Sigui e Ehèmpel Ku Hesus A Pone
Sigui e Ehèmpel Ku Hesus A Pone
“Mi a duna boso un ehèmpel, pa boso tambe hasi manera ami a hasi ku boso.”—JUAN 13:15.
1. Dikon Hesus ta un bon modelo pa kristiannan imitá?
DEN henter historia di humanidat, ta un persona so a biba sin nunka kometé piká. Esei ta Hesus. Fuera di Hesus, “no tin ningun hende ku no ta peka.” (1 Reinan 8:46; Romanonan 3:23) Ta p’esei kristiannan berdadero ta mira Hesus komo un modelo perfekto pa nan imitá. De echo, djis promé ku Hesus su morto riba 14 di nisan di aña 33 di nos era, e mes a bisa su siguidónan pa imit’é. E di: “Mi a duna boso un ehèmpel, pa boso tambe hasi manera ami a hasi ku boso.” (Juan 13:15) Durante e último anochi ei, Hesus a menshoná vários manera ku kristiannan mester hasi esfuerso pa imit’é. Den e artíkulo aki nos lo konsiderá algun di nan.
Humildat Ta Nesesario
2, 3. Den ki maneranan Hesus tabata un ehèmpel perfekto di humildat?
2 Ora ku Hesus a urgi su disipelnan pa sigui e ehèmpel ku el a pone, e tabata papia spesífikamente di humildat. Na mas ku un okashon, el a konsehá su siguidónan pa nan ta humilde, i riba e anochi di 14 di nisan, el a demostrá su propio humildat dor di laba pia di su apòstelnan. Kaba Hesus a bisa: “Si ami anto, e Señor i Maestro, a laba boso pia, boso tambe mester laba pia di otro.” (Juan 13:14) Ta despues di esei el a bisa su apòstelnan pa sigui e ehèmpel ku el a pone. I e ehèmpel di humildat ku el a pone tabata realmente ekselente!
3 Apòstel Pablo ta konta nos ku promé ku Hesus a bin na tera, e tabata “eksistí den e forma di Dios.” Sin embargo, el a bandoná su gloria i a bira un simpel ser humano. Es mas, “el a humiá su mes dor di bira obedesidu te na morto, asta morto na un [“staka di tormento,” NW].” (Filipensenan 2:6-8) Pensa riba esei un ratu. Hesus, e di dos persona mas haltu den universo, a bai di akuerdo pa bira ménos ku e angelnan, nase komo un beibi indefenso, lanta komo un yu sumiso na mayornan imperfekto i por último muri manera un kriminal despresiá. (Kolosensenan 1:15, 16; Hebreonan 2:6, 7) Esta un humildat! Ta posibel pa imitá e “aktitut” mental ei i kultivá tal “humildat”? (Filipensenan 2:3-5) Sí, esei ta posibel pero e no ta fásil.
4. Kiko ta e kosnan ku ta hasi hende orguyoso, pero dikon orguyo ta peligroso?
4 Lo kontrario di humildat ta orguyo. (Proverbionan 6:16-19) Orguyo a hiba na Satanas su kaida. (1 Timoteo 3:6) Ta fásil pa orguyo kria rais den hende su kurason, i unabes e ta eiden, ta difísil pa rank’é afó. Hende ta yen di orguyo debí na nan pais, nan rasa, nan poseshonnan, nan edukashon, nan logronan den mundu, nan posishon sosial, nan aparensia, nan abilidatnan atlétiko i pa hopi otro kos mas. Sin embargo, ningun di e kosnan ei no ta importante pa Yehova. (1 Korintionan 4:7) I si nan ta hasi nos orguyoso, nan ta daña nos relashon kuné. “Sí, maske SEÑOR ta elevá, e ta mira un hende humilde i djaleu ta vigilá un orguyoso.”—Salmo 138:6, BPK; Proverbionan 8:13.
