Vishonnan di e Reino di Dios Ta Bira Realidat

“Boso ta hasi bon di pone atenshon [na e palabra profétiko], komo na un lampi ku ta lusa den un lugá skur.”—2 PEDRO 1:19.

1. Ki kontraste nos ta haña den e mundu djawe?

KRÍSIS tras di krísis—esei ta un di e tópikonan prinsipal di e mundu djawe. Sea ta desasternan ekológiko òf terorismo mundial, ta parse ku e problemanan di humanidat ta saliendo kompletamente for di man. Ni e religionnan di mundu no por yuda. Es mas, hopi bes nan ta empeorá e situashon dor di fomentá e prehuisio, odio i nashonalismo ku ta dividí hende. Sí, manera Isaias a profetisá, “skuridat profundo” a tapa “pueblonan.” (Isaias 60:2) Sin embargo, na mes momentu tin miónes di hende ta wak futuro ku konfiansa. Dikon? Wèl, pasobra nan ta presta atenshon n’e palabra profétiko di Dios manera “na un lampi ku ta lusa den un lugá skur.” Nan ta permití e “palabra,” òf mensahe, di Dios ku nos por haña den Beibel, guia nan pasonan.—2 Pedro 1:19.

2. Segun e profesia di Daniel tokante “e tempu di e fin,” ken so lo komprondé kosnan spiritual?

² Relashoná ku “e tempu di e fin,” profeta Daniel a skirbi: “Hopi hende lo kore pariba-pabou, i konosementu lo oumentá. Hopi lo wòrdu limpiá, purifiká i refiná; ma e malbadonan lo hasi maldat, i ningun di e malbadonan lo komprondé, ma esnan ku tin disernimentu lo komprondé.” (Daniel 12:4, 10) Únikamente e hendenan ku realmente ta “kore pariba-pabou” den e Palabra di Dios, esta, ku ta studia esaki diligentemente, someté nan mes na Dios su normanan i hasi esfuerso pa kumpli ku su boluntat, ta komprondé kosnan spiritual.—Mateo 13:11-15; 1 Juan 5:20.

3. Durante dékada di 1870, ki bèrdat importante e studiantenan di Beibel di e tempu ei a diserní?

³ For di dékada di 1870, promé ku “e último dianan” a kuminsá, Yehova Dios a kuminsá tira mas lus riba “e sekretonan sagrado dje reino di shelu.” (2 Timoteo 3:1-5; Mateo 13:11, NW) E tempu ei un grupo di studiante di Beibel a diserní—kontrali n’e opinion general ku a reina—ku Kristu lo a bin bèk na un manera invisibel. Despues ku e ser entronisá  den shelu, Hesus lo a bin bèk den sentido ku lo el a dirigí su atenshon na tera komo e Rei di tera. Un señal visibel, konsistiendo di un kombinashon di kosnan, lo a alertá su disipelnan ku su presensia invisibel a kuminsá.—Mateo 24:3-14.

Ora un Vishon Bira Realidat

4. Kon Yehova a fortalesé e fe di su sirbidónan di aktualidat?

⁴ E vishon di e transfigurashon tabata un bista briante di Kristu den su futuro gloria di Reino. (Mateo 17:1-9) E vishon ei a fortalesé e fe di Pedro, Santiago i Juan na un tempu ku hopi hende a stòp di sigui Hesus pa motibu ku e no a kumpli ku nan ekspektativanan sin base bíbliko. Meskos awe den e tempu di fin aki, Yehova a fortalesé e fe di su sirbidónan di aktualidat dor di laga nan haña un mihó komprondementu di e vishon impreshonante ei i hopi profesia relashoná kuné. Laga nos konsiderá awor algun di e realidatnan spiritual aki ku ta fortalesé nos fe.

5. Ken a resultá di ta e Strea di Mardugá, i na ki tempu i kon el a “sali”?

⁵ Refiriendo n’e transfigurashon, apòstel Pedro a skirbi: “Asina nos tin e palabra profétiko pa mas siguransa, na kual boso ta hasi bon di pone atenshon, komo na un lampi ku ta lusa den un lugá skur, te ora dia habri i e strea di mardugá sali den boso kurason.” (2 Pedro 1:19) E Strea di Mardugá figurativo ei, òf “e strea briante di mardugá,” ta Hesukristu glorifiká. (Revelashon 22:16) El a “sali” na 1914 ora e Reino di Dios a nase den shelu, markando e ourora di un era nobo. (Revelashon 11:15) Den e vishon di e transfigurashon, Moisés i Elias a aparesé banda di Hesus ta kòmbersá kuné. Ken nan ta prefigurá?

