Bo Por Tin Kontròl Riba Bo Futuro?

NOS futuro definitivo ta predeterminá? Loke nos ta skohe den bida no tin efekto riba nos futuro?

Suponé ku hende ta doño di su propio futuro. Den un kaso asina, un hende lo ta predeterminá pa hasi un tarea spesífiko òf hasi sierto trabou? I kon Dios lo por a kumpli ku su boluntat pa e tera si hende ta liber pa forma nan propio futuro? Beibel ta duna kontesta satisfaktorio pa e preguntanan aki.

Predestinashon i Boluntat Liber —Tur Dos Ta Korekto?

Konsiderá e manera ku Yehova Dios a traha nos. “Segun e imágen di Dios el a krea hende; hòmber i muhé el a krea nan,” Beibel ta bisa. (Génesis 1:27) Dor ku nos a ser kreá den e imágen di Dios, nos tin e abilidat di reflehá su kualidatnan manera, amor, hustisia, sabiduria i poder. Tambe Dios a duna nos e don di boluntat liber òf e libertat di skohe. Esaki ta hasi nos diferente for di tur loke el a krea riba tera. Nos por skohe si no ke sigui Dios su guia moral òf nò. Ta p’esei profeta Moisés por a bisa: “Mi ta yama shelu i tera komo testigu kontra boso awe, ku mi a pone bida i morto boso dilanti, e bendishon i e maldishon. P’esei, skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje.”—Deuteronomio 30:19, 20.

Sin embargo, e echo ku nos tin libertat di skohe no ta nifiká ku nos tin libertat apsoluto.  E no ta libra nos di e leinan físiko i moral ku Dios a traha p’e stabilidat i pas di e universo. El a pone e leinan aki pa nos mes bon, i kualke violashon di nan por hiba na konsekuensianan serio. Djis pensa kiko lo pasa si nos disidí di ignorá e lei di gravedat i bula for di dak di un edifisio haltu!—Galationan 6:7.

Tambe libertat di skohe ta duna nos sierto responsabilidat ku kriaturanan ku no tin e libertat ei no tin. E outor Corliss Lamont a puntra: “Kon nos por atribuí responsabilidat moral na hende, i kastigá nan pa malecho, si nos ta aseptá  . . ku loke nan skohe i nan echonan ta determiná di antemano?” Esei sigur no por. Animalnan ku ta sigui nan instinto no ta moralmente responsabel pa nan echonan ni no por tene kòmpiuternan responsabel pa e funshonnan ku nan a ser programá pa ehekutá. P’esei anto, libertat di skohe ta pone un responsabilidat serio riba nos i ta hasi nos responsabel pa nos echonan.

Yehova Dios lo tabata masha inhustu i sin amor si promé ku nos a nase, el a predeterminá e manera ku nos lo hiba nos bida, i despues ta tene nos responsabel pa nos echonan! E no ta hasi esaki pasobra “Dios ta amor,” i “tur su kamindanan ta hustu.” (1 Juan 4:8; Deuteronomio 32:4) E no a duna nos libertat di skohe i na e mesun tempu ‘determiná for di eternidat ken lo e salba i ken lo e destruí,’ manera esnan ku ta kere den predestinashon ta pretendé. Libertat di skohe no ta laga lugá pa predestinashon.

Beibel ta mustra bon kla ku loke nos skohe tin influensia riba nos futuro. Por ehèmpel, Dios ta hasi un apelashon n’e hasidónan di maldat: “Kada un bira awor for di su mal kaminda i for di e maldat di su echonan, . .  lo mi no hasi boso daño.” (Jeremias 25:5, 6) E apelashon aki lo no tabatin sentido si Dios ya kaba a fiha destino di kada persona individual. Ademas, e Palabra di Dios ta bisa: “Repentí anto i kombertí, pa boso pikánan wòrdu kitá, pa tempunan di refreskamentu por bin for di e presensia di Señor.” (Echonan 3:19) Dios lo a pidi hende pa nan repentí i kombertí, si e tabata sa di antemano ku nan lo no por hasi apsolutamente nada pa kambia nan futuro?

E Skritura ta papia di algun persona ku ta yamá pa Dios pa goberná komo rei den shelu huntu ku Hesukristu. (Mateo 22:14; Lukas 12:32) Sin embargo, Beibel ta bisa ku nan lo pèrdè e privilegio ei si nan no keda fiel te na fin. (Revelashon 2:10) Pakiko Dios lo a yama nan mes si el a disidí kaba ku nan lo no ser  skohí? Konsiderá tambe e palabranan ku apòstel Pablo a deklará na su kompañeronan di fe. El a skirbi: “Si nos sigui peka boluntariamente despues di a risibí e konosementu di e bèrdat, no ta keda sakrifisio pa piká mas.” (Hebreonan 10:26) E spièrtamentu ei lo no tabatin balor si Dios a predeterminá nan destino. Pero Dios no a predeterminá por lo ménos algun persona pa nan ta gobernante huntu ku Hesukristu?

Dios A Predeterminá Personanan Individual òf un Grupo?

Apòstel Pablo a skirbi: “[Dios] a bendishoná nos, pa medio di nos union ku Kristu, ku tur benefisio spiritual di e regionnan selestial. Pasobra den Kristu el a skohe nos fo’i promé ku el a krea mundu . . .El a disidí di antemano ku lo e adoptá nos komo su yunan pa medio di Hesukristu.” (Efesionan 1:3-5, BPK) Kiko Dios a predeterminá òf disidí di antemano, i kiko ta e nifikashon di ser skohé “promé ku el a krea mundu”?