Humilde Meimei di Nos Rumannan
5. Dikon ta masha importante pa ansianonan ta humilde?
5 Ni sikiera loke nos ta kontribuí kuné i logra den Yehova su sirbishi no mester hasi nos orguyoso; tampoko e responsabilidatnan ku nos tin den kongregashon. (1 Krónikanan 29:14; 1 Timoteo 6:17, 18) De echo, mas pisá nos responsabilidatnan ta, mas humilde nos mester ta. Apòstel Pedro a urgi ansianonan pa no ta manera hende ‘ku tin dominio riba esnan ku a wòrdu konfiá na nan, ma siendo ehèmpel pa e tou.’ (1 Pedro 5:3) Ansianonan ta nombrá pa fungi komo sirbidó i ehèmpel, no komo señor i shon.—Lukas 22:24-26; 2 Korintionan 1:24.
6. Den ki aspektonan di bida, kristiannan tin mester di humildat?
6 No ta ansianonan so mester ta humilde. Pedro a skirbi na hòmbernan mas hóben, ku kisas ta orguyoso di nan mente ku ta kapta kos mas lihé i nan kurpa hopi mas fuerte kompará ku di hende grandi: “Bisti boso mes ku humildat pa ku otro, pasobra ‘Dios ta resistí e orguyosonan, ma ta duna grasia na e humildenan.’” (1 Pedro 5:5) Sí, ta masha importante pa un i tur reflehá humildat manera Kristu. Humildat ta nesesario pa prediká e bon nobo, spesialmente ora nos ta topa hende ku un aktitut indiferente òf di menospresio. Humildat ta nesesario pa aseptá konseho òf pa simplifiká nos bida afin di por hasi mas den sirbishi. Ademas, nos tin mester di humildat i tambe fe i kurashi ora nos ta konfrontá publisidat negativo, atakenan legal òf persekushon violento.—1 Pedro 5:6.
7, 8. Menshoná algun manera ku nos por kultivá humildat.
7 Kon un persona por vense orguyo i komportá su mes na un manera humilde, ‘konsiderando otro hende mas importante ku e mes’? (Filipensenan 2:3) E tin ku mira su mes manera Yehova ta mir’é. Hesus a splika kua ta e manera korekto pa mira nos mes ora el a bisa: “Boso tambe, ora boso hasi tur loke boso a wòrdu ordená, bisa: ‘Nos ta esklabonan inútil; nos a hasi solamente loke nos mester a hasi.’” (Lukas 17:10) Kòrda ku nada ku nos hasi no por para banda di loke Hesus a hasi. Pero tòg Hesus tabata humilde.
8 Ademas, nos por pidi Yehova yuda nos kultivá e manera korekto di mira nos mes. Meskos ku e salmista, nos por pidi den orashon: “Siña mi bon disernimentu i konosementu, pasobra mi ta kere bo mandamentunan.” (Salmo 119:66) Yehova lo yuda nos diserní i desaroyá un punto di bista rasonabel i balansá di nos mes, i lo e bendishoná nos pa nos aktitut humilde. (Proverbionan 18:12) Hesus a bisa: “Ken ku halsa su mes lo wòrdu humiá, i ken ku humiá su mes lo wòrdu halsá.”—Mateo 23:12.
Un Punto di Bista Korekto di Loke Ta Bon i Loke Ta Malu
9. Ki punto di bista Hesus tabatin di loke ta bon i loke ta malu?
9 Apesar ku Hesus a biba pa 33 aña meimei di hende imperfekto, el a keda “sin piká.” (Hebreonan 4:15) De echo, ora e salmista tabata profetisá tokante e Mesias, el a bisa: “Bo a stima hustisia i a odia maldat.” (Salmo 45:7; Hebreonan 1:9) Kristiannan ta hasi nan bèst pa imitá Hesus den esaki tambe. Nan no solamente sa kiko ta bon i kiko ta malu; nan ta odia loke ta malu i ta stima loke ta bon. (Amos 5:15) Esaki ta yuda nan resistí nan inklinashonnan pekaminoso heredá.—Génesis 8:21; Romanonan 7:21-25.
