Kristiannan, Sea Orguyoso di Boso Identidat!

“Laga esun ku ta gaba, gaba den SEÑOR.”—1 KORINTIONAN 1:31.

1. Ki tendensia ta bisto den e aktitut di hende pa ku religion?

“APATEISMO.” Resientemente un komentarista di asuntunan religioso a usa e palabra ei pa deskribí e aktitut ku hopi hende tin pa ku nan religion. El a splika: “E desaroyo mas grandi den religion moderno niun ora so no ta un religion; e ta un aktitut aptamente deskribí komo ‘apateismo.’” Elaborando riba esei, el a duna un definishon di apateismo [un kombinashon di e palabra “apatia” i “teismo”]: “No tin gana di ta muchu enbolbí ku bo propio religion.” El a deklará ku hopi hende “ta kere den Dios . . . ; simplemente nan no ta wòri muchu kuné.”

2. (a) Dikon no ta un sorpresa ku hende a bira spiritualmente indiferente? (b) Ki peliger indiferensia ta forma pa kristiannan berdadero?

² E tendensia aki den direkshon di apatia òf indiferensia no ta sorprendé studiantenan di Beibel. (Lukas 18:8) I relashoná ku religion en general, nos por ferwagt tal falta di interes. Religion falsu a gaña i desepshoná humanidat pa hopi tempu. (Revelashon 17:15, 16) Sin embargo, pa kristiannan berdadero e aktitut indiferente i falta di selo ku ta reina ta forma un peliger. Nos no por afòrt pa bira indiferente tokante nos fe i pèrdè nos selo di sirbi Dios i pa bèrdat bíbliko. Hesus a atvertí kontra tal aktitut lou ora el spièrta kristiannan di promé siglo ku tabata biba na Laodisea: “Bo no ta ni friu ni kayente; mara bo tabata friu òf kayente. . . . Bo ta lou.”—Revelashon 3:15-18.

Realisá Ken Nos Ta

3. Kristiannan por ta orguyoso di ki aspektonan di nan identidat?

³ Pa lucha kontra indiferensia spiritual, kristiannan mester tin un bista bon kla di ken nan ta, nan mester ta rasonablemente orguyoso di nan identidat distintivo. Komo sirbidó di Yehova i disipel di Kristu, nos por haña den Beibel deskripshonnan ku ta indiká ken nos ta. Nos ta “testigunan” di Yehova, “Dios su kolaboradónan,” segun ku nos ta kompartí aktivamente e “evangelio” òf bon nobo ku otro hende. (Isaias 43:10; 1 Korintionan 3:9; Mateo 24:14) Nos ta hende ku “stima otro.” (Juan 13:34) Kristiannan berdadero ta personanan ku “pa motibu di práktika, tin nan mente entrená pa diserní loke ta bon i loke ta malu.” (Hebreonan 5:14) Nos ta “lusnan den mundu.” (Filipensenan 2:15) Nos ta hasi esfuerso pa nos “kondukta ta ekselente meimei di e paganonan.”—1 Pedro 2:12; 2 Pedro 3:11, 14.

4. Kon un adoradó di Yehova por determiná loke e no ta?

⁴ Berdadero adoradónan di Yehova sa tambe loke nan no ta. ‘Nan no ta parti di mundu,’ meskos ku nan Lider, Hesukristu, no tabata parti di mundu. (Juan 17:16) Nan ta keda separá for di e nashonnan ku ta “tapá ku skuridat den nan komprondementu, ekskluí  di e bida di Dios.” (Efesionan 4:17, 18) Komo resultado, Hesus su siguidónan ta “renunsiá impiedat [òf, maldat] i deseonan mundano i [ta] biba huisioso, hustu i santu den e siglo presente.”—Tito 2:12.

5. Kiko e konseho pa ‘gaba den Yehova’ ta indiká?

⁵ E bista kla ku nos tin di nos identidat i nos relashon ku e Gobernante Soberano di universo ta motivá nos pa ‘gaba den Yehova.’ (1 Korintionan 1:31) Ki klase di gabamentu esei ta? Komo kristiannan berdadero, nos ta orguyoso di tin Yehova komo nos Dios. Nos ta sigui e konseho: “Laga esun ku ta gaba, gaba den esaki, ku e ta komprondé i konosé mi, ku ami ta SEÑOR, Kende ta mustra miserikòrdia, huisio i hustisia riba tera.” (Jeremias 9:24) Nos ta “gaba” ku nos tin e privilegio di konosé Dios i di ser usá dor di dje pa yuda otro hende.

