Kon pa Protehá Nos Identidat Kristian

“‘Boso ta mi testigunan,’ SEÑOR ta deklará.”—ISAIAS 43:10.

1. Ki klase di hende Yehova ta hala na su mes?

ORA bo ta na Salòn di Reino, wak bon rònt di bo. Ken bo ta mira na e lugá di adorashon aki? Kisas bo ta mira hóbennan sinsero kendenan ku atenshon ta apsorbá sabiduria bíbliko. (Salmo 148:12, 13) Probablemente lo bo opservá kabesnan di famia ku ta hasi esfuerso pa agradá Dios miéntras nan ta biba den un mundu ku ta baha e nivel bida di famia. Podisé lo bo mira rumannan stimá di edat, ku firmemente ta kumpli ku nan dedikashon na Yehova apesar di e doló- i krekechénan di edat avansá. (Proverbionan 16:31) Nan tur stima Yehova profundamente. I Yehova gustosamente a forma un relashon ku nan. E Yu di Dios a konfirmá: “Ni un hende no por bin serka mi, si no ta e Tata ku a manda mi a hal’é.”—Juan 6:37, 44, 65.

2, 3. Dikon por ta difísil pa keda ku un bista bon kla di nos identidat kristian?

² Nos no ta kontentu di ta parti di un pueblo ku tin Yehova su aprobashon i bendishon? Sin embargo, por ta difísil pa mantené un bista bon kla di nos identidat komo kristian den e “tempunan trabahoso” aki. (2 Timoteo 3:1) Foral pa hóbennan ku ta lanta den famianan kristian esaki no ta fásil. Un hóben  asina a atmití: “Ounke mi tabata asistí na reunionnan kristian, mi no tabatin ningun meta spiritual bon definí i frankamente, mi no a desaroyá un deseo personal di sirbi Yehova.”

³ Otro kristiannan, apesar di tin e deseo sinsero di sirbi Yehova, kisas ta ser distraí dor di preshon intenso di nan pareunan, dor di influensia mundano i dor di tendensianan pekaminoso. Ora nos ta bou di hopi preshon, esei pokopoko por pone nos pèrdè nos identidat kristian. Por ehèmpel, hopi hende den e mundu djawe ta konsiderá e normanan di Beibel enkuanto moralidat komo ouderwets òf irealístiko pa nos mundu moderno. (1 Pedro 4:4) Tin hende ta haña ku no ta importante pa adorá Dios den e manera ku e ta manda. (Juan 4:24) Den su karta na e efesionan, Pablo ta papia di e “spiritu” di mundu, esta, mundu su aktitut dominante. (Efesionan 2:2) E spiritu ei ta pone preshon riba hende pa adaptá na e manera di pensa di un sosiedat ku no konosé Yehova.

4. Kon Hesus a enfatisá e nesesidat pa nos protehá e identifikashon kla ku nos tin komo kristian?

⁴ Sin embargo, komo sirbidónan dediká di Yehova, nos ta realisá ku lo ta un tragedia pa un di nos—hóben òf bieu—si nos pèrdè nos identifikashon kristian. Un punto di bista sano di e identidat kristian por ta basá solamente riba e normanan di Yehova i riba loke e ta ferwagt di nos. Esaki ta rasonabel, ya ku nos ta kreá den su imágen. (Génesis 1:26; Mikeas 6:8) Beibel ta kompará e identifikashon kla ku nos tin komo kristian ku paña ku nos ta bisti pa tur hende mira. Relashoná ku nos tempu, Hesus a spièrta: “Mira, mi ta bin manera ladron. Bendishoná ta esun ku keda lantá i keda ku su pañanan bistí, pa e no kana sunú i hende mira su bèrgwensa.” * (Revelashon 16:15) Nos no ke kita nos kualidatnan i normanan di kondukta kristian i permití e mundu di Satanas moldia nos. Si esei mester sosodé, nos lo pèrdè e “pañanan” aki. Un situashon asina lo ta lamentabel i bergonsoso.