6, 7. Ken Moisés i Elias ta representá den e transfigurashon, i ki detayenan importante e Skritura ta revelá tokante e personanan ku nan ta representá?

⁶ Siendo ku Moisés i Elias tambe tabata parti di e gloria di Kristu, e dos testigunan fiel aki mester ta representá e personanan ku ta goberná ku Hesus den su Reino. E komprondementu ku tin otro personanan ta goberná ku Hesus ta kuadra ku e vishon ku profeta Daniel a haña di e Mesias entronisá. Daniel a mira “manera un yu di hende” risibí ‘un reino eterno’ for di “e Ansiano di Dianan,” Yehova Dios. Pero ripará kiko Daniel ta mira djis despues. El a skirbi: “E soberania, e dominio i e grandesa di tur e reinonan bou di henter shelu lo wòrdu duná na e pueblo di e santunan di e Haltísimo.” (Daniel 7:13, 14, 27) Sí, mas ku sinku siglo promé ku e transfigurashon, Dios a revelá ku sierto “santunan” lo a partisipá den e grandesa real di Kristu.

⁷ Ken ta e santunan den e vishon di Daniel? En konekshon ku e personanan ei apòstel Pablo a bisa: “E spiritu mes ta duna testimonio huntu ku nos spiritu ku nos ta yu di Dios, i si nos ta yu, nos ta heredero tambe, heredero di Dios i ko-heredero ku Kristu, si di bèrdat nos ta sufri huntu kuné, pa nos wòrdu glorifiká tambe huntu kuné.” (Romanonan 8:16, 17) Pues anto, e santunan ta Hesus su disipelnan ungí ku spiritu. Den e buki di Revelashon, Hesus a bisa: “Esun ku vense, lo mi permitié sinta huntu ku mi riba mi trono, meskos ku ami tambe a vense i a sinta huntu ku mi Tata riba su trono.” Hesus huntu ku e ‘vensedónan’ resusitá aki ku na tur ta 144.000, lo goberná riba henter tera.—Revelashon 3:21; 5:9, 10; 14:1, 3, 4; 1 Korintionan 15:53.

8. Kon Hesus su disipelnan ungí a hasi e mesun trabou ku Moisés i Elias a hasi, i ku ki resultado?

⁸ Pero pakiko a usa Moisés i Elias pa representá e kristiannan ungí? E motibu ta ku miéntras e kristiannan ei ta den karni ainda,  nan ta hasi e mesun trabou ku Moisés i Elias a hasi. Por ehèmpel, nan ta sirbi komo testigu di Yehova asta ora nan ta wòrdu persiguí. (Isaias 43:10; Echonan 8:1-8; Revelashon 11:2-12) Meskos ku Moisés i Elias, ku kurashi nan ta desenmaskará religion falsu miéntras nan ta urgi hende sinsero pa duna Dios deboshon eksklusivo. (Eksodo 32:19, 20; Deuteronomio 4:22-24; 1 Reinan 18:18-40) Nan trabou a duna fruta? Sigur ku sí! Ademas di yuda kompletá e kantidat di ungínan ku tabata falta, nan a yuda miónes di ‘otro karné’ someté nan mes boluntariamente na Hesukristu.—Juan 10:16; Revelashon 7:4.

Kristu Ta Kompletá Su Viktoria

9. Kon Revelashon 6:2 ta deskribí Hesus manera e ta awe?

⁹ Aworakí Hesus ta un Rei poderoso, no djis un hende sintá riba lomba di un yu di buriku. E ta ser deskribí komo koriendo riba un kabai, i den Beibel kabai ta un símbolo di guera. (Proverbionan 21:31) Revelashon 6:2 ta bisa: “Ata un kabai blanku, i esun ku tabata sintá riba dje tabatin un bog; i un korona a wòrdu duná na dje, i el a sali konkistando, i pa konkistá [òf, “kompletá su viktoria,” NW].” Ademas, e salmista David a skirbi relashoná ku Hesus: “SEÑOR lo ekstendé bo sèpter poderoso for di Sion, bisando: ‘Goberná meimei di bo enemigunan.’”—Salmo 110:2.

