Matrimonio Por Tin Éksito den e Mundu Djawe

“Bisti amor, kual ta e laso perfekto di unidat.”—Kolosensenan 3:14.

1, 2. (a) Ki echo relashoná ku e kongregashon kristian ta un animashon? (b) Kiko ta un matrimonio eksitoso?

ORA nos wak den e kongregashon kristian, no ta alentador pa mira asina hopi pareha kasá ku ta fiel na nan partner pa 10, 20, 30 òf asta mas aña? Nan a keda ku nan kasá apesar di tur opstákulo.—Génesis 2:24.

² Mayoria hende lo atmití ku nan tabatin difikultat den nan matrimonio. Un opservadó a skirbi: “Matrimonionan felis no ta sin problema. Tin tempu bon i tin tempu malu . . . Pero di un manera òf otro . . . e hendenan aki a keda kasá apesar di e [agitashon] di bida moderno.” Parehanan eksitoso a siña trata ku e tormentanan i krísisnan inevitabel ku e preshonnan di bida ta trese kuné, spesialmente si nan a kria yu. Eksperensia a siña parehanan asina ku amor berdadero “nunka no ta faya.”—1 Korintionan 13:8.

3. Kiko estadístika ta indiká tokante matrimonio i divorsio, i esaki ta hiba na ki preguntanan?

³ Na kontraste, tin miónes di matrimonio ku a noufragá. Un informe a bisa: “Segun ekspektativa, mitar di tur matrimonio merikano djawe lo kaba den divorsio. I mitar di e [divorsionan] ei lo tuma lugá denter di e promé 7,8 añanan di matrimonio . . . Di e 75 porshento di hende ku bolbe kasa, 60 porshento lo bolbe divorsiá.” Asta paisnan ku ántes tabatin un porsentahe relativamente abou di divorsio a mira un kambio. Por ehèmpel, na Hapon e porsentahe di divorsio a bira dòbel den último añanan. Kiko ta algun di e preshonnan ku a hiba na e situashon aki, preshonnan ku tin biaha ta manifestá nan mes asta den e kongregashon kristian? Kiko ta nesesario pa hasi matrimonio un éksito apesar di Satanas su esfuerso pa debilitá e areglo?

 Trampanan Ku Mester Evitá

4. Kua ta algun faktor ku por debilitá un matrimonio?

⁴ E Palabra di Dios ta yuda nos komprondé e faktornan ku por debilitá un matrimonio. Por ehèmpel, konsiderá e palabranan di apòstel Pablo relashoná ku e kondishonnan ku lo a eksistí durante e último dianan aki: “Den e último dianan tempunan trabahoso lo bin. Pasobra hende lo ta stimadó di nan mes, stimadó di plaka, gabadó, arogante, blasfemadó, desobedesidu na mayornan, ingrato, impio [òf, “desleal,” NW], sin amor, irekonsiliabel, ku mala lenga, sin dominio propio, grosero, odiadó di loke ta bon, traidó, imprudente, sobèrbè, mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder; evitá e sorto di hendenan aki.”—2 Timoteo 3:1-5.

5. Dikon un ‘stimadó di su mes’ ta pone su matrimonio na peliger, i kiko Beibel ta konsehá relashoná ku esaki?

⁵ Ora nos analisá e palabranan di Pablo, nos ta mira ku hopi di e kosnan ku el a menshoná por kontribuí na desintegrashon di relashonnan matrimonial. Por ehèmpel, hende ku ta “stimadó di nan mes” ta egoista i no ta tene konsiderashon ku otro hende. Esposo òf esposa ku ta stima nan mes so, ta desididu pa haña loke nan kier. Nan ta infleksibel. Un aktitut asina lo kontribuí na un matrimonio felis? Di ningun manera. Apòstel Pablo sabiamente a konsehá kristiannan, inkluso parehanan kasá: “No hasi nada ku un aktitut di egoismo òf orguyo, ma ku humildat laga kada un di boso konsiderá e otro mas importante ku e mes; no buska boso interes personal so, ma buska tambe interes di otronan.”—Filipensenan 2:3, 4.

6. Kon amor pa plaka por debilitá un relashon matrimonial?

⁶ Amor pa plaka tambe por kousa desunion entre un esposo i esposa. Pablo a spièrta: “Esnan ku kier bira riku ta kai den tentashon i den trampa i den hopi deseonan loko i dañino, kualnan ta hundi hende den ruina i destrukshon. Pasobra amor pa plaka ta rais di tur sorto di maldat, i algun hende, dor di deseá esaki, a desviá for di e fe, i a traspasá nan mes ku hopi doló.” (1 Timoteo 6:9, 10) Lamentablemente, e konsekuensianan doloroso ku Pablo a spièrta p’e ta un realidat den hopi matrimonio djawe. Den nan búskeda pa rikesa, hopi kasá ta ignorá e nesesidatnan di nan pareha, inkluso e nesesidat básiko di apoyo emoshonal i di kompaño kaluroso riba un base regular.

