Milagernan Realidat òf Fantasia?

MESORA e lema di e steker riba bùmper di e outo ku tabata pasando a hala atenshon di e hòmber, “Milagernan Ta Sosodé, Djis Puntra e Angelnan.” Maske e mes tabata un hende religioso, e no tabatin sigur ta kiko e lema aki a nifiká. E ta nifiká ku e shofùr ta kere den milager? Òf mas bien e tabata un manera sarkástiko pa mustra ku e no ta kere ni den milager ni den angel?

Kisas lo bo ke sa kiko e outor aleman Manfred Barthel a komentá: “Milager ta un palabra ku ta dividí lesadónan mesora den dos grupo opuesto.” Esnan ku ta kere den milager ta konvensí ku nan ta sosodé i kisas ku frekuensia. * Por ehèmpel, segun un informe na Gresia durante e último añanan kreyentenan a pretendé ku milagernan a tuma lugá mas o ménos un bes pa luna. P’esei un obispu di e Iglesia Griego Òrtodòks a atvertí: “Kreyentenan tin tendensia di mira Dios, Maria i e santunan komo si fuera ta hende nan ta. Kreyentenan no mester bai asina leu.”

Den algun otro pais no tin muchu hende ta kere den milager. Segun un enkuesta publiká na Alemania na aña 2002, 71 porshento di e poblashon ta haña ku milager no ta eksistí. Sin embargo, entre e ménos ku un tersera parti ku sí ta kere den milager tin tres señora ku ta pretendé ku nan a risibí un mensahe for di Bírgen Maria. Un par di luna despues ku Maria supuestamente a aparesé na nan kompañá pa angelnan i un palomba, e korant aleman Westfalenpost a informá: “Te aworakí alrededor di 50.000 peregrino, tantu hende ku ta buskando kurashon komo hende kurioso, a mustra interes den e vishonnan ku e señoranan aki a mira.” I nan tabata spera ku un 10.000 hende mas lo a drenta na gran kantidat den e pueblo pa mira otro aparishonnan. Nan ta bisa ku na aña 1858, un aparishon similar di Bírgen Maria a tuma lugá na Lourdes, Fransia, i na aña 1917, na Fátima, Portugal.

Kiko Religionnan No-Kristian Ta Pensa?

Den kasi tur religion tin hende ta kere den milager. The Encyclopedia of Religion ta splika ku e fundadónan di budismo, kristianismo i islam tabatin diferente punto di bista enkuanto milager, pero e ta bisa: “Historia posterior di e religionnan aki ta mustra klaramente ku milager i relatonan tokante milagernan semper tabata un parti integral di kreensianan religioso di humanidat.” E ensiklopedia aki ta bisa ku “na sierto okashon Buda mes a yega di hasi milager.” Despues di tempu, ora ku “misioneronan a introdusí budismo na China, hopi bes nan a usa nan podernan milagroso.”

Despues di referí na e diferente supuesto milagernan ei, e ensiklopedia ta konkluí bisando: “Por ta difísil pa aseptá ku tur e relatonan ku biógrafonan a konta enkuanto susesonan milagroso a sosodé, pero no kabe duda  ku a kompilá nan ku bon intenshon, esta, pa glorifiká Buda, kende por a dota su siguidónan ferviente ku tal podernan milagroso.” E mesun fuente di informashon ta bisa di islam: “Mayoria di komunidat islam nunka no a stòp di spera den milager. Segun tradishon (hadīths), na vários okashon Mohamed a hasi milager públikamente. . . . Hende ta kere ku asta despues ku e santunan muri nan ta sigui hasi milager na nan graf na fabor di esnan fiel, i ku fervor hende ta pidi e santunan intersedé pa nan.”

Kiko di Milagernan den Kristianismo?

Hopi hende ku ta pertenesé na kristianismo tin opinionnan kompletamente diferente. Tin di nan ta aseptá komo realidat loke Beibel ta bisa di e milagernan ku Hesukristu òf otro sirbidónan di Dios di e era prekristian a hasi. Sin embargo, hopi hende ta di akuerdo ku e reformista protestant Martin Luther. The Encyclopedia of Religion ta bisa di dje: “Tantu Luther komo Calvijn a skirbi ku e era di milager a pasa i ku nan lo no sosodé mas.” Iglesia Katóliko ta sigui kere den milager “sin purba splika kon nan a sosodé,” segun e mesun ensiklopedia aki. Sin embargo, “e komunidat protestant intelektual ta kere ku kristianismo ta mas tantu un asuntu di moralidat i ku ni Dios ni e mundu spiritual a komuniká ku bida humano òf influensi’é na gran eskala.”