10. Ki aktitut nos ta reflehá ora nos ta praktiká “maldat” sin arepentí?
10 Hesus a bisa e fariseo Nikodemo: “Esun ku ta hasi maldat ta odia e lus, i no ta bin na e lus, pa su echonan no wòrdu eksponé. Ma esun ku ta praktiká bèrdat ta bin na e lus, pa por wòrdu manifestá ku su echonan ta wòrdu hasí den Dios.” (Juan 3:20, 21) Pensa riba esaki: Juan a identifiká Hesus komo “e lus berdadero, ku ta lusa tur hende.” (Juan 1:9, 10) Sin embargo, Hesus a bisa ku si nos ta praktiká “maldat”—kosnan ku ta robes, inaseptabel pa Dios—nos ta odia e lus. Bo por imaginá bo ta odia Hesus i su normanan? Sin embargo, esei ta loke hende ta hasi ora nan ta praktiká piká sin arepentí. Podisé nan no ta pensa ku nan ta odia Hesus i su normanan, pero Hesus sí ta mir’é asina.
Kon pa Kultivá Hesus Su Punto di Bista di Loke Ta Bon i Loke Ta Malu
11. Kiko ta hopi importante pa nos por kultivá Hesus su punto di bista di loke ta bon i loke ta malu?
11 Nos mester komprondé bon kla kiko ta bon i kiko ta malu for di Yehova su punto di bista. Nos ta haña e komprondementu ei solamente dor di studia e Palabra di Dios, Beibel. Segun ku nos ta studi’é, nos tin ku pidi den orashon meskos ku e salmista: “Hasi mi konosé bo kamindanan, o SEÑOR; siña mi bo bereanan.” (Salmo 25:4) Pero no lubidá ku Satanas ta engañoso. (2 Korintionan 11:14) E por laga algu malu parse aseptabel pa un kristian ku no ta alerta. P’esei nos tin ku meditá profundamente riba loke nos ta siña i sigui kuidadosamente e konseho di “e esklabo fiel i prudente.” (Mateo 24:45-47) Dor di studia, hasi orashon i meditá riba loke nos siña, nos lo por alkansá madures i ta entre esnan ku “pa motibu di práktika, tin nan mente entrená pa diserní loke ta bon i loke ta malu.” (Hebreonan 5:14) E ora ei nos lo ta inkliná na odia loke ta malu i stima loke ta bon.
12. Kua konseho bíbliko ta yuda nos pa no praktiká maldat?
12 Si nos ta odia loke ta malu, nos lo no permití deseo pa kos malu krese den nos kurason. Hopi aña despues di Hesus su morto, apòstel Juan a skirbi: “No stima mundu, ni e kosnan ku tin den mundu. Si un hende ta stima mundu, e amor di e Tata no ta den dje. Pasobra tur loke ku tin den mundu, e deseo di karni i e deseo di wowo i e orguyo di bida, no ta bin di e Tata, sino di e mundu.”—1 Juan 2:15, 16.
13, 14. (a) Dikon amor pa e kosnan di mundu ta peligroso pa kristiannan? (b) Kon nos por evitá di kultivá amor pa kosnan ku tin den mundu?
13 Tin hende kisas ta rasoná ku no ta tur kos den mundu ta malu. Maske esei ta bèrdat, mundu i su atrakshonnan fásilmente por kita nos di sirbi Yehova. I nada ku mundu ta ofresé no ta diseñá pa hala nos mas serka di Dios. P’esei, si nos kuminsá stima e kosnan ku tin den mundu, asta kosnan ku riba nan mes no ta malu, nos ta kohiendo un rumbo peligroso. (1 Timoteo 6:9, 10) Ademas, mayoria kos den mundu ta realmente malu i por korumpí nos. Si nos ta wak pelíkula òf programa di televishon ku ta enfatisá violensia, materialismo òf inmoralidat seksual, e kosnan ei por bira aseptabel, i despues asta un tentashon pa nos. Si nos ta anda ku hende kende nan interes prinsipal ta pa mehorá nan estilo di bida òf pa krea oportunidatnan pa hasi negoshi, e kosnan ei por bira lo mas importante pa nos tambe.—Mateo 6:24; 1 Korintionan 15:33.
