Ki Influensia Hesukristu Tin Riba Abo?

EN BISTA di loke nos a konsiderá den e artíkulo anterior, por tin kualke duda ku Hesus su siñansanan tabatin un impakto rònt mundu? Pero, e pregunta ku kada un di nos mester hasi nos mes ta: “Ki influensia Hesus su siñansanan tin riba ami personalmente?”

Hesus su siñansanan a toka un gran variedat di tópiko. E lèsnan balioso ku nan ta trese padilanti por tin efekto riba tur aspekto di nos bida. Laga nos focus riba loke Hesus a siña nos relashoná ku pone prioridat den bida, kultivá amistat ku Dios, establesé bon relashon ku otro hende, solushoná problema i evitá aktonan di violensia.

Pone Prioridat den Bida

E bida rùsh-rùsh den e mundu djawe ta kita asina hopi tempu i energia for di nos ku hopi bes e kosnan spiritual ta ser halá un banda. Tuma por ehèmpel e kaso di un  hòmber di bint’i piku aña ku nos lo yama Jerry. Jerry ta gusta kòmbersá riba tópikonan spiritual i e ta duna hopi balor na loke e ta siña for di nan, pero e ta lamentá: “Ègt mi no tin tempu pa hasi esei tur ora bai. Mi ta traha seis dia pa siman. Djadumingu ta e úniko dia liber ku mi tin. I ora mi kaba di hasi e kosnan ku mi tin ku hasi, mi ta keda muchu kansá.” Si abo ta den e mesun situashon, bo por benefisiá for di loke Hesus a siña otro hende den e Sermon Riba Seru.

Hesus a bisa un multitut di hende ku a reuní pa tend’é: “No preokupá boso mes pa boso bida, kiko boso lo kome òf kiko boso lo bebe; tampoko pa boso kurpa, kiko boso lo bisti. Bida no ta mas ku kuminda, i kurpa mas ku paña di bisti? Mira e paranan di shelu ku no ta sembra ni kosechá, ni ta warda den mangasina, i tòg boso Tata selestial ta alimentá nan. Boso no tin muchu mas balor ku nan? . . . No preokupá boso mes anto, bisando: ‘Kiko nos lo kome?’ òf ‘Kiko nos lo bebe?’ òf ‘Kiko nos lo bisti?’ Pasobra tur e kosnan aki e paganonan ta buska; ma boso Tata selestial sa ku boso tin mester di tur e kosnan aki. Ma buska promé e reino di Dios i su hustisia, i tur e kosnan aki lo wòrdu añadí na boso.” (Mateo 6:25-33) Kiko nos ta siña for di esei?

Hesus no tabata ke men ku nos mester keda sin perkurá pa nos nesesidatnan físiko i pa esnan di nos famia. Beibel ta bisa: “Si un hende no proveé pa su mes hendenan, i spesialmente pa esnan di su kas, el a nenga e fe i ta pió ku un inkrédulo.” (1 Timoteo 5:8) Sin embargo, Hesus a primintí ku si nos duna prioridat na e kosnan di mas importante i pone e kosnan spiritual na promé lugá, Dios lo perkurá pa nos demas nesesidatnan. E lès ku nos ta siña aki ta kiko pa pone komo prioridat. Esnan ku sigui e konseho aki lo haña felisidat, pasobra Beibel ta bisa: “Felis ta esnan ku ta konsiente di nan nesesidat spiritual.”—Mateo 5:3, NW.

Kultivá Amistat ku Dios

Esnan ku ta konsiente di nan nesesidat spiritual ta mira e importansia pa kultivá un bon relashon ku Dios. Kon nos por forma un bon relashon ku un otro hende? No ta dor di purba konosé e persona ei mas mihó? Nos mester tuma tempu pa siña konosé su punto di bista, aktitut-, abilidat- i logronan, loke e ta gusta i loke e no ta gusta. Ora nos ke forma un amistat ku Dios ta e mesun kos. Konosementu eksakto di Dios ta nesesario. Ora Hesus a hasi orashon na Dios tokante su disipelnan, el a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Sí, pa nos kultivá un relashon íntimo ku Dios nos mester siña konos’é. E úniko fuente di e konosementu ei ta e Palabra inspirá di Dios, Beibel. (2 Timoteo 3:16) Nos mester apartá tempu pa studia e Skritura.

Sin embargo, konosementu so no ta basta. Den e mesun orashon, Hesus a bisa: “Nan [su disipelnan] a warda bo palabra.” (Juan 17:6) No ta konosementu di Dios so nos mester; nos mester aktua tambe na armonia ku e konosementu ei. Di ki otro manera nos lo por bira amigu di Dios? Nos realmente por spera ku nos amistat ku un hende ta krese si nos aktua deliberadamente di un manera ku ta bai kontra e ideanan i prinsipionan di e persona ei? Klaru ku nò. Dios su punto di bista i prinsipionan mester guia tur nos pasonan den bida. Wak kon dos di su  prinsipionan ta apliká na nos relashon ku otro sernan humano.

