“Kiko Ta Bo Sekreto?”

MURIEL, un mama di tres yu, a keda sorprendí ora un hòmber di edat den un restorant di fast-food a hasié e pregunta ei. Muriel tabata hopi okupá ku bishita na dòkter ku su yunan i el a kai lat. E no tabatin sufisiente tempu pa nan bai kas i kome kuminda di atardi promé ku nan bai nan reunion kristian. P’esei el a bai un restorant den bisindario ku e muchanan pa nan por a kome algu.

Ora nan tabata serka di kaba di kome, un hòmber a aserká Muriel i a bisa: “Mi tabata opservá boso for di ora boso a drenta aki den. I mi a ripará un diferensia grandi entre bo yunan i muchanan ku normalmente mi sa topa. Bo mester mira kon e muchanan ei sa trata e mesa i stulnan. Nan ta pone pia riba mesa. Nan ta lastra stul. Pero bo yunan ta masha trankil i ku bon manera. Kiko ta bo sekreto?”

Muriel a kontestá: “Ami ku mi kasá ta studia Beibel regularmente ku nos yunan, i nos ta purba di apliká loke nos ta siña den nos bida. Nos ta Testigunan di Yehova.” E ora ei e hòmber a bisa: “Mi ta un hudiu i un sobrebibiente di e holokousto. Mi ta kòrda ku mi a mira kon Testigunan di Yehova tabata ser persiguí na Alemania. Asta e ora ei nan a sobresalí komo personanan diferente. E kondukta di bo yunan a ègt impreshoná mi. Mi tin ku analisá boso religion.”

Beibel ta un guia ekselente ku ta siña nos kon pa lanta yu. Testigunan di Yehova ta masha interesá pa yuda otro hende benefisiá di e guia ku nos ta haña den e Skritura. Nos ta invitá bo kalorosamente pa reakshoná riba e siguiente oferta.