Bo Ta Kompará Bo Mes ku Otro Hende?

KUA di nos no a yega di topa un persona ku ta mas nèchi ku nos, ta parse di ta mas popular, ta kapta kos mas lihé òf ta haña mihó punto na skol? Kisas otro hende tin mihó salú òf un trabou ku ta duna nan mas satisfakshon, òf nan tin mas éksito òf ta parse di tin mas amigu. Podisé nan tin mas propiedat, mas plaka, un outo mas nobo, òf kisas gewon nan ta parse mas felis. Ora nos tuma nota di e kosnan ei, nos ta kompará nos mes ku otro hende? Kompará bo mes ku otro hende ta un kos inevitabel? Dikon un kristian lo ke evitá di hasi esei? I kon nos por ta satisfecho sin kompará nos mes ku un otro hende?

Dikon i Ki Ora Nos Sa Kompará Nos Mes

Un teoria di e motibu pakiko hende lo ta kompará nan mes ku otro ta ku esei ta sirbi pa mantené òf mehorá nan balor propio. Hende hopi bes ta sinti nan satisfecho ora nan deskubrí ku nan ta mesun eksitoso ku nan pareunan. Un otro idea ta ku nos ta kompará nos mes ku otro hende den un intento pa redusí nos propio insiguridat, pa komprondé kiko ta nos kapasidat i kiko ta nos límite. Nos ta opservá loke otro hende a logra. Si den hopi aspekto nan ta meskos ku nos i nan a alkansá sierto ophetivonan, nos lo por sinti ku nos tambe por alkansá metanan similar.

Mayoria biaha komparashon ta ser hasí entre hende ku parse otro: hende di mesun sekso, di mesun edat i di mesun nivel sosial i ku konosé otro. Nos ta ménos inkliná na kompará nos mes ku un otro persona si nos ta pensa ku tin un diferensia grandi entre nos i e otro persona. Ku otro palabra, un mucha muhé tiner komun i koriente ta kompará su mes mas lihé ku su kompañeranan di skol ku e ta kompará su mes ku un modelo profeshonal. I lo ta improbabel ku e modelo ta kompará su mes ku e tiner.

Riba ki tereno hende ta kompará nan mes ku otronan? Kualke pertinensia òf karakterístika ku ta ser konsiderá balioso den un komunidat—sea ta inteligensia, beyesa, rikesa, paña—por ta e base pa hasi tal komparashon. Sin embargo, nos tin e tendensia di hasi komparashon den asuntunan ku ta interesá nos. Por ehèmpel, nos lo no envidiá e tamaño di e kolekshon di stampia di un di nos konosínan, a ménos ku nos ta partikularmente interesá den kolekshoná stampia.

 Kompará nos mes ku otro hende ta kousa un eskala grandi di reakshon, ku ta varia for di satisfakshon te depreshon, for di atmirashon i un deseo di imitá te na inkomodidat òf antipatia. Algun di e emoshonnan aki ta perhudisial, i nan no ta kompatibel ku kualidatnan kristian.

Komparashonnan Kompetitivo

Hopi hende ku ta lucha pa sali e “ganadó” ora nan kompará nan mes ku otro hende, ta desplegá un spiritu kompetitivo. Nan ke ta mihó ku otro hende, i nan no ta keda satisfecho sino te ora ku nan ta mihó. No ta dushi pa ta den kompania di personanan asina. Nos amistat ku nan òf nan relashon ku otro hende, semper ta yen di tenshon. Personanan asina no solamente falta humildat sino ku por lo general nan no ta apliká Beibel su konseho di stima nan próhimo, ya ku nan aktitut fásilmente ta laga otro hende sinti nan mes inferior i humiá.—Mateo 18:1-5; Juan 13:34, 35.

Den un sentido nos ta perhudiká hende dor di laga nan sinti ku nan ta un “frakaso.” Segun un eskritor, “nos frakasonan ta mas doloroso ainda ora ta parse ku hende den e mesun situashon ku nos, sí a logra optené e poseshonnan ku nos ke.” Pues anto, un spiritu kompetitivo ta provoká envidia, renkor i malkontentu pa ku un persona debí na su pertinensianan, su prosperidat, posishon, reputashon, bentahanan, etcetera. I esaki ta hiba na mas kompetensia, pues, e ta un sírkulo visioso. Beibel ta kondená ‘instigamentu di kompetensia.’—Galationan 5:26, NW.

Hende envidioso ta sinti nan balor propio heridá ora otronan logra algu. Anto nan ta purba rekuperá nan balor propio dor di rebahá e logronan di nan rivalnan. Tal reakshon lo por parse algu insignifikante, pero si no rekonosé nan pa loke nan ta i frena nan, nan por hiba na malecho malisioso. Konsiderá dos relato bíbliko kaminda envidia tabata un faktor.

