“Boso A Wòrdu Kumprá pa un Preis”

“Boso a wòrdu kumprá pa un preis: p’esei glorifiká Dios.”—1 KORINTIONAN 6:20.

1, 2. (a) Segun e Lei di Moisés, kon mester a trata esklabonan israelita? (b) E esklabo ku a stima su shon tabatin ki opshon?

“SKLABITUT tabata un kos komun i generalmente aseptá den e mundu di antigwedat,” segun Holman Illustrated Bible Dictionary. E dikshonario ta agregá: “E ekonomia di Egipto, Gresia i Roma tabata basá riba labor di esklabo. Den e promé siglo kristian, un di kada tres persona na Italia i un di kada sinku den otro paisnan tabata esklabo.”

² Ounke den antiguo Israel tambe a eksistí sklabitut, e Lei di Moisés a sòru pa esklabonan hebreo haña protekshon. Por ehèmpel, un rekisito di e Lei tabata ku un israelita no por a sirbi komo esklabo pa mas ku seis aña. Den e di shete aña, e mester a “sali liber, sin paga nada.” Pero e reglanan relashoná ku e manera pa trata esklabo tabata asina hustu i humano ku e Lei di Moisés tabatin e siguiente areglo: “Si e esklabo bisa bon kla: ‘Mi stima mi shon, mi esposa i mi yunan; mi no kier sali liber,’ e ora ei su shon mester hib’é dilanti di e huesnan. Despues e shon mester hib’é na e porta òf na e kozein-di-porta, i su shon mester bora su orea ku prim; i e esklabo mester sirbié pa semper.” —Eksodo 21:2-6; Levítiko 25:42, 43; Deuteronomio 15:12-18.

3. (a) Ki tipo di sklabitut e kristiannan di promé siglo a aseptá? (b) Kiko ta motivá nos pa sirbi Dios?

³ E areglo aki di sklabitut boluntario a duna un bista adelantá di e tipo di sklabitut ku kristiannan berdadero ta bou di dje. Por ehèmpel, e eskritornan bíbliko Pablo, Santiago, Pedro i Hudas a identifiká nan mes komo sirbidó [òf, “esklabo,” NW] di Dios i di Kristu. (Tito 1:1; Santiago 1:1; 2 Pedro 1:1; Hudas 1) Pablo a rekordá e kristiannan tesalonisense ku nan a ‘bandoná nan ídolonan pa sirbi un Dios bibu i berdadero komo esklabo.’ (1 Tesalonisensenan 1:9, NW) Kiko a motivá e kristiannan ei pa boluntariamente bira esklabo di Dios? Wèl, kiko tabata e motivashon den kaso di e esklabo israelita ku a renunsiá su libertat personal? Akaso no tabata amor pa su shon? Sklabitut kristian ta basá riba amor pa Dios. Ora nos siña konosé i stima e Dios bibu i berdadero, nos ta sinti nos motivá pa sirbié ‘ku henter nos kurason i ku henter nos alma.’ (Deuteronomio 10:12, 13) Pero kiko bira esklabo di Dios i di Kristu ta enserá? Ki efekto esaki tin riba nos bida diario?

‘Hasi Tur Kos pa e Gloria di Dios’

4. Kon nos ta bira esklabo di Dios i di Kristu?

⁴ Un esklabo ta un persona ku ta e propiedat legal di un otro òf di otronan, i ku ta obligá na rindi obedensia apsoluto. Nos ta bira Yehova su propiedat legal na momentu ku nos dediká nos bida na dje i batisá. Apòstel Pablo a splika: “Boso no ta pertenesé na boso mes . . . Pasobra boso a wòrdu kumprá pa un preis.” (1 Korintionan 6:19, 20) E preis ei naturalmente ta Hesukristu su sakrifisio di reskate, ya ku a base di esei Dios ta aseptá nos komo su sirbidónan, sea ku nos ta kristiannan ungí òf nan kompañeronan ku un speransa terenal. (Efesionan 1:7; 2:13; Revelashon 5:9) Pues, for di momentu di nos boutismo, ‘nos ta di Yehova.’ (Romanonan 14:8) Siendo ku nos a ser kumprá ku e sanger presioso di Hesukristu, nos ta bira su esklabo tambe i nos ta bou di e obligashon di warda su mandamentunan.—1 Pedro 1:18, 19.

