Yehova Semper Ta Hasi Loke Ta Korekto

“SEÑOR ta hustu den tur su kamindanan.”—SALMO 145:17.

1. Kon bo ta reakshoná ora ku un hende saka un konklushon robes tokante bo, i ki lès nos por siña di tal eksperensia?

HENDE a yega di saka konklushon robes tokante bo, kisas dor di kuestioná bo akshonnan òf motibunan, sin ku nan tabata na haltura di tur echo? Si ta asina, probablemente bo a sinti bo ofendí, i ta di komprondé. For di esaki nos por siña un lès importante: Ta sabí pa nos no bula saka konklushon ora nos no tin e kuadro kompletu di e asuntu.

2, 3. Kon algun hende ta reakshoná riba relatonan bíbliko ku no tin sufisiente detaye pa kontestá tur pregunta, ma sin embargo kiko Beibel ta bisa nos di Yehova?

² Ta bon pa nos tene e lès aki na mente ora ta trata di saka konklushon tokante Yehova Dios. Dikon? Pasobra tin sierto relatonan bíbliko ku na promé instante por parse straño òf inkomprendibel. E relatonan aki—podisé tokante loke algun adoradó di Dios a hasi òf tokante Dios su huisionan di pasado—kisas no ta kontené sufisiente detaye pa kontestá tur nos preguntanan. Lamentablemente, tin hende ta kritiká tal relato, i asta ta kuestioná si Dios ta hustu i rekto. Sin embargo, Beibel ta bisa nos ku Yehova “ta hustu den tur su kamindanan.” (Salmo 145:17) Su Palabra tambe ta sigurá nos ku e “no ta aktua na manera inhustu.” (Jòb 34:12; Salmo 37:28) Pues imaginá bo, kon Dios lo mester ta sinti ora ku hende ta saka konklushon robes tokante dje!

³ Laga nos konsiderá sinku motibu pakiko nos mester aseptá e huisionan di Yehova. Anto kaba, ku e motibunan ei na mente, nos lo analisá dos relato bíbliko ku algun hende ta haña difísil pa komprondé.

Pakiko Aseptá e Huisionan di Yehova?

4. Dikon nos mester ta humilde ora nos ta konsiderá e akshonnan di Dios? Ilustrá esei.

⁴ Na promé lugá, nos mester ta humilde ora nos ta konsiderá e akshonnan di Dios ya ku Yehova sa tur e echonan enbolbí i nos sí no sa nan. Por ehèmpel: Imaginá bo ku un hues ku tin un registro sobresaliente di ta tuma desishonnan imparsial, a dikta un sentensia den un kaso. Kiko lo bo pensa di un persona ku ta krítika e hues su desishon sin ku e ta na haltura di tur echo òf sin ku realmente e ta komprondé e leinan enbolbí? Lo ta bobo pa un hende kritiká un asuntu sin ku e tin tur informashon relashoná kuné. (Proverbionan 18:13) Lo ta mas bobo ainda pa simpel ser humano kritiká “e Hues di henter mundu”!—Génesis 18:25.

5. Kiko nos no mester lubidá ora nos ta lesa relatonan bíbliko tokante huisionan ku Dios a ehekutá riba sierto personanan?

⁵ Un di dos motibu pa aseptá e huisionan di Dios ta pasobra distinto for di hende, Dios por lesa kurason. (1 Samuel 16:7) Su Palabra ta deklará: “Ami, SEÑOR, ta skudriñá kurason, mi ta saminá mente, pa duna kada un segun su kondukta, segun e fruta di su echonan.” (Jeremias 17:10) Pues, ora nos ta lesa relatonan bíbliko tokante Dios su huisio riba sierto personanan, laga nos no lubidá ku komo ku Dios ta mira tur kos, el a tuma na kuenta pensamentunan, motibunan i intenshonnan skondí ku no ta ser menshoná den su Palabra.—1 Krónikanan 28:9.

6, 7. (a) Kon Yehova a demostrá ku e ta fiel na su normanan rekto i hustu asta si esei ta nifiká un sakrifisio grandi p’e? (b) Kiko nos mester kòrda si nos lesa algu den Beibel ku ta pone nos puntra nos mes si Dios a aktua den un manera hustu òf korekto?