E Reto

6. Dikon ta difísil pa algun kristian mantené un bista kla di nan identidat komo kristian?

⁶ Ta bèrdat ku no ta semper fásil pa mantené un bista skèrpi di nos identidat distintivo komo kristian. Un yònkuman ku a lanta komo un kristian ta kòrda kon pa un tempu e tabata den un estado spiritualmente débil: “Tabatin biaha ku mi a sinti ku mi no sa dikon mi ta un Testigu di Yehova. Mi a siña e bèrdat for di tempu mi ta chikí. Tin biaha mi a sinti ku esaki tabata simplemente un otro religion bon konosí i aseptá.” Otro hende kisas a laga e mundu di farándula, medionan di komunikashon i e punto di bista aktual di bida ku no ta na armonia ku Dios influensiá nan sentido di ken nan ta. (Efesionan 2:2, 3) De bes en kuando algun kristian kisas ta pasa dor di periodonan den kua nan ta insigur di nan mes i ta reevaluá nan normanan i metanan.

7. (a) Ki klase di eksaminashon propio ta apropiá pa sirbidónan di Dios? (b) Unda e peliger ta sinta?

⁷ Ta malu pa de bes en kuando nos saminá nos mes kuidadosamente? Nò. Podisé bo ta kòrda ku apòstel Pablo a animá kristiannan pa sigui saminá nan mes: “Saminá boso mes pa wak si boso ta den e fe; saminá boso mes!” (2 Korintionan 13:5) Aki e apòstel tabata animá kristiannan pa hasi esfuerso na un manera balansá i sano pa detektá kualke debilidat spiritual ku lo por a desaroyá. Anto e meta mester tabata pa dal e pasonan nesesario pa rektifiká nan. Ora un kristian ta saminá su mes pa wak si e ta den e fe, e mester determiná si su palabranan i akshonnan ta kuadra ku loke supuestamente e ta kere aden. Sin embargo, si e eksaminashon propio ta mal dirigí i e ta motivá nos pa buska nos “identidat” individual òf pa buska kontestanan ku no tin nada di haber ku nos relashon ku Yehova òf ku e kongregashon kristian, esei lo resultá enbano i por ta spiritualmente fatal. * Nunka nos lo ke ‘noufragá enkuanto nos fe’!—1 Timoteo 1:19.

Nos No Ta Liber di Difikultat

8, 9. (a) Kon Moisés a ekspresá su sintimentu di insiguridat? (b) Kon Yehova a reakshoná riba Moisés su sintimentu di inkapasidat? (c) Ki efekto Yehova su palabranan di garantia tin riba bo?

⁸ Kristiannan ku de bes en kuando ta insigur di nan mes mester sinti ku nan a frakasá? Klaru ku nò! De echo, un kos ku por konsolá nan ta di kòrda ku tal sintimentu no ta algu nobo. Testigunan fiel di Dios den pasado tambe a sinti asina. Tuma por ehèmpel Moisés kende a desplegá fe, lealtat i deboshon ekstraordinario. Ora Moisés a risibí un asignashon aparentemente abrumador, el a puntra ku timides: “Ta ken mi ta?” (Eksodo 3:11) Parse ku e kontesta ku e tabatin na mente tabata: ‘Mi ta un don nadie!’ òf ‘mi no ta kapasitá!’ Vários aspekto di Moisés su background kisas a pon’é sinti inadekuá: El a pertenesé na  un nashon di katibu. E israelitanan a rechas’é. E no tabata un bon oradó. (Eksodo 1:13, 14; 2:11-14; 4:10) E tabata un wardadó di karné, un fishi ku e egipsionan a despresiá. (Génesis 46:34) No ta nada straño anto ku el a sinti ku e no ta apto pa bira e libertadó di Dios su pueblo sklabisá!

⁹ Yehova a trankilisá Moisés dor di dun’é dos promesa poderoso: “Lo mi ta ku bo i esaki lo ta e señal pa bo, ku ta ami a manda bo: ora bo a kaba di saka e pueblo for di Egipto, boso lo sirbi Dios riba e seru aki.” (Eksodo 3:12) Ku e palabranan aki Dios a bisa su sirbidó ku tabata yen di duda, ku lo E ta konstantemente kuné. Ademas, Yehova a indiká ku sin falta lo e libra su pueblo. Atraves di siglonan, Dios a duna promesanan similar di sosten. Por ehèmpel, mediante Moisés el a bisa e nashon di Israel ora nan tabata serka di drenta e Tera Primintí: “Sea fuerte i tene kurashi. . . . SEÑOR bo Dios ta esun ku ta bai ku bo. E lo no faya bo ni bandoná bo.” (Deuteronomio 31:6) Yehova a sigurá Josué tambe: “Ningun hende lo no por para bo dilanti tur e dianan di bo bida.  . . . Lo mi ta ku bo; lo mi no faya bo ni bandoná bo.” (Josué 1:5) I Yehova ta primintí kristiannan: “Nunka lo mi no bandoná bo, i nunka lo mi no laga bo desampará.” (Hebreonan 13:5) Siendo ku nos tin tal sosten fuerte, nos mester sinti nos orguyoso di ta kristian!

