Bo Ta Aseptá Yehova Su Yudansa?
Bo Ta Aseptá Yehova Su Yudansa?
‘Yehova ta mi yudadó, lo mi no tin miedu.’—HEBREONAN 13:6.
1, 2. Pakiko ta importante pa nos aseptá Yehova su yudansa i guia den bida?
IMAGINÁ ku bo ta subiendo un seru. Pero bo no ta bo so pasobra un guia a ofresé su mes pa kompañá bo, i e ta e mihó guia ku bo por a haña. Ounke e tin muchu mas eksperensia i resistensia ku bo, tòg e ta kana ku pasenshi banda di bo. E ta ripará ku de bes en kuando bo ta trompeká. Pa motibu ku e ta preokupá ku bo siguridat, e ta saka man pa yuda bo pasa over di un parti hopi peligroso. Lo bo nenga su yudansa? Klaru ku nò! Bo siguridat ta den wega.
2 Komo kristian, nos tin un kaminda difísil pa kana. Nos tin ku kana riba e kaminda smal ei nos so? (Mateo 7:14) Nò, Beibel ta mustra ku e mihó Guia ku nos por haña, Yehova Dios, ta permití hende kana kuné. (Génesis 5:24; 6:9) Yehova ta yuda su sirbidónan segun ku nan ta kana? E ta bisa: “Ami ta SEÑOR bo Dios, kende ta sostené bo man drechi, kende ta bisa bo: ‘No tene miedu, lo mi yuda bo.’” (Isaias 41:13) Meskos ku e guia den nos ilustrashon, bondadosamente Yehova ta ekstendé su man i su amistat na ken ku ta hasi esfuerso pa kana kuné. Klaru ku niun di nos lo ke rechasá su yudansa!
3. Ki preguntanan nos lo kontestá durante e estudio aki?
3 Den e artíkulo anterior, nos a analisá kuater manera den kua Yehova a yuda su pueblo den tempu antiguo. E ta yuda su pueblo den e mesun maneranan awe? I kon nos por hasi sigur ku nos ta aseptá tur e yudansa ei? Laga nos kontestá e preguntanan ei, i asina nos por haña mas konfiansa ku Yehova en bèrdat ta nos Yudadó.—Hebreonan 13:6.
Yudansa di Angelnan
4. Pakiko Dios su sirbidónan djawe por ta sigur ku e angelnan ta kla pa yuda nan?
4 Angelnan ta yuda Yehova su sirbidónan djawe? Sigur ku sí. Ta bèrdat ku awe nan no ta aparesé visiblemente pa libra adoradónan berdadero for di peliger. Den tempu di Beibel tampoko angelnan no a intervení mashá den e forma ei. Mayoria kos ku nan a hasi tabata invisibel pa wowo humano, meskos ku ta e kaso awe. No opstante, e solo echo ku e sirbidónan di Dios tabata sa ku e angelnan tabata kla pa yuda nan, a animá nan bastante. (2 Reinan 6:14-17) Nos tin bon motibu pa sinti meskos.
5. Kon Beibel ta mustra ku e angelnan ta enbolbí den e obra di prediká di nos tempu?
5 Yehova su angelnan ta partikularmente interesá den un trabou spesial ku tin di haber ku nos. Ki trabou esei ta? Nos por haña e kontesta na Revelashon 14:6: “Mi a mira un otro angel ta bula meimei di shelu, kende tabatin un evangelio eterno pa prediká na esnan ku ta biba riba tera, i na tur nashon i tribu i lenga i pueblo.” Opviamente, e “evangelio eterno” aki ta ligá ku e ‘evangelio di e reino,’ ku, manera Hesus a profetisá, “lo wòrdu prediká den henter mundu komo un testimonio na tur nashon” promé ku e fin di e mundu aki yega. (Mateo 24:14) Klaru ku no ta e angelnan mes ta prediká. Ta hende Hesus a duna e enkargo importante aki. (Mateo 28:19, 20) No ta un animashon pa sa ku segun ku nos ta kumpli ku e enkargo ei, nos tin yudansa di e angelnan santu, esta, kriaturanan spiritual sabí i poderoso?