5. Kiko ta nos obligashon prinsipal komo esklabo di Yehova, i kon nos por kumpli kuné?

⁵ Esklabonan mester obedesé nan shon. Nos sklabitut ta boluntario i ta ser motivá dor di nos amor pa e Shon. Promé Juan 5:3 ta deklará:  “Esaki ta e amor di Dios, ku nos ta warda su mandamentunan; i su mandamentunan no ta pisá.” Pues den nos kaso, nos obedensia ta prueba di nos amor i tambe di nos sumishon. E ta bisto den tur loke nos ta hasi. Pablo a bisa: “Sea ku boso ta kome òf bebe òf kiko ku boso ta hasi, hasi tur pa e gloria di Dios.” (1 Korintionan 10:31) Den bida diario, asta den kosnan chikí, nos ke mustra ku nos ta ‘sirbi Yehova’ manera esklabo.—Romanonan 12:11.

6. Kon e echo ku nos ta esklabo di Dios ta influensiá e desishonnan ku nos ta tuma den bida? Ilustrá esaki ku un ehèmpel.

⁶ Por ehèmpel, ora di tuma desishon, nos ke sòru tene kuenta ku e boluntat di nos Shon selestial, Yehova. (Malakias 1:6) Desishonnan difísil lo por pone na prueba nos obedensia na Dios. Nos lo hasi kaso e ora ei di Dios su konseho en bes di sigui e inklinashonnan di nos kurason “engañoso” i “korupto”? (Jeremias 17:9) Melisa, un kristian soltera, tabatin un poko tempu batisá ora ku un yònkuman a kuminsá interesá den dje. E tabata parse un hende desente, i tabata studia Beibel kaba ku Testigunan di Yehova. Apesar di esei, un ansiano a papia ku Melisa i a mustr’é ku ta sabí pa hasi kaso di Yehova su mandamentu pa kasa “basta ta den Señor.” (1 Korintionan 7:39; 2 Korintionan 6:14) Melisa a atmití: “No tabata fásil pa mi sigui e konseho aki. Pero mi a disidí ku siendo ku mi a hasi un dedikashon na Dios pa hasi su boluntat, lo mi obedesé su instrukshonnan bon kla.” Reflekshonando riba loke a sosodé despues, el a bisa: “Mi ta masha kontentu ku mi a sigui e konseho. Poko despues e mucha hòmber a stòp di studia. Si mi a sigui ku mi amistat kuné, aworakí lo mi tabata kasá ku un inkrédulo.”

7, 8. (a) Dikon nos no mester ta demasiado preokupá pa agradá hende? (b) Ilustrá kon nos por vense miedu di hende.

⁷ Komo esklabo di Dios, nos no mester bira esklabo di hende. (1 Korintionan 7:23) Ta bèrdat ku ningun di nos no gusta ta impopular, pero nos tin ku kòrda ku kristiannan tin normanan ku ta distinto for di esnan di mundu. Pablo a puntra: “Ta hende mi ta trata di agradá?” Su konklushon tabata: “Si ainda ta hende mi tabata trata di agradá, lo mi no tabata un sirbidó di Kristu.” (Galationan 1:10)  Simplemente nos no mag entregá na preshon di nos pareunan i bira personanan ku ta trata di agradá hende. Kiko anto nos por hasi ora nos ser preshoná pa adaptá na e normanan di mundu?

⁸ Konsiderá e ehèmpel di Elena, un hóben kristian na Spaña. Den su klas tabatin vários mucha ku tabata dunadó di sanger. Nan tabata sa ku Elena, komo un Testigu di Yehova, lo no a duna sanger ni aseptá transfushon di sanger. Ora un oportunidat a presentá ku Elena por a splika su posishon na henter e klas, el a ofresé pa duna un presentashon. Elena a konta: “Frankamente, mi tabata hopi nervioso pa hasi esaki. Pero mi a prepará bon, i e resultado tabata sorprendente. Mi a gana e rèspèt di hopi di e muchanan den mi klas, i e dosente a bisa mi ku e ta atmirá e trabou ku mi ta hasi. Mas ku tur kos, mi a sinti mi satisfecho ku mi a defendé e nòmber di Yehova i ku mi por a splika bon kla e motibunan di mi posishon basá riba Beibel.” (Génesis 9:3, 4; Echonan 15:28, 29) Sí, komo esklabo di Dios i di Kristu, nos ta sobresalí komo diferente. Sin embargo, den hopi kaso nos lo gana e rèspèt di otro hende si nos ta kla pa defendé nos kreensianan ku rèspèt.—1 Pedro 3:15.