 ⁶ Tuma nota di un di tres motibu pa aseptá e huisionan di Yehova: E ta fiel na su normanan hustu asta si esei ta nifiká un sakrifisio grandi p’e. Konsiderá un ehèmpel. Na momentu ku Yehova a duna su Yu komo reskate pa libra humanidat obediente for di piká i morto, Yehova a satisfasé su propio normanan hustu i rekto. (Romanonan 5:18, 19) Sin embargo, pa para mira su Yu stimá sufri i muri riba un staka di tormento mester a kousa Yehova e doló di mas grandi ku e por a sinti. Kiko esaki ta konta nos di Dios? Relashoná ku e “reskate ku Kristu Hesus a paga,” Beibel ta bisa: “Esaki tabata afin di demostrá [Dios] su mes hustisia.” (Romanonan 3:24-26, NW) Un otro tradukshon di Romanonan 3:25 ta bisa: “Esaki a mustra ku Dios semper ta hasi loke ta korekto i hustu.” (New Century Version) Sí, e echo ku Yehova tabata dispuesto pa bai asina leu pa perkurá e reskate ta mustra ku e tin sumo rèspèt pa “loke ta korekto i hustu.”

⁷ Pues anto, si nos lesa algu den Beibel ku ta pone algun hende puntra nan mes si Dios a aktua na un manera hustu òf korekto, nos mester kòrda esaki: Yehova ta asina fiel na su normanan di hustisia i rektitut ku e no a spar ni su propio Yu di un morto doloroso. Akaso lo e komprometé e normanan ei den otro asuntu? Echo ta ku Yehova nunka ta violá su normanan hustu i rekto. Pues nos tin motibu amplio pa ta konvensí ku semper e ta hasi loke ta korekto i hustu.—Jòb 37:23.

8. Dikon lo no ta kuadra pa hende imaginá ku di un manera òf otro Yehova falta hustisia i rektitut?

⁸ Konsiderá un di kuater motibu pakiko nos tin ku aseptá e huisionan di Yehova: Yehova a traha hende den Su imágen. (Génesis 1:27) Pues hende a ser kreá ku atributonan meskos ku esnan di Dios, entre nan, un sentido di hustisia i rektitut. Pues anto, lo no ta kuadra si nos sentido di hustisia i rektitut ta laga nos imaginá ku di un manera òf otro Yehova sí falta e kualidatnan ei. Si un sierto relato bíbliko ta perturbá nos, nos tin ku kòrda ku debí na nos piká heredá, nos sentido di loke ta hustu i korekto ta imperfekto. Yehova Dios, den kende su imágen nos a ser kreá, ta perfekto den hustisia i rektitut. (Deuteronomio 32:4) Lo ta ridíkulo pa asta imaginá ku hende lo por ta mas hustu i rekto ku Dios!—Romanonan 3:4, 5; 9:14.

9, 10. Dikon Yehova no ta obligá na splika òf hustifiká su akshonnan na hende?

⁹ Un di sinku motibu pa aseptá e huisionan di Yehova ta ku e ta “e Haltísimo riba henter tera.” (Salmo 83:18) Komo tal, e no ta obligá na splika òf hustifiká su akshonnan na hende. E ta e Gran Alfarero, i nos ta manera klei ku a ser formá den pòchi, pa e trata manera e kier. (Romanonan 9:19-21) Ken nos ta—pòchi ku el a traha—pa kuestioná su desishonnan òf akshonnan? Ora ku e patriarka Jòb tabatin e idea robes di Dios su trato ku humanidat, Yehova a korigié, puntrando: “Di bèrdat bo kier anulá mi huisio? Bo kier kondená mi pa abo por ta hustifiká?” Despues Jòb a repentí ora el a realisá ku el a papia sin komprondementu. (Jòb 40:8; 42:6) Laga nos nunka hasi e fout di krítika Dios!

¹⁰ Ta bisto anto ku nos tin motibunan sólido pa kere ku Yehova semper ta hasi loke ta korekto. Awor ku nos tin e fundeshi aki pa komprondé Yehova su manera di aktua, laga nos analisá dos relato bíbliko ku tin hende kisas ta haña straño i inkomprendibel. E promé tin di haber ku e akshonnan di un adoradó di Dios, i e otro ta un huisio ku Dios mes a ehekutá.