6, 7. (a) Kiko ta indiká ku e angelnan ta apoyando nos trabou di prediká? (b) Kon nos por hasi sigur ku nos ta risibí e apoyo di Yehova su angelnan?
6 Tin bastante evidensia ku angelnan ta apoyá nos den nos trabou. Por ehèmpel, hopi bes nos ta tende ku Testigunan di Yehova a topa un persona den sirbishi ku nèt a kaba di resa pidi Dios pa yud’é haña e bèrdat. E eksperensianan ei ta sosodé demasiado biaha pa deskartá nan komo simpel koinsidensia. Komo resultado di tal yudansa di angel, mas i mas hende ta siñando pa hasi manera e “angel [ku] ta bula meimei di shelu” a proklamá: “Teme Dios i dun’é gloria.”—Revelashon 14:7.
7 Bo ta anhelá pa e angelnan poderoso di Yehova apoyá bo? Si ta asina, hasi bo máksimo esfuerso den sirbishi. (1 Korintionan 15:58) Segun ku nos ta duna di nos mes libremente den e asignashon spesial aki di Yehova, nos por konta riba e yudansa di su angelnan.
Yudansa di e Kabesante di Tur Angel
8. Ki posishon elevá Hesus ta okupá den shelu, i pakiko esei ta un gran animashon pa nos?
8 Tambe Yehova ta duna nos un otro tipo di yudansa di angel. Revelashon 10:1 ta deskribí un “angel fuerte” asombroso kende “su kara tabata manera solo.” E angel aki ku Juan a mira den vishon evidentemente ta representá Hesukristu glorifiká den poder selestial. (Revelashon 1:13, 16) Hesus ta realmente un angel? Den un sentido, sí, pasobra e ta un arkangel. (1 Tesalonisensenan 4:16) Kiko ta un arkangel? E palabra ei ta nifiká “angel prinsipal,” òf “angel kabesante.” Di tur yu spiritual di Yehova, Hesus ta esun di mas poderoso. Yehova a dun’é outoridat riba henter Su ehérsito di angel. E arkangel aki en bèrdat ta un fuente poderoso di yudansa. Den ki manera?
9, 10. (a) Kon Hesus ta sirbi komo nos “yudadó” ora nos hasi piká? (b) Ki yudansa nos por haña den e ehèmpel di Hesus?
9 E biehitu apòstel Juan a skirbi: “Si un hende hasi piká, nos tin un abogado [“yudadó,” NW] serka e Tata, Hesukristu, e hustu.” (1 Juan 2:1) Pakiko Juan a indiká ku Hesus ta nos “yudadó” foral ora nos “hasi piká”? Wèl, nos ta peka tur dia, i piká ta hiba na morto. (Eklesiastés 7:20; Romanonan 6:23) Sin embargo, Hesus a entregá su bida komo un sakrifisio pa nos pikánan. I e ta na lado di nos Tata miserikòrdioso pa boga na nos fabor. Kada un di nos mester di e yudansa ei. Kon nos por asept’é? Nos tin ku repentí di nos pikánan i buska pordon riba base di Hesus su sakrifisio. Tambe nos tin ku evitá di kometé e mesun pikánan kada bes.
10 Ademas di a muri pa nos, Hesus a pone e ehèmpel perfekto pa nos. (1 Pedro 2:21) Su ehèmpel ta guia nos, ta yuda nos fiha nos rumbo den bida pa asina nos evitá di hasi piká serio, i pa nos por agradá Yehova Dios. Nos no ta kontentu ku e yudansa ei? Hesus a primintí su siguidónan ku nan lo a haña un yudadó mas.
Yudansa di Spiritu Santu
11, 12. Kiko Yehova su spiritu ta, kon poderoso e ta, i pakiko nos tin mester di dje awe?
11 Hesus a primintí: “Lo mi pidi e Tata i lo e duna boso un otro yudadó pa keda ku boso pa semper, e spiritu dje bèrdat, ku e mundu no por risibí.” (Juan 14:16, 17, NW) E “spiritu dje bèrdat,” òf spiritu santu, no ta un persona sino un forsa: Yehova su propio forsa aktivo. E ta sumamente poderoso. E ta e forsa ku Yehova a usa pa krea universo, efektuá milagernan espektakular i revelá su boluntat pa medio di vishon. E echo ku Yehova no ta usando su spiritu den e maneranan spesífiko ei awe ta nifiká ku nos no tin mester di dje?
