Hasi Guera ku Palabra​—Dikon Esei Ta Hasi Daño?

“Di ki fuente tin guera i di ki fuente tin pelea den boso?”—SANTIAGO 4:1, NW.

E ESKRITOR di Beibel Santiago no a dirigí e pregunta aki na e sòldánan di e legionnan romano ku tabata bringa gueranan pa konkistá sierto lugánan; ni e no tabata analisando e motibunan tras di e peleanan di gueria di e sikarionan hudiu di promé siglo. Santiago tabata referí na pleitu ku a enbolbé por lo ménos dos persona. Dikon? Pasobra pleitunan personal ta mes destruktivo ku guera. Tuma nota di e siguiente relatonan bíbliko.

E yu hòmbernan di e patriarka Jakòb a odia nan ruman Hosé asina tantu ku nan a bend’é komo esklabo. (Génesis 37:4-28) Mas despues, Rei Saul di Israel a purba mata David. Dikon? Pasobra el a envidiá David. (1 Samuel 18:7-11; 23:14, 15) Den promé siglo, dos muhé kristian, Euodias i Sintike, a perturbá e pas di henter un kongregashon ku nan pleitunan.—Filipensenan 4:2.

Den tempunan mas resien, hende tabata regla nan problemanan dor di enfrentá otro den un duelo ku spada òf ku pistol. Hopi bes un di e kontrinkantenan aki a muri òf el a keda mankaron pa restu di su bida. Awendia, hende ku ta den enemistat ku otro por lo general ta usa palabranan amargo i skèrpi komo nan arma. Ounke podisé no tin dramamentu di sanger, atakenan verbal ta hùrt sintimentu i ta hasi daño na hende su reputashon. Hopi bes hende inosente ta sufri den e ‘gueranan’ aki.

Konsiderá loke a sosodé algun aña pasá ora un pastor anglikano a akusá un otro di mal maneho di e plaka di iglesia. Nan pleitu a bira públiko, i a krea desunion entre e miembronan di e misa kaminda nan tabata sirbi. Algun miembro a nenga di asistí na misa si e pastor ku nan tabata kontra dje tabata esun ku ta presidí. E miembronan tabatin un despresio asina intenso pa otro, ku nan tabata ignorá otro ora nan tabata den misa pa adorashon. Ora ku e pastor ku a akusá esun, na su turno a ser akusá di mal komportashon seksual, e pleitu a eskalá.

 E arsobispu di Canterbury a hasi un apelashon na e dos pastornan, refiriendo na nan pleitu komo “un kanser” i “un eskándalo ku ta desonrá e nòmber di Nos Señor.” Na 1997 un di e pastornan a bai di akuerdo pa baha ku penshon. E otro a keda ku su puesto te ora e mester a bai pasobra el a yega e edat ku e mester a baha ku penshon. Sin embargo, el a keda te na e último momentu posibel, i a baha dia ku el a hasi 70 aña di edat, dia 7 di ougùstùs 2001. The Church of England Newspaper a menshoná ku e dia ku el a baha tabata e dia di fiesta di “San” Victrisio. Ken tabata “San” Victrisio? E tabata un obispu di siglo 4 ku segun informe, nan a bati pasobra el a nenga di bringa den ehérsito. Indikando e kontraste entre e dos aktitutnan ei, e korant a bisa: “Nenga di bringa un guera eklesiástiko no tabata un karakterístika di [e pastor ku tabata bayendo ku penshon].”

E pastornan ei por a evitá di hasi daño na nan mes i na otro hende si nan a apliká e konseho na Romanonan 12:17 i 18, ku ta bisa: “Nunka paga malu ku malu na ningun hende. Respetá loke ta korekto den bista di tur hende. Si ta posibel, asina leu ku ta dependé di boso, sea na pas ku tur hende.”

Kiko di abo? Si un persona ofendé bo, renkor ta motivá bo pa hasi guera ku palabra? Òf bo ta evitá palabranan skèrpi ku ta ofendé, i asina tene e porta pa logra pas habrí? Si bo ofendé un hende, bo ta evitá e persona ei, sperando ku segun ku tempu pasa lo e lubidá e problema? Òf bo ta kla pa pidi despensa? Sea ku bo ta pidi un persona pordon òf ta abo ta esun ku ta pordoná un persona, esfuersonan pa hasi pas lo kontribuí na bo bienestar. Manera e siguiente artíkulo ta mustra, konseho di Beibel por yuda nos resolvé asta konfliktonan bieu.