Kaminda Adorashon Berdadero i Paganismo A Klèsh

PA MAS ku un siglo kaba, nan ta hasiendo investigashon arkeológiko intensivo den e ruinanan di Efeso di antigwedat, na kosta wèst di Turkia. Vários edifisio a ser rekonstruí, i sientífikonan a studia hopi deskubrimentu i a duna detaye di nan. Dor di esei, Efeso a bira un di e atrakshonnan turístiko mas popular na Turkia.

Kiko nan a deskubrí tokante Efeso? Ki idea nos awe por forma di e metrópolis fasinante ei? Un bishita na tantu e ruinanan di Efeso komo e Museo di Efeso na Vienna, Oustria, lo yuda nos komprondé kon adorashon berdadero i religion pagano a klèsh na Efeso. Laga nos kuminsá na analisá algu di su historia.

Un Sitio Kudishá

Durante siglo 11 promé ku nos era tabatin hopi konflikto i migrashon di hende na Europa i Asia. Ta den e tempu ei e griegonan joniano a kuminsá kolonisá e kosta wèst di Asia Menor. E promé kolonisadónan ei a bini den kontakto ku hende ku tabata konosí pa nan adorashon di un diosa-mama, esta, un deidat ku despues a bira konosí komo e Artémis di Efeso.

Meimei di siglo 7 promé ku nos era, e cimerianonan nomádiko a bini for di Laman Pretu den nort pa plùnder Asia Menor. Mas despues, rònt di aña 550 promé ku nos era, a lanta Rei Creso di Lidia, un gobernante poderoso i famoso pa su enorme rikesa. Ku e ekspanshon di e Imperio Perso, Rei Siro a dominá e statnan joniano, inkluyendo Efeso.

Na aña 334 promé ku nos era, Alexander di Masedonia a kuminsá su kampaña kontra Pèrsia, birando asina e gobernante nobo di Efeso. Despues di Alexander su morto prematuro na aña 323 promé ku nos era, Efeso a haña su mes enbolbí den un lucha pa poder entre su generalnan. Na aña 133 promé ku nos era, Atalo III, e rei sin yu di Pérgamo, a entregá Efeso n’e romanonan, i dor di esei el a bira parti di e provinsia romano di Asia.

Adorashon Berdadero Ta Klèsh ku Paganismo

Ora apòstel Pablo a yega Efeso na fin di su di dos biahe komo misionero den e promé siglo di nos era, el a haña un stat di mas o ménos 300.000 habitante. (Echonan 18:19-21) Durante su di tres biahe komo misionero, Pablo a regresá Efeso i ku mas kurashi ainda a papia den e snoa tokante e  Reino di Dios. Sin embargo, despues di tres luna e oposishon di e hudiunan a bira mas intenso, i Pablo a disidí di duna su diskursonan di tur dia den ouditorio di e skol di Tirano. (Echonan 19:1, 8, 9) Su aktividat di prediká a dura dos aña, kompañá pa obranan ekstraordinario di poder, manera kurashonnan milagroso i sakamentu di demoño. (Echonan 19:10-17) P’esei, no ta straño ku hopi hende a bira kreyente! Sí, e palabra di Yehova a prevalesé, di manera ku un gran kantidat di eks-praktikante di magia, di nan mes boluntat, a kima nan bukinan balioso.—Echonan 19:19, 20.

Pablo su predikashon eksitoso no solamente a impulsá hopi hende pa stòp di adorá e diosa Artémis sino tambe a provoká e rabia di esnan ku a promové e adorashon pagano ei. Trahamentu di tèmpelnan chikitu di plata di Artémis tabata un negoshi lukrativo. Mirando ku e negoshi aki tabata na peliger, un tal Demetrio a instigá e platénan pa rebeldiá.—Echonan 19:23-32.

E konfrontashon a yega na su punto kulminante ora e multitut a bira histériko i a grita pa dos ora largu: “Grandi ta Artémis di e efesionan!” (Echonan 19:34) Despues ku e lantamentu a kalma un tiki, Pablo a animá su rumannan kristian un biaha mas i despues a sigui su kaminda. (Echonan 20:1) Sin embargo, e echo ku el a sali pa Masedonia no a frena e kaida den e adorashon di Artémis, ku ya tabata destiná pa kaba na nada.