12 Al kontrario! Den e “tempunan trabahoso” aki, nos tin mester di Yehova su spiritu mas ku nunka. (2 Timoteo 3:1) E ta fortalesé nos pa wanta bou di prueba. E ta yuda nos kultivá bunita kualidatnan ku ta hala nos mas serka Yehova i serka nos rumannan spiritual. (Galationan 5:22, 23) Kon anto nos por benefisiá di e yudansa maravioso aki di Yehova?
13, 14. (a) Pakiko nos por ta sigur ku Yehova ta suministrá su spiritu santu di buena gana na su sirbidónan? (b) Ku ki tipo di akshon nos ta mustra ku nos realmente no ta aseptando e regalo di spiritu santu?
13 Na promé lugá, nos tin ku resa pidi pa spiritu santu. Hesus a bisa: “Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!” (Lukas 11:13) Sí, Yehova ta e mihó Tata ku nos por imaginá. Si nos ta sinsero i nos pidié ku fe pa su spiritu santu, nos por konta ku lo e duna nos e regalo aki. E ora ei, e pregunta ta: Nos ta pidi p’e? Nos tin bon motibu pa inkluí e petishon ei tur dia den nos orashonnan.
14 Na di dos lugá, nos ta aseptá e regalo ei dor di traha na armonia kuné. Laga nos ilustrá esaki: Suponé ku un kristian ta lucha kontra e tendensia di wak pornografia. El a resa pidi Dios spiritu santu pa yud’é resistí e kustumber degenerá aki. El a buska konseho di ansianonan kristian, i nan a sugerié p’e tuma akshon desisivo, por ehèmpel, pa no pasa mes banda di e material degradante ei. (Mateo 5:29) Kiko lo pasa si e ignorá nan konseho i eksponé su mes na mas tentashon? E ta obrando na armonia ku su orashon pa spiritu santu yud’é? Òf, mas bien, e ta koriendo e riesgo di hasi e spiritu di Dios tristu i keda sin haña e regalo aki? (Efesionan 4:30) Realmente, nos tur mester hasi tur loke ta na nos alkanse pa hasi sigur ku nos ta sigui risibí e yudansa maravioso aki di Yehova.
Yudansa di e Palabra di Dios
15. Kon nos por mustra ku nos no ta mira Beibel komo djis un gewon buki?
15 Pa hopi siglo kaba Beibel ta un fuente di yudansa pa Yehova su fiel sirbidónan. Pero, en bes di mira e Santu Skritura komo djis un gewon buki, nos tin ku kòrda ku e ta un fuente poderoso di yudansa. Pa nos haña e yudansa ei nos tin ku hasi esfuerso. Nos tin ku siña lesa Beibel regularmente.
16, 17. (a) Kon Salmo 1:2 i 3 ta deskribí e rekompensanan di lesa e lei di Dios? (b) Kon Salmo 1:3 ta pinta un kuadro di trabou duru?
16 Salmo 1:2 i 3 ta bisa di e hende ku ta agradá Dios: “Su delisia ta den e lei di SEÑOR, i den su lei e ta meditá di dia i anochi. I e lo ta manera un palu, plantá kantu di koridanan di awa, ku ta duna su fruta na su tempu, i su blachi no ta marchitá; i tur loke ku e hasi ta prosperá.” Bo a kapta e punto importante den e pasashi ei? Ta fásil pa lesa e palabranan ei i konkluí ku nan ta djis pinta un esena bunita di un ambiente pasífiko, esta, un palu ku ta duna sombra i ku ta krese banda di un riu. Esta dushi ta pa tira un kabes mèrdia bou di un palu asina! Pero e salmo aki no ta invitando nos pa pensa riba sosiegu. E ta pinta un kuadro basta distinto, unu ku ta duna idea di trabou duru. Kon asina?