14 Di otro banda, si nos tin delisia den e Palabra di Yehova, “e deseo di karni i e deseo di wowo i e orguyo di bida” lo no ta dje atraktivo ei mas. Mas ainda, si nos ta anda ku hende ku ta pone e interesnan di e Reino di Dios na promé lugá, nos lo bira meskos ku nan, stimando loke nan ta stima i evitando loke nan ta evitá.—Salmo 15:4; Proverbionan 13:20.
15. Meskos ku tabata e kaso ku Hesus, kon nos por ser fortifiká dor di stima hustisia i odia maldat?
15 Hesus a odia maldat i stima hustisia, i esei a yud’é keda ku su bista fihá riba “e goso poné su dilanti.” (Hebreonan 12:2) Nos tambe por hasi meskos. Nos sa ku “mundu ta pasa bai i su deseonan tambe.” P’esei kualke plaser ku e mundu aki ta ofresé ta un kos temporal. Sin embargo, “esun ku hasi e boluntat di Dios ta permanesé pa semper.” (1 Juan 2:17) Komo ku Hesus a hasi Dios su boluntat, el a habri kaminda pa hende haña bida eterno. (1 Juan 5:13) Laga nos tur imit’é i benefisiá di su integridat.
Perseverá bou di Persekushon
16. Dikon Hesus a urgi su siguidónan pa nan stima otro?
16 Hesus a indiká un otro manera ku su disipelnan lo a imit’é, bisando: “Esaki ta mi mandamentu, ku boso stima otro meskos ku ami a stima boso.” (Juan 15:12, 13, 17) Tin hopi motibu pakiko kristiannan ta stima nan rumannan. Na e okashon aki, Hesus tabata pensa mas ku tur kos riba e echo ku mundu lo odia nan. El a bisa: “Si mundu odia boso, sa anto ku el a odia ami promé ku boso. . . . ‘Un esklabo no ta mas ku su shon.’ Si nan a persiguí mi, boso tambe nan lo persiguí.” (Juan 15:18, 20) Sí, asta ora kristiannan ta ser persiguí, nan ta meskos ku Hesus. Nan tin ku kultivá un laso fuerte i amoroso ku otro pa yuda nan soportá e odio ei.
17. Dikon mundu ta odia kristiannan berdadero?
17 Dikon mundu lo a odia kristiannan? Pasobra meskos ku Hesus, nan ‘no ta parti di mundu.’ (Juan 17:14, 16) Nan ta neutral den asuntunan militar i polítiko, i nan ta kumpli ku prinsipionan bíbliko, respetando e santidat di bida i siguiendo normanan moral haltu. (Echonan 15:28, 29; 1 Korintionan 6:9-11) Nan metanan prinsipal ta meta spiritual, no material. Nan ta biba den mundu, pero manera Pablo a skirbi, nan no ta ‘hasi uso kompletu di dje.’ (1 Korintionan 7:31) Ta bèrdat ku algun hende a ekspresá nan atmirashon pa e normanan haltu di Testigunan di Yehova. Pero Testigunan di Yehova no ta pasa por haltu di nan normanan pa asina hende por atmirá nan i aseptá nan. Komo resultado, mayoria hende den mundu no ta komprondé nan, i hopi ta esnan ku ta odia nan.
18, 19. Siguiendo e ehèmpel di Hesus, kon kristiannan ta trata ku oposishon i persekushon?
18 E apòstelnan di Hesus a mira e odio intenso ku mundu tin ora ku Hesus a keda arestá i ehekutá, i nan a mira kon Hesus a trata ku e odio ei. Hesus su oponentenan religioso a bin pa arest’é den e hòfi di Getsemané. Pedro a purba protehá Hesus ku un spada, pero el a bisa Pedro: “Pone bo spada bèk na su lugá; pasobra tur esnan ku saka spada lo peresé pa medio di spada.” (Mateo 26:52; Lukas 22:50, 51) Ta bèrdat ku den pasado e israelitanan a bringa ku spada kontra nan enemigunan. Pero awor e situashon tabata otro. E Reino di Dios ‘no tabata parti di e mundu aki’ i e no tabatin ningun frontera nashonal ku e mester a protehá. (Juan 18:36) Un djis Pedro lo a bira parti di un nashon spiritual, kende su miembronan lo tin nan siudadania den shelu. (Galationan 6:16; Filipensenan 3:20, 21) Pues anto, Hesus su siguidónan lo a trata ku odio i persekushon manera Hesus a trata ku nan: sin miedu pero na un manera pasífiko. Ku konfiansa nan lo a laga kos den man di Yehova i stèns riba dje pa haña e fortalesa pa perseverá.—Lukas 22:42.