10, 11. Kiko a yuda e levita Asaf mantené e aktitut korekto pa ku e balor di su sirbishi na Yehova?

¹⁰ Rònt di sinku siglo despues di Moisés, un fiel levita ku yama Asaf a skirbi frankamente tokante e dudanan ku e tabatin di e balor di sigui un bida di rektitut ku empeño. Miéntras ku Asaf tabata lucha pa sirbi Dios apesar di prueba i tentashon, el a mira kon algun hende ku tabata hasi bofon di Dios a bira mas poderoso i próspero. Kon esei a afektá Asaf? El a atmití: “Ma pa loke t’ami, mi pia a hera di trompeká; parumpinga mi pasonan a slep. Pasobra mi tabata envidioso di e arogantenan, ora mi a mira e prosperidat di e malbadonan.” El a kuminsá duda di e balor di ser un adoradó di Yehova. Asaf a pensa: “Siguramente ta enbano mi a tene mi kurason puru, i a laba mi mannan den inosensia; pasobra henter dia mi a wòrdu afligí.”—Salmo 73:2, 3, 13, 14.

¹¹ Kon Asaf a trata ku e emoshonnan inkietante aki? El a nenga ku e tin nan? Nò. El a ekspresá nan den orashon na Dios, manera nos por lesa na Salmo 73. Un bishita na e santuario di e tèmpel a kousa un kambio grandi den Asaf su aktitut. Miéntras e tabata einan, el a realisá ku apesar di tur kos, deboshon na Dios tòg ta e mihó proseder. Unabes el a renobá su apresio spiritual, el a komprondé ku Yehova ta odia maldat i ku na e debido tempu e malbadonan lo ser kastigá. (Salmo 73:17-19) Den e proseso, Asaf a fortalesé su sentido di identidat komo un sirbidó privilegiá di Yehova. El a bisa Dios: “Mi ta konstantemente serka bo; bo a kohe mi man drechi tene. Ku bo konseho lo bo guia mi, i despues  risibí mi den gloria.” (Salmo 73:23, 24) Asaf, tabata orguyoso atrobe di su Dios.—Salmo 34:2.

Nan Tabata Bon Konsiente di Nan Identidat

12, 13. Duna algun ehèmpel di personahenan bíbliko ku tabata orguyoso di nan relashon ku Dios.

¹² Un manera pa fortalesé nos sentido di identidat kristian ta di saminá i imitá e fe di fiel adoradónan kendenan apesar di kontratempu tabata realmente orguyoso di nan relashon ku Dios. Tuma por ehèmpel Hosé, e yu hòmber di Jakòb. Na un edat yòn, nan a bend’é komo katibu den un manera traishonero i el a ser hibá Egipto, sientos di kilometer leu for di su tata temeroso di Dios i hopi leu for di e kalor i apoyo di su hendenan di kas. Den Egipto, Hosé no tabatin ningun hende pa akudí na dje pa haña konseho ku tin Dios su aprobashon. Tambe e tabatin ku konfrontá situashonnan difísil ku a tèst su normanan moral i kuantu el a dependé riba Dios. Sin embargo, ta bisto ku el a hasi un esfuerso deliberá pa keda bon konsiente di su identidat komo un sirbidó di Dios, i el a keda fiel na loke e tabata sa ku ta korekto. E tabata orguyoso di ta un adoradó di Yehova asta den un ambiente hostil, i e no a vasilá pa ekspresá kiko e tabata pensa.—Génesis 39:7-10.

¹³ Ocho siglo despues, un mucha muhé israelita prezu ku a bira katibu di e general sirio Naaman, no a lubidá su identidat komo un adoradó di Yehova. Ora e oportunidat a presentá, ku kurashi el a duna un bon testimonio di Yehova dor di identifiká Eliseo komo un profeta di e Dios berdadero. (2 Reinan 5:1-19) Añanan despues di esei, e hóben  Rei Josias, apesar di tabata den un ambiente korupto, a bin ku reformanan religioso ku a perdurá riba plaso largu, el a drecha Dios su tèmpel i a yuda e nashon bolbe adorá Yehova. E tabata orguyoso di su fe i adorashon. (2 Krónikanan, kapítulo 34 i 35) Daniel i su tres kompañeronan hebreo na Babilonia nunka a lubidá nan identidat komo sirbidó di Yehova, i asta bou di preshon i tentashon, nan a mantené nan integridat. Ta bisto ku nan tabata orguyoso di ta sirbidónan di Yehova.—Daniel 1:8-20.