Tempu ku Isaak tabata biba meimei di e filisteonan, el a ser bendishoná ku “krianan di bestia chikitu i krianan di baka i gran kantidat di sirbidó, asina ku e filisteonan tabata envidi’é.” Nan a reakshoná dor di dèmpel e posnan ku Isaak su tata, Abraham, a koba, i nan rei a pidi Isaak bai for di e área. (Génesis 26:1-3, 12-16) Nan envidia tabata malisioso i destruktivo. Simplemente nan no por a soportá pa Isaak sigui gosa di prosperidat meimei di nan.

Siglonan despues, David a destaká riba kampo di bataya. E muhénan di Israel a aklamá su hazañanan kantando: “Saul a mata su milnan, i David su dies milnan.” Ounke Saul a haña un grado di elogio, el a konsiderá e echo ku nan a kompar’é ku David un humiashon, i envidia a lanta den su kurason. For di e momentu ei en adelante, el a keda ku un rabia riba David. Poko despues el a hasi e promé di vários intento pa mata David. Pues, envidia por hiba na maldatnan grandi!—1 Samuel 18:6-11.

P’esei si ora nos kompará nos mes ku otronan—ku nan hazañanan òf bentahanan—anto esei lanta sintimentunan di envidia òf di kompetensia, nos mester tene kuidou! Esakinan ta emoshonnan perhudisial, ku no ta kompatibel ku Dios su manera di pensa. Pero promé ku nos analisá kon por resistí e aktitutnan ei, laga nos konsiderá un otro kos ku ta pone hende kompará nan mes ku otronan.

Evaluashon Propio i Kontentamentu

‘Mi ta inteligente, atraktivo, kompetente, den bon kondishon físiko, outoritativo, amabel? Te na ki grado?’ Masha poko biaha nos ta para dilanti spil i puntra nos mes e kosnan aki. Sin embargo, segun un eskritor, “indirektamente, tal preguntanan hopi bes ta bin den nos mente i silensiosamente nan ta produsí kontesta ku ta duna nos mas o ménos un  satisfakshon.” Un persona ku no ta sigur di loke e por logra, kisas ta reflekshoná riba e kosnan aki sin ningun inklinashon pa kompetí òf sin un sintimentu di envidia. Simplemente e ta evaluando su mes. Esaki no ta nesesariamente malu. Sin embargo, e manera korekto di hasié no ta dor di kompará nos mes ku otro hende.

Nos kada un tin diferente abilidat ku ta dependé di vários faktor. Semper lo tin hende ku ta parse di ta mas mihó ku nos. P’esei, en bes di opservá nan ku envidia, nos mester midi nos aktividat en relashon ku Dios su normanan hustu, lokual ta un guia sigur di loke ta bon i loke ta malu. Yehova ta interesá den loke nos ta individualmente. E no tin nodi kompará nos ku ningun hende. Apòstel Pablo ta konsehá nos: “Laga kada un saminá su mes obra, i e ora ei e lo tin motibu pa gaba solamente enkuanto su mes, i no enkuanto un otro.”—Galationan 6:4.

Kon pa Resistí Envidia

Komo ku tur hende ta imperfekto, nos lo tin ku hasi esfuerso vigoroso i kontinuo pa resistí envidia. Ta fásil pa sa loke e Skritura ta bisa nos: “Den mustra onor na otro hiba delantera.” Pero ta mas difísil pa aplik’é. Pablo a rekonosé su propio inklinashon pa hasi piká. Pa lucha kontra esei, e tabatin ku ‘gòlpia su kurpa i hasié su esklabo.’ (Romanonan 12:10, NW; 1 Korintionan 9:27) Pa nos, kisas esei ta nifiká ku nos tin ku resistí pensamentunan kompetitivo, i remplasá nan ku pensamentunan positivo. Nos tin ku hasi orashon, i pidi Yehova yuda nos pa nos “no pensa mas haltu di [nos] mes ku [nos] mester pensa.”—Romanonan 12:3.

Studia Beibel i meditá riba dje tambe ta yuda. Por ehèmpel, pensa riba e futuro Paradeis ku Dios ta primintí. E tempu ei tur hende lo tin pas, bon salú, kuminda na abundansia, kas kómodo i trabou ku ta duna satisfakshon. (Salmo 46:8, 9; 72:7, 8, 16; Isaias 65:21-23) Akaso un hende lo sinti e nesesidat di kompetí? Nò. Lo no tin ningun motibu pa hasi esei. Ta bèrdat ku Yehova no a perkurá tur detaye di e manera ku bida lo ta e tempu ei, pero nos por suponé rasonablemente ku tur hende lo por okupá nan mes ku interesnan i abilidatnan ku nan gusta. Un persona kisas ta studia astronomia, un otro ta diseñá bunita tela. Pakiko nan lo tin ku envidiá otro? E aktividatnan di nos próhimo lo ta un estímulo, no un motibu pa sinti renkor. Tal sintimentunan lo ta kos di pasado.

