E Palabra di Yehova Ta Bibu

Puntonan Sobresaliente di e Buki di Huesnan

KON Yehova ta reakshoná ora su propio pueblo bira lomba p’e i kuminsá adorá dios falsu? Kiko si kada bes nan ta desobedes’é i ta buska su yudansa solamente ora nan ta den pèrtá? Yehova ta perkurá un eskape pa nan asta na momentunan asina? E buki di Huesnan ta kontestá e preguntanan aki i tambe otro mas di sumo importansia. Profeta Samuel ta esun ku a skirbi e buki rònt di aña 1100 promé ku nos era, i e susesonan ku e ta relatá ta abarká un periodo di 330 aña, esta, for di e morto di Josué te na entronisashon di e promé rei di Israel.

Komo parti di e palabra òf mensahe poderoso di Dios, e buki di Huesnan ta di gran balor pa nos. (Hebreonan 4:12) E relatonan eksitante registrá den dje ta yuda nos komprondé e personalidat di Dios mas mihó. E lèsnan ku nos ta siña for di nan ta fortalesé nos fe i ta yuda nos haña un gara firme riba e ‘berdadero bida,’ esta, bida eterno den e mundu nobo ku Dios a primintí. (1 Timoteo 6:12, 19; 2 Pedro 3:13) Yehova su aktonan di salbashon na fabor di su pueblo ta duna nos un bista adelantá di e liberashon mas grandi ku su Yu, Hesukristu, lo bai efektuá den futuro.

PAKIKO TABATIN MESTER DI HUES?

(Huesnan 1:1–3:6)

Despues ku e reinan di e tera di Kánaan a wòrdu derotá bou di e liderato di Josué, e tribunan individual di Israel a bai na nan herensia i a tuma e tera den nan poder. Sin embargo, e israelitanan no a saka tur e habitantenan for di e tera. E fayo aki a bira un berdadero trampa pa Israel.

E generashon ku a bini despues di e dianan di Josué “no tabata konosé SEÑOR, ni e obra ku el a hasi pa Israel.” (Huesnan 2:10) Ademas, e pueblo a kuminsá kasa ku e kananeonan i adorá nan diosnan. Dor di esei Yehova a entregá e israelitanan den man di nan enemigunan. Ma ora e opreshon tabata bira hopi fuerte, e yunan di Israel tabata invoká e Dios berdadero pa yudansa. Ta den e ambiente religioso, sosial i polítiko aki e relato di un seri di hues ku Yehova a lanta pa salba su pueblo for di nan enemigunan, ta desaroyá.

Kontesta Riba Pregunta Bíbliko:

1:2, 4—Dikon Yehova a apuntá Huda komo e promé tribu pa tuma e tera asigná na dje den su poder? Normalmente, e privilegio aki lo a bai p’e tribu di Ruben, promé yu di Jakòb. Pero ora Jakòb tabata na su kama di morto, el a profetisá ku Ruben lo no a sobresalí pasobra el a pèrdè su derecho komo primogénito. Anto Simeon i Leví, kendenan a aktua ku krueldat, mester a wòrdu plamá den Israel. (Génesis 49:3-5, 7) P’esei, e siguiente yu ku a bini na remarke tabata Huda, e di kuater yu di Jakòb. Simeon, ku a subi bai huntu ku Huda, a risibí áreanan chikí di tereno tur plamá den e teritorio grandi di Huda. *—Josué 19:9.

1:6, 7—Pakiko nan tabata kap dùim i dede grandi di pia di e reinan derotá kita afó? Aparentemente un hende ku a pèrdè su dùimnan i dede grandinan di pia no tabata kapas mas pa bai guera. Kon un sòldá lo por a manehá un spada òf lansa sin su dùimnan? I e pèrdida di e dede grandi di pia lo a strob’é di mantené su ekilibrio na un manera adekuá.

Lès pa Nos:

2:10-12. Pa nos ‘no lubidá Yehova su echonan,’ nos mester tin un programa regular di studio di Beibel. (Salmo 103:2, NW) Mayornan  tin ku inkulká e bèrdat di e Palabra di Dios den kurason di nan yunan.—Deuteronomio 6:6-9.

2:14, 21, 22. Yehova ta permití mal kosnan sosodé ku su pueblo desobediente pa un propósito: pa disipliná, refiná i motivá nan pa bolbe bèk na dje.

YEHOVA TA LANTA HUESNAN

(Huesnan 3:7–16:31)

E relato eksitante di e hazañanan di e huesnan ta kuminsá ora Otoniel a pone fin na Israel su sumishon di ocho aña na un rei di Mesopotamia. Hues Aod a mata Eglon, e rei moabita gordo, pa medio di un strategia ku a eksigí kurashi. E balente Samgar, su so a mata 600 filisteo ku un palu pa suta baka. Ku e animashon di Débora, kende a sirbi komo profeta muhé, i ku e respaldo di Yehova, Barak ku su ehérsito di dies mil hòmber levemente armá a aplastá e ehérsito poderoso di Sísara. Tambe Yehova a lanta Gideon i a duna e ku su 300 hòmbernan viktoria riba e madianitanan.