5, 6. Dikon stabilidat spiritual ta importante?

⁵ Un bista bon kla di nos identidat kristian tin un influensia grandi riba e manera ku nos ta hiba nos bida. Kon asina? Si un adoradó di Yehova mester pèrdè su sentido di identidat, lo e por resultá distraí, sin un rumbo òf metanan bon definí. Beibel bes tras bes ta spièrta pa tene kuidou ku un estado indesiso asina. Disipel Santiago a atvertí: “Esun ku duda ta manera un ola di laman ku ta wòrdu lastrá i tirá dor di bientu. Pasobra no laga e hende ei spera ku e lo risibí algu di Señor, siendo un hende di kurason dòbel [indesiso], inkonstante den tur su kamindanan.”—Santiago 1:6-8; Efesionan 4:14; Hebreonan 13:9.

⁶ Kon nos por protehá nos identidat kristian? Kiko por hasi nos mas konsiente di nos gran privilegio di ta adoradónan di e Haltísimo? Konsiderá e siguiente maneranan.

 Establesé Bo Identidat Kristian Firmemente

7. Dikon ta bon pa nos roga Yehova pa saminá nos?

⁷ Kontinuamente fortifiká bo relashon ku Yehova. E kos mas balioso ku un kristian tin ta su relashon personal ku Dios. (Salmo 25:14; Proverbionan 3:32) Si nos kuminsá duda di nos identidat kristian, ta tempu pa nos saminá kuidadosamente e kalidat i profundidat di e relashon aki. E salmista apropiadamente a roga Yehova: “Skudriñá mi, o SEÑOR, i pone mi na prueba; saminá mi mente i mi kurason.” (Salmo 26:2) Pakiko tal eksaminashon ta importante? Pasobra nos no por konfia ku nos mes lo por hasi un bon evalushon di nos propio motivashonnan i inklinashonnan di mas íntimo. Ta Yehova so por komprondé e persona ku nos ta di paden: nos motivashonnan, pensamentunan i emoshonnan.—Jeremias 17:9, 10.

8. (a) Kon nos por benefisiá ora Yehova ta laga nos pasa dor di prueba? (b) Kiko a yuda abo hasi progreso komo kristian?

⁸ Dor di pidi Yehova pa saminá nos, nos ta invit’é pa pone nos na prueba. E por permití situashonnan desaroyá ku ta revelá nos berdadero motivashon i e kondishon di nos kurason. (Hebreonan 4:12, 13; Santiago 1:22-25) Nos mester aseptá tal prueba di buena gana pasobra nan ta duna nos un oportunidat di demostrá kon profundo nos lealtat na Yehova ta. E pruebanan ei por mustra si nos ta “kompletu, sin falta di nada.” (Santiago 1:2-4) Anto ora nos ta bou di prueba, nos por krese spiritualmente.—Efesionan 4:22-24.

9. Pakiko ta nesesario pa konvensé nos mes ku loke Beibel ta siña ta bèrdat?

⁹ Studia pa bo konvensé bo mes di bèrdat bíbliko. Nos sentido di identidat komo sirbidó di Yehova por debilitá si e no ta sólidamente basá riba konosementu di e Skritura. (Filipensenan 1:9, 10) Kada kristian—hóben i bieu—tin ku konvensé su mes te ora ku e ta satisfecho ku loke e ta kere realmente ta e bèrdat ku bo ta haña den Beibel. Pablo a urgi su rumannan den fe: “Saminá tur kos; tene duru na loke ta bon.” (1 Tesalonisensenan 5:21) Kristiannan hóben ku ta pertenesé na famianan temeroso di Dios tin ku realisá ku nan no por ta kristiannan berdadero simplemente a base di e fe di nan mayornan. Salomon su propio tata, David, a anim’é pa “konosé e Dios di bo tata, i sirbié ku henter bo kurason.” (1 Krónikanan 28:9) Lo no tabata basta pa e hóben Salomon djis wak kon su propio tata a kultivá fe den Yehova. Salomon mes mester a siña konosé Yehova, i el a hasié. El a supliká Dios: “Duna mi sabiduria i konosementu, pa mi por sali i drenta dilanti di e pueblo aki.”—2 Krónikanan 1:10.