 Dikon Lòt A Ofresé Su Yunan Muhé na un Multitut Rabiá?

11, 12. (a) Konta kiko a sosodé ora ku Dios a manda dos angel ku a bisti kurpa humano na Sodoma. (b) Ki preguntanan e relato aki a lanta den mente di algun hende?

¹¹ Den Génesis kapítulo 19, nos ta haña e relato di loke a sosodé ora ku Dios a manda dos angel ku a bisti kurpa humano na Sodoma. Lòt a insistí pa e bishitantenan keda na su kas. Sin embargo, e anochi ei un multitut di hòmber di e stat a rondoná e kas i a eksigí Lòt saka e bishitantenan pafó pa propósitonan inmoral. Lòt a purba rasoná ku e multitut, pero sin éksito. Den un intento pa protehá su huéspetnan, Lòt a bisa: “Pa fabor, mi rumannan, no aktua ku maldat. Mira aki, mi tin dos yu muhé ku nunka a yega di tin relashon ku hòmber; pa fabor, laga mi saka nan pafó pa boso i hasi ku nan manera boso haña ta bon; solamente, no hasi e hòmbernan aki nada, pasobra ta esaki ta e motibu ku nan a bin bou di e sombra di mi dak.” E multitut no kier a tende i kasi a kibra e porta. Finalmente, e angelnan ku tabata di bishita a dal e multitut enlokesí ku sieguedat.—Génesis 19:1-11.

¹² Ta di komprondé ku e relato aki a lanta pregunta den mente di algun hende. Nan ta puntra nan mes: ‘Kon Lòt por a purba protehá su huéspetnan dor di ofresé su yu muhénan na un multitut yen di mal deseo? Akaso e no a aktua robes, asta di un manera kobarde?’ En bista di e relato aki, dikon Dios lo a inspirá Pedro pa yama Lòt un “hòmber hustu”? Lòt a aktua ku Dios su aprobashon? (2 Pedro 2:7, 8) Laga nos rasoná riba e asuntu aki pa nos no saka konklushon robes.

13, 14. (a) Kiko nos mester tuma nota di dje den e relato bíbliko tokante e akshonnan di Lòt? (b) Kiko ta mustra ku Lòt no a aktua na un manera kobarde?

¹³ Pa kuminsá, nos tin ku rekonosé ku Beibel no ta ekspresá aprobashon ni kondenashon pa loke Lòt a hasi, simplemente e ta informá loke a tuma lugá. Tampoko Beibel no ta bisa nos kiko Lòt tabata pensa ni kiko a motiv’é pa aktua asina. Ora ku e bin bèk den e “resurekshon di . . . e hustunan,” kisas lo e revelá e detayenan.—Echonan 24:15.

¹⁴ Pero Lòt no tabata un kobarde. El a hañ’é den un situashon difísil. Dor di bisa ku e bishitantenan a “bin bou di e sombra” di su dak, el a indiká ku el a sintié obligá na duna nan protekshon i refugio. Pero esaki lo no tabata fásil. E historiadó hudiu Hosefo ta informá ku e sodomitanan tabata “inhustu pa ku hende, i malbado pa ku Dios . . . Nan a odia hende stranhero, i a abusá di nan mes ku práktikanan di sodomia.” Sin embargo, Lòt no a kobardiá pa e multitut yen di odio. Al  kontrario, el a sali bai pafó i a rasoná ku e hòmbernan rabiá ei. El a asta “sera e porta su tras.”—Génesis 19:6.

