Dia di Graduashon—Un Bunita Dia

“NOS a ser bendishoná ku un bunita dia. Solo ta bria i shelu ta blou. Yerbanan ta bèrdè. Paranan ta kanta. Tur kos ta prepará pa un bunita dia, i nos no ta bai keda desilushoná. Yehova no ta un Dios di desilushon. E ta un Dios di bendishon.”

Ku e remarkenan ei Ruman Samuel Herd, miembro di e Kuerpo Gobernante di Testigunan di Yehova, a kuminsá e programa di graduashon di e di 117 klas di e Skol Bíbliko di Galaad di Watchtower. Tabata 11 di sèptèmber 2004. E programa ekselente a inkluí konseho bíbliko edifikante i tambe eksperensianan lokal i algun eksperensia di diferente ruman den e trabou di misionero. Sí, tabata un bunita dia pa tur e 6.974 personanan ku a asistí n’e Sentro Edukashonal di Watchtower na Patterson, New York, i n’e komplehonan na Brooklyn i Wallkill, ku por a sigui e programa via medionan oudio visual.

Palabranan di Animashon p’e Studiantenan

John Kikot, kende ta miembro di e Komité di Sukursal di Merka, a ofresé palabranan di animashon riba e tema “Mantené Bo Goso Komo Misionero.” El a mustra ku studiantenan di Galaad ta konosí pa nan goso, manera a ser komprobá n’e graduashon aki. E instrukshon ku e studiantenan a haña for di e Skritura den e skol a duna nan hopi goso, i awor nan ta bon prepará pa yuda otronan haña e mesun goso. Kon asina? Dor di duna di nan mes den nan sirbishi komo misionero. Hesus a bisa: “Ta mas bendishoná pa duna ku pa risibí.” (Echonan 20:35) Segun ku e misioneronan nobo ta imitá Yehova Dios, e generoso “Dios felis,” kende ta hasi e bèrdat disponibel pa otro hende, nan lo por mantené nan mes goso.—1 Timoteo 1:11, NW.

Despues a sigui un otro miembro di e Kuerpo Gobernante, David Splane, kende su tema tabata “Ki Relashon Lo Bo Tin ku Otro Hende?” Sin duda ta bon i agradabel pa biba den unidat, ounke esaki por nifiká ku bo tin ku bira “tur kos pa tur hende.” (1 Korintionan 9:22; Salmo 133:1) Ruman Splane a menshoná ku e studiantenan ku a gradua lo haña nan ta trata ku hopi otro hende den nan trabou komo misionero—hende den teritorio, otro misioneronan, rumannan den nan kongregashon nobo i e rumannan n’e sukursal ku ta dirigiendo e trabou di prediká i di siña. El a duna sugerensia práktiko riba kon pa hasi nan trato ku otro hende mas agradabel posibel: Siña konosé e idioma lokal, ser dispuesto pa adaptá na kustumbernan lokal, respetá e privasidat di  otro misioneronan i ser obediente na esnan ku ta hiba delantera.—Hebreonan 13:17.

Siguientemente, un di e instruktornan di Galaad, Lawrence Bowen, a puntra, “Manera Ken Bo Ta Pensa?” El a rekordá e studiantenan ku e hendenan ku a “husga segun aparensia” no a aseptá Hesus komo Mesias. (Juan 7:24) Komo personanan imperfekto, nos tur mester tene kuidou pa nos no pensa manera hende ta pensa sino pa nos tin ‘e pensamentunan di Dios.’ (Mateo 16:22, 23) Asta hende spiritual mester sigui ahustá nan manera di pensa. Meskos ku den kaso di un barku riba laman, e ahustenan ku nos ta hasi awor por nifiká e diferensia entre alkansá e meta i sufri noufragio spiritual. Un estudio kontinuo di Beibel den su konteksto ta yuda nos pensa manera Dios.

Wallace Liverance, un otro instruktor di Skol di Galaad, a konkluí e parti aki di e programa. Su tema tabata basá riba Isaias 55:1: “Kiko Lo Bo Kumpra?” El a animá e studiantenan pa “kumpra” e refreskamentu, e goso i e nutrishon ku ta bini di e mensahe profétiko di Dios pa nos tempu. E profesia di Isaias a kompará Dios su palabra ku awa, biña i lechi. Kon bo por kumpr’é “sin plaka i sin preis”? Ruman Liverance a splika ku esei ta dor di presta atenshon na profesia di Beibel i eliminá pensamentu- i kamindanan no-spiritual i  pone na lugá di eseinan e pensamentu- i kamindanan di Dios. (Isaias 55:2, 3, 6, 7) Esaki di mes por sostené e misioneronan nobo den nan asignashonnan den estranheria. Hopi bes hende imperfekto ta pensa ku felisidat ta dependé di komodidat material. E oradó a urgi: “No kumpra esei. No kere esei. Hasi sigur di saka tempu pa bo studia e Palabra profétiko di Dios kabalmente. Esei por refreská bo, fortalesé bo i duna bo goso den bo asignashon komo misionero.”

