Amigunan di Dios Riba e Islanan di Tonga

Na 1932 un barku di bela a trese algun simia di hopi balor na Tonga. E kapitan di e boto a duna Charles Vete e foyeto “Unda e Mortonan Ta?” Charles tabata konvensí ku el a haña e bèrdat. Poko tempu despues, e sede di Testigunan di Yehova a aprobá Charles su petishon pa e tradusí e foyeto den su idioma natal. Despues ku el a kaba e trabou, el a risibí 1.000 foyeto imprimí i a kuminsá repartí nan. Asina e simianan di e bèrdat tokante e Reino di Yehova a kuminsá plama den e reino di Tonga.

RIBA un mapa di Sur Pasífiko, bo por haña Tonga djis wèst di kaminda e datumgrenslijn internashonal ta topa e asina yamá Steenbokskeerkring. Su isla mas grandi, Tongatapu, ta situá rònt di 2.000 kilometer nortost di Auckland, Nueva Zelandia. Tonga ta konsistí di 171 isla, di kua 45 ta habitá. E famoso eksploradó britániko di siglo 18, James Cook, a yama e islanan isolá aki Friendly Islands.

Ku un poblashon di mas o ménos 106.000 hende, Tonga ta konsistí di tres grupo di isla. E tres gruponan prinsipal ta Tongatapu, Ha’apai i Vava’u. Di e sinku kongregashonnan lokal di Testigunan di Yehova, tres ta den e grupo mas poblá, esta Tongatapu, un ta na Ha’apai i e otro ta na Vava’u. Pa yuda e hendenan bira amigu di Dios, Testigunan di Yehova tin un kas di misionero i un ofisina di tradukshon banda di e kapital Nuku’alofa.—Isaias 41:8.

For di e dékada di 1930 bini dilanti Charles Vete tabata ampliamente konosí komo un Testigu di Yehova, ounke ta te na aña 1964 el a batisá. Mas hende a djòin e den e trabou di prediká i na 1966 nan a konstruí un Salòn di Reino ku tabatin kapasidat di 30 persona. Na 1970 nan a forma un kongregashon di 20 publikadó di Reino na Nuku’alofa.

Djei padilanti por mira bon kla kon e palabranan di profeta Isaias a kumpli riba e islanan  di Tonga: “Laga nan onra SEÑOR, i laga hende riba e islanan kanta su gloria.” (Isaias 42:12, BPK) E obra di Reino a sigui prosperá, i esei a yuda hopi hende drenta den un relashon ku Yehova. N’e kongreso di distrito na Nuku’alofa na 2003, tabatin un asistensia máksimo di 407 persona i 5 persona a batisá. E kantidat di 621 persona ku a asistí n’e Memorial na 2004 ta indiká ku tin bon prospekto pa mas kresementu.

Nan Ta Hiba un Bida Simpel

Sin embargo, leu for di e kapital ta bisto ku ainda tin mester di mas proklamadó di Reino. Por ehèmpel, e 8.500 hendenan ku ta biba riba e 16 islanan habitá di e grupo Ha’apai mester tende mas tokante e bèrdat di Beibel. Gran parti di Ha’apai ta konsistí di islanan plat yen di pal’i koko ku playanan largu di santu. Laman ta kristalino i hopi bes e visibilidat bou di awa ta mas ku 30 meter. Landa entre e koralnan i e mas ku shen sorto di piská tropikal kolorido ta un eksperensia ekstraordinario. Por lo general e komunidatnan ta chikí. Ounke e kasnan ta simpel, nan ta masha resistente kontra siklon tropikal.

Palu di un tipo di fruta di pan i di mango ta duna sombra i kuminda. Gran parti di e bida di tur dia ta wòrdu dediká na buska i prepará kuminda. Ademas di porko, e isleñonan ta gusta piská i otro bestia di laman ku tin na abundansia. Hòfinan di famia ta produsí batata i bèrdura. Palu di lamunchi i apelsina ta krese den mondi; tambe tin palu di koko i di bakoba na granèl. E konosementu lokal di yerba, blachi, kaska i rais medisinal ta pasa di un generashon pa otro.

Klaru ku e rekurso mas agradabel di Ha’apai ta su hendenan amigabel, ku ta adaptá nan mes fásilmente den nan ambiente trankil. Aki, bida ta simpel. Mayoria hende muhé ta hasi obra di man; nan ta traha makutu, un paña típiko ku yama ‘tapa’ i tambe mat. Ora e muhénan di Tonga ta traha, nan ta sinta, kanta, papia i hari ku otro bou di un palu ku ta duna sombra, hopi bes ku nan yunan i beibinan hungando òf drumí banda di nan. I por lo general ta e muhénan ta bai laman ora tin mareo abou pa kohe molusko i otro bestia di laman, i tambe e lima bròs ku nan ta prepará un salada delisioso kuné.