E Tèmpel di Artémis Ta Tambaleá

E adorashon di Artémis tabatin rais profundo den Efeso. Promé ku e tempu di Rei Creso, e diosa-mama Cibeles tabata e personahe sentral di e bida religioso den e área ei. Creso a pretendé ku Cibeles a bini di e diosnan griego, i ku esei Creso a spera di establesé un figura religioso ku tabata aseptabel pa tantu griego komo no-griego. Ku su sosten, meimei di siglo 6 promé ku nos era, nan a kuminsá traha riba e tèmpel di Artémis, susesor di Cibeles.

E tèmpel tabata un gran hazaña den arkitektura griego. Nunka promé a yega di usa blòki di marmer asina grandi pa krea un edifisio di e tipo i tamaño aki. Kandela a destruí e tèmpel ei na aña 356 promé ku nos era. E tèmpel rekonstruí, ku tabata mes impreshonante, a bira un fuente importante di empleo i un atrakshon prinsipal pa peregrinonan. E tèmpel rekonstruí tabata rònt di 50 meter hanchu i 105 meter largu, i nan a trah’é riba un fundeshi di 73 meter hanchu i 127 meter largu. El a wòrdu konsiderá un di e shete maravianan di mundu. Sin embargo, no ta tur hende tabata kontentu kuné. E filósofo Heráklito di Efeso a kompará e espasio skur dilanti e altar ku e skuridat di maldat, i el a konsiderá normanan di moralidat di e tèmpel pió ku esnan di bestia. Tòg, mayoria hende nunka lo por a pensa ku e santuario di Artémis na Efeso lo a kaba na nada. Pero historia a proba nèt kontrali. E buki Ephesos—Der neue Führer (Efeso—E Lider Nobo) ta deklará: “Pa siglo 2, diripiente e adorashon di Artémis i di otro deidatnan tradishonal di e panteon a basha den otro.”

Den siglo 3 di nos era, un temblor fuerte a sagudí Efeso. Komo si fuera  no tabata basta, e gótikonan marinero di Laman Pretu a sakea e rikesanan impreshonante di e tèmpel di Artémis i despues nan a peg’é na kandela. E buki ku nos a kaba di menshoná ta bisa: “Siendo derotá i inkapas pa protehá su propio lugá di biba, kon Artémis por wòrdu konsiderá ainda komo protektor di e stat?”—Salmo 135:15-18.

Finalmente, pa fin di siglo 4 di nos era, emperador Teodosio I a establesé “kristianismo” komo religion di Estado. Pronto e murayanan di piedra di loke un tempu tabata e tèmpel prestigioso di Artémis a bira un lugá di koba saka material di konstrukshon. E adorashon di Artémis a kai pèrdè kompletamente. En konekshon ku un dicho ku ta alabá e tèmpel komo un maravia di e mundu antiguo, un opservadó no-identifiká a komentá: “Aworakí e ta un lugá kompletamente bandoná i miserabel.”

For di Artémis pa “Mama di Dios”

Pablo a spièrta e ansianonan di e kongregashon na Efeso ku despues ku e bai lo presentá “lobo brabu” i ku for di meimei di nan mes lo lanta hòmbernan ku ta “papia kosnan pèrvèrso.” (Echonan 20:17, 29, 30) Esei ta eksaktamente loke a sosodé. Susesonan ta revelá ku adorashon falsu a prevalesé na Efeso den e forma di kristianismo apóstata.

Na aña 431 di nos era, Efeso tabata e sitio di e di tres konsilio ekuméniko, kaminda a debatí riba e kuestion di e naturalesa di Kristu. Ephesos—Der neue Führer ta splika: “E viktoria di e alehandrinonan, ku a afirmá ku Kristu tabatin un naturalesa so, esta esun divino, . . . tabata kompletu.” E konsekuensianan tabata di largu alkanse. “E desishon ku nan a tuma na Efeso, pa medio di kua Maria a ser halsá for di e puesto di Mama di Kristu pa esun di Mama di Dios, no solamente a pone e base pa adorashon di Maria sino tambe a produsí e promé divishon grandi den iglesia. . . . E debate ta kontinuá te dia djawe.”

Pues, e adorashon di Maria e “Mama di Dios” a remplasá e adorashon di Cibeles i Artémis. Manera e buki ta bisa, “te awe e Adorashon di Maria na Efeso . . . ta un tradishon bibu ku nos no por mira lòs for di e Adorashon di Artémis.”

El A Pasa pa Historia

Despues di e kaida di e adorashon di Artémis a bini e dekadensia di Efeso. Temblor, malaria i e echo ku pokopoko pero sigur e haf a yena ku lodo di riu a hasi bida den e stat asta mas difísil.

