Guia Sabí pa Parehanan Kasá
Guia Sabí pa Parehanan Kasá
“Esposanan, sea sumiso na boso mes esposo, manera na Señor. Esposonan, stima boso esposa.”—Efesionan 5:22, 25.
1. Kiko ta e punto di bista korekto di matrimonio?
HESUS a bisa ku matrimonio ta ora Dios uni un hòmber ku un muhé pa nan bira “ún karni.” (Mateo 19:5, 6) Esei ta enserá ku dos persona ku personalidat distinto ta siña desaroyá interesnan en komun i ta traha huntu pa alkansá metanan en komun. Matrimonio ta un kompromiso di bida largu, no un akuerdo temporal ku fásilmente bo por sali afó. Den hopi pais no ta difísil pa haña un divorsio, pero den bista di un kristian, e relashon matrimonial ta sagrado. Ta un motibu hopi serio so por ta e base pa pone fin na dje.—Mateo 19:9.
2. (a) Ki yudansa tin disponibel pa parehanan kasá? (b) Dikon ta importante pa hasi esfuerso pa un matrimonio por ta eksitoso?
2 Un konsehero matrimonial a bisa: “Un bon matrimonio ta un proseso di kambio kontinuo segun ku e ta reflehá kuestionnan nobo, trata ku problemanan ku ta surgi, i ta usa e rekursonan disponibel na kada etapa di bida.” Pa kasánan kristian, e rekursonan ei ta entre otro, konseho sabí for di Beibel, apoyo di nan rumannan kristian, i un relashon íntimo ku Yehova mediante orashon. Un matrimonio eksitoso ta sobrebibí apesar di difikultatnan, i atraves di añanan e ta trese felisidat i satisfakshon p’e esposo i esposa. Mas importante ainda, e ta trese onor na Yehova Dios, e Originadó di matrimonio.—Génesis 2:18, 21-24; 1 Korintionan 10:31; Efesionan 3:15; 1 Tesalonisensenan 5:17.
Imitá Hesus i Su Kongregashon
3. (a) Menshoná e puntonan prinsipal di Pablo su konseho na parehanan kasá. (b) Ki ehèmpel ekselente Hesus a pone?
3 Dos mil aña pasá, apòstel Pablo a duna konseho sabí na parehanan kristian ora el a skirbi: “Meskos ku e iglesia ta sumiso na Kristu, asina tambe e esposanan mester ta sumiso na nan esposo den tur kos. Esposonan, stima boso esposa, meskos ku Kristu tambe a stima e iglesia i a entregá su mes p’e.” (Efesionan 5:24, 25) E komparashonnan aki ta ekselente! Esposanan kristian ku ta keda humildemente sumiso na nan esposo ta imitá e kongregashon dor di rekonosé i kumpli ku e prinsipio di hefatura. Esposonan kreyente ku ta sigui stima nan esposa, sea den tempu bon òf difísil, ta demostrá ku nan ta sigui estrechamente Kristu su ehèmpel di stima e kongregashon i perkurá p’e.
4. Kon esposonan por sigui Hesus su ehèmpel?
4 Esposonan kristian ta e kabes di nan famia, pero nan tambe tin un kabes, Hesus. (1 Korintionan 11:3) Pues, meskos ku Hesus a perkurá pa su kongregashon, asina esposonan amorosamente ta perkurá pa nan famia den un sentido spiritual i material, asta si esei ta rekerí sakrifisio personal. Nan ta pone e bienestar di nan famia promé ku nan propio deseo- i preferensianan. Hesus a bisa: “Tur loke boso kier pa hende hasi pa boso, hasi meskos pa nan.” (Mateo 7:12) E prinsipio ei ta apliká spesialmente den matrimonio. Pablo a mustra esaki ora el a bisa: “Esposonan tambe mester stima nan esposa manera nan mes kurpa. . . . Nunka ni un hende no a odia su mes karni, ma ta aliment’é i ta kuid’é.” (Efesionan 5:28, 29) Un hòmber mester alimentá i kuida su kasá ku e mesun diligensia ku e ta alimentá i kuida su mes.
5. Kon esposanan por imitá e kongregashon kristian?
5 Esposanan ku ta adorá Dios ta wak riba e kongregashon kristian komo un ehèmpel. Tempu ku Hesus tabata riba tera, su siguidónan gustosamente a bandoná nan okupashonnan di ántes i a siguié. Despues ku Hesus a subi na shelu, nan a sigui sometí na dje, i den transkurso di kasi 2.000 aña, e berdadero kongregashon kristian a keda sometí na dje i a sigui su liderato den tur kos. Asina tambe esposanan kristian no ta despresiá nan esposo òf trata na minimisá e areglo bíbliko di hefatura den matrimonio. Mas bien, nan ta apoyá nan esposo, ta sumiso na dje, ta koperá kuné i asina nan ta anim’é. Ora ku tantu e esposo komo e esposa ta aktua den un manera amoroso asina, nan matrimonio lo tin éksito i nan tur dos lo haña goso den e relashon.