Establesé Bon Relashon ku Otro Hende

Na un okashon, Hesus a konta un kuenta kòrtiku pa siña hende un lès balioso enkuanto relashonnan humano. El a konta tokante un rei ku kier a regla kuenta ku su sirbidónan. Un di nan tabatin un debe grandi i no por a pag’é bèk. P’e hòmber paga su debe, e rei a duna òrdu pa bende e hòmber, su esposa i su yunan. E debedó a kai na rudia su dilanti i a rog’é: “Tene pasenshi ku mi i lo mi paga bo tur kos.” E rei a sinti kompashon p’e i a kanselá su debe. Pero ora e esklabo a sali bai i a topa ku un kompañero esklabo di dje ku tabata deb’é un suma chikí, e sí a eksigié pa e pag’é. Maske su kompañero a rog’é p’e tene miserikòrdia di dje, el a tir’é den prizon te ora ku e lo a paga tur su debe. Ora ku e rei a haña sa, el a rabia kuné i a puntr’é: “Abo tambe no mester a tene miserikòrdia di bo kompañero-esklabo, meskos ku ami a tene miserikòrdia di bo?” I el a laga enkarselá e esklabo ku no a pordoná su kompañero te ora ku e lo a paga tur loke ku e tabata debe. Pa siña hende un lès for di e kuenta, Hesus a bisa: “Asina tambe mi Tata selestial lo hasi ku boso, si kada un di boso no pordoná su ruman di henter su kurason.”—Mateo 18:23-35.

Komo hende imperfekto, nos ta kometé hopi falta. Nunka nos no por paga Dios e debe inmenso ku nos a akumulá p’e echo ku nos ta peka kontra dje. E úniko kos ku nos por hasi ta pidié pordon. I Yehova Dios ta kla pa pordoná tur nos faltanan, basta nos pordoná nos rumannan pa e pikánan ku nan a kometé kontra nos. Ki un lès impaktante! Hesus a siña su siguidónan pa pidi den orashon: “Pordoná nos nos debenan, meskos ku nos tambe ta pordoná nos debedónan.”—Mateo 6:12.

Yega na Rais di e Problema

Hesus ta komprondé naturalesa humano hopi bon. P’esei su konseho pa solushoná problema tabata yega na rais di e asuntu. Konsiderá e siguiente dos ehèmpelnan.

Hesus a bisa: “Boso a tende ku a wòrdu bisá na e hendenan di promé aya: ‘No mata’ i ‘Esun ku mata lo ta kulpabel dilanti di korte.’ Ma ami ta bisa boso ku ken ku rabia ku su ruman lo ta kulpabel dilanti di korte.” (Mateo 5:21, 22) Aki Hesus a mustra ku rais di e problema di matamentu ta bai mas profundo ku e akto di violensia mes. Ta e aktitut ku ta desaroyá den kurason di e asesino ta rais di e problema. Si hende no laga resentimentu i rabia lanta den nan, violensia premeditá lo disparsé. Ta hopi dramamentu di sanger lo por a wòrdu evitá si hende a apliká e siñansa aki!

Wak kon Hesus ta yega na rais di un otro problema ku ta kousa masha hopi tristesa. El a bisa e multitut: “Boso a tende ku a wòrdu bisá: ‘No kometé adulterio’; ma ami ta bisa boso ku ken ku wak un muhé pa dese’é, ya kaba el a kometé adulterio kuné den su kurason. I si bo wowo drechi hasi bo trompeká, sak’é tir’afó.” (Mateo 5:27-29) Hesus a siña hende ku e problema ta bai mas profundo ku e komportashon inmoral mes. Loke ta kousa e problema ta lokual ta bin promé kuné, esta, deseonan inmoral. Si un persona perkurá pa no keda pensa riba un deseo robes i “sak’é” for di su mente i ‘tir’é afó,’ e ora ei lo e vense e problema di inmoralidat ku lo por presentá.

“Pone Bo Spada Bèk na Su Lugá”

Riba e anochi ku nan a traishoná i arestá Hesus, un di su disipelnan a saka su spada pa defend’é. Hesus a orden’é: “Pone bo spada bèk na su lugá; pasobra tur esnan ku saka spada lo peresé pa medio di spada.” (Mateo 26:52) E siguiente mainta Hesus a bisa Ponsio Pilato: “Mi reino no ta di e mundu  aki. Si mi reino tabata di e mundu aki, mi sirbidónan lo a bringa, pa mi no wòrdu entregá na e hudiunan; ma t’asina ku mi reino no ta di e mundu aki.” (Juan 18:36) E siñansa aki ta práktiko?

Ki aktitut e promé kristiannan tabatin pa ku e siñansa di Hesus pa no usa violensia? E buki The Early Christian Attitude to War (Kon e Promé Kristiannan A Mira Guera) ta bisa: “E echo ku nan [Hesus su siñansanan] a prohibí tur tipo di violensia i aktonan ku ta heridá otro hende, a impliká klaramente ku partisipashon den guera tabata inaseptabel . . . E promé kristiannan a sigui loke Hesus a bisa al pie de la letra, i a komprondé su siñansanan enkuanto suavedat i violensia. Nan a mira un relashon estrecho entre nan religion i pas; nan a kondená guera fuertemente pa motibu di e dramamentu di sanger ku e ta kousa.” Esta diferente historia humano lo tabata si tur esnan ku ta bisa ku nan ta kristian en bèrdat a sigui e siñansa aki!

Bo Por Benefisiá di Tur e Siñansanan di Hesus

E siñansanan di Hesus ku nos a konsiderá ta ekselente, simpel i poderoso. Hende por benefisiá di su siñansanan dor di siña konosé nan i apliká nan. *

Testigunan di Yehova den bo área lo ta kontentu pa yuda bo mira kon lo bo por benefisiá di e siñansanan ku ta reflehá un sabiduria ku ningun otro ser humano a yega di desplegá. Nos ta invitá bo kalurosamente pa tuma kontakto ku nan òf skirbi nan n’e adrès riba página 2 di e revista aki.

[Nota]

[Plachi na página 5]

“Boso Tata selestial ta alimentá nan”

[Plachi na página 7]

E siñansanan di Hesus por tin un bon influensia riba bo bida