Pregunta di Lektor

E echo ku David i su hòmbernan a kome e pannan di e presensia akaso ta indiká ku ora hende ta den sirkunstansia difísil nan por kibra Dios su lei sin haña kastigu?—1 Samuel 21:1-6.

Segun Levítiko 24:5-9, e pannan di e presensia ku a ser remplasá tur sabat, tabata reservá pa e saserdotenan kome. E prinsipio tras di esei tabata ku e pannan ta santu i mester a sirbi komo kuminda pa e hòmbernan okupá den Dios su sirbishi: e saserdotenan. Definitivamente lo tabata robes pa duna e pannan na un simpel obrero òf kome nan djis pa smak. Pero tòg e saserdote Ahimelek no a kometé piká ora el a duna e pannan di e presensia na David i su hòmbernan.

David aparentemente tabata riba un mishon spesial pa Rei Saul. David i su hòmbernan tabatin hamber. Ahimelek a hasi sigur promé ku nan tabata limpi den sentido seremonial. Ounke ku téknikamente e echo ku nan a kome e pannan di e presensia tabata kontra lei, tòg e tabata na armonia ku e uso básiko stipulá pa e pannan di e presensia. Teniendo kuenta ku esei, Ahimelek por a hasi un eksepshon riba e regla. Hesukristu mes a usa e insidente aki pa ilustrá kon inkorekto tabata pa hasi un aplikashon demasiado estrikto di e lei di sabat segun e interpretashon di e fariseonan.—Mateo 12:1-8.

Sin embargo, esaki no ta nifiká ku hende por violá e lei di Dios ora sirkunstansianan bira difísil. Por ehèmpel, un situashon aparentemente krítiko a surgi ora ku guereronan israelita tabata bringa kontra e filisteonan. Rei Saul a bisa: “Maldishoná sea e hòmber ku kome kuminda promé ku nochi sera i promé ku mi tuma vengansa riba mi enemigunan.” Beibel ta bisa: “Riba e dia ei nan a derotá e filisteonan.” E sòldánan tabata kansá di e bataya i hambrá, ‘i e pueblo a kuminsá mata e bestianan riba suela i a kome nan ku sanger ku tur.’ (1 Samuel 14:24, 31-33) Nan a peka kontra Yehova dor di violá su lei tokante sanger. Nan akshonnan no tabata na armonia ku e úniko uso ku Dios a stipulá pa sanger, esta, “pa hasi ekspiashon” pa piká. (Levítiko 17:10-12; Génesis 9:3, 4) Miserikòrdiosamente, Yehova a aseptá sakrifisionan spesial na fabor di esnan ku a peka.—1 Samuel 14:34, 35.

Sí, Yehova ta ferwagt di nos ku nos ta obedesé su leinan den tur sirkunstansia. Apòstel Juan a bisa: “Esaki ta e amor di Dios, ku nos ta warda su mandamentunan.”—1 Juan 5:3.

[Plachi na página 30]

Tur sabat tabata pone pannan di e presensia nobo den e tabernakel