Sigui Biba ku Nan ku Komprenshon
6. Ki konseho Pedro a duna esposonan, i dikon e ta importante?
6 Apòstel Pedro tambe tabatin konseho pa parehanan kasá, i su palabranan na esposonan ta hopi direkto. El a bisa: “Biba ku boso esposanan ku komprenshon, manera ku un vaso mas delikado, komo ku e ta hende muhé; i dun’é onor komo ko-heredero di e grasia di bida, pa boso orashonnan no wòrdu strobá.” (1 Pedro 3:7) E seriedat di e konseho di Pedro ta bisto den e último palabranan di e versíkulo ei. Si un esposo keda sin duna onor na su esposa, esei lo afektá e esposo su relashon ku Yehova. Su orashonnan lo ser strobá.
7. Kon un esposo mester duna onor na su esposa?
7 Pues anto, kon esposonan por duna onor na nan esposa? Duna onor na bo esposa ta nifiká trat’é amorosamente, ku rèspèt i dignidat. Trata un esposa na tal manera bondadoso lo tabata un novedat pa hopi hende. Un eksperto di asuntunan griego a skirbi: “Bou di lei romano un muhé no tabatin ningun derecho. Pa lei el a keda semper un mucha. . . . E tabata totalmente bou di kontròl di su esposo, i kompletamente na su merset.” Ki un kontraste grandi ku siñansa kristian! E esposo kristian a duna onor na su esposa. Loke a dirigí e manera ku el a trata su esposa tabata prinsipionan kristian, no kapricho personal. Ademas, el a trat’é ku “komprenshon,” i a tene kuenta ku su esposa ta un vaso mas delikado.
Den Ki Sentido “un Vaso Mas Delikado”?
8, 9. Den ki maneranan hende muhé ta igual ku hende hòmber?
8 Ora ku Pedro a bisa ku e muhé ta “un vaso mas delikado,” e no tabata ke men ku hende muhé ta mas suak ku hende hòmber den sentido intelektual òf spiritual. Ta bèrdat ku hopi hende hòmber kristian tin privilegionan den kongregashon ku hende muhé no por ferwagt di haña, i den e famia hende muhé ta sometí na nan esposo. (1 Korintionan 14:35; 1 Timoteo 2:12) No opstante, Dios ta rekerí e mesun fe, perseveransia i normanan moral haltu for di tur hende, hòmber i muhé. I manera Pedro a bisa, tantu esposo komo esposa ta “ko-heredero di e grasia di bida.” Pa loke ta toka salbashon, nan tin mesun posishon dilanti di Yehova Dios. (Galationan 3:28) Pedro su karta tabata dirigí na kristiannan ungí di promé siglo. Pues, su palabranan a rekordá esposonan kristian ku komo “ko-heredero ku Kristu,” nan i nan esposa tabatin e mesun speransa selestial. (Romanonan 8:17) Un dia, ámbos lo a sirbi komo saserdote i rei den Dios su Reino selestial!—Revelashon 5:10.
9 Esposanan kristian ungí di ningun manera tabata inferior na nan esposonan kristian ungí. I en prinsipio, esei ta konta tambe pa esnan ku tin e speransa di biba riba tera. Tantu hende hòmber komo hende muhé di e “multitut grandi” ta laba nan pañanan i hasi nan blanku den sanger di e Lamchi. Tantu hende hòmber komo hende muhé ta partisipá “di dia i anochi” den e gritu mundial di alabansa na Yehova. (Revelashon 7:9, 10, 14, 15) Tantu hende hòmber komo hende muhé ta spera ansiosamente pa disfrutá di “e libertat glorioso di e yunan di Dios,” ora ku nan lo deleitá den e “loke ta bida berdadero.” (Romanonan 8:21; 1 Timoteo 6:19) Sea ungí òf di e otro karnénan, tur kristian ta sirbi Yehova huntu komo “ún tou” bou di “ún wardadó.” (Juan 10:16) Esei ta un motibu hopi konvinsente pa un esposo i esposa kristian mustra e debido onor na otro!
10. Den ki sentido hende muhé ta “un vaso mas delikado”?
10 Den ki manera anto, hende muhé ta “un vaso mas delikado”? Podisé Pedro tabata referí na e echo ku por lo general hende muhé su kurpa ta mas chikí i nan tin ménos forsa físiko ku hende hòmber. Ademas, den nos kondishon imperfekto, e privilegio úniko di haña yu ta kaba ku salú físiko di e hende muhé. Muhénan den edat pa haña yu kisas ta konfrontá malestar físiko riba un base regular. Definitivamente nan tin mester di kuido i konsiderashon spesial ora nan ta sufri di tal malestar òf ta soportá e agotashon di embaraso i di duna lus. Un esposo ku ta duna onor na su esposa i ta rekonosé ku su esposa tin mester di apoyo, lo kontribuí masha hopi na e éksito di e matrimonio.