9. Kiko nos ta siña di un angel ku a aparesé na apòstel Juan?

⁹ Un otro benefisio di kòrda ku nos ta esklabo di Dios ta ku esei por yuda nos keda humilde. Na un okashon, apòstel Juan tabata asina impreshoná ku e vishon magnífiko di Yerusalèm selestial ku el a kai abou pa adorá dilanti pia di e angel ku a fungi komo bosero di Dios. E angel a bis’é: “No hasi e kos ei; mi ta un ko-sirbidó [òf, ko-esklabo] di bo i di bo rumannan, e profetanan, i di esnan ku ta warda e palabranan di e buki aki; adorá Dios.” (Revelashon 22:8, 9) E angel ei definitivamente a pone un ekselente ehèmpel pa tur esklabo di Dios! Sierto kristiannan kisas ta den puesto di responsabilidat spesial den e kongregashon. No opstante, Hesus a bisa: “Ken ku kier bira grandi entre boso lo ta boso sirbidó, i ken ku kier ta esun di promé entre boso lo ta boso esklabo.” (Mateo 20:26, 27) Komo siguidónan di Hesus, nos tur ta esklabo.

“Nos A Hasi Solamente Loke Nos Mester A Hasi”

10. Duna algun ehèmpel bíbliko pa mustra ku no tabata semper fásil pa fiel sirbidónan di Dios hasi su boluntat.

¹⁰ Hasi e boluntat di Dios no ta semper fásil pa hende imperfekto. Profeta Moisés no tabata masha dispuesto pa obedesé ora ku Yehova a pidié bai i libra e yunan di Israel for di sklabitut den Egipto. (Eksodo 3:10, 11; 4:1, 10) Ora ku Jonas a risibí e asignashon pa proklamá un mensahe di huisio na e hendenan di Nínive, el a “lanta pa hui bai Tarsis for di e presensia di SEÑOR.” (Jonas 1:2, 3) Baruk, e sekretario di profeta Jeremias, a keha ku el a kansa. (Jeremias 45:2, 3) Kon nos mester reakshoná ora nos deseo òf preferensia personal ta na konflikto ku e hasimentu di Dios su boluntat? Un komparashon ku Hesus a konta ta duna e kontesta.

11, 12. (a) Konta brevemente e komparashon di Hesus ku tin pará skirbí na Lukas 17:7-10. (b) Ki lès nos ta saka for di e komparashon di Hesus?

¹¹ Hesus a konta di un esklabo ku a pasa henter dia ta kuida e tou di su shon den kunuku. Ora e esklabo a yega kas, kansá despues di kasi 12 ora di trabou pisá, su shon no  a invit’é pa kai sinta i disfrutá di un bon sena. Al kontrario, e shon a bis’é: “Prepará algu pa mi kome, i faha bo mes i sirbi mi te ora ku ami a kaba di kome i bebe; i despues abo por kome i bebe.” E esklabo por a atendé su propio nesesidat despues ku el a sirbi su shon. Hesus a konkluí e komparashon bisando: “Asina boso tambe, ora boso hasi tur loke boso a wòrdu ordená, bisa: ‘Nos ta esklabonan inútil; nos a hasi solamente loke nos mester a hasi.’”—Lukas 17:7-10.

¹² Hesus no a duna e komparashon aki pa mustra ku Yehova no ta apresiá loke nos ta hasi den sirbishi. Beibel ta deklará bon kla: “Dios no ta inhustu pa lubidá boso trabou i e amor ku boso a mustra pa su nòmber.” (Hebreonan 6:10) Mas bien, e punto di Hesus su parábola ta ku un esklabo no por agradá su mes ni konsentrá riba su propio komodidat. Ora nos a dediká nos mes na Dios i a skohe pa ta su esklabo, nos a bai di akuerdo pa pone su boluntat promé ku esun di nos. Nos tin ku someté nos propio boluntat na e boluntat di Dios.