15. Dikon nos por bisa ku por ta masha bon ku Lòt a aktua a base di fe?

¹⁵ Kisas tin hende ta puntra: ‘Pero dikon Lòt a ofresé su dos yu muhénan na e multitut?’ En bes di asumí ku Lòt tabatin mal intenshon, pakiko no konsiderá algun posibilidat? Na promé lugá, por ta masha bon ku Lòt a aktua a base di fe. Kon asina? Lòt sin duda tabata sa kon Yehova a protehá Sara, kasá di Abraham, tio di Lòt. Kòrda ku komo ku Sara tabata hopi bunita, Abraham a pidié pa bisa ku e tabata su ruman, pa evitá ku nan lo a mata Abraham pa keda ku Sara. * Despues di esei nan a kue Sara hib’é den kas di Fárao. Sin embargo, Yehova a intervení i a stroba e Fárao di violá Sara. (Génesis 12:11-20) Ta posibel ku Lòt tabatin fe ku su yu muhénan tambe lo por a ser protehá di un manera similar. Un punto importante ta ku Yehova pa medio di su angelnan a intervení, i e mucha muhénan a ser protehá.

16, 17. (a) Den ki manera Lòt kisas a purba shòk òf konfundí e hòmbernan di Sodoma? (b) Sea kual sea tabata Lòt su rasonamentu, di kiko nos por ta sigur?

¹⁶ Konsiderá un otro posibilidat. Por ta tambe ku Lòt a purba shòk òf konfundí e hòmbernan. Kisas el a pensa ku e multitut lo no a deseá su yu muhénan debí na e pashon homoseksual di e sodomitanan. (Hudas 7) Ademas, e mucha muhénan tabata komprometé pa kasa ku hòmbernan di e stat, pues por ta masha bon ku den e multitut tabatin famia, amigu òf sosio di negoshi di Lòt su prospektivo yernonan. (Génesis 19:14) Kisas Lòt a spera ku pa motibu di tal laso, algun hòmber den e multitut lo por a sali na defensa di su yu muhénan. I un multitut dividí lo no ta dje peligroso ei. *

¹⁷ Sea kual sea tabata Lòt su rasonamentu i motibu, nos por tin sigur di esaki: Siendo ku Yehova semper ta hasi loke ta korekto, lo e mester tabatin bon motibu pa konsiderá Lòt komo un “hòmber hustu.” I si nos wak e akshonnan di e multitut enlokesí di sodomita, por tin algun duda ku Yehova tabata plenamente hustifiká pa ehekutá huisio riba e habitantenan di e stat malbado ei?—Génesis 19:23-25.

Dikon Yehova A Dal Uza Mata?

18. (a) Kiko a sosodé ora ku David a purba trese e Arka na Yerusalèm? (b) Ki pregunta e relato aki ta lanta?

¹⁸ Un otro relato ku kisas ta parse straño i inkomprendibel pa algun hende ta trata David su intento pa trese e arka di pakto na Yerusalèm. Nan a pone e Arka riba un garoshi guiá pa Uza i su ruman hòmber. Beibel ta deklará: “Ora nan a yega na e plenchi-di-bati-maishi di Nakon, Uza a saka su man na e arka di Dios i a koh’é tene, pasobra e bueynan a trompeká. I e rabia di SEÑOR a kima kontra Uza, i Dios a dal é mata ayanan pa motibu di su ireverensia; i el a muri ayanan banda di e arka di Dios.” Algun luna despues, un di dos intento sí tabatin éksito ora ku nan a transportá e Arka den e manera ku Dios a spesifiká: riba skouder di levitanan koatita. (2 Samuel 6:6, 7; Numbernan 4:15; 7:9; 1 Krónikanan 15:1-14) Podisé tin hende ta puntra: ‘Dikon Yehova a reakshoná asina duru? Uza solamente kier a skapa e Arka.’ Pa nos no saka konklushon robes, ta bon pa nos tuma nota di algun detaye útil.

19. Dikon ta imposibel pa Yehova aktua inhustu?

¹⁹ Nos tin ku kòrda ku ta imposibel pa Yehova aktua inhustu. (Jòb 34:10) Pa e hasi un kos inhustu lo ta un falta di amor di su parti, i nos sa for di nos estudio di Beibel den su totalidat ku “Dios ta amor.” (1 Juan 4:8) Ademas, e Skritura ta bisa nos ku “hustisia i huisio ta e fundeshi di [Dios su] trono.” (Salmo  89:14) Pues anto, kon Yehova hamas lo por aktua inhustu? Si e mester hasi esei, lo e debilitá e fundeshi di su gobernashon supremo.