Pa medio di Jefte, Yehova a libra Israel for di e amonitanan. Den e 12 hòmbernan ku a sirbi komo hues den Israel tabatin tambe Tola, Jair, Ibzan, Elon i Abdon. E periodo di e huesnan a terminá ku Samson, kende a bringa kontra e filisteonan.

Kontesta Riba Pregunta Bíbliko:

4:8—Pakiko Barak a insistí pa profeta Débora bai kuné n’e kampo di bataya? Aparentemente, Barak a sinti ku su so e no tabata sufisiente fuerte pa enfrentá e ehérsito di Sísara. E echo ku e por tabatin e profeta huntu kuné a sigurá tantu e komo su hòmbernan ku nan tabatin e guia di Dios i esei lo a duna nan konfiansa. Pues e insistensia di Barak pa Débora kompañ’é no tabata un señal di debilidat sino di fe firme.

5:20—Kon e streanan a lucha for di shelu na fabor di Barak? Beibel no ta bisa si esaki tabatin di haber ku yudansa di angel, òf yobida di meteorit ku e sabionan di Sísara a mira komo un señal di kalamidat, òf tal bes pronostikashon astrológiko pa Sísara ku a resultá di ta inkorekto. Ma un kos ta sigur, di un òf otro manera Dios a intervení.

7:1-3; 8:10—Pakiko Yehova a bisa ku e 32.000 hòmbernan di Gideon tabata muchu hopi kontra e forsa enemigu di 135.000 sòldá? Esaki ta pasobra ta Yehova tabata bai duna Gideon i su hòmbernan e viktoria. Dios  no tabata ke pa nan pensa ku nan a derotá e madianitanan riba nan mes forsa.

11:30, 31—Ora Jefte a hasi su promesa, e tabatin un sakrifisio humano na mente? Jefte lo no a pensa mes riba algu asina, pasobra e Lei a stipulá: “Entre boso no mag wòrdu hañá ningun hende ku ta hasi su yu hòmber òf su yu muhé pasa dor di kandela.” (Deuteronomio 18:10) Sin embargo, loke sí Jefte tabatin na mente ta un persona i no un bestia. E israelitanan lo no a tene bestianan adekuá pa usa komo sakrifisio na kas. I ofrenda di un bestia lo no tabata nada eksepshonal. Jefte tabata konsiente ku e persona ku lo a sali for di su kas pa bin top’é lo por tabata su mes yu muhé. Lo e mester a ofresé esaki komo “un ofrenda kimá” den sentido ku lo el a dediká e persona ei na e sirbishi eksklusivo di Yehova en konekshon ku e santuario.

Lès pa Nos:

3:10. Éksito den aktividatnan spiritual no ta dependé di sabiduria humano, sino di Yehova su spiritu.—Salmo 127:1.

3:21. Aod a usa su spada di un manera ábil i ku kurashi. Nos mester bira ábil den usa “e spada di e spiritu, kual ta e palabra di Dios.” Esaki ta nifiká ku nos mester usa e Skritura ku kurashi den nos ministerio.—Efesionan 6:17; 2 Timoteo 2:15.

6:11-15; 8:1-3, 22, 23. E modestia di Gideon ta siña nos tres lès importante: (1) Ora nos haña un privilegio di sirbishi, nos mester reflekshoná riba e responsabilidat ku esaki ta enserá en bes di riba e prominensia òf prestigio ku esei lo por trese kuné. (2) Ora nos ta trata ku hende ku ta gusta pleita, ta sabí pa nos ta modesto. (3) Modestia ta yuda nos evitá di preokupá muchu ku puesto.

6:17-22, 36-40. Nos tambe mester ta kouteloso i “no kere tur ekspreshon inspirá.” En bes di esei, nos tin ku pone nan “na prueba pa mira si nan ta originá di Dios.” (1 Juan 4:1, NW) Pa un ansiano kristian nobo hasi sigur ku e konseho ku e tin planiá pa duna ta basá firmemente riba e Palabra di Dios, ta sabí pa e konsultá ku un ansiano ku tin mas eksperensia.

6:25-27. Gideon a usa diskreshon pa asina e no a pone su opositornan rabia innesesariamente. Ora nos ta prediká e bon nobo, nos mester tene kuidou pa e manera ku nos ta papia no ofendé otro hende innesesariamente.

7:6. Relashoná ku nos sirbishi na Yehova, nos mester ta manera e 300 hòmbernan di Gideon—atento i vigilante.

9:8-15. Ta hopi bobo di nos parti pa aktua ku orguyo i ambishoná posishon òf poder!

11:35-37. Sin duda, e bon ehèmpel di Jefte a  kontribuí hopi na yuda su yu muhé desaroyá un fe firme i un spiritu di sakrifisio propio. Awe mayornan por pone un ehèmpel asina pa nan yunan.

11:40. Ora bo nota ku un ruman ta manifestá un spiritu dispuesto den Yehova su sirbishi, elogi’é [NW]; esei ta anim’é.

13:8. Ora mayornan ta siña nan yunan, nan mester pidi Yehova su guia i sigui su instrukshon.—2 Timoteo 3:16.

