Dikon Hopi Hende Ta Duda Ku Religion Por Uni Humanidat

“STIMA bo próhimo.” (Mateo 22:39) Hopi religion ta aklamá e regla básiko di kondukta aki. Si e religionnan ei tabata efektivo den siña nan miembronan pa stima nan próhimo, nan miembronan lo a uni i sera ku otro. Sin embargo, ta esei ta loke bo a opservá? Religionnan ta un influensia fuerte ku ta trese union? Un enkuesta resien na Alemania a hasi e pregunta: “Religionnan ta uni hende, òf tin mas chèns ku nan ta separá nan?” Di e personanan ku a kontestá, 22 porshento tabata di opinion ku religion ta trese union, miéntras ku 52 porshento a haña ku nan ta kousa divishon den hende òf ta separá nan. Podisé den bo pais hende ta pensa kasi meskos.

Dikon hopi hende tin tiki konfiansa ku religion por uni humanidat? Podisé ta debí na loke nan sa di historia. En bes di hala hende serka otro, religion hopi bes a pusha nan for di otro. Den algun kaso, hende a usa religion komo kapa pa kometé e atrosidatnan di mas horibel. Konsiderá algun ehèmpel for di solamente e último 100 añanan.

Influensiá dor di Religion

Durante segundo guera mundial, kroatanan katóliko romano i serbionan òrtodòks na paisnan di Balkan tabata den konflikto ku otro. Ámbos grupo a pretendé di ta sigui Hesus, kende a siña su siguidónan pa stima nan próhimo. Sin embargo, nan konflikto a hiba na “un di e masakrenan sivil di mas horibel konosí den historia,” segun un investigadó. Mundu a keda di shòk pa e kantidat di 500.000 morto ku tabata konsistí di hòmber, muhé i mucha.

Na 1947 e supkontinente di India tabatin alrededor di 400 mion habitante—rònt di un kinta parti di e poblashon mundial—prinsipalmente di religion hindú, mòslem i sikh. Ora nan a parti India na dos, e nashon islámiko di Pakistan a nase. E tempu ei, sientos di míles di refugiado di ámbos pais a ser kimá, batí, torturá i tirá mata den un seri di masakrenan religioso.

Anto fuera di e ehèmpelnan inkietante menshoná ariba, menasa di terorismo a resaltá na prinsipio di siglo 21. Awe, terorismo a pone ku henter mundu ta alerta, i hopi grupo terorista ta afirmá di tin lasonan religioso. Hende  no ta mira religion komo promotor di union. Mas bien, hopi bes nan ta asosiá religion ku violensia i desunion. P’esei no ta nada straño ku e revista aleman FOCUS a kompará budismo, kristiandat, konfusianismo, hinduismo, islam, hudaismo i taoismo—e religionnan prinsipal di mundu—ku pòlbu.

Disputanan Interno

Miéntras ku algun religion ta na guera ku otro, otronan ta ser perturbá pa disputanan interno. Por ehèmpel, último añanan iglesianan di kristiandat a keda dividí dor di debatenan konstante riba asuntunan relashoná ku doktrina. Tantu klero komo laiko ta puntra: Ta permití pa plania famia? Kiko di aborto? Hende muhé tin mag di bira saserdote? Kon iglesia mester mira homoseksualidat? Un religion tin mag di aprobá guera? En bista di tal desunion, hopi hende ta puntra nan mes: ‘Kon un religion por uni humanidat si e no por uni ni sikiera su propio miembronan?’

Pues ta bisto anto ku religion en general no a logra trese union. Pero ta tur religion ta ser karakterisá pa desunion? Tin un religion ku ta diferente, unu ku por uni humanidat?

[Plachi na página 3]

Polisnan heridá durante bringamentu entre gruponan religioso na India na 1947

[Rekonosementu]

Potrèt di Keystone/Getty Images