Mayoria hende hòmber ta dediká nan na sea traha den hòfi, piska, traha opheto, konstruí boto i drecha reda. Tantu hòmber komo muhé i mucha ta biaha entre e islanan den boto di piskadó chikí ku kapa pa bai bishitá famia, bai dòkter i bende i kumpra kos.

No Tin Lugá Ku Ta Muchu Leu pa e Bon Nobo

Ta e ambiente pasífiko aki dos misionero i dos minister pionero a bin topa ora nan a yega den e dianan promé ku e Memorial di 2002. Anteriormente tabatin algun kontakto kaba ku e hendenan di Ha’apai i esakinan a risibí literatura publiká dor di Testigunan di Yehova i asta a studia Beibel ku e Testigunan.

E kuater maestronan di Beibel ku a yega tabatin tres ophetivo: laga literatura bíbliko, kuminsá studio di Beibel i invitá personanan interesá pa asistí n’e selebrashon di e Sena di Señor. Nan a logra tur tres. Nobentishete persona a respondé n’e invitashon pa asistí n’e Konmemorashon di e morto di Hesus. Algun  di nan a biaha den botonan sin kapa apesar di e áwaseru pisá i bientunan fuerte. Pa motibu di mal tempu, hopi hende a pasa anochi kaminda a tene e Memorial, i nan a bai kas bèk e dia siguiente.

Pa e oradó pa Memorial tampoko kosnan no tabata fásil. E misionero ku tabata e oradó a bisa: “Mi no tin nodi di bisa bo kon difísil ta pa duna dos diskurso di Memorial den un idioma straño riba e mesun anochi. Bo por imaginá bo kon nervioso mi tabata. Ta orashon a yuda! Mi a kòrda palabranan i strukturanan di frase ku kasi mi no a realisá mes ku mi tabata sa.”

Komo resultado di e interes ku e evangelisadónan a kultivá riba e islanan di Ha’apai, dos parehá kasá di e área ei a batisá. Den un kaso, e esposo a mustra interes den e literatura di e Testigunan tempu ku e tabata hañando preparashon pa bira lider den e iglesia lokal.

Ounke e hòmber ku su kasá ta hende di poko rekurso, nan tabata duna hopi plaka na kontribushon ora nan nòmber ser anunsiá na misa durante un sirbishi anual pa rekoudá fondo. Un Testigu ku a yega di bishitá e esposo anteriormente a pidié habri su Beibel i lesa 1 Timoteo 5:8. Ei apòstel Pablo a skirbi: “Si un hende no proveé pa su mes hendenan, i spesialmente pa esnan di su kas, el a nenga e fe i ta pió ku un inkrédulo.” E prinsipio di Beibel aki a konmové e esposo. El a realisá ku dor di sede n’e eksigensianan pisá di iglesia, e no por a kumpli ku e nesesidatnan básiko di su famia. N’e siguiente misa anual ku tabatin e kolekta, ounke e tabatin e plaka den su saku, e no por a lubidá 1 Timoteo 5:8. Ora su nòmber a ser yamá, ku kurashi el a bisa e pastor ku e nesesidatnan di su famia tabata mas importante. Dor di esei, e ansianonan di iglesia a menospresiá i ridikulisá e pareha públikamente.

Despues di a studia Beibel ku Testigunan di Yehova, e hòmber ku su kasá a bira publikadó di e bon nobo. E esposo ta bisa: “E bèrdat di Beibel a kambia mi. Mi no ta trata mi famia malu mas. Tambe mi a stòp di bebe di mas. E hendenan di mi komunidat por mira e diferensia ku e bèrdat a hasi den mi bida. Mi ta spera ku un dia nan lo stima e bèrdat meskos ku mi.”

Uso di Quest den e Búskeda

Un par di luna despues di e Memorial di 2002, un otro barku di bela a trese algun karga balioso p’e islanan remoto di Ha’apai. E yate Quest di 18 meter ku a bini di Nueva Zelandia a nabegá entre e islanan di Tonga. Na bordo tabatin Gary ku Hetty, huntu ku nan yu muhé Katie. Nuebe ruman di Tonga i dos misionero a kompañá nan riba dos biahe. E Testigunan lokal a yuda nabegá e boto ábilmente, algun biaha pasando riba refnan deskonosí. No tabata trata aki di biahenan di plaser. E personanan na bordo tabat’ei pa bai siña otro hende e bèrdat di Beibel. Nan a pasa 14 isla, kubriendo distansianan grandi riba laman. Algun di e islanan ei nunka a yega di tende di e bon nobo di Reino.