7. Den algun kaso, ki komportashon a hiba na deslealtat matrimonial?

⁷ Tambe Pablo a bisa ku algun hende den e último dianan aki lo ta “impio [òf, desleal], sin amor, irekonsiliabel.” E voto matrimonial ta un promesa solèm ku mester hiba na un laso permanente, no na traishon. (Malakias 2:14-16) Sin embargo, algun persona a dirigí nan atenshon romántiko na otro hende ku no ta nan kasá. Un esposa di trint’i piku aña di edat kende su kasá a bandon’é, a splika ku asta promé ku su esposo a bai, el a kuminsá aktua muchu familiar, muchu kariñoso ku otro hende muhé. E esposo no a rekonosé ku e tabata komportá su mes na un manera inapropiá pa un hòmber kasá. E esposa a sintié hopi di hùrt ora el a mira e komportashon di su esposo, i ku takto el a purba spièrta e esposo ku loke e tabata hasi ta peligroso. Tòg e esposo a kometé adulterio. Apesar ku a duna e kasá kulpabel spièrtamentu bondadoso, e no kier a skucha. El a kana bai kai stret den e trampa.—Proverbionan 6:27-29.

8. Kiko por hiba na adulterio?

⁸ Beibel ta duna spièrtamentu bon kla kontra adulterio. “Esun ku kometé adulterio ku un muhé ta falta komprondementu; esun ku hasi esaki ta kaba ku su mes.” (Proverbionan 6:32) Por lo general, adulterio no ta un akto spontáneo i impulsivo.  Manera e eskritor bíbliko Santiago a señalá, un piká manera adulterio normalmente ta tuma lugá solamente despues ku e ofensor a keda karga e pensamentu pa kometé adulterio. (Santiago 1:14, 15) E kasá kulpabel pokopoko ta stòp di ta fiel na su partner na ken el a hura fieldat pa semper. Hesus a bisa: “Boso a tende ku a wòrdu bisá: ‘No kometé adulterio’; ma ami ta bisa boso ku ken ku wak un muhé pa dese’é, ya kaba el a kometé adulterio kuné den su kurason.”—Mateo 5:27, 28.

9. Ki konseho sabí nos ta haña na Proverbionan 5:18-20?

⁹ P’esei e proseder sabí i fiel ta esun ku e buki bíbliko di Proverbionan ta animá pa sigui: “Laga bo fuente ta bendishoná, i alegrá bo den e esposa di bo hubentut. Manera un biná amabel i un gazèl grasioso, laga su pechunan satisfasé bo tur ora; sea semper enkantá ku su amor. Mi yu, pakiko bo mester ta enkantá ku un adúltera, i brasa pechu di un muhé stranhero?”—Proverbionan 5:18-20.

No Kore Kasa

10. Dikon ta sabí pa tuma tempu pa siña konosé bo futuro kasá?

¹⁰ Problemanan den matrimonio lo por surgi ora ku un pareha kasa muchu purá. Kisas nan ta muchu yòn i sin eksperensia. Òf kisas nan no ta tuma tempu pa siña konosé otro, pa sa loke nan gusta òf no gusta, nan metanan den bida, nan background familiar. Ta sabí pa bo tin pasenshi i tuma tempu pa siña konosé bo futuro kasá. Pensa riba Jakòb, yu di Isaak. E tabatin ku traha shete aña pa su futuro suegro promé ku e tabatin mag di kasa ku Raquel. E tabata dispuesto pa hasi esei pasobra su sintimentunan tabata basá riba amor berdadero, no simplemente atrakshon físiko.—Génesis 29:20-30.

11. (a) Kiko e union matrimonial ta trese huntu? (b) Dikon ta masha importante pa usa nos abla na un manera sabí den matrimonio?

¹¹ Matrimonio ta mas ku djis un relashon romántiko. E union matrimonial ta djòin dos persona di diferente background familiar i kende nan personalidat, komposishon emoshonal i hopi bes asta nan edukashon ta distinto. Tin biaha matrimonio ta uni dos kultura, asta dos idioma. En todo kaso, e ta uni dos hende ku por ekspresá opinionnan distinto riba tur sorto di asuntu. E dos opinionnan aki ta un parti masha real di un union matrimonial. Nan por ekspresá nan opinion dor di kritiká i keha konstantemente, òf nan por animá otro i edifiká otro kalurosamente. Sí, ku nos palabranan nos por sea hùrt òf kura nos kasá. Papia sin pensa por kousa hopi tenshon den un matrimonio.—Proverbionan 12:18; 15:1, 2; 16:24; 21:9; 31:26.