10. (a) Kon Hesus su kareda di viktoria a kuminsá na un manera glorioso? (b) Kon e promé viktoria di Kristu a afektá humanidat en general?

¹⁰ Hesus su promé viktoria tabata riba su enemigunan di mas poderoso, esta, Satanas i su demoñonan. El a saka nan for di shelu i tira nan riba tera. Sabiendo ku nan tempu ta kòrtiku, e spiritunan malbado aki a baha tur nan rabia violento riba humanidat, kousando gran sufrimentu. Den e buki di Revelashon e sufrimentu aki ta ser simbolisá pa tres ginete mas. (Revelashon 6:3-8; 12:7-12) Na armonia ku Hesus su profesia relashoná ku “e señal di [su] binida i di e fin di tempu,” e kareda di e ginetenan aki a resultá den guera, hamber i plaga mortal. (Mateo 24:3, 7; Lukas 21:7-11) Sin duda, e “dolónan di parto” aki lo sigui bira mas fuerte te ora Kristu “kompletá su viktoria” dor di destruí tur rastro di e organisashon visibel di Satanas. *—Mateo 24:8.

11. Kon e historia di e kongregashon kristian ta duna testimonio di e outoridat ku Kristu tin komo rei?

¹¹ Hesus su outoridat komo rei ta bisto  tambe den e echo ku el a protehá e kongregashon kristian pa esaki por kumpli ku su enkargo di prediká e mensahe di Reino rònt mundu. Apesar di oposishon kruel di parti di Babilonia e Grandi—e imperio mundial di religion falsu—i di parti di gobièrnunan hostil, e trabou di prediká no solamente a kontinuá sino a alkansá tambe un eskala nunka bisto den historia di mundu. (Revelashon 17:5, 6) Esaki ta un testimonio poderoso ku Kristu su reinado ta un realidat!—Salmo 110:3.

12. Pakiko mayoria hende no ta diserní e presensia invisibel di Kristu?

¹² Pero lamentablemente, mayoria hende, inkluso miónes di esnan ku ta bisa ku nan ta kristian, no ta diserní e realidatnan invisibel tras di e susesonan históriko ku ta tumando lugá riba tera. Nan ta asta hasi bofon di esnan ku ta proklamá e Reino di Dios. (2 Pedro 3:3, 4) Kon bin? Pasobra Satanas a siega nan mente. (2 Korintionan 4:3, 4) En realidat, for di hopi siglo pasá el a kuminsá tira e velo di skuridat spiritual riba supuesto kristiannan, i asta a pone nan bira lomba pa e speransa presioso di Reino.

Hende Ta Bira Lomba pa e Speransa di Reino

13. Na kiko e velo di skuridat spiritual a hiba?

¹³ Hesus a profetisá ku apóstatanan, meskos ku yerba shimaron sembrá entre trigu, lo a penetrá den e kongregashon kristian i desviá hopi miembro. (Mateo 13:24-30, 36-43; Echonan 20:29-31; Hudas 4) E supuesto kristiannan aki ku tempu a tuma over fiesta-, kustumber- i siñansanan pagano i asta a katalogá nan komo “kristian.” Por ehèmpel, Pasku tin su orígen den ritonan ku tin di haber ku adorashon di e diosnan falsu Mitra i Saturno. Pero kiko a pone e supuesto kristiannan aki bin riba e idea pa tuma e selebrashonnan no-kristian aki over? The New Encyclopædia Britannica (1974) ta bisa: “A establesé Pasku, fiesta di nasementu di Hesukristu, pa motibu ku e gran ekspektativa ku Kristu lo a bolbe pronto a baha konsiderablemente.”