Eksperensia- i Entrevistanan Deleitabel

E studiantenan a partisipá regularmente den e aktividat di prediká. Bou di direkshon di Mark Noumair, un otro instruktor di Galaad, vários studiante di e klas a demostrá eksperensianan ku a resaltá e tema “No Tene Bèrgwensa di e Evangelio.” (Romanonan 1:16) E presentenan a gosa di tende kon e ministernan versá aki a duna testimonio di kas pa kas, riba kaya i den sentronan komersial. E studiantenan ku ta dominá mas idioma a tuma e inisiativa den e teritorio di nan kongregashon pa alkansá hende ku ta papia otro lenga. Otronan a hasi bon uso di e publikashonnan basá riba Beibel ku Testigunan di Yehova ta produsí na momentu ku nan tabata hasi rebishita i kuminsá studio di Beibel. Nan “no [tabatin] bèrgwensa” di prediká e bon nobo.

Ruman William Nonkes, di e Departamentu di Sirbishi, a entrevistá misioneronan di hopi eksperensia di Burkina Faso, Latvia i Rusia. Nan a duna konseho práktiko riba e tema “Yehova Amorosamente Ta Rekompensá Hende Fiel.” Un di e rumannan entrevistá a animá e studiantenan pa kòrda riba Gideon su ehérsito di 300 sòldá. Kada sòldá a haña un asignashon ku a kontribuí n’e éksito di e kampaña di Gideon. (Huesnan 7:19-21) Meskos tambe, e misioneronan ku ta keda den nan asignashon ta haña nan rekompensa.

E entrevistanan ku Samuel Roberson, instruktor na Patterson, a tene despues a resaltá e tema “Bira Tur Kos pa Tur Tipo di Hende.” El a entrevistá kuater miembro di Komité di Sukursal; un di Senegal, un di Guam, un di Liberia i un di Madagascar. Un total di 170 misionero ta sirbiendo den e paisnan aki. For di e komentarionan e studiantenan ku a gradua a haña sa kon Komiténan di Sukursal ta yuda misioneronan nobo adaptá nan na nan ambiente nobo. Hopi bes esei ta nifiká siña kustumbernan ku por parse straño pa normanan di oksidente. Por ehèmpel, den algun pais ta masha komun pa mira hende hòmber, inkluso ruman hòmber di e kongregashon kristian, tene man komo amigu ora nan ta kana ku otro. Na algun lugá bou di e sukursal di Guam, nan ta kome kumindanan straño. Pero otro hende a adaptá nan mes, i e misioneronan nobo tambe por.

Guy Pierce, miembro di e Kuerpo Gobernante, a desaroyá e tema “Keda Leal na ‘e Reino di Nos Señor.’” El a rekordá e presentenan: “Yehova a krea kosnan ku un propósito. E tabatin algu na mente pa su kreashon. Su propósito pa e planeta aki no a kambia. No tin nada ku por kambia esei òf strob’é di wòrdu realisá.” (Génesis 1:28) Ruman Pierce a animá tur presente pa someté nan mes lealmente n’e soberania di Dios apesar di e difikultatnan ku a surgi pa motibu di e piká di e promé hòmber Adam. “Nos ta bibando den e ora di huisio. No a sobra muchu tempu mas pa alkansá hende di kurason onrado pa yuda nan konosé e bèrdat. Probechá bon di e tempu pa alkansá otro hende ku e bon nobo di Reino,” Ruman Pierce a urgi. Hende ku ta apoyá e Reino di Dios lealmente por konta ku su respaldo.—Salmo 18:25, NW.

Na konklushon, e presidente a lesa saludo- i ekspreshonnan di bon deseo for di sukursalnan rònt mundu. Despues el a entregá e studiantenan ku a gradua nan diploma. Un di e graduadonan a lesa un karta di e klas ku a ekspresá nan gradisimentu di kurason p’e entrenamentu ku nan a risibí. Esaki tabata un konklushon apropiá pa un bunita dia ku tur persona ku a asistí lo keda kòrda pa hopi tempu.

[Kuadro na página 23]

ESTADÍSTIKANAN DI E KLAS

Kantidat di pais representá: 11

Kantidat di pais na kua a asigná nan: 22

Kantidat di studiante: 48

Edat promedio: 34,8

Promedio di aña den e bèrdat: 18,3

Promedio di aña den sirbishi di tempu kompletu: 13,4

[Plachi na página 24]

E di 117 Klas di Graduadonan di e Skol Bíbliko di Galaad di Watchtower

Den e lista aki bou, e reinan ta numerá di dilanti bai patras, i e nòmbernan ta bai di robes pa drechi den kada rei.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.