12, 13. Ki punto di bista realístiko di matrimonio ta bon pa nos tin?

¹² P’esei, ta sabí pa tuma tempu pa realmente konosé bo futuro kasá. Un ruman muhé ku eksperensia a yega di bisa: “Ora bo  ta konsiderá un futuro partner matrimonial, pensa riba podisé dies kos básiko ku lo bo ke mira den e persona ei. Si bo por haña solamente shete di e dies kosnan, puntra bo mes: ‘Mi ta dispuesto pa pasa por haltu di e tresnan ku e falta? Lo mi por tolerá e defisiensianan ei riba un base diario?’ Si bo tin duda, hala atras i reflekshoná.” Klaru ku bo mester ta realístiko. Si bo ke kasa, sea konsiente ku nunka lo bo no haña un kasá perfekto. Pero na mesun momentu, e persona ku finalmente bo kasa kuné tampoko no a haña un kasá perfekto!—Lukas 6:41.

¹³ Matrimonio ta enserá sakrifisio. Pablo a enfatisá esaki ora el a bisa: “Mi no kier pa boso tin kibramentu di kabes. Esun ku no ta kasá ta okupá su mes ku e kosnan di Señor, kon e por agradá Señor; ma esun ku ta kasá ta kibra su kabes ku e kosnan di mundu, kon e por agradá su esposa, i su interesnan ta keda dividí. I e muhé ku no ta kasá i e bírgen ta okupá su mes ku e kosnan di Señor, pa e por ta santu tantu den kurpa komo den spiritu; ma esun ku ta kasá ta okupá su mes ku e kosnan di mundu, kon e por agradá su esposo.”—1 Korintionan 7:32-34.

Dikon Algun Matrimonio Ta Frakasá

14, 15. Kiko por debilitá e laso matrimonial?

¹⁴ Un señora kristian resientemente a pasa dor di e trouma di divorsio ora ku su esposo a bai lag’é despues ku nan tabatin 12 aña kasá i a kuminsá un relashon ku un otro muhé. Akaso e esposa a ripará señalnan di spièrtamentu promé ku e matrimonio a kibra? El a splika: “Mi kasá a yega na un punto kaminda e no tabata hasi orashon mas. E tabata bin ku flou èksküs pa no bai e reunionnan kristian i pa no bai prediká. E tabata pretendé ku e ta sea muchu drùk òf muchu kansá pa dediká tempu na mi. E no kier a papia ku mi. El a stòp di papia tokante kosnan spiritual ku mi. Ta tristu ku el a kambia asina tantu. E no tabata mas e hòmber ku mi a kasa kuné.”

¹⁵ Mas hende ta informá ku nan a ripará e mesun señalnan, entre otro, ku nan kasá a kuminsá neglishá estudio di Beibel personal, orashon òf asistensia na reunionnan kristian. Ku otro palabra, hopi persona ku finalmente a bai laga nan kasá a permití nan relashon ku Yehova debilitá. Komo resultado, nan no a enfoká mas riba asuntunan spiritual. Nan no tabata mira Yehova mas komo un Dios bibu. E mundu nobo primintí a stòp di ta un realidat. Den algun kaso, e debilitashon spiritual aki a tuma lugá asta promé ku e kasá infiel a forma un relashon pafó di e matrimonio.—Hebreonan 10:38, 39; 11:6; 2 Pedro 3:13, 14.

16. Kiko ta fortifiká un matrimonio?

¹⁶ Na kontraste, un pareha hopi felis ta atribuí e éksito di nan matrimonio na nan laso spiritual fuerte. Nan ta hasi orashon huntu i ta studia huntu. E esposo a bisa: “Nos ta lesa Beibel huntu. Nos ta sali den sirbishi huntu. Nos ta gusta hasi kos huntu.” E lès ta bon kla: Manteniendo un bon relashon ku Yehova lo yuda masha hopi pa hasi un matrimonio sólido.

Sea Realístiko i Komuniká

17. (a) Menshoná dos kos ku ta kontribuí na un matrimonio eksitoso. (b) Kon Pablo ta deskribí amor kristian?