14:16, 17; 16:16. Algu ku por daña bo relashon ku un hende ta ora bo ta pone preshon riba dje dor di yor’é i kansa su kabes.—Proverbionan 19:13; 21:19.

OTRO VIOLASHONNAN DI LEI DEN ISRAEL

(Huesnan 17:1–21:25)

E último parti di e buki di Huesnan ta kontené dos relato sobresaliente. E promé tin di haber ku un hòmber ku yama Mikaia, kende a pone un dios falsu den su kas i a usa un levita pa fungi komo saserdote p’e. Despues di destruí e stat di Lais (òf Lesem), e danitanan a konstruí nan mes stat i a yam’é Dan. Usando e dios falsu di Mikaia i su saserdote, nan a establesé un otro forma di adorashon na Dan. Evidentemente, Lais a wòrdu kapturá promé ku Josué a muri.—Josué 19:47.

E di dos suseso a tuma lugá no hopi tempu despues di e morto di Josué. Un krímen seksual grave ku algun hòmber di e stat benjaminita di Gabaa a kometé kasi a hiba n’e destrukshon di henter e tribu di Benjamin; 600 hòmber so a sobrebibí. Sin embargo, un areglo práktiko a permití nan haña esposa, i pa tempu di e reinado di David, ya nan kantidat a oumentá te kasi 60.000 guerero.—1 Krónikanan 7:6-11.

Kontesta Riba Pregunta Bíbliko:

17:6; 21:25—Si ‘kada hende tabata hasi loke ta bon den nan mes bista,’ esaki no a fomentá un situashon di anarkia? No nesesariamente, pasobra Yehova a hasi vários areglo pa guia su pueblo. El a duna nan e Lei i e saserdosio pa eduká nan den su kaminda. Pa medio di e Urim i e Tumim, e sumo saserdote por a buska e guia di Dios riba asuntunan importante. (Eksodo 28:30) Ademas, tur stat tabatin ansianonan kapas pa duna konseho sano. Ora un israelita a hasi uso di e areglonan aki, e tabatin un guia sano pa su konsenshi. Si el a “hasi loke tabata bon den su mes bista” den e manera aki, lo a bai bon kuné. Di otro banda, si un persona a ignorá e Lei i a tuma su mes desishonnan tokante kondukta i adorashon, e resultado tabata malu.

20:17-48—Pakiko Yehova a laga e benjaminitanan derotá e otro tribunan dos bes, maske e benjaminitanan mes mester a ser kastigá? Dor di laga e tribunan fiel sufri derotanan grandi na prinsipio, Yehova a tèst nan pa wak kon determiná nan tabata pa kaba ku maldat den Israel.

Lès pa Nos:

19:14, 15. E echo ku e pueblo di Gabaa no tabata dispuesto pa mustra hospitalidat tabata un indikashon di defisiensia moral. Beibel ta manda kristiannan pa ‘praktiká hospitalidat.’—Romanonan 12:13.

Liberashon Ta Serka

Ta falta masha poko pa e Reino di Dios den man di Kristu Hesus destruí e mundu malbado aki i trese un gran liberashon pa hende rekto i sin kulpa. (Proverbionan 2:21, 22; Daniel 2:44) ‘Tur Yehova su enemigunan lo peresé, ma esnan ku ta stim’é lo ta manera solo ku ta sali den tur su forsa.’ (Huesnan 5:31) Laga nos resultá di ta entre e personanan ku ta stima Yehova dor di apliká loke nos a siña for di e buki di Huesnan.

E bèrdat fundamental ku ta keda demostrá bes tras bes den e relatonan di Huesnan ta esaki: Obedesé Yehova ta hiba na bendishon riku, desobedensia na konsekuensianan kalamitoso. (Deuteronomio 11:26-28) Pues anto, ta masha importante pa nos bira “obedesidu di kurason” n’e boluntat di Dios ku el a revelá na nos.—Romanonan 6:17; 1 Juan 2:17.

[Nota]

[Mapa na página 25]

(Pa e teksto den su formato kompleto, wak e publikashon)

‘Yehova a lanta huesnan ku a libra nan for di man di esnan ku tabata plùnder nan.’—Huesnan 2:16

HUESNAN

1. Otoniel (Tribu di Manasés)

2. Aod (Tribu di Huda)

3. Samgar (Tribu di Huda)

4. Barak (Tribu di Nèftalí)

5. Gideon (Tribu di Isakar)

6. Tola (Tribu di Manasés)

7. Jair (Tribu di Manasés)

8. Jefte (Tribu di Gad)

9. Ibzan (Tribu di Asher)

10. Elon (Tribu di Zabulon)

11. Abdon (Tribu di Efrain)

12. Samson (Tribu di Huda)

DAN

MANASÉS

NÈFTALÍ

ASER

ZABULON

ISAKAR

MANASÉS

GAD

EFRAIN

DAN

BENJAMIN

RUBEN

HUDA

[Plachi na página 26]

Ki lès bo a siña for di e echo ku Barak a insistí pa Débora bai n’e kampo di bataya?