Ken Lo Alimentá Mundu?

SEGUN kálkulo di e Programa Mundial di Alimentashon, e organisashon di Nashonnan Uní ku ta lucha pa kombatí hamber, 800 mion hende, mayoria di nan mucha, ta muriendo di hamber. Resientemente, e organisashon ei a bisa ku e rekursonan i atenshon ku hopi nashon desaroyá lo por a dediká na e situashon aki ta ser apsorbá dor di otro problemanan, manera entre otro terorismo. Anto e echo ku malesanan kontagioso ta plamando a hasi e problema bira pió. Un rapòrt (Global School Feeding Report) di e mesun organisashon ei a bisa enkuanto paisnan afrikano kaminda tin masha hopi kaso di AIDS: “Henter un generashon di mayor ta disparsiendo. E yunan ku nan ta laga atras hopi bes ta pa nan kuenta, i mayoria di nan no tin konosementu básiko di agrikultura ni di kosnan básiko di bida ku normalmente ta pasa di un generashon pa otro.”

E Programa Mundial di Alimentashon tin un kampaña ku e meta pa muchanan haña por lo ménos un kuminda pa dia na skol. E idea no solamente ta pa mengua hamber sino tambe pa mediante skolnan introdusí otro programanan spesialmente pa prevení HIV/AIDS entre hóbennan.

Kaminda nan a implementá e programanan aki, muchanan a haña kuminda, instrukshon enkuanto higiena personal i otro tipo di yudansa. Tambe nan a ripará ku kaminda hende a kambia nan kondukta, kasonan di infekshon di HIV/AIDS a baha.

Ta un lástima ku e resultadonan di e esfuersonan ku hende ta hasi hopi bes ta solamente limitá i insignifikante. Pero Beibel sí ta duna un promesa alentador pa loke ta trata un solushon permanente pa e problema di hamber. Salmo 72:16 ta bisa: “Lo tin abundansia di maishi den e tera.” Bou di e Reino di Dios, hende lo por bisa di Yehova Dios: ‘Bo ta bishitá tera i bo ta hasié masha riku mes; bo ta prepará nan maishi, pasobra asina bo ta prepará tera.’—Salmo 65:9.

[Rekonosementu pa Potrèt na página 32]

WFP/Y. Yuge