¹⁷ Tin dos otro kos ku ta kontribuí na un matrimonio eksitoso: amor kristian i komunikashon. Ora dos hende ta enamorá di otro, nan tin e tendensia di pasa por haltu di otro su faltanan. E pareha kisas ta drenta den e matrimonio ku ekspektativanan eksagerá, kisas basá riba loke nan a lesa den bukinan di romanse òf a mira den pelíkula. Sin embargo, ku tempu e pareha tin ku enfrentá realidat. E ora ei, faltanan chikí òf sierto kustumbernan ku ta un poko iritante por bira problemanan grandi. Si esei sosodé, kristiannan tin ku desplegá e fruta di spiritu, di kua un aspekto ta amor. (Galationan 5:22, 23) En  bèrdat amor ta hopi poderoso, pero no amor romántiko sino amor kristian. Pablo a deskribí e amor kristian ei, bisando: “Amor tin pasenshi, amor ta kariñoso . . . e no ta buska su propio interes, e no ta wòrdu provoká, e no ta warda renkor, . . . tur kos e ta tapa, tur kos e ta kere, tur kos e ta spera, tur kos e ta soportá.” (1 Korintionan 13:4-7) Ta bisto anto ku amor berdadero ta tene kuenta ku debilidat humano. Realístikamente, amor no ta ferwagt perfekshon.—Proverbionan 10:12.

18. Kon komunikashon por fortifiká un relashon?

¹⁸ Komunikashon tambe ta masha esensial. Sin importá kuantu aña kasá un pareha tin, nan mester papia ku otro i realmente skucha otro. Un esposo a bisa: “Nos ta ekspresá nos sintimentunan abiertamente, pero den un manera amigabel.” Na medida ku nan ta haña eksperensia, un esposo òf un esposa ta siña skucha no solamente loke ta ser bisá sino tambe loke no ta ser bisá. Ku otro palabra, segun ku e añanan ta pasa, un pareha felismente kasá ta siña distinguí pensamentu- i sintimentunan ku no a ser ekspresá. Algun esposa a bisa ku nan esposo no ta ègt skucha nan. Algun esposo a keha ku ta parse ku nan esposa ke komuniká na e momentunan mas inkumbiniente. Komunikashon ta enserá kompashon i komprenshon. Komunikashon efektivo ta benefisiá tantu e esposo komo e esposa.—Santiago 1:19.

19. (a) Dikon por ta difísil pa pidi despensa? (b) Kiko lo motivá nos pa pidi despensa?

¹⁹ Tin biaha komunikashon ta enserá pidi despensa. Esei no ta semper fásil. Bo mester ta humilde pa bo por atmití bo erornan. Sin embargo, esei realmente por yuda edifiká un matrimonio fuerte! Un despensa sinsero por eliminá un situashon ku den futuro lo por kousa konflikto, i ta prepará e kaminda pa berdadero pordon i un solushon di e problema. Pablo a deklará: “Boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi. I ademas di tur e kosnan aki bisti amor, kual ta e laso perfekto di unidat.”—Kolosensenan 3:13, 14.

20. Kon un kristian mester trata su kasá den privá i den presensia di otro hende?

 ²⁰ Un otro kos esensial den un matrimonio ta sosten mutuo. Un esposo i esposa kristian mester por konfia otro i dependé riba otro. Niun di dos no mester sabotiá e otro òf hasi kosnan pa kibra e otro su konfiansa propio. Amorosamente nos ta elogiá nos partner matrimonial; nos no ta kritik’é severamente. (Proverbionan 31:28b) Anto sigur nos no ta rebah’é dor di hasié e blanko di chiste- òf chansanan estúpido i deskonsiderá. (Kolosensenan 4:6) Ekspreshonnan regular di kariño ta fortifiká tal sosten mutuo. Un karisia òf un palabra suave di kariño por bisa: “Mi ta stima bo ainda. Mi ta kontentu ku bo ta ku mi.” Esakinan ta algun faktor ku por influensiá un relashon i yuda matrimonionan pa nan tin éksito den e mundu djawe. Tin mas kos, i e siguiente artíkulo lo duna mas guia bíbliko enkuanto kon pa hasi matrimonio un éksito. *

[Nota]

Bo Por Splika?

• Kua ta algun faktor ku por debilitá un matrimonio?

• Dikon no ta sabí pa kore kasa?

• Ki efekto spiritualidat tin riba un matrimonio?

• Ki faktornan ta yuda hasi un matrimonio stabil?

[Preguntanan di Estudio]

[Plachi na página 12]

Matrimonio ta mas ku djis un relashon romántiko

[Plachinan na página 14]

Un bon relashon ku Yehova ta yuda un pareha hasi nan matrimonio un éksito