Samson A Triunfá Mediante e Forsa di Yehova!

KAPTURADÓNAN vengativo ta saka Samson su wowonan i ta lag’é hasi trabou fòrsá. Despues nan ta sak’é for di prizon i hib’é den un tèmpel pagano pa entretené e multitut. Nan ta oblig’é marcha dilanti di míles di espektador i ta hasi bofon di dje. E prizonero no ta un kriminal ni un komandante di un ehérsito enemigu. E ta un adoradó di Yehova i a sirbi komo hues den Israel pa 20 aña.

Kon bin Samson—e hòmber di mas fuerte ku hamas a biba—a hañ’é den un situashon asina humiante? Akaso su forsa ekstraordinario lo salb’é? Kiko tabata e sekreto di Samson su forsa? Tin algu ku nos por siña for di e relato di su bida?

Lo E “Kuminsá Libra Israel”

E yunan di Israel kada bes tabata desviá for di adorashon berdadero. P’esei ora nan ‘a bolbe hasi maldat den bista di Yehova, Yehova a entregá nan den man di e filisteonan pa kuarenta aña.’—Huesnan 13:1.

E relato di Samson a kuminsá ora ku e angel di Yehova a aparesé na e esposa steril di un hòmber israelita ku yama Manoa i a inform’é ku lo e duna lus na un yu hòmber. E angel a bis’é: “Nabaha lo no pasa riba su kabes, pasobra e mucha lo ta un nazareo pa Dios for di den barika di su mama; i e lo kuminsá libra Israel for di man di e filisteonan.” (Huesnan 13:2-5) Promé ku Samson a ser konsebí, Yehova a determiná ku Samson lo haña un tarea spesífiko. For di momentu ku e nase lo e tabata un nazareo, es desir, un persona skohé pa un tipo spesial di sirbishi sagrado.

E Ta “Nèt Esun Apropiá den Mi Bista”

Segun ku Samson a krese, ‘Yehova a sigui bendishon’é.’ (Huesnan 13:24) Un dia Samson a bai serka su tata i su mama i a bisa nan: “Mi a mira un muhé na Timna, un di e yu muhénan di e filisteonan; p’esei awor, busk’é pa mi komo esposa.” (Huesnan 14:2) Imaginá bo nan sorpresa. En bes di libra Israel for di man di e opresornan, nan yu kier a forma un aliansa matrimonial ku nan. Kasa ku un muhé ku tabata adoradó di diosnan pagano tabata kontra e Lei di Dios. (Eksodo 34:11-16) P’e motibu ei e mayornan a ekspresá nan desaprobashon:  “Ta ningun muhé no tin entre e yu muhénan di bo famianan, òf entre henter nos pueblo, ku bo ta bai buska un esposa serka e filisteonan insirkunsidá?” Ma Samson a insistí: “Busk’é pa mi, pasobra t’é mi ta gusta” òf literalmente, “e ta nèt esun apropiá den mi bista.”—Huesnan 14:3; NW.

Den ki manera e muhé filisteo en partikular aki tabata “nèt esun apropiá” pa Samson? No den e sentido ku e tabata “bunita, agradabel, atraktivo,” segun e Cyclopedia di McClintock i Strong, “sino apropiá pa logra un meta, propósito òf ophetivo.” Kua meta? Huesnan 14:4 ta splika ku Samson “tabata buska un oportunidat kontra e filisteonan.” Samson tabata interesá den e muhé pa e propósito ei. Segun ku Samson a krese bira adulto, “e spiritu di SEÑOR a kuminsá mov’é,” òf stimul’é na akshon. (Huesnan 13:25) Pues tabata e spiritu di Yehova ku a motivá Samson pa hasi e petishon remarkabel aki pa un kasá i e tabata tambe e forsa ku a motivá henter su karera komo hues di Israel. Samson a haña e chèns ku e tabata buska? Laga nos konsiderá promé kon Yehova a sigur’é di apoyo divino.

Samson tabata riba kaminda pa Timna, e stat di su futuro esposa. E relato bíbliko ta konta: “[Samson] a yega te na e kunukunan di wendrùif di Timna; i mira, un leon chikitu a bin kontra dje ta gruña. I e spiritu di SEÑOR a bin riba dje ku poder, asina ku el a sker e leon.” E demostrashon remarkabel aki di forsa a tuma lugá ora ku Samson tabata su so. No tabatin ningun testigu. Akaso esaki tabata Yehova su manera di sigurá Samson ku komo un nazareo e tabata kapasitá pa kumpli ku e enkargo ku Dios a dun’é? Beibel no ta bisa, pero Samson definitivamente a realisá ku tal poder ekstraordinario no tabata di su mes. E mester a bin di Dios. E por a stèns ku Yehova lo yud’é ku e trabou su dilanti. Fortifiká dor di e insidente ku e leon, Samson “a sigui bai abou i a kuminsá papia ku e muhé; i ainda e tabata apropiá den bista di Samson.”—Huesnan 14:5-7; NW.