10. Dikon no tin nada malu den hasi preguntanan onesto ku e motivashon korekto?

¹⁰ Fe firme ta fundá riba konosementu. Pablo a deklará: “Fe ta bin for di tendementu.” (Romanonan 10:17) Kiko e tabata ke men ku esei? E tabata ke men ku dor di alimentá nos mes ku e Palabra di Dios, nos ta fortalesé nos fe i konfiansa den Yehova, den su promesanan i den su organisashon. Hasiendo preguntanan onesto tokante Beibel por hiba na kontestanan ku ta trankilisá nos mente. Ademas, na Romanonan 12:2, nos ta haña e konseho aki di Pablo: “Komprobá kiko ta e bon i agradabel i perfekto boluntat di Dios.” Pero kon nos por logra esei? Dor di atkerí “e konosementu [“eksakto,” NW] di e bèrdat.” (Tito 1:1) E spiritu di Yehova por yuda nos komprondé asta tópikonan difísil. (1 Korintionan 2:11, 12) Nos tin ku pidi Dios su yudansa den orashon ora nos tin problema pa komprondé algu. (Salmo 119:10, 11, 27) Yehova ke pa nos komprondé su Palabra, ker’é i obedes’é. Gustosamente Yehova ta aseptá preguntanan onesto, hasí ku e motivashon korekto.

Sea Determiná pa Agradá Dios

11. (a) Kua deseo normal por bira un trampa pa nos? (b) Kon nos por tuma un kurashi pa resistí preshon di nos pareunan?

¹¹ Trata na agradá Dios, no hende. Ta masha normal pa establesé nos identidat te na sierto grado dor di pertenesé na un grupo. Tur hende  tin mester di amigu òf amiga, i nos ta sinti bon ora nos ta ser aseptá. Durante adolesensia—i tambe mas despues den bida—preshon di pareunan por ta hopi fuerte, i por lanta un deseo desesperá pa imitá òf agradá otro hende. Pero no ta semper amigu- i pareunan tin nos mihó interes na pechu. Tin biaha e úniko kos ku nan ke ta pa un hende kompañá nan den hasi malu. (Proverbionan 1:11-19) Ora un kristian sukumbí na e preshon negativo di su pareunan, por lo general e ta purba skonde su identidat. (Salmo 26:4) Apòstel Pablo a spièrta: “No laga e manera di pensa di e mundu aki forma boso.” (Romanonan 12:2, BPK) Yehova ta duna nos e fortalesa interno nesesario pa nos por resistí kualke preshon di pafó.—Hebreonan 13:6.

12. Ki prinsipio i ki ehèmpel por fortifiká nos pa keda firme ora ta trata di nos konfiansa den Dios?

¹² Ora ku preshon di pafó ta menasá di daña nos sentido di identidat kristian, ta bon pa nos kòrda ku nos lealtat na Dios ta hopi mas importante ku opinion públiko òf ku e tendensianan di e mayoria. E palabranan di Eksodo 23:2 ta sirbi komo un prinsipio safe: “No sigui e mayoria den hasimentu di maldat.” Ora ku mayoria di e israelitanan a duda di Yehova su abilidat di kumpli ku Su promesa, Kalèb a nenga firmemente di bai tras di e mayoria. E tabatin sigur ku e promesanan di Dios tabata digno di konfiansa, i el a ser rekompensá rikamente pa su posishon. (Numbernan 13:30; Josué 14:6-11) Abo tambe ta dispuesto pa resistí e preshon di opinion popular afin di protehá bo relashon ku Dios?