14. Kon e siñansanan di Orígenes i Agustin a trose e bèrdat di Reino?

¹⁴ Konsiderá tambe kon nan a trose e nifikashon di e palabra “reino.” E buki The Kingdom of God in 20th-Century Interpretation (E  Reino di Dios Segun Interpretashon di Siglo 20) ta deklará: “Ta Orígenes [un teólogo di siglo 3] a kambia e manera ku kristiannan tabata usa e palabra ‘reino’ pa e nifiká ku Dios ta reina den kurason di hende.” Riba kiko Orígenes a basa su siñansa? No riba e Skritura, sino riba “e kuadro di un filosofia i punto di bista di mundu ku ta bastante diferente for di e pensamentu di Hesus i e promé iglesia.” Agustin di Hipo (di aña 354-430 di nos era) a deklará den su obra De Civitate Dei (E Stat di Dios) ku e iglesia mes ta e Reino di Dios. E pensamentu no-bíbliko ei a duna e iglesianan di kristiandat un base teológiko pa asumí poder polítiko. I nan a ehersé e poder ei pa vários siglo, hopi bes na un manera kruel.—Revelashon 17:5, 18.

15. Kon Galationan 6:7 a kumpli riba hopi di e iglesianan di kristiandat?

¹⁵ Sin embargo, awe iglesianan ta kosechando loke nan a sembra. (Galationan 6:7) Hopi di nan aparentemente ta pèrdiendo tantu nan poder komo nan parokianonan. E tendensia ei ta bastante notabel na Europa. E revista Christianity Today a bisa: “Awor e katedralnan grandi di Europa no [ta] fungi mas komo lugá di adorashon sino komo museo. Turista so ta bishitá nan.” Na otro partinan di mundu por nota e mesun tendensia. Kiko esaki ta nifiká pa religion falsu? Lo e simplemente kaba na nada pa falta di apoyo? I ki efekto esei lo tin riba adorashon berdadero?

Prepará pa e Gran Dia di Dios

16. Pakiko e kresiente enemistat kontra Babilonia e Grandi ta signifikativo?

¹⁶ Ora un volkan inaktivo kuminsá saka huma ku shinishi, esei ta un spièrtamentu ku un ora pa otro e por eksplotá. Asina tambe e enemistat kresiente kontra religion den hopi parti di mundu ta un indikashon ku e dianan di religion falsu ta kontá. Pronto, Yehova lo pone e elementonan polítiko di mundu uni forsa pa desenmaskará i destruí e prostituta spiritual, Babilonia e Grandi. (Revelashon 17:15-17; 18:21) Kristiannan berdadero mester tin miedu di e suseso ei i di e otro kosnan ku e “gran tribulashon” lo trese kuné? (Mateo 24:21) Nò! Al kontrario, nan lo tin motibu pa alegrá ora Dios aktua kontra e malbadonan. (Revelashon 18:20; 19:1, 2) Konsiderá e ehèmpel di Yerusalèm di promé siglo i di e kristiannan ku tabata biba aya.

17. Pakiko Yehova su fiel sirbidónan por enfrentá e fin di e sistema di kosnan aki ku konfiansa?

¹⁷ Ora e trupanan romano a sitia Yerusalèm na aña 66 di nos era, esei no a kohe e kristiannan spiritualmente alerta di sorpresa, ni nan no a spanta. Komo bon studiante di e Palabra di Dios, nan tabata sa ‘ku su desolashon tabata serka.’ (Lukas 21:20) Nan tabata sa tambe ku Dios lo a habri kaminda pa nan hui bai na un lugá sigur. Ora esei en bèrdat a sosodé, e kristiannan a hui. (Daniel 9:26; Mateo 24:15-19; Lukas 21:21) Meskos awe tambe, hende ku konosé Dios i ku ta obedesé su Yu por enfrentá e fin di e sistema di kosnan aki ku konfiansa. (2 Tesalonisensenan 1:6-9) De echo, ora e gran tribulashon kuminsá, ku goso nan lo stret nan kurpa i ‘lanta nan kabes, pasobra nan redenshon ta yegando serka.’—Lukas 21:28.

18. Kiko lo ta e resultado di Gòg su atake final direkto kontra Yehova su sirbidónan?

¹⁸ Despues di e destrukshon di Babilonia e Grandi, Satanas, den su papel di Gòg di Magòg, lo lansa un atake final direkto kontra e Testigunan pasífiko di Yehova. E trupanan di Gòg ku ta pasa “manera un nubia ku ta tapa tera” lo kere ku nan por haña un viktoria fásil. Wèl, nan ta gran kiboká! (Ezekiel 38:14-16, 18-23) Apòstel Juan a skirbi: “Mi a mira shelu habrí; i ata un kabai blanku, i esun ku tabata sintá riba dje ta wòrdu yamá Fiel i Berdadero . . . For di su boka ta sali un spada skèrpi pa e dal e nashonnan kuné.” E “Rei di Reinan” invensibel aki lo reskatá Yehova su adoradónan leal i kaba ku tur nan  enemigunan. (Revelashon 19:11-21) Esei lo ta e gran kulminashon di e kumplimentu di e vishon di e transfigurashon!