Ora ku mas despues Samson a regresá pa tuma e muhé i bai kas kuné, “el a kita for di kaminda pa wak e kadaver di e leon; i mira, tabatin un nèshi di abeha i miel den kurpa di e leon.” Tumando nota di esaki, Samson a konta e siguiente charada na 30 yònkuman filisteo ku a kompañ’é durante su kasamentu: “For di e komedó a sali algu pa kome, i for di esun fuerte a sali algu dushi.” Si nan a rei e charada, Samson lo a duna nan 30 paña-djabou i 30 sèt di paña-pa-kambia. Si nan no por a saka e charada, nan lo mester a duna Samson mesun tantu paña. E filisteonan no por a saka e charada pa tres dia. Riba e di kuater  dia, nan a disidí na menasá e muhé. Nan a bis’é: “Papia dushi-dushi ku bo esposo, lòk é pa e bisa nos e charada, pa nos no kima abo i e kas di bo tata ku kandela.” Esta kruel! Si e filisteonan tabata trata nan mes hendenan den e manera aki, imaginá bo e situashon penoso di e israelitanan oprimí!—Huesnan 14:8-15.

E muhé morto spantá a preshoná Samson pa bis’é e kontesta. Demostrando falta di amor i lealtat na Samson, el a konta e yònkumannan mesora kiko tabata e kontesta. Nan a saka e charada, i Samson tabata sa dikon. El a bisa nan: “Si boso no a plug ku mi bisé, boso lo no a haña sa mi charada.” E chèns ku Samson tabata buska awor a presentá su mes. “E ora ei e spiritu di SEÑOR a bin riba dje ku poder, i el a baha bai Askalon, i a mata trinta di nan hòmbernan i a kohe nan botin, i a duna e sètnan di paña-pa-kambia na esnan ku a saka e charada.”—Huesnan 14:18, 19.

Samson su akshon na Askalon a ser motivá pa un deseo di tuma vengansa? Nò. Tabata un akto di Dios mediante su libertadó skohí. Mediante Samson, Yehova a kuminsá un lucha kontra e opresornan kruel di su pueblo. E kampaña aki mester a sigui. E siguiente oportunidat a presentá ora ku Samson a bin pa bishitá su kasá.

Samson So Ta Bringa Kontra e Filisteonan

Ora Samson a regresá Timna, e ta deskubrí ku tata di su esposa, pensando ku Samson lo tabata odia su kasá, a duna e muhé na un otro hòmber. Samson di pafó a parse ofendí. El kohe 300 zoro i mara nan dos-dos ku un flambeu meimei di nan rabu. Ora el a lòs e zoronan, nan a pega kunukunan i tambe hòfi di wendrùif i di oleifi na kandela, i asina nan a destruí Filistea su tres kosechanan prinsipal di aña. E filisteonan furioso a desplegá krueldat. Nan a konsiderá Samson su kasá i tata di e kasá responsabel i a kima nan. Nan vengansa kruel a sirbi Samson su propósito. E na su turno a ataká nan ku un gran matansa.—Huesnan 15:1-8.

Akaso e israelitanan a komprondé ku ta Yehova Dios a bendishoná Samson i nan a bin djòin e pa trese un fin na e dominashon filisteo? Nò. Pa evitá problema, e hòmbernan di Huda a manda 3.000 hòmber pa arestá Dios su lider skohí i pa entreg’é na su enemigunan. Sin embargo, e falta di lealtat aki di parti di Israel a duna Samson e oportunidat pa kousa mas pèrdida na su enemigunan. Ora ku e tabata a punto di ser entregá na e filisteonan, “e spiritu di SEÑOR a bin riba dje ku poder, asina ku e kabuyanan ku tabatin na su brasanan a bira manera lino kimá ku kandela, i su kabuyanan a kai for di su mannan.” E ora ei el kohe un kakumbein di un buriku i mata mil enemigu kuné.—Huesnan 15:10-15.

Suplikando Yehova, Samson a bisa: “Bo a duna e gran liberashon aki pa medio di man di bo sirbidó, i awor mi mester muri di set i kai den man di hendenan insirkunsidá?” Yehova a skucha Samson su orashon i a kontest’é. “Dios a splet e spelònk . . . , asina ku a sali awa for di dje. Ora ku el a bebe, su forsa a bolbe i el a rebibá.”—Huesnan 15:18, 19.

Samson tabata determiná pa kumpli ku su ophetivo, esta, bringa kontra e filisteonan. E echo ku el a keda na kas di un prostituta na Gaza tabata ku e propósito di bringa kontra e enemigunan di Dios. Samson tabatin mester di alohamentu pa pasa anochi den un stat enemigu, i el a logra haña esei den kas di un prostituta. Samson no tabatin ningun propósito inmoral na mente. El a sali meianochi for di kas di e muhé, gara e portanan di e stat i e dos balkinan, anto el a karga nan hiba te riba un seru serka di Hebròn, ku tabata keda 60 kilometer leu. El a hasi esaki ku Dios su aprobashon i ku e forsa ku Dios a dun’é.—Huesnan 16:1-3, NW.