Den un Famia Dividí den e Aspekto Religioso
11. Den ki sentido un matrimonio por tin éksito asta si e esposo i esposa no ta di mesun religion?
11 Pero kiko si parehanan kasá tin diferente punto di bista religioso debí ku un di nan a aseptá e bèrdat kristian despues ku nan tabata kasá kaba i e otro no a aseptá e bèrdat? Un matrimonio asina por tin éksito? E eksperensia di hopi ta bisa ku sí. Un esposo i esposa ku no tin e mesun religion tòg por tin un matrimonio eksitoso den e sentido ku e por dura i trese felisidat pa nan tur dos. Ademas, e matrimonio ainda ta válido den bista di Yehova; ainda nan ta “ún karni.” P’esei, kasánan kristian ta haña e konseho pa keda ku e partner inkrédulo si e partner ei ta di akuerdo pa keda. Si nan tin yu, e yunan ta benefisiá di e fieldat di e mayor kristian.—1 Korintionan 7:12-14.
12, 13. Siguiendo e konseho di Pedro, kon esposanan kristian por yuda esposonan inkrédulo?
12 Pedro a duna palabranan bondadoso di konseho na muhénan kristian ku ta biba den un famia dividí den e aspekto religioso. En prinsipio por apliká su palabranan tambe na esposonan kristian ku ta den mesun situashon. Pedro a skirbi: “Boso, esposanan, sea sumiso na boso mes esposonan, pa si algun di nan ta desobedesidu na e palabra, nan por wòrdu ganá sin palabra pa medio di e kondukta di nan esposanan, ora nan opservá boso kondukta puru i respetuoso.”—1 Pedro 3:1, 2.
13 Si un esposa ku takto por splika su kreensianan religioso na su esposo, esei lo ta hopi bon. Pero kiko si e no ke skucha? Esei ta su desishon. No opstante, esei no ke men ku tur kos ta pèrdí, ya ku kondukta kristian tambe ta duna un testimonio potente. Hopi esposo ku na prinsipio no tabata interesá òf ku tabata asta oponé e religion di nan kasá a haña e “disposishon korekto pa bida eterno” despues di mira e kondukta ekselente di nan esposa. (Echonan 13:48, NW) Asta si un esposo no aseptá e bèrdat kristian, lo e por keda faborablemente impreshoná dor di e kondukta di su esposa, i esei por fortifiká e laso matrimonial. Un esposo kende su kasá ta un Testigu di Yehova a atmití ku e nunka lo por kumpli ku e normanan haltu di e Testigunan. Pero tòg e ta yama su mes “e esposo felis di un esposa enkantador” i sinseramente el a elogiá su esposa i e esposa su kompañeronan Testigu den un karta na un korant.
14. Kon esposonan por yuda nan esposa inkrédulo?
14 Esposonan kristian ku a apliká e prinsipionan di e palabranan di Pedro tambe a logra gana nan kasá na nan banda dor di nan kondukta. Esposanan inkrédulo a ripará kon nan esposo a haña un sentido di responsabilidat, a stòp di malgastá sèn na humamentu, bebementu i wega di plaka, i no ta papia kosnan ofensivo mas. Algun di e esposanan inkrédulo aki a sera konosí ku otro miembronan di e kongregashon kristian. Nan a keda impreshoná ku e amoroso hermandat kristian, i loke nan a opservá entre e rumannan a hala nan na Yehova.—Juan 13:34, 35.
“E Persona Skondí di e Kurason”
15, 16. Ki klase di kondukta di un esposa kristian lo por gana un esposo inkrédulo na su banda?
15 Ki klase di kondukta lo por gana un esposo na bo banda? Bon mirá, esei ta e klase di kondukta ku hende muhé kristian naturalmente ta kultivá. Pedro a bisa: “No laga boso dòrnamentu ta di pafó so—flègtmentu di kabei, bistimentu di hoya di oro, òf bistimentu di paña luhoso; ma lag’é ta e persona skondí di e kurason, ku e kalidat inkoruptibel di un spiritu suave i ketu, lokual ta presioso den bista di Dios. Pasobra na e manera aki promé aya e muhénan santu tambe, kendenan tabata spera den Dios, tabata dòrna nan mes, siendo sumiso na nan mes esposo. Asina Sara a obedesé Abraham i a yam’é señor, i boso a bira su yunan, si boso hasi loke ta korekto sin tene miedu di nada.”—1 Pedro 3:3-6.