13. Dikon e proseder sabí ta pa laga hende sa ku nos ta kristian?

¹³ Laga hende sa ku bo ta un kristian. E dicho ku un bon ofensivo ta e mihó defensa ta sierto ora nos ta defendé nos identidat kristian. Den tempu di Esdras, ora ku e israelitanan fiel a haña oposishon kontra nan esfuerso pa hasi e boluntat di Yehova, nan a deklará: “Nos ta e sirbidónan di e Dios di shelu i tera.” (Esdras 5:11) Si e reakshon i krítika di hende hostil afektá nos, nos por paralisá di miedu. Si semper nos ke purba agradá tur hende, esei lo debilitá nos efektividat. Pues no sea intimidá. Semper ta bon pa laga hende sa bon kla ku bo ta un Testigu di Yehova. Den un manera respetuoso pero firme, bo por splika otro hende tokante bo norma- i balornan, bo kreensianan i bo posishon komo un kristian. Laga hende sa ku bo ta determiná pa mantené Yehova su normanan haltu relashoná ku asuntunan di moralidat. Splika bon kla ku lo bo no komprometé bo integridat kristian. Mustra ku bo ta orguyoso di bo normanan moral. (Salmo 64:10) E echo ku bo ta destaká komo un kristian firme por fortifiká bo, protehá bo i asta motivá algun hende pa buska informashon tokante Yehova i su pueblo.

14. Dikon bofon i oposishon no mester desanimá nos?

¹⁴ Sí, algun hende kisas lo hasi bofon di bo òf  oponé bo. (Hudas 18) Si otro hende no ta reakshoná faborabel riba bo esfuerso pa splika nan tokante bo norma- i balornan, no desanimá. (Ezekiel 3:7, 8) Sin importá kon determiná bo ta, nunka lo bo no konvensé hende ku no ke ser konvensí. Kòrda riba Fárao. Ningun plaga ni milager—ni sikiera e morto di su yu primogénito—no por a konvensé Fárao ku Moisés tabata papia na nòmber di Yehova. P’esei no laga miedu di hende paralisá bo. Konfiansa i fe den Dios por yuda nos vense miedu.—Proverbionan 3:5, 6; 29:25.

Siña for di Pasado, Traha pa Futuro

15, 16. (a) Kiko ta nos herensia spiritual? (b) Kon nos por benefisiá dor di meditá ku yudansa di e Palabra di Dios riba nos herensia spiritual?

¹⁵ Apresiá bo herensia spiritual. Ku yudansa di e Palabra di Dios, kristiannan lo benefisiá si nan meditá riba nan herensia spiritual riku. E herensia aki ta enserá e bèrdat di e Palabra di Yehova, e speransa di bida eterno i e onor di representá Dios komo proklamadó di e bon nobo. Abo por mira e papel ku bo tin meimei di Yehova su Testigunan, den e grupo privilegiá di hende ku a ser enkargá ku e trabou di prediká e Reino, un trabou ku ta salba bida? Kòrda ku ta Yehova ta esun ku ta afirmá: “Boso ta mi testigunan.”—Isaias 43:10.

¹⁶ Bo por hasi bo mes preguntanan manera: ‘Kon balioso e herensia spiritual aki ta pa mi? Mi ta balor’é lo sufisiente pa pone hasimentu di e boluntat di Dios na promé lugá den mi bida? Mi apresio ta sufisiente grandi pa duna  mi forsa pa resistí kualke tentashon ku lo por pone mi pèrdè e herensia aki?’ Tambe nos herensia spiritual por yena nos ku un sentido profundo di siguridat spiritual ku nos por tin solamente den e organisashon di Yehova. (Salmo 91:1, 2) Un repaso di susesonan remarkabel den e historia di Yehova su organisashon moderno por graba den nos mente ku ningun persona ni kos por eliminá e pueblo di Yehova for di riba tera.—Isaias 54:17; Jeremias 1:19.