19 Añanan despues, Pedro a skirbi: “Kristu tambe a sufri pa boso, lagando un ehèmpel pa boso, pa boso sigui den su pasonan . . . Ora ku el a wòrdu zundrá, e no a zundra bèk; ora ku el a sufri, e no a menasá, ma a konfia su mes na esun ku ta husga ku hustisia.” (1 Pedro 2:21-23) Manera Hesus a atvertí, kristiannan a eksperensiá persekushon severo atraves di añanan. Tantu den promé siglo komo den nos tempu, nan a sigui Hesus su ehèmpel i a establesé un tremendo registro di fiel perseveransia, demostrando asina ku nan ta mantené nan integridat na un manera pasífiko. (Revelashon 2:9, 10) Laga kada un di nos hasi meskos ora nos ta konfrontá sirkunstansianan similar.—2 Timoteo 3:12.
“Bisti Boso ku Señor Hesukristu”
20-22. Den ki manera kristiannan ta ‘bisti Señor Hesukristu’?
20 Pablo a skirbi e kongregashon na Roma: “Bisti boso ku Señor Hesukristu, i no hasi provishon pa e karni, pa kumpli ku su mal deseonan.” (Romanonan 13:14) Kristiannan, na moda di papia, ta bisti Hesus manera bo ta bisti un paña. Nan ta hasi esfuerso pa imitá su kualidatnan i akshonnan te na e grado ku nan ta bira un refleho—maske unu imperfekto—di nan Maestro.—1 Tesalonisensenan 1:6.
21 Nos por tin éksito den ‘bisti Señor Hesukristu’ si nos familiarisá nos mes ku Hesus su bida i hasi esfuerso pa biba manera é a biba. Nos ta imitá su humildat, su amor pa hustisia, su odio pa maldat, su amor pa su rumannan, e echo ku e no tabata parti di mundu i e manera ku el a soportá sufrimentu ku pasenshi. Nos no ta ‘hasi provishon pa kumpli ku e mal deseonan di karni,’ es desir ku nos propósito prinsipal den bida no ta pa alkansá metanan mundano ni pa satisfasé deseonan di karni. Mas bien, ora di tuma un desishon òf di atendé un problema, nos ta puntra: ‘Kiko Hesus lo a hasi den e situashon aki? Kiko lo e ke pa mi hasi?’
22 Por último, nos ta imitá Hesus dor di keda okupá ku ‘proklamashon di e evangelio di reino.’ (Mateo 4:23; 1 Korintionan 15:58) Den e manera ei tambe kristiannan ta sigui e ehèmpel ku Hesus a pone, i e siguiente artíkulo lo trata kon nan ta hasié.
Bo Por Splika?
• Dikon ta hopi importante pa un kristian ta humilde?
• Kon nos por kultivá e punto di bista korekto di loke ta bon i loke ta malu?
• Kon kristiannan ta imitá Hesus su manera di trata ku oposishon i persekushon?
• Kon ta posibel pa ‘bisti Señor Hesukristu’?
[Preguntanan di Estudio]
[Plachi na página 7]
Hesus a pone e ehèmpel perfekto di humildat
[Plachi na página 8]
Un kristian tin mester di humildat den tur aspekto di su bida, inkluso den e predikashon
[Plachi na página 9]
Satanas por laga entretenimentu inapropiá parse aseptabel pa un kristian
[Plachi na página 10]
Amor di nos rumannan lo fortifiká nos kontra oposishon