Pregunta di Lektor

Kon bin Samsòn por a mishi ku kadaver di bestia ku el a mata i tòg keda un nazareo?

Den Israel di antigwedat, un persona por a hasi un voto boluntariamente i bira un nazareo pa un sierto periodo di tempu. * Un di e restrikshonnan ku un persona ku a hasi e voto aki mester a tene kuenta kuné tabata: “Tur e dianan di su separashon na SEÑOR e no mag yega serka di un morto. E no mester hasi su mes impuru pa su tata ni pa su mama, pa su ruman hòmber ni pa su ruman muhé ora nan muri.” Pero kiko si un hende “muri repentinamente banda di dje”? Den un kaso asina ora e hañ’é aksidentalmente ta mishi ku un kadaver, esaki lo a kontaminá su posishon komo nazareo. P’esei e lei a stipulá: “E dianan promé lo keda anulá.” E mester pasa dor di un seremonia di purifikashon i kuminsá su periodo di nazareo di nobo.—Numbernan 6:6- 12.

Sin embargo, Samsòn tabata nazareo den un otro sentido. Promé ku Samsòn a nase, e angel di Yehova a bisa su mama: “Mira, lo bo konsebí i duna lus na un yu hòmber, i nabaha lo no pasa riba su kabes, pasobra e mucha lo ta un nazareo pa Dios for di den barika di su mama; i e lo kuminsá libra Israel for di man di e filisteonan.” (Huesnan 13:5) Samsòn no a hasi un voto komo nazareo. Ta Dios mes a nombr’é komo nazareo, i e mester a keda un nazareo henter su bida. E restrikshon relashoná ku mishimentu ku kadaver no por a apliká den su kaso. Si tabata asina i aksidentalmente el a mishi ku un kadaver, kon lo e por a kuminsá di nobo ku un periodo di nazareo pa bida largu ku a kuminsá for di ora ku el a nase? Aparentemente anto, e rekisitonan pa nazareonan pa bida largu den sierto sentido tabata diferente for di esnan pa hendenan ku boluntariamente a bira nazareo.

Konsiderá Yehova su mandamentunan pa e tres nazareonan di bida largu ku Beibel ta menshoná, esta, Samsòn, Samuel i Juan Boutista. Manera nos a mira anteriormente, Samsòn no tabatin mag di kòrta su kabei. Ana a hasi e siguiente voto relashoná ku Samuel, e yu ku e tabata bai haña: “Lo mi dun’é na SEÑOR tur e dianan di su bida, i nunka nabaha lo no pasa riba su kabes.” (1 Samuel 1:11) Den kaso di Juan Boutista, e angel di Yehova a bisa: “E lo no bebe biña ni bebida stèrki.” (Lukas 1:15) Ademas, “Juan aki tabata bistí ku un paña trahá di  lana di kamel, i tabatin un faha di kueru na su sintura; i su kuminda tabata tirakochi i miel di mondi.” (Mateo 3:4) Ningun di e tres personanan aki no a haña e mandato pa no bini den serkania di un kadaver.

Ounke Samsòn tabata un nazareo, e tabata entre e huesnan ku Yehova a lanta pa salba e israelitanan for di man di esnan ku tabata plùnder nan. (Huesnan 2:16) I kumpliendo ku e asignashon aki, el a bin den kontakto ku kadaver. Tabatin un biaha ku Samsòn a dal 30 filisteo mata i a kita nan paña for di nan. Despues el a sigui mata e enemigu “sin miserikòrdia den un gran matansa.” Tambe el a kohe un kakumbein di buriku ku no a seka ainda i a mata mil hòmber kuné. (Huesnan 14:19; 15:8, 15) Samsòn a hasi tur e kosnan aki ku Yehova su aprobashon i apoyo. I e Skritura ta referí na dje komo un hòmber di fe ehemplar.—Hebreonan 11:32; 12:1.

E deklarashon ku ta bisa ku Samsòn a sker un leon “manera hende ta sker un yu di kabritu” na dos, ta indiká ku hende den su tempu tabatin e kustumber di sker lamchi di kabritu for di otro?

No tin ningun evidensia ku ta mustra ku den tempu di e huesnan di Israel tabata normal pa hende sker lamchi di kabritu for di otro. Huesnan 14:6 ta bisa: “I e spiritu di SEÑOR a bin riba [Samsòn] ku poder, asina ku el a sker e leon [“na dos,” NW] manera hende ta sker un yu di kabritu, ounke ku e no tabatin nada den su man.” Probablemente e komentario aki ta un ilustrashon.

E ekspreshon ‘el a sker e na dos’ por tin dos nifikashon. Sea Samsòn a sker e kakumbein di e leon for di otro, òf di un òf otro manera el a sker e leon na pida-pida. Si ta e promé opshon tabata e kaso, hende tambe por hasi esei ku un lamchi di kabritu. Den e kaso aki, e ilustrashon ta indiká ku Samsòn por a mata un leon ku su mannan ku mesun fasilidat ku lo el a mata un lamchi di kabritu. Sin embargo, kiko si Samsòn a mata e leon dor di sker e na pida-pida? E ora ei nos lo tin ku komprondé ku e komentario aki ta un metáfora. E punto ku nos mester saka for di e metáfora aki ta ku e spiritu di Yehova a duna Samsòn poder pa efektuá un tarea ku ta rekerí forsa físiko ekstraordinario. Den tur dos opshon e komparashon na Huesnan 14:6 ta mustra ku debí na e forsa ku Yehova a duna Samsòn, un leon poderoso no tabata mas feros p’e ku un lamchi di kabritu lo tabata pa un persona ku forsa normal.

[Nota]