17. Kiko mas ta nesesario fuera di simplemente dependé riba nos herensia spiritual?

¹⁷ Klaru ku nos no por dependé solamente di nos herensia spiritual. Kada un di nos tin ku kultivá un relashon íntimo ku Dios. Despues ku Pablo a traha duru pa edifiká e fe di e kristiannan na Filipos, el a skirbi nan: “Asina anto, mi stimánan, meskos ku semper boso a obedesé, no manera den mi presensia solamente, ma awor muchu mas den mi ousensia, traha riba boso salbashon ku temor i temblamentu.” (Filipensenan 2:12) Nos no por stèns riba un otro persona pa nos salbashon.

18. Kon aktividatnan kristian por profundisá nos sentido di identidat kristian?

¹⁸ Partisipá plenamente den aktividatnan kristian. Un hende a yega di bisa ku “trabou ta loke ta forma identidat personal.” Kristiannan djawe a keda enkargá ku e trabou importante di prediká e bon nobo di Dios su Reino establesí. Pablo a deklará: “Komo ku mi ta apòstel di e paganonan, mi ta gloria den mi ministerio.” (Romanonan 11:13) Nos trabou di prediká ta distinguí nos for di mundu, i nos partisipashon den dje ta duna realse na nos identidat kristian. Ademas, nos por profundisá nos sentido di identidat komo kristian dor di partisipá plenamente den otro aktividatnan teokrátiko, manera reunionnan kristian, programanan pa konstruí lugánan di adorashon, obranan pa yuda rumannan den nesesidat, i kosnan por estilo.—Galationan 6:9, 10; Hebreonan 10:23, 24.

Un Identidat Kristian Bon Kla Ta Trese Berdadero Bendishon

19, 20. (a) Ki benefisionan abo personalmente a risibí dor ku bo ta un kristian? (b) Kiko ta duna nos e base pa nos berdadero identidat?

¹⁹ Tuma un momentu pa reflekshoná riba e tantísimo benefisio- i bentahanan ku nos tin pasobra nos ta kristiannan berdadero. Nos tin e privilegio ku Yehova ta rekonosé nos personalmente. Profeta Malakias a bisa: “Esnan ku a teme SEÑOR a papia ku otro, i SEÑOR a presta atenshon i a tende esaki, i un buki di memoria a wòrdu skirbí su dilanti pa esnan ku ta teme SEÑOR i ku ta onra su nòmber.” (Malakias 3:16) Dios por konsiderá nos komo su amigu. (Santiago 2:23) Nos bida ta bira mas dushi dor ku e tin un propósito bon kla i nifikashon profundo, i tambe metanan sano i produktivo. Mas ainda, nos a risibí e speransa di un futuro eterno.—Salmo 37:9.

²⁰ Kòrda ku bo berdadero identidat i balor komo persona ta ser determiná dor di Dios, no dor di loke otro hende lo por pensa di bo. Hende kisas ta evaluá nos a base di normanan humano inadekuá. Pero Dios su amor i interes personal ta duna nos e berdadero base di nos balor: nos ta pertenesé na dje. (Mateo 10:29-31) Na nos turno, nos propio amor pa Dios por duna nos e sentido mas grandi di identidat i e guia mas kla den nos bida. “Si un hende ta stima Dios, e ta konosí pa Dios.”—1 Korintionan 8:3.

[Nota]

Bo Ta Kòrda?

• Dikon ta importante pa kristiannan protehá nan identidat spiritual?

• Kon nos por establesé nos identidat kristian firmemente?

• Ora nos ta konfrontá e pregunta ken nos mester agradá, ki faktornan por yuda nos tuma e desishon korekto?

• Kon un sentido bon kla di identidat por influensiá nos futuro komo kristian?

[Preguntanan di Estudio]

[Plachinan na página 21]

Partisipando plenamente den aktividatnan kristian por duna realse na nos identidat kristian