Pa siglo 7 di nos era, islam a kuminsá plama formalmente. Ademas di unifiká e tribunan arabir bou di su ideologia, e flotanan arabir a sakea Efeso durante siglo 7 i 8 di nos era. I despues ku e haf a yena kompletu ku lodo di riu i e stat mes a bira un monton di ruina, su fin a wòrdu seyá pa semper. Di loke un tempu tabata un metrópolis briante, a keda solamente un komunidat chikitu ku yama Aya Soluk (awor Selçuk).

Un Paseo dor di e Ruinanan di Efeso

Pa bo haña un idea di Efeso su gloria di pasado, bo por bishitá su ruinanan. Si bo kuminsá un tour for di e entrada parti ariba, lo bo wòrdu rekompensá mesora ku un bista magnífiko riba e Kaya di Kurete bai abou te n’e Biblioteka di Celso. Na man drechi di e kaya, e Odeum—un teater chikitu konstruí den siglo 2 di nos era—lo kapta bo atenshon. E tabata duna asiento na rònt di 1.500 hende, i probablemente nan tabata us’é no solamente komo un kámara di konsilio sino tambe pa entretenimentu públiko. Na kada banda di e Kaya di Kurete tin edifisio, manera e agora, òf plasa públiko, di Estado, e plasa kaminda nan tabata  debatí riba asuntunan di Estado, e tèmpel di Adriano, algun fòntein públiko i kasnan na barika di seru kaminda e efesionan élite tabata biba.

E presiosidat di Biblioteka di Celso, konstruí den siglo 2 di nos era, lo impreshoná bo sigur. Nan a warda su gran kantidat di ròlnan den hòlnan den muraya den un sala grandi kaminda hende por a sinta lesa. E kuater estatuanan den e bunita fachada a representá e kualidatnan típiko ku bo por a spera di un ámtenar romano importante manera Celso, esta: Sofia (sabiduria), Arete (birtut), Ennoia (deboshon) i Episteme (konosementu òf komprondementu). E estatuanan original ta ekshibí den e Museo di Efeso na Vienna. Banda di e patio di e biblioteka, tin un porta grandísimo ku ta hiba bo n’e agora di Tetragono. Riba e plasa enorme aki, ku ta rondoná pa pationan kubrí kaminda e hendenan por a kana keiru, nan tabata hasi nan aktividatnan komersial di tur dia.

Despues bo ta yega n’e Kaminda di Marmer ku ta hiba na e teater grandi. Ku e ekstenshonnan final hasí den tempu di e Imperio di Roma, e teater a duna asiento na rònt di 25.000 espektador. E dekorashon ekstrabagante di su fachada tabata konsistí di kolumna, relieve i estatua. Bo por visualisá e gran konmoshon ku e platé Demetrio a kousa den e multitutnan reuní einan.

E kaya ku ta ekstendé for di e teater grandi yega te na e haf di e stat ta impreshonante. E ta mas o ménos 500 meter largu i 11 meter hanchu, i na kada banda di dje tin kolumna. Riba e ruta aki nan a konstruí tambe e gimnasio di teater i e gimnasio di haf, tur dos reservá pa entrenamentu físiko. E porta impreshonante di e haf na fin di e kaya tabata e porta di mundu, i aki nos tour kòrtiku dor di algun di e ruinanan mas fasinante di mundu ta yega na su fin. Den e Museo di Efeso na Vienna tin un makèt di palu di e metrópolis históriko aki i tambe vários monumento.

Ora bo pasa dor di e museo i bo mira e estatua di e Artémis di Efeso, bo ta pensa mesora riba e awante di e promé kristiannan na Efeso. Nan tabatin ku biba den un stat ku tabata den gara di spiritismo i siegá pa prehuisio religioso. E adoradónan di Artémis a oponé e mensahe di Reino amargamente. (Echonan 19:19; Efesionan 6:12; Revelashon 2:1-3) Den e ambiente hostil ei, adorashon berdadero a saka rais. E adorashon aki di e Dios berdadero lo prevalesé tambe ora e religionnan falsu di nos tempu yega na nan fin, meskos ku e adorashon antiguo di Artémis a yega na su fin.—Revelashon 18:4-8.

[Mapa/Plachi na página 26]

(Pa e teksto den su formato kompleto, wak e publikashon)

MASEDONIA

Laman Pretu

ASIA MENOR

Efeso

Laman Mediteráneo

EGIPTO

[Plachi na página 27]

Restunan di e tèmpel di Artémis

[Plachinan na página 28, 29]

1. Biblioteka di Celso

2. Bista di aserka di Arete

3. Kaminda di Marmer ku ta hiba n’e teater grandi