Kon e hendenan a reakshoná? Por lo general, e predikadónan ku a bini ku barku a topa ku hende kurioso, kariñoso i ku e hospitalidat tradishonal di e islanan aki. Unabes e isleñonan a komprondé e propósito di e bishita, nan a keda hopi gradisidu. Tabata bisto pa e Testigunan bishitante ku e isleñonan tabatin rèspèt pa e Palabra di  Dios i ku nan tabata konsiente di nan nesesidat spiritual.—Mateo 5:3.

Hopi biaha, e bishitantenan tabata sinta bou di palunan tropikal rondoná pa hende ku tabatin vários pregunta riba Beibel. Despues ku a bira anochi, e kòmbersashonnan riba Beibel tabata sigui den e kasnan. Ora e Testigunan mester a despedí di e hendenan riba un di e islanan, esakinan a bisa e Testigunan: “No bai! Ken lo kontestá nos preguntanan ora boso bai?” Un Testigu a remarká: “Semper tabata difísil pa bai laga asina tantu hende semehante na karné ku tabatin hamber pa e bèrdat. Nos a planta hopi simia di e bèrdat.” Ora e barku Quest a yega un di e islanan, e Testigunan a haña tur hende bistí na luto. E esposa di e ofisial di e pueblo a kaba di muri. El a gradisí e rumannan personalmente pa a trese un mensahe di konsuelo for di Beibel.

No tabata fásil pa yega na algun di e islanan. Hetty ta splika: “Un isla no tabatin un lugá kumbiniente pa baha, i tur kaminda tabatin baranka ta sali vários centimeter for di awa. Ta ku nos boto chikí di rùber so nos por a yega. Promé, nos tabatin ku tira nos tasnan p’e hopi mannan boluntario na kosta. Despues, segun ku ola tabata hisa e boto chikí na altura di e terasa di un baranka, nos tabatin ku bula riba esaki promé ku e boto a baha atrobe den e ola.”

Sin embargo, no ta tur hende na bordo tabata nabegantenan intrépido. Despues di a nabegá pa dos siman, e kapitan a skirbi relashoná ku e biahe di regreso p’e isla prinsipal di Tongatapu: “Awor nos tin ku bai nabegá 18 ora largu. Pero nos no por hasi e trayekto den un tiru pasobra na bordo tin hende ku a marea. Nos ta kontentu di por bai kas bèk pero a la bes masha tristu pa laga atras asina tantu hende ku awor a tende e mensahe di Reino. Nos ta laga nan den man di Yehova; ku su spiritu santu i angelnan lo e yuda nan krese spiritualmente.”

Islanan ku Hopi Perspektiva

Rònt di seis luna despues ku e barku Quest a sali, a asigná dos evangelisadó ku ta pionero spesial, Stephen i Malaki, pa prediká den e grupo di isla di Ha’apai. Ei nan a djòin e dos parehanan kasá resien batisá den e obra di siñansa bíbliko. E publikadónan ta haña nan den kòmbersashonnan interesante tokante asuntunan di doktrina i nan ta hasi bon uso di Beibel.

Dia 1 di desèmber 2003 a forma un kongregashon na Ha’apai, e di sinku na Tonga. Den e grupo tin hopi mucha. Nan a siña skucha ku atenshon. Nan ta sinta ketu i ta ansioso pa duna komentario ora e oportunidat presentá. E superintendente di sirkuito a komentá ku “nan konosementu di Mi buki di relato bíblico ta mustra ku mayornan ta tuma masha na serio nan responsabilidat pa inkulká e bèrdat di Beibel den nan yunan.” Tur kos ta mustra ku tin bon perspektiva riba e islanan ei pa loke ta oumento den e kosecha di mas amigu di Yehova.

Mas ku 70 aña pasá, ora Charles Vete a tradusí e foyeto Unda e Mortonan Ta? den su idioma natal, tongano, e no por a imaginá su mes te na ki grado e simia di Reino lo a saka rais den kurason di su paisanonan. For di e prinsipio humilde ei Yehova a sigui bendishoná e proklamashon kresiente di e bon nobo den e parti lehano ei di nos planeta. Awe, di bèrdat nos por bisa ku Tonga ta entre e islanan remoto di laman ku, na moda di papia, ta akudiendo na Yehova. (Salmo 97:1; Isaias 51:5) Awor nan ta birando e hogar di hopi amigu di Yehova.

[Plachi na página 8]

Charles Vete, 1983

[Plachi na página 9]

Trahando un paña ‘tapa’

[Plachi na página 10]

A usa “Quest” pa plama e bon nobo na Tonga

[Plachi na página 11]

Tim di tradukshon, Nukuʹalofa

[Rekonosementu pa Potrèt na página 9]

Trahando un paña ‘tapa’: © Jack Fields/CORBIS; fondo di página 8 i 9, i piskamentu: © Fred J. Eckert