E tekstonan aki ta deklará ku Dios a skohe algun desendiente di e promé hòmber, Adam, pa goberná huntu ku Kristu den shelu. (Romanonan 8:14-17, 28- 30; Revelashon 5:9, 10) Sin embargo, e idea ku ta míles di aña di antemano promé ku sierto personanan spesífiko a nase Yehova Dios a disidí ku nan lo a haña e privilegio ei, no ta kuadra ku e echo ku hende tin libertat di skohe. Loke Dios a predeterminá tabata un grupo di hende, i no hende individual.

Pa ilustrá esaki: Suponé ku un gobièrnu ta disidí di establesé un sierto agensia. Di antemano e ta determiná e funshonnan di e agensia, su outoridat i su tamaño. Finalmente e agensia ta kuminsá funshoná algun tempu despues ku el a ser establesí, i su miembronan ta saka un deklarashon ku ta bisa: “Vários aña pasá, gobièrnu a determiná ki trabou nos lo hasi. Awor nos ta kuminsá hasi e trabou ku el a asigná na nos.” Abo lo yega n’e konklushon ku e gobièrnu mester a determiná algun aña promé ken lo bai ta e miembronan individual di e agensia ei? Siguramente ku nò. Asina tambe Yehova a determiná di antemano ku lo e establesé un agensia spesial pa remediá e efektonan di e piká di Adam. El a predeterminá e klase òf grupo di hende ku lo sirbi den e agensia ei, pero no e hendenan individual. Nan lo a ser skohé despues, i e kurso di bida ku nan lo a skohe lo determiná si finalmente nan lo ser aprobá òf nò.

Kua mundu Pablo tabatin na mente ora el a bisa: “[Dios] a skohe nos fo’i promé ku el a krea mundu”? E mundu ku Pablo ta referí na dje aki no ta e mundu ku Dios a kuminsá ora el a krea Adam ku Eva. E mundu ei tabata “masha bon,” kompletamente liber di piká i korupshon. (Génesis 1:31) E no tabatin mester di un “redenshon” òf liberashon for di piká.—Efesionan 1:7.

E mundu en partikular ku Pablo a referí na dje tabata esun ku a bini na eksistensia despues ku Adam ku Eva a rebeldiá den Edén, un mundu kompletamente diferente for di esun ku tabata e propósito original di Dios. E tabata e mundu ku a kuminsá ku e yunan di Adam ku Eva. E mundu ei a konsistí di hende alehá for di Dios i sklabisá na piká i korupshon. E tabata un mundu di hende ku, distinto di e pekadónan boluntario, Adam ku Eva, por a ser reskatá.—Romanonan 5:12; 8:18- 21.

Mesora Yehova por a trata ku e situashon ku a presentá debí n’e rebelion den Edén. Asina ku e nesesidat a surgi, el a determiná di antemano ku lo e bini ku un agensia spesial—e Reino Mesiániko den man di Hesukristu—ku e lo bai usa pa reskatá humanidat for di e piká di Adam. (Mateo 6:10) Dios a hasi esaki ‘promé ku el a krea e mundu’ di humanidat ku por ser reskatá, esta, promé ku e rebeldenan Adam ku Eva a haña yu.

Hende en general tin mester di un plan di akshon pa nan logra loke nan ke hasi. Predestinashon  tin di haber ku e idea ku Dios mester tin un plan detayá pa e universo den kua tur kos ta predeterminá. Roy Weatherford a skirbi: ‘Segun hopi filósofo, tur suseso ku ta na armonia ku e Mahestat di Dios mester tin un spesifikashon kompletu.’ Dios realmente tin ku spesifiká kada suseso di antemano?

Komo ku Yehova tin poder infinito i sabiduria inkomparabel, e por trata ku kualke emergensia òf suseso imprevisto ku lo por presentá segun ku su kriaturanan ta ehersé nan boluntat liber. (Isaias 40:25, 26; Romanonan 11:33) E por hasi esaki mesora sin ku el a plani’é delantá. Distinto for di hende imperfekto ku nan abilidatnan limitá, e Dios Todopoderoso no tin mester di un plan kompletamente detayá ku ta bisa di antemano kiko ta e futuro di kada persona individual riba tera. (Proverbionan 19:21) Den vários tradukshon di Beibel, Efesionan 3:11 ta menshoná ku Dios tin un “propósito eterno,” i no un plan fiho.

Kon Bo Por Influensiá Bo Futuro

Yehova tin un propósito pa e tera, i e propósito ei sí ta predeterminá. Revelashon 21:3 i 4 ta deklará: “Mira, e tabernakel di Dios ta meimei di hende, i e lo biba meimei di nan, i nan lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” Sí, e tera aki lo bira un paradeis, manera tabata Yehova su intenshon originalmente. (Génesis 1:27, 28) Awor e pregunta ta: Abo lo t’ei? Esei ta dependé di loke abo disidí awor. Yehova no a fiha bo destino.

E sakrifisio di reskate di Hesukristu, e Yu di Dios, ta hasi posibel pa tur hende ku ehersé fe den dje risibí bida eterno. (Juan 3:16, 17; Echonan 10:34, 35) Beibel ta bisa: “Esun ku kere den e Yu tin bida eterno; ma esun ku no obedesé e Yu lo no mira bida.” (Juan 3:36) Bo por skohe bida dor di siña tokante Dios, su Yu, i Su boluntat for di Beibel i dor di apliká loke bo ta siña. E persona ku ta aktua na armonia ku berdadero sabiduria registrá den e Palabra di Dios por ta sigur ku “lo e biba konfiadamente, i lo biba trankil, sin miedu di maldat.”—Proverbionan 1:20, 33.

[Plachinan na página 5]

Distinto for di bestia, hende ta moralmente responsabel pa nan echonan

[Rekonosementu]

Águila: Potrèt: Kortesia di GREFA