Otro personanan ku ta bisa ku nan ta kristian, entre otro algun klero, ta duda ku e milagernan menshoná den Beibel a sosodé di bèrdat. Konsiderá por ehèmpel e relato na Eksodo 3:1-5 di e mata na kandela. E buki What the Bible Really Says (Loke Beibel Realmente Ta Bisa) ta splika ku hopi teólogo aleman no ta konsiderá e relato di milager aki  komo algu literal. Mas bien, nan ta interpret’é komo “un símbolo di e lucha interno ku Moisés tabatin pa motibu di remordimentu di konsenshi i angustia mental.” E buki ta sigui bisa: “Tambe por mira e kandela komo flornan ku ta habri den rayonan di solo den presensia divino.”

Kisas bo no ta haña e splikashon ei satisfaktorio. Pues, kiko bo mester kere? Ta realístiko pa kere ku milagernan a yega di sosodé? I kiko di milagernan di awendia? Dor ku nos no por puntra e angelnan, ta ken nos por puntra anto?

E Punto di Bista Bíbliko

Ningun hende por nenga ku Beibel ta papia di okashonnan den pasado den kua Dios a intervení pa hasi algun akto ku ta imposibel pa hende hasi. Beibel ta bisa di dje: “Ku milagernan tremendo i gran despliegue di poder bo a saka Israel, bo pueblo, for di Egipto i esei a yena tur hende ku temor pa bo.” (Jeremias 32:21, BPK) Figura bo, Dios a manda dies plaga pa humiá e nashon mas poderoso di e tempu ei, ku a inkluí morto di nan primogénito. No tin duda, nan tabata milagernan!—Eksodo, kapítulo 7 pa 14.

Siglonan despues, e kuater eskritornan di Evangelio a deskribí alrededor di 35 milager ku Hesus a hasi. De echo, nan palabranan ta indiká ku probablemente el a hasi asta mas milager pero ku no a ser registrá. E informenan aki ta realidat òf fantasia? *—Mateo 9:35; Lukas 9:11.

Si Beibel ta loke e ta afirmá di ta, esta Dios su Palabra di bèrdat, e ora ei bo tin un base sólido pa kere den e milagernan ku e ta papia di dje. Beibel ta mustra bon kla ku milagernan a sosodé den pasado, manera por ehèmpel kurashon milagroso i resurekshon. Pero e ta splika bon kla tambe ku tal milagernan no ta tuma lugá mas. (Wak e kuadro na página 4, “Dikon Sierto Milager No Ta Sosodé Mas.”) Esei ta nifiká ku asta hendenan ku ta aseptá Beibel komo realidat no ta kere den e milagernan di awendia? Laga e siguiente artíkulo kontesta e pregunta ei.

[Nota]

[Kuadro na página 4]

DIKON SIERTO MILAGER NO TA SOSODÉ MAS

Beibel ta menshoná diferente tipo di milager. (Eksodo 7:19-21; 1 Reinan 17:1-7; 18:22-38; 2 Reinan 5:1-14; Mateo 8:24-27; Lukas 17:11-19; Juan 2:1-11; 9:1-7) Hopi di e milagernan aki a yuda identifiká Hesus komo Mesias, i nan a proba ku e tabatin Dios su apoyo. Hesus su promé siguidónan a mustra ku nan tabatin e don di milager, manera e don di papia den lenga i profetisá. (Echonan 2:5-12; 1 Korintionan 12:28-31) E donnan milagroso ei tabata útil pa e kongregashon kristian ora el a kuminsá. Dikon?

Pa kuminsá, no tabatin hopi kopia di e Skritura. Por lo general ta solamente e rikunan tabatin ròl òf buki. Den e paisnan pagano, hende no tabata konosé ni Beibel ni su Outor Yehova. Siñansanan kristian mester a wòrdu pasá pa otro hende oralmente. E donnan di milager tabata útil pa proba ku Dios tabata usando e kongregashon kristian.

Pero Pablo a splika ku e donnan aki lo a kaba ora nan no tabata nesesario mas. “Pa loke ta donnan di profesia, nan lo wòrdu kitá; pa loke ta lenganan, eseinan lo stòp; pa loke ta konosementu, esei lo wòrdu kitá. Pasobra nos ta komprondé pa un parti, i nos ta profetisá pa un parti; ma ora loke ta perfekto bin, loke ta pa un parti lo wòrdu kitá.”—1 Korintionan 13:8-10.

Awendia ta fásil pa hende haña tantu Beibel komo konkordansia- i ensiklopedianan. Mas ku seis mion kristian entrená ta yudando otro hende pa haña konosementu tokante Dios basá riba Beibel. Pues, milager no ta nesesario mas pa proba ku Hesukristu ta e Libertadó nombrá di Dios ni pa duna prueba ku Yehova ta apoyá su sirbidónan.