Manera un “Sardio” Presioso

APÒSTEL Juan a haña un vishon di un trono glorioso den shelu. E aparensia di esun sintá riba e trono tabata “manera un piedra di yaspe.” Tambe e tabata manera un “sardio,” esta, un piedra presioso koló kòrá. (Revelashon 4:2, 3) Ta di kua piedranan e ta papiando akinan?

Tabata trata aki di piedranan transparente. Ántes aya, e palabra griego pa “yaspe” tabata referí na piedranan di diferente koló, inkluso piedranan presioso ku tabata transparente. A. T. Robertson a bisa den e buki Word Plachinan in the New Testament ku e “piedra di yaspe” di Revelashon 4:3, “sigur-sigur no [tabata] nos yaspe barata di awendia.” Ademas, mas despues den e buki di Revelashon, Juan ta deskribí e stat selestial, Yerusalèm, bisando: “E tabata bria manera un piedra masha kostoso, manera un piedra di yaspe, transparente manera kristal.” (Revelashon 21:10, 11) Aparentemente lus por a pasa dor di e piedranan ku Juan ta referí na dje.

Den e vishon di Juan, esun sintá riba e trono ta representá e Persona mas glorioso den universo, esta, Yehova Dios. E ta e persona mas puru i santu. Na armonia ku esei, apòstel Juan a skirbi: “Dios ta lus i den dje no tin nada-nada di skuridat.” (1 Juan 1:5) P’esei Juan a urgi su kompañeronan den fe pa ‘purifiká nan mes, meskos ku Yehova ta puru.’—1 Juan 3:3.

Kiko nos mester hasi pa nos por ta puru den Dios su bista? Ta sumamente importante pa nos tin fe den e sanger ku Kristu a drama pa pordon di nos pikánan. Tambe nos mester sigui “kana den lus” dor di studia Beibel regularmente i biba na armonia ku e siñansanan ku e ta kontené.—1 Juan 1:7.