13, 14. (a) Den ki sirkunstansianan kisas nos tin ku surpasá nos propio inklinashonnan? (b) Dikon nos tin ku laga Dios su boluntat prevalesé?

¹³ Kisas ta rekerí hopi esfuerso di nos parti pa nos studia e Palabra di Dios i e publikashonnan di e “esklabo fiel i prudente” riba un base regular. (Mateo 24:45) Esaki por ta e kaso foral si nunka nos no tabata gusta lesa òf si un publikashon ta trata “e profundidatnan di Dios.” (1 Korintionan 2:10) Pero apesar di esei nos mester traha tempu pa estudio personal, no ta bèrdat? Kisas nos tin ku disipliná nos mes pa kai sinta i no pasa purá-purá dor di e material di estudio. Pasobra si nos no hasi esei, ta kon nos lo por siña gusta “kuminda sólido [ku] ta pa hende madurá”?—Hebreonan 5:14.

¹⁴ Kiko di e biahanan ku nos ta yega kas kansá despues di un dia largu di trabou? Podisé nos tin ku fòrsa nos mes pa asistí na reunionnan kristian. Òf kisas prediká na hende straño ta bai kontra nos inklinashon natural. Pablo mes a rekonosé ku por sosodé ku nos ta deklará e bon nobo ‘kontra nos boluntat.’ (1 Korintionan 9:17) Sin embargo, nos ta hasi e kosnan aki pasobra Yehova—nos Shon selestial ku nos stima—ta bisa nos ku nos mester hasi nan. I semper nos ta sinti nos satisfecho i refreská despues ku nos a hasi e esfuerso pa studia, pa asistí na reunion i pa prediká, no ta asina?—Salmo 1:1, 2; 122:1; 145:10-13.

No “Wak Patras”

15. Kon Hesus a pone un ehèmpel di sumishon na Dios?

¹⁵ Hesukristu a demostrá su sumishon na su Tata selestial den un manera ekstraordinario. El a bisa su disipelnan: “Mi a baha for di shelu, no pa hasi mi mes boluntat, sino e boluntat di esun ku a manda mi.” (Juan 6:38) Ora ku e tabata den agonia den e hòfi di Getsemané, el a pidi den orashon: “Mi Tata, si ta posibel, laga e kopa aki pasa bai for di mi; sin embargo, no manera ami kier, ma manera abo kier.”—Mateo 26:39.

16, 17. (a) Kon nos mester mira e kosnan ku nos a laga atras? (b) Mustra kon Pablo tabata realístiko ora el a evaluá su prospektonan mundano komo “basura.”

¹⁶ Hesukristu ke pa nos keda fiel na nos desishon pa ta esklabo di Dios. El a bisa: “Ningun hende ku ta pone man na plug i ta wak patras no ta apto pa e reino di Dios.” (Lukas 9:62) Keda pensa riba e kosnan ku nos a laga atras, definitivamente no ta e kos korekto pa hasi ora nos ta traha komo esklabo pa Dios. Mas bien nos mester tin gran apresio pa loke nos a gana ora nos a skohe pa bira esklabo di Dios. Pablo a skirbi e filipensenan: “Mi ta konsiderá tur kos komo pièrdè kompará ku e balor superior di konosé Kristu Hesus mi Señor, pa kende mi a sufri pièrdè di tur kos, i ta konsiderá nan komo basura, pa mi por gana Kristu.”—Filipensenan 3:8.

 ¹⁷ Pensa un ratu riba tur e kosnan ku Pablo a konsiderá komo basura i ku el a bandoná na fabor di e rekompensanan spiritual komo esklabo di Dios. El a laga atras no solamente e komodidatnan di mundu sino tambe e posibilidat di bira un futuro lider di hudaismo. Si Pablo a sigui praktiká hudaismo, por ta masha bon ku lo el a yega na un puesto similar ku esun di Simeon, yu di Pablo su edukadó, Gamaliel. (Echonan 22:3; Galationan 1:14) Apesar di ku Simeon tabatin algun duda, el a bira un lider di e fariseonan i a hunga un papel prominente den e rebelion hudiu kontra Roma di aña 66 pa 70 di nos era. El a muri den e konflikto ei na man di sea ekstremistanan hudiu òf di e ehérsito romano.

