‘Kontentu ku Mi Edukashon’

E HOBENSITA Kazuna a keda pasmá ora ku su maestro a rekomend’é pa e partisipá den un konkurso di duna spich na ingles. Tur skol sekundario na Hokkaido, ku ta e isla grandi ku ta keda na e parti nort di Hapon, tabatin mag di manda partisipante. Pero tabata e promé biaha ku Kazuna su skol a manda un alumno. Riba e dia di e konkurso, Kazuna tabata nervioso pasobra tabatin mas o ménos 50 otro partisipante. El a bira mas nervioso ainda ora el a ripará ku tabatin dos miembro di hurado kende nan idioma tabata ingles.

Nan a anunsiá ken tabata e ganadónan, kuminsando ku e premio mas abou bin ariba. Ora ku por último nan a menshoná Kazuna su nòmber, el a keda babuká. E ku su maestro, kende tabata sintá banda di dje, a keda wak otro tur asombrá. Kazuna, ku ainda tabata den shòk, a subi riba podio i a haña su trofeo pa e promé premio!

Ku alegria Kazuna a splika: “Esaki tabata posibel solamente debí na e edukashon ku Yehova su organisashon ta duna mediante e Skol di Ministerio Teokrátiko. Mi ta masha kontentu ku mi a risibí e edukashon aki.” E skol ei ku Kazuna ta partisipá den dje for di tempu ku e tabata chikitu, ta un di e reunionnan di kongregashon di Testigunan di Yehova. Pa prepará pa e konkurso, Kazuna a paga tinu spesialmente riba uso di mikrofon, papia ku sintimentu, entusiasmo, uso di gesto, kontakto ku ouditorio i otro puntonan mas ku ta ser tratá den e Skol di Ministerio Teokrátiko.

Nos ta invitá bo kordialmente pa bin wak kon, tur siman, e skol aki ta ser tené na un di e Salònnan di Reino lokal di Testigunan di Yehova. Wak pa bo mes kon tantu mucha chikitu komo hende grandi ta benefisiá. E reunion ta pa un i tur. Pues, si bo ta deseá di haña sa kua ta e skol mas serka di bo kas, tuma kontakto ku Testigunan di Yehova den bo bisindario.