20. Pa ki motibu Uza lo mester tabata sa di e reglanan relashoná ku e Arka?

²⁰ Tene na mente ku Uza lo mester tabata sa mihó. E Arka a representá Yehova su presensia. E Lei a bisa spesífikamente pa ningun persona no-outorisá no mishi kuné, spièrtando bon kla ku esnan ku violá e lei ei lo ser kastigá ku morto. (Numbernan 4:18-20; 7:89) P’esei, no mester a trata e mudansa di e kaha sagrado ei komo algu di ménos importansia. Uza evidentemente tabata un levita, (ounke no un saserdote), pues e mester tabata konosé e Lei. Ademas, añanan promé e Arka a keda transferí pa e kas di su tata pa ward’é na un lugá sigur. (1 Samuel 6:20–7:1) El a keda einan pa un 70 aña, te ora ku David a disidí di kit’é. Pues for di infansia Uza probablemente tabata sa di e leinan relashoná ku e Arka.

21. Den kaso di Uza, dikon ta importante pa kòrda ku Yehova ta mira e motivashonnan di kurason?

²¹ Manera nos a menshoná anteriormente, Yehova por lesa kurason. Siendo ku su Palabra ta yama loke Uza a hasi un akto di “ireverensia,” esta, un falta di rèspèt, Yehova kisas a mira un òf otro motivashon egoista ku e relato no ta revelá spesífikamente. Por ta ku Uza tabata un hòmber orguyoso, inkliná na bai mas ayá di loke ta permití? (Proverbionan 11:2) Akaso e echo ku el a guia e Arka públikamente—e Arka ku su famia a protehá den privá—a lag’é kere ku e ta masha kos? (Proverbionan 8:13) Uza tabatin asina tiki fe ku el a pensa ku Yehova su man ta muchu kòrtiku pa wanta e kaha sagrado ku a simbolisá Su presensia? Sea kual sea e kaso, nos por tin sigur ku Yehova a hasi loke tabata korekto. Probablemente el a mira algu den Uza su kurason ku a pon’é ehekutá huisio rápido.—Proverbionan 21:2.

Un Base Sólido pa Konfiansa

22. Kon nos por mira Yehova su sabiduria den e echo ku de bes en kuando su Palabra ta laga sierto detayenan afó?

²² Nos por mira Yehova su sabiduria inkomparabel den e echo ku su Palabra de bes en kuando ta laga sierto detayenan afó. Di e manera ei Yehova ta duna nos chèns pa demostrá ku nos ta konfi’é. A base di loke nos a konsiderá, no ta bisto ku nos tin motibunan sólido pa aseptá e huisionan di Yehova? Sí, ora nos ta studia e Palabra di Dios ku un kurason sinsero i un mente habrí, nos ta siña mas ku sufisiente tokante Yehova pa keda konvensí ku semper e ta hasi loke ta hustu i korekto. Pues anto, si algun relato bíbliko ta lanta preguntanan pa kua nos no por haña kontestanan bon kla mesora, laga nos tin pleno konfiansa ku Yehova a hasi loke tabata korekto.

23. Ki konfiansa nos por tin relashoná ku loke Yehova ta bai hasi den futuro?

²³ Nos por tin mesun konfiansa relashoná ku loke Yehova ta bai hasi den futuro. Pues anto, nos por keda trankil ku ora e bin pa ehekutá huisio durante e binidero gran tribulashon, lo e no “destruí e hustu huntu ku e malbado.” (Génesis 18:23) Su amor pa hustisia i rektitut nunka lo no permitié hasi esei. Nos por tin pleno konfiansa tambe ku den e binidero mundu nobo, lo e satisfasé tur nos nesesidatnan na e mihó manera posibel.—Salmo 145:16.

[Nota]

Bo Ta Kòrda?

• Pa ki motibunan nos mester aseptá e huisionan di Yehova?

• Kiko por yuda nos pa no saka e konklushon robes tokante e echo ku Lòt a ofresé su yu muhénan na e multitut rabiá?

• Ki faktornan por yuda nos komprondé dikon Yehova a dal Uza mata?

• Ki konfiansa nos por tin relashoná ku loke Yehova ta bai hasi den futuro?

[Preguntanan di Estudio]