Sea Orguyoso di Bo Identidat Kristian

14, 15. Kiko ser orguyoso di nos identidat kristian ta enserá?

¹⁴ E sirbidónan di Dios aki tabatin éksito pasobra nan a kultivá un orguyo sano di nan posishon dilanti Dios. Kiko di nos awe? Kiko ser orguyoso di nos identidat kristian ta enserá?

¹⁵ Esaki ta enserá prinsipalmente un apresio profundo pa e echo ku nos ta forma parti di e pueblo ku ta karga Yehova su nòmber, ku tin su bendishon i aprobashon. Dios no tin duda tokante ken ta pertenesé na dje. Apòstel Pablo, kende a biba den un era di bastante konfushon religioso, a skirbi: “Señor konosé esnan ku ta di dje.” (2 Timoteo 2:19; Numbernan 16:5) Yehova ta orguyoso di esnan “ku ta di dje.” E ta deklará: “Esun ku ta mishi ku boso ta mishi ku mi pòpch’i wowo.” (Zakarias 2:8, NW) Ta bisto anto ku Yehova stima nos. Na nos turno, nos relashon kuné mester ta basá riba amor profundo p’e. Pablo a komentá: “Si un hende ta stima Dios, e ta konosí pa Dios.”—1 Korintionan 8:3.

16, 17. Dikon kristiannan, hóben i bieu, por ta orguyoso di nan herensia spiritual?

¹⁶ Hóbennan ku a lanta komo Testigu di Yehova ta hasi bon di saminá si nan identidat kristian ta birando mas fuerte a base di nan relashon personal ku Dios. Nan no por dependé djis riba e fe di nan mayornan. Relashoná ku kada sirbidó di Dios, Pablo a skirbi: “Pa su mes shon e ta keda para òf e ta kai.” P’esei Pablo a sigui bisa: “Kada un di nos lo duna kuenta di su mes na Dios.” (Romanonan 14:4, 12) Pues ta bisto anto ku djis aseptá e adorashon di bo mayornan sin ningun berdadero interes, lo no yuda bo mantené un relashon íntimo i duradero ku Yehova.

¹⁷ Atraves di historia, tabatin un lista largu di testigu di Yehova. E lista ta kuminsá for di e hòmber fiel Abel—rònt di 60 siglo pasá—te na e “multitut grandi” di Testigunan moderno i e ta sigui ku kantidat di adoradó di Yehova ku lo disfrutá di un futuro eterno. (Revelashon 7:9; Hebreonan 11:4) Nos ta e grupo mas resien riba e lista largu aki di adoradónan fiel. En bèrdat nos tin un herensia spiritual maravioso!

18. Kon nos norma- i balornan ta distinguí nos for di mundu?

¹⁸ Nos identidat kristian ta enserá tambe e konhunto di norma-, balor-, kualidat- i karakterístikanan ku ta identifiká nos komo kristian. E ta “E Kaminda,” e úniko kaminda di bida ku ta resultá den éksito i ku ta agradá Dios. (Echonan 9:2; Efesionan 4:22-24) Kristiannan ta “saminá tur kos” i ta “tene duru na loke ta bon”! (1 Tesalonisensenan 5:21) Nos ta komprondé bon kla e diferensia grandi ku tin entre kristianismo i e mundu alehá for di Dios. Yehova no ta laga lugá pa ningun duda entre adorashon berdadero i falsu. Mediante  profeta Malakias, el a deklará: “Boso lo distinguí atrobe entre e hustu i e malbado, entre ún ku ta sirbi Dios i ún ku no ta sirbié.”—Malakias 3:18.

19. Kiko nunka lo pasa ku kristiannan berdadero?

¹⁹ Siendo ku den e mundu konfundí i desorientá aki ta asina importante pa gaba den Yehova, kiko por yuda nos keda ku un orguyo sano di nos Dios i mantené un bista bon kla di nos identidat kristian? Den e siguiente artíkulo nos ta haña sugerensianan útil. Miéntras bo ta konsiderá esakinan, un kos bo por ta sigur di dje: Kristiannan berdadero nunka lo bira víktima di “apateismo.”

[Nota]

Bo Ta Kòrda?

• Kon kristiannan por ‘gaba den Yehova’?

• Kiko bo a siña di e ehèmpel di Moisés i Asaf?

• Kua personahenan bíbliko tabata orguyoso di nan sirbishi na Dios?

• Kiko ser orguyoso di nos identidat kristian ta enserá?

[Preguntanan di Estudio]

[Plachi na página 14]

Pa un tempu, Moisés tabata insigur di su mes

[Plachinan na página 15]

Hopi sirbidó di Yehova di pasado tabata orguyoso di nan identidat distintivo