17 Ripará ku e palu aki no ta djis un palu di sombra ku pa kasualidat ta krese banda di un riu. E ta un palu ku ta duna fruta, “plantá” a propósito na un lugá ideal, esta, “kantu di koridanan di awa.” Kon un palu por krese banda di mas ku un korida? Wèl, den un hòfi di palu di fruta, kisas e doño ta koba kanalnan pa awa kore yega n’e raisnan di su palunan di balor. Ahan, awor e punto ta sali na kla! Si den un sentido spiritual nos ta bona manera e palu ei, ta pasobra un otro hende a traha duru pa yuda nos. Nos ta asosiá ku un organisashon ku ta perkurá p’e awa puru di e bèrdat yega te serka nos, pero ta nos tin ku hasi nos parti. Nos tur tin ku probechá awor pa chupa e awa presioso aki dor di meditá i hasi e investigashonnan nesesario pa inkulká e bèrdatnan di e Palabra di Dios den nos mente i kurason. Den e manera ei, nos tambe lo duna bon fruta.
18. Kiko nos tin ku hasi pa haña kontestanan bíbliko riba nos preguntanan?
18 Beibel lo no yuda nos ku nada si e para kue stòf riba rèki. Tampoko e no ta un talisman, komo si fuera nos por sera nos wowo, habri Beibel na un página i ferwagt di haña e kontesta riba nos pregunta nèt riba e página ei. Ora nos tin ku tuma desishon, nos tin ku koba buska e “konosementu di Dios,” komo si fuera buskando un tesoro skondí. (Proverbionan 2:1-5) Hopi bes investigashon diligente i kuidadoso ta nesesario pa por haña konseho bíbliko nèt riba nos nesesidatnan spesífiko. Nos tin hopi publikashon basá riba Beibel ku por yuda nos den nos investigashon. Segun ku nos ta koba den esakinan buskando ansiosamente e hoyanan di sabiduria den e Palabra di Dios, nos ta ègt benefisiá di e yudansa ku Yehova ta duna nos.
Yudansa pa Medio di Rumannan den Fe
19. (a) Pakiko nos por mira e artíkulonan den E Toren di Vigilansia i Spièrta! komo yudansa ku nos ta risibí pa medio di nos rumannan den fe? (b) Kon un sierto artíkulo den un di nos revistanan a yuda bo?
19 Semper Yehova su sirbidónan humano tabata un fuente di yudansa pa otro. Yehova a kambia? Di ningun manera. Sin duda kada un di nos por kòrda okashonnan den kua nos a risibí nèt e yudansa i nèt n’e momentu ku nos tabatin mester di dje for di nos rumannan den fe. Por ehèmpel, bo por kòrda un artíkulo den E Toren di Vigilansia òf Spièrta! ku a konsolá bo ora bo tabatin mester di esei òf ku a yuda bo resolvé un problema òf enfrentá un prueba di fe? Yehova ta esun ku a yuda bo pa medio di “e esklabo fiel i prudente” ku a haña e enkargo di perkurá “kuminda na su debido tempu.”—Mateo 24:45-47.
20. Den ki maneranan ansianonan kristian ta demostrá ku nan ta “donnan den hende”?
20 Pero hopi bes e yudansa ku nos ta risibí di nos rumannan den fe ta mas direkto. Un ansiano kristian ta duna un diskurso ku ta konmové nos, òf e ta hasi nos un bishita di pastoreo ku ta yuda nos pasa dor di un ke otro difikultat, òf e ta duna nos un konseho bondadoso ku ta yuda nos mira i vense un debilidat. Un kristian gradisidu a skirbi relashoná ku e yudansa ku un ansiano a dun’é: “Durante sirbishi, el a tuma tempu pa animá mi pa mi ekspresá mi mes. E anochi anterior, mi a pidi Yehova duna mi un hende ku mi por papia kuné. E siguiente dia e ruman aki a papia ku mi na un manera kompasivo. El a yuda mi mira kon Yehova ta yudando mi pa hopi aña kaba. Mi ta gradisí Yehova pa a manda e ansiano aki pa mi.” Den tur e maneranan ei, ansianonan kristian ta mustra ku nan ta “donnan den hende” ku Yehova a perkurá pa medio di Hesukristu pa yuda nos perseverá riba e kaminda ku ta hiba na bida.—Efesionan 4:8, NW.