19. Ki efekto e viktoria total di Kristu lo tin riba su disipelnan leal, i kiko nan mester purba hasi awor?

¹⁹ “Riba e dia ei, [Hesus lo] wòrdu atmirá dor di tur esnan ku a kere.” (2 Tesalonisensenan 1:10) Abo lo ke ta entre e personanan ku lo tin un rèspèt profundo i atmirashon pa e Yu di Dios viktorioso? Awèl sigui fortalesé bo fe i ‘sea prepará, pasobra e Yu di hende lo bin na un ora ku bo no ta pensa.’—Mateo 24:43, 44.

Mantené Bo Huisio

20. (a) Kon nos por mustra nos apresio pa e echo ku Dios a perkurá “e esklabo fiel i prudente”? (b) Kiko nos tin ku puntra nos mes?

²⁰ “E esklabo fiel i prudente” ta spièrta e pueblo di Dios regularmente pa keda spiritualmente alerta i pa mantené nan sano huisio. (Mateo 24:45, 46; 1 Tesalonisensenan 5:6) Abo ta apresiá e rekordatorionan oportuno aki? Bo ta usa nan pa fiha prioridat den bida? Puntra bo mes: ‘Mi ta rekonosé bon kla e nifikashon spiritual di susesonan na mundu i e echo ku e Yu di Dios ta gobernando den shelu? Mi ta mir’é kla pa ehekutá huisio divino kontra Babilonia e Grandi i e restu di e mundu di Satanas?’

21. Pakiko algun persona a permití nan vishon spiritual bira dòf, i kiko nan tin ku hasi urgentemente?

²¹ Algun persona ku ta asosiando aworakí ku e pueblo di Yehova a laga nan vishon spiritual bira dòf. Por ta pa falta di pasenshi òf perseveransia, manera a sosodé ku algun disipel di Hesus di promé siglo? Ta preokupashonnan di bida, materialismo òf persekushon a afektá nan? (Mateo 13:3-8, 18-23; Lukas 21:34-36) Podisé algun a haña sierto informashon ku “e esklabo fiel i prudente” a publiká difísil pa komprondé. Si bo ta den un di e situashonnan aki, nos ta animá bo fuertemente pa studia e Palabra di Dios ku un selo renobá i supliká Yehova pa bo por bolbe haña un relashon íntimo i fuerte kuné.—2 Pedro 3:11-15.

22. Ki efekto e konsiderashon di e vishon di e transfigurashon i profesianan relashoná kuné tabatin riba bo?

²² Hustamente na momentu ku e disipelnan di Hesus tabatin mester di ánimo, nan a haña e vishon di e transfigurashon. Awe, nos tin algu muchu mas grandi pa fortalesé nos: e kumplimentu di e vishon espektakular ei i hopi profesia relashoná kuné. Segun ku nos ta kontemplá e realidatnan glorioso aki i nan futuro nifikashon, laga nos tambe ekspresá di henter nos kurason e sintimentunan di apòstel Juan ora el a bisa: “Amèn. Bin, Señor Hesus.”—Revelashon 22:20.

[Nota]

Bo Ta Kòrda?

• Den dékada di 1870, kiko un grupo chikitu di studiante di Beibel a bin komprondé tokante Kristu su regreso?

• Kon e vishon di e transfigurashon a kumpli?

• Ki efekto Hesus su kareda di viktoria tin riba mundu i riba e kongregashon kristian?

• Kiko nos mester hasi pa ta entre esnan ku lo sobrebibí ora Hesus kompletá su viktoria?

[Preguntanan di Estudio]

[Plachinan na página 17]

Un vishon ta bira un realidat

[Plachinan na página 18]

Bo sa kiko a pasa ora Kristu a kuminsá su viktoria?