Un Bishita na e Isla di Saba

E ISLA di Saba ku ta forma parti di e Reino Hulandes, un tempu a fungi komo bastion di piratanan ku tabata nabegá e awanan di Laman Caribe en buska di botin. Awe, e isla chikititu aki, situá 240 kilometer ost di Puerto Rico, ta kas di 1.600 habitante, di kua 5 ta Testigu di Yehova. Sin embargo, e predikadónan intrépido aki ta en buska di algu hopi mas balioso ku botin. Diligentemente nan ta buskando hende ku tin “e disposishon korekto pa bida eterno.”—Echonan 13:48, NW.

E bon nobo di e Reino di Dios a yega e isla pa promé biaha dia 22 di yüni 1952, ora ku Sibia, un boto di bela di 59 pia (18 meter) di Testigunan di Yehova, a ankra dilanti di kosta di Saba. (Mateo 24:14) E misioneronan Gust Maki i Stanley Carter a subi The Ladder, un trapi di mas ku 500 tret ku ta hiba na The Bottom, kapital di Saba. * Pa siglonan, e kaminda smal aki tabata e úniko forma pa yega na e habitantenan di e isla.

E promé informe ku a sali publiká tokante e trabou di prediká na Saba tabata den e Anuario 1966 di Testigunan di Yehova. Segun e informe ei, tabatin un solo Testigu aktivo riba e isla. Despues, un famia di Canada a prediká e bon nobo einan pa vários aña. Resientemente, Russel ku Kathy, un pareha merikano ku a baha ku penshon, a bai Saba i a partisipá den e trabou di prediká einan. Ban lesa nan relato.

 Bishita na Saba

Ami ku mi esposa a yega ku avion komo huéspetnan di Ronald, kende tabata e úniko Testigu di Yehova riba e isla durante gran parti di dékada di 1990. Nos anfitrion ta wardando riba nos na aeropuerto. E ta keda enkantá ku e kaha chikí di bèrdura ku nos a trese komo regalo, ya ku riba e isla nan no ta kultivá bèrdura pa bende. Nos ta subi un trùk chikí, i pokopoko nos ta subi zigzag ku e kaminda te ora nos yega na tòp di Mount Scenery, un volkan morto.

Nos ta para na e pueblito di Hell’s Gate pa Ronald chèk riba e bòrchi di informashon públiko si ainda e invitashon pa e diskurso di djadumingu t’ei. Nos ta keda kontentu ku ainda e t’ei. Ronald ta subi bèk den trùk, i nos ta sigui ku nos subida rumbo pa e pueblito mas grandi di e isla, Windwardside (Banda di Bientu). Manera e nòmber ta indiká, e pueblito pintoresko aki ta situá na e isla su banda di bientu, i ta keda un 400 meter riba nivel di laman. Ora nos kore drenta den kurá di Ronald su kas, nos ta mira un bòrchi kolorido riba e balkon dilanti ku ta identifik’é komo un Salòn di Reino di Testigunan di Yehova.

Durante e kuminda di mèrdia mi ta hasi e pregunta ku a pone ku nos a bin bishit’é: “Ta kon bo a bira un proklamadó di Reino na Saba?”

Ron a konta: “Tempu ku konstrukshon di e sukursal di Testigunan di Yehova na Puerto Rico a terminá na 1993, ami ku mi kasá tabata interesá pa keda den un asignashon den eksterior. Anteriormente, nos a bishitá Saba ku un otro pareha pionero i nos a tende ku tabatin 1.400 habitante pero ningun Testigu. P’esei nos a papia ku e Komité di Sukursal di Puerto Rico pa nos muda bin aki.

Un kos a hiba na otro, i finalmente nos a risibí aprobashon pa muda. Lamentablemente, dos aña despues mi kasá a bira gravemente malu, i nos a regresá California. Despues di su morto, mi a bin Saba bèk. E kos ta ku ami no gusta kuminsá un kos sin kab’é.”

Predikashon di Kas pa Kas na Saba

E sala di Ron su kas di 100 aña bieu ta fungi tambe komo Salòn di Reino. * Segun ku nos ta kome desayuno i prepará pa sali bai prediká, áwaseru di un nubia ku ta pasa ta muha e kushina ku ta na aire liber. Despues di desayuno, nos ta sali ku shelu nublá pa partisipá den predikashon di kas pa kas den The Bottom. Na kada kas, Ron ta kumindá e doño di kas na nòmber. Nos kòmbersashon ta enfoká riba un notisia lokal resiente. Mayoria hende konosé Ron i su sirbishi, i hopi di nan gustosamente ta aseptá literatura bíbliko.

Si bo no konosé e habitantenan lo por ta difísil pa mantené un registro di esnan interesá den e mensahe di Reino. Dikon? Pasobra “lei ta eksigí pa tur kas ta di fèrf e mesun koló,” segun Ron. I bèrdat, ora mi wak rònt mi ta mira ku tur e kasnan na Saba ta blanku ku dak kòrá.

Na final di nos kòmbersashon bíbliko, nos ta invitá e doño di kas pa asistí na e diskurso bíbliko pa públiko ku nos lo tin djadumingu na e Salòn di Reino. Ora Ron ta riba e isla, e ta duna un diskurso públiko tur siman. Aktualmente, 17 estudio di Beibel ta ser kondusí na Saba. Binti persona a asistí na Konmemorashon di Kristu su morto na 2004. I ounke e kantidat ei por parse hopi tiki, e ta representá 1 porshento di henter e poblashon di Saba.

De echo, Testigunan di Yehova no a spar ningun esfuerso pa alkansá mas tantu hende posibel ku Dios su mensahe di salbashon. Sea ta riba un isla chikititu manera Saba òf riba henter un kontinente, Testigunan di Yehova fielmente ta kumpli ku e tarea di “hasi tur e nashonnan disipel.”—Mateo 28:19.

Lamentablemente, nos bishita a yega na su fin. Segun ku nos ta subi nos avion, nos ta zuai yama ayó. Semper nos lo kòrda nos bishita na Saba i e tempu ku nos a pasa pa subi bai The Bottom!

[Nota]

[Mapanan na página 10]

(Pa e teksto den su formato kompleto, wak e publikashon)

PUERTO RICO

[Rekonosementu pa Potrèt na página 10]

Background: www.sabatourism.com