18. Duna un ehèmpel pa mustra kon logronan spiritual ta duna satisfakshon.

¹⁸ Hopi Testigu di Yehova a sigui e ehèmpel di Pablo. Jean por ehèmpel ta konta: “Despues di un par di aña ku mi a kaba skol, mi a haña trabou komo sekretaria ehekutivo serka un abogado prominente na Lònden. Mi a gusta mi trabou i tabata gana bon plaka, pero den mi kurason mi tabata sa ku lo mi por a hasi mas pa sirbi Yehova. Finalmente, mi a entregá mi retiro i a kuminsá traha pionero. Mi ta masha gradisidu ku mi a dal e paso ei kasi 20 aña pasá! Mi sirbishi di tempu kompletu a enrikesé mi bida mas ku mi trabou di sekretaria hamas lo por a hasi. No tin nada ku ta duna mas satisfakshon ku mira kon e Palabra di Yehova por kambia bida di un persona. Ta un kos maravioso di por tin un parti den esei. Loke nos ta duna Yehova no ta nada kompará ku loke nos ta risibí.”

19. Kiko mester ta nos determinashon, i dikon?

¹⁹ Nos sirkunstansianan kisas ta kambia ku tempu. Sin embargo, nos dedikashon na Dios ta keda meskos. Nos ta keda esklabo di Yehova, i e ta laga na nos pa disidí kon ta e mihó manera pa nos usa nos tempu, energia, talentonan i otro poseshonnan. Pues, e desishonnan ku nos ta tuma relashoná ku esaki por reflehá nos amor pa Dios. Tambe nan ta mustra te na ki grado nos ta dispuesto pa hasi sakrifisio personal. (Mateo 6:33) Sin importá den ki sirkunstansia nos ta, nos no mester ta desididu pa duna Yehova lo mihó? Pablo a skirbi: “Si e boluntat t’ei, e ta aseptabel segun loke un hende tin, no segun loke e no tin.”—2 Korintionan 8:12.

“E Benefisio Ku Bo Tin”

20, 21. (a) Ki fruta e esklabonan di Dios ta produsí? (b) Kon Yehova ta rekompensá esnan ku ta dun’é lo mihó?

²⁰ Ser esklabo di Dios no ta opresivo. Al kontrario, e ta spar nos di un forma di sklabitut perhudisial ku ta hòrta nos di felisidat. Pablo a skirbi: “Awor ku boso a wòrdu librá di piká i a bira esklabo di Dios, e benefisio ku boso tin ta resultá den santifikashon, i e fin, bida eterno.” (Romanonan 6:22) Nos forma di sirbi Dios manera esklabo ta produsí benefisio ku ta resultá den santifikashon, esta, ku nos ta kosechá e benefisionan di kondukta ku ta santu òf moralmente limpi. Es mas, e ta hiba na bida eterno den futuro.

²¹ Yehova ta generoso pa ku su esklabonan. Ora nos ta hasi nos bèst den su sirbishi, e ta habri “e bentananan di shelu,” i ta basha riba nos ‘asina tantu bendishon, ku nos no tin sufisiente lugá pa konten’é.’ (Malakias 3:10) Ki dushi lo ta pa sigui sirbi komo esklabo di Yehova pa tur eternidat!

Bo Ta Kòrda?

• Dikon nos ta bira esklabo di Dios?

• Kon nos ta demostrá nos sumishon na e boluntat di Dios?

• Dikon nos mester ta prepará pa pone Yehova su boluntat promé ku esun di nos?

• Dikon nos no mester “wak patras”?

[Preguntanan di Estudio]

[Plachi na página 16, 17]

E areglo di sklabitut boluntario den Israel a duna un bista adelantá di nos sirbishi komo esklabo kristian

[Plachi na página 17]

Nos ta bira esklabo di Dios ora nos batisá

[Plachi na página 17]

Kristiannan ta pone e boluntat di Dios na promé lugá

[Plachi na página 18]

Moisés no tabata masha dispuesto pa aseptá su asignashon