Si esei ta e tipo di bida ku nos ta deseá, anto nos lo no tin ku kultivá e mesun aktitut for di awor? Ya kaba nos ta gosa di un paradeis spiritual, liber di e tantísimo problemanan dje mundu rondó di nos. Siendo ku lo no tin un spiritu kompetitivo den Dios su mundu nobo, nos tin realmente bon motibu pa evit’é for di awor.

Ke men anto ku ta malu pa kompará nos mes ku otro hende? Òf tin biaha ku esei por ta apropiá?

Komparashon Apropiá

Ora ku hende ta kompará nan mes ku otronan esei hopi biaha tin komo konsekuensia ku nan ta sinti nan amargá òf depresivo, pero no ta semper mester ta asina. En konekshon ku esaki, tuma nota di e konseho di apòstel Pablo: “[Sea] imitadónan di esnan ku pa medio di fe i pasenshi ta heredá e promesanan.” (Hebreonan 6:12) Hasiendo esfuerso pa kultivá e mesun  kualidatnan ku Yehova su sirbidónan di tempu antiguo tabatin, por ta produktivo. Ta bèrdat ku pa logra esei nos lo tin ku kompará nos mes ku algun persona. Sin embargo, esei por yuda nos mira ehèmpelnan ku nos por imitá i áreanan kaminda nos por mehorá.

Konsiderá Jonatan. Den un sentido, e tabatin motibu pa ta envidioso. Komo yu mayó di Rei Saul di Israel, Jonatan kisas un tempu tabatin e speransa ku ta e lo bira rei, pero Yehova a skohe e hóben David, un hòmber ku tabata 30 aña mas yòn kuné. En bes di karga renkor, Jonatan a destaká pa motibu di su amistat inegoista i su sosten pa David komo Yehova su rei designá. Jonatan tabata realmente un hòmber spiritual. (1 Samuel 19:1-4) Distinto for di su tata, kende a mira David komo un rival, Jonatan a rekonosé Yehova su man den e asuntu i a someté na Su boluntat; e no a kompará su mes ku David, puntrando: “Dikon David i no ami?”

Entre nos rumannan kristian, nunka nos no mester sinti nos menasá, komo si fuera otro rumannan ta purba superá nos òf tuma nos lugá. Rivalidat ta inapropiá. Kristiannan maduro ta ser karakterisá pa koperashon, union i amor, no pa kompetensia. Sosiólogo Francesco Alberoni a bisa: “Amor ta e gran enemigu di envidia. Si nos ta stima un persona, nos ke loke ta bon p’e, i nos ta felis ora e tin éksito i ta felis.” Si un otro ruman den e kongregashon kristian keda skohé pa un sierto privilegio, e kos amoroso lo ta pa keda kontentu ku esei. Asina Jonatan tabata. Meskos kuné, nos tambe lo ser bendishoná si fielmente nos ta apoyá e rumannan ku ta sirbi den puesto di responsabilidat den Yehova su organisashon.

Ta un bon kos pa nos atmirá e ekselente ehèmpel di otro rumannan kristian. Komparando nos mes na un manera balansá ku nan, por stimulá nos pa imitá nan fe na un manera sano. (Hebreonan 13:7) Pero si nos no tene kuidou, imitashon por bira kompetensia. Si nos ta sinti ku un persona ku nos ta atmirá tin hopi mas éksito ku nos i nos ta purba rebah’é òf kritik’é, e ora ei nos intento di imit’é a para bira envidia.

Ningun hende imperfekto por ta un modelo ideal. P’esei e Skritura ta bisa: “Sea imitadónan di Dios, manera yunan stimá.” Tambe e ta bisa: “Kristu . . . a sufri pa boso, lagando un ehèmpel pa boso, pa boso sigui den su pasonan.” (Efesionan 5:1, 2; 1 Pedro 2:21) E kualidatnan di Yehova i Hesus—nan amor, kariño, empatia i humildat—mester ta loke nos ta hasi esfuerso pa imitá. Nos mester tuma tempu pa kompará nos mes ku nan kualidatnan, propósitonan i manera di hasi kos. Komparando nos mes ku nan por enrikesé nos bida, i duna nos guia konfiabel, stabilidat i siguridat. Tambe esei por yuda nos alkansá e estatura di hende hòmber i muhé kristian madurá. (Efesionan 4:13) Si nos konsentrá riba hasi nos bèst pa imitá nan ehèmpel perfekto, definitivamente nos lo ta ménos inkliná na kompará nos mes ku otro hende.

[Plachi na página 28, 29]

Rei Saul a kuminsá envidiá David

[Plachi na página 31]

Jonatan nunka a mira David, ku tabata mas yòn kuné, komo un rival