16 Pedro ta konsehá un muhé kristian pa no dependé riba aparensia di pafó. Mas bien, e mester laga su esposo ripará e efekto ku siñansanan di Beibel tin riba su persona interno. Laga e esposo mira su personalidat nobo den akshon. Podisé lo e mira e kontraste entre esei i e personalidat bieu ku e esposa tabatin. (Efesionan 4:22-24) Sigur lo e haña e esposa su “spiritu suave i ketu” un kos refreskante i atraktivo. Tal aktitut no solamente ta agradá un esposo sino tambe ta “presioso den bista di Dios.”—Kolosensenan 3:12.
17. Kon Sara ta un ekselente ehèmpel pa esposanan kristian?
17 Sara ta ser menshoná komo un ehèmpel, i e ta un ehèmpel digno pa esposanan kristian sea ku nan esposo ta kreyente òf nò. No tin duda ku Sara a mira Abraham komo su kabes. Asta den su kurason, el a yam’é “señor.” (Génesis 18:12, NW) Sin embargo, esei no a rebahá su dignidat. E tabata klaramente un muhé spiritualmente fuerte ku su propio fe firme den Yehova. De echo, e ta parti di e “nubia asina grandi di testigunan” kende nan ehèmpel di fe mester motivá nos pa ‘kore ku perseveransia e kareda ku ta poní nos dilanti.’ (Hebreonan 11:11; 12:1) Pa un esposa kristian no ta un humiashon p’e ta manera Sara.
18. Ki prinsipionan nos mester tene na mente den un kas dividí?
18 Den un kas kaminda e kasánan ta di diferente religion, e esposo ta keda e kabes. Si e ta esun den e bèrdat, lo e mustra konsiderashon pa e kreensianan di su esposa sin komprometé su propio fe. Si e esposa ta e kreyente, e tampoko lo no komprometé su fe. (Echonan 5:29) Pero tòg lo e no kuestioná e hefatura di su esposo. Lo e onra e esposo su posishon i keda bou “di e lei” di su esposo.—Romanonan 7:2.
E Guia Sabí di Beibel
19. Kua ta algun preshon ku ta afektá e laso matrimonial, pero kon por resistí e preshonnan ei?
19 Awe, tin hopi kos ku por pone preshon riba e laso matrimonial. Tin hende hòmber ku no ta asumí nan responsabilidatnan. Tin hende muhé ku ta nenga di aseptá e hefatura di nan kasá. Den algun matrimonio, un kasá ta maltratá e otro sea físikamente òf verbalmente. Pa kristiannan, tenshon ekonómiko, imperfekshon humano i e spiritu di mundu ku su inmoralidat i sentido trosí di norma i balor por pone nan lealtat na prueba. Sin embargo, esposo- i esposanan kristian ku ta sigui e prinsipionan di Beibel, sea kual sea nan situashon, ta risibí Yehova su bendishon. Asta si ta un partner so den e matrimonio ta apliká prinsipionan bíbliko, e situashon ta mihó ku si ningun di dos no tabata apliká nan. Ademas, Yehova ta stima i ta yuda su sirbidónan ku ta keda fiel na nan promesa matrimonial asta den situashonnan difísil. E no ta lubidá nan lealtat.—Salmo 18:25, NW; Hebreonan 6:10; 1 Pedro 3:12.
20. Ki konseho Pedro tabatin pa tur kristian?
20 Despues di konsehá hòmber- i muhénan kasá, apòstel Pedro a konkluí ku palabranan sinsero di estímulo. El a bisa: “Finalmente, boso tur sea di akuerdo ku otro, teniendo kompashon ku otro, stimando manera ruman, i sea miserikòrdioso i humilde den spiritu, no pagando malu ku malu òf insulto ku insulto, ma mas bien dunando un bendishon; pasobra boso a wòrdu yamá pa e propósito aki pa boso por a heredá un bendishon.” (1 Pedro 3:8, 9) En bèrdat un konseho sabí pa tur, spesialmente pa parehanan kasá!
Bo Ta Kòrda?
• Kon esposonan kristian ta imitá Hesus?
• Kon esposanan kristian ta imitá e kongregashon?
• Den ki manera esposonan ta duna onor na nan esposa?
• Kua ta e mihó proseder pa un esposa kristian kende su esposo no ta un kreyente?
[Preguntanan di Estudio]
[Plachi na página 16]
Un esposo kristian ta stima su kasá i perkurá p’e
Un esposa kristian ta respetá i onra su kasá
[Plachi na página 17]
Distinto for di lei romano, siñansa kristian a rekerí di un esposo p’e duna onor na su kasá
[Plachi na página 18]
Tantu hende hòmber komo hende muhé di e “multitut grandi” ta spera ansiosamente riba bida eterno den Paradeis
[Plachi na página 20]
Sara a mira Abraham komo su señor