21, 22. (a) Ora e rumannan di kongregashon apliká e konseho di Filipensenan 2:4, den kiko esei ta resultá? (b) Pakiko asta e gestonan chikí di bondat ta importante?
21 Ademas di e ansianonan, tur kristian fiel kier apliká e mandamentu inspirá pa “no buska [su] interes personal so, ma buska tambe interes di otronan.” (Filipensenan 2:4) Ora e rumannan den e kongregashon kristian apliká e konseho ei, e ta resultá den bunita gestonan di bondat. Por ehèmpel, diripiente un famia a haña su mes den un gran tragedia. E tata a bai kumpra kos ku su yu muhé. Riba kaminda pa kas, nan a haña nan den un aksidente di outo. E yu muhé a fayesé i e tata keda gravemente heridá. Ora el a sali for di hospital, na prinsipio e tabata asina inkapasitá ku e no por a hasi nada pa su mes. Su esposa tabata emoshonalmente muchu kibrá pa e so kuid’é. Pues un famia den e kongregashon a tuma e pareha deskonsolá aki den nan kas i a perkurá pa nan pa vários siman.
22 Klaru ku no ta ora di tragedia so por hasi akto di bondat i sakrifisio personal. Hopi bes nos ta risibí yudansa ku kosnan chikitu. Pero sin importá kon chikí e bondat ta, nos ta apresi’é, no ta bèrdat? Bo por kòrda un okashon ku un palabra òf gesto di bondat di un ruman a duna bo nèt e yudansa ku bo tabatin mester? Hopi bes Yehova ta perkurá pa nos den e maneranan ei.—Proverbionan 17:17; 18:24.
23. Kon Yehova ta konsiderá e esfuerso ku nos ta hasi pa yuda otro?
23 Bo ke pa Yehova usa bo komo un medio pa yuda otro hende? Bo tin e oportunidat úniko ei. De echo, Yehova ta apresiá e esfuerso ei di bo parti. Su Palabra ta bisa: “Esun ku tene miserikòrdia di un hende pober ta fia SEÑOR, i E lo pag’é bèk pa su bon obra.” (Proverbionan 19:17) Ora nos ta duna di nos mes na nos rumannan, esei ta resultá den un goso grandi. (Echonan 20:35) Hende ku ta isolá nan mes deliberadamente no por eksperensiá e goso di duna e yudansa ei ni e animashon di por risibié. (Proverbionan 18:1) P’esei, laga nos semper asistí fielmente na reunionnan kristian pa asina nos por animá otro.—Hebreonan 10:24, 25.
24. Pakiko nos no tin nodi sinti nos ménos privilegiá djis pasobra nos no a mira Yehova su milagernan espektakular di pasado?
24 No ta un plaser pa kontemplá e maneranan den kua Yehova ta yuda nos? Ounke nos no ta biba den un tempu ku Yehova ta efektuando milagernan espektakular pa kumpli ku su propósitonan, nos no tin nodi sinti nos ménos privilegiá. Loke ta konta realmente ta ku Yehova ta duna nos tur e yudansa ku nos tin mester pa keda fiel. I si nos perseverá huntu den fe, nos lo biba pa mira Yehova su aktonan di mas espektakular i mas glorioso den henter historia! Laga nos keda determiná pa aseptá i probechá plenamente di Yehova su yudansa amoroso pa nos tambe por ripití e palabranan di nos teksto pa aña 2005: ‘Mi yudansa ta bini for di Yehova.’—Salmo 121:2.
Kiko Bo Ta Pensa?
Kon Yehova ta duna e yudansa ku nos tin mester awe:
• pa medio di e angelnan?
• pa medio di su spiritu santu?
• ku su Palabra inspirá?
• pa medio di nos rumannan den fe?
[Preguntanan di Estudio]
[Plachi na página 18]
Ta un animashon pa sa ku e angelnan ta apoyando e trabou di prediká
[Plachi na página 21]
Yehova por usa un di nos rumannan den fe pa duna nos e konsuelo ku nos tin mester