Ora di Kome No Ta Djis pa Kome So!

TUR hende ta gusta saboriá un bon kuminda. Si huntu ku e kuminda ei tin bon kòmbersashon i asosiashon kaluroso ku hende ku bo ta stima, e komementu aki ta bira un evento gososo ku ta satisfasé mas ku nos hamber so. Hopi famia tin e kustumber di reuní pa kome huntu por lo ménos un bes pa dia. Ora e famia ta kome huntu nan ta haña e oportunidat di papia di kosnan ku a pasa durante dia òf ku nan tin planiá di hasi. Mayornan ku ta skucha remarke- i ekspreshonnan di nan yunan ta haña un bista di loke nan yunan ta pensa i sinti. Atraves di tempu, e asosiashon relahá i felis ku e famia a disfrutá ora nan ta kome huntu, ta edifiká den e famia un sentido di siguridat, konfiansa i amor, ku ta hasi e famia mas stabil.

Dor ku awendia hopi miembro di famia ta semper okupá, nan ta haña ku ta difísil pa reuní pa kome huntu. Den algun parti di mundu, kultura lokal no ta aprobá pa famianan kome huntu ni pa nan papia ora ta kome. Otro famianan tin e kustumber di sende televishon ora nan ta kome, i esaki ta un manera efikas pa stroba kualke komunikashon signifikativo.

Sin embargo, mayornan kristian sí semper ta alerta pa buska oportunidat pa edifiká nan famia. (Proverbionan 24:27) Hopi tempu pasá, Dios a bisa mayornan ku un di e mihó oportunidatnan pa komuniká e palabra di Dios na nan yunan ta ora nan ta ‘sinta den nan kas.’ (Deuteronomio 6:7) Ora mayornan ta sinta regularmente pa kome huntu ku nan yunan, nan tin e chèns úniko pa edifiká den nan yunan un amor mas profundo pa Yehova i su prinsipionan hustu. Dor di kultivá un atmósfera felis i relahá, bo por hasi e ora di kome un eksperensia dushi i edifikante tambe pa bo famia. Sí, laga boso ora di kome no ta djis pa kome so!