 E manera ku e spiritu santu tabata obra den Samson su kaso tabata úniko debí na e sirkunstansianan ekstraordinario. Fiel sirbidónan di Dios djawe por stèns riba e mesun spiritu ei pa duna nan forsa. Hesus a sigurá su siguidónan ku Yehova lo “duna e spiritu santu na esnan ku pidié.”—Lukas 11:13.

Dikon Yehova ‘A Bai for di Samson’?

Despues a sosodé ku Samson a namorá di un muhé ku yama Dalila. E sinku prensnan prinsipal di e filisteonan tabata asina ansioso pa kaba ku Samson ku nan a bai pidi Dalila yuda nan. Nan a aserk’é i a bis’é: “Papia dushi-dushi ku Samson, i mira unda su forsa grandi ta sinta, i kon nos por poderá di dje.” Komo soborno, kada un di e prensnan a ofres’é “mil un shen pida plata.”—Huesnan 16:4, 5.

Si e pidanan di plata tabata siklo, e oferta di 5.500 siklo tabata un soborno hopi grandi. Abraham a paga 400 siklo pa un lugá di entiero pa su kasá, i e preis di un esklabo tabata solamente 30 siklo. (Génesis 23:14-20; Eksodo 21:32) E echo ku e prensnan—gobernantenan di sinku stat filisteo—a paga Dalila un soborno i no a hasi un yamada riba dje pa ofresé su servisio komo muestra di lealtat na su pueblo, ta indiká ku kisas Dalila tabata un muhé israelita. En todo kaso, Dalila a aseptá e oferta.

Tres biaha Samson a duna Dalila kontesta falsu riba su pregunta, i tres biaha Dalila a traishon’é dor di purba entreg’é na su enemigunan. Pero “a sosodé ku dor ku Dalila tabata pone preshon riba dje tur dia ku su palabranan i tabata rog’é, Samson a fada pa muri.” Finalmente Samson a revelá e bèrdat: nunka e no a kòrta su kabei. Si kòrt’é, lo e bira débil i lo e ta meskos ku tur otro hòmber.—Huesnan 16:6-17.

Esei tabata Samson su kaida. Dalila a logra hañ’é den un posishon pa por a feita su kabes. Sin embargo, Samson su poder no tabata literalmente den su kabei. Su kabei simplemente a representá su relashon spesial ku Dios komo un nazareo. Ora Samson a hinka su mes den un situashon ku a afektá su posishon komo nazareo dor ku nan a feita su kabes, ‘Yehova a bai for di dje.’ E ora ei e filisteonan a poderá di Samson, hasié siegu i ser’é den prizon.—Huesnan 16:18-21.

Ki un lès poderoso esaki ta siña nos! Akaso nos no mester mira nos relashon ku Yehova komo algu sumamente balioso? Si den un manera òf otro nos ta komprometé nos dedikashon na Dios komo kristian, kon nos por ferwagt pa Dios sigui bendishoná nos?

“Laga Mi Muri Huntu ku e Filisteonan”

Filisteonan kontentu a gradisí nan dios Dagon pa Samson su derota. Pa selebrá nan viktoria, nan a hiba nan prizonero na e tèmpel di Dagon. Pero Samson tabata sa e berdadero motibu di su kaida. E tabata sa dikon Yehova a bandon’é, i Samson a repentí di su fayo. Miéntras ku Samson tabata den prizon, su kabei a bolbe krese bira hopi. Awor ku e tabata dilanti di míles di filisteo, kiko lo el a hasi?

Samson a pidi den orashon: “O Señor DIOS, pa fabor, kòrda riba mi i pa fabor, duna mi forsa e biaha aki so, o Dios, pa mi tuma vengansa awor mes riba e filisteonan pa mi dos wowonan.” Anto el a pusha su kurpa kontra e dos pilarnan ku tabata sostené e lugá, anto “el a dobla su kurpa ku tur su forsa.” Ku ki resultado? “E kas a bash’abou riba e prensnan i riba henter e pueblo ku tabata den dje. Asina esnan ku el a mata na su morto tabata mas ku esnan ku el a mata durante di su bida.”—Huesnan 16:22-30.

Pa loke ta forsa físiko, Samson tabata e hòmber di mas fuerte ku a biba. Su echonan poderoso tabata realmente remarkabel. Pero mas importante ainda, e Palabra di Yehova ta konta Samson entre e hendenan ku tabatin fe fuerte.—Hebreonan 11:32-34.

[Plachi na página 26]

Kiko tabata e sekreto di Samson su forsa?