Informe di Proklamadónan di Reino

 Buskando Hende Digno den Interior di Oustralia

ALGUN parti remoto di e inmenso interior di Oustralia tabatin 12 aña sin haña bishita di Testigunan di Yehova. P’esei Testigunan di Yehova na Darwin, siudat kapital di Teritorio di Nort, a organisá un kampaña di nuebe dia di predikashon intensivo pa buska hende digno di skucha e bon nobo.—Mateo 10:11.

Planiamentu kuidadoso a kuminsá 12 luna promé ku e kampaña, i esei a enserá trahamentu di mapa pa un área di mas ku 800.000 kilometer kuadrá, lokual ta kasi e tamaño di Venezuela. Pa haña un idea kon aislá e teritorio inmenso aki ta, djis imaginá ku por lo general e distansia for di porta di kurá pa yega dilanti di porta di kas di un ganaderia òf rancho ta mas ku 30 kilometer! Ademas, algun rancho ta keda 300 kilometer leu òf mas for di otro.

Un total di 145 boluntario Testigu a partisipá den e kampaña. Algun di nan a bin for di basta leu, asta for di Tasmania. Tin di nan a bin den vehíkulonan “four-wheel-drive” kargá ku ekipo di kamper, piesanan di reserva i kombustibel. Otronan a hala nan ekipo den trailer. Ademas, e rumannan a hür dos bùs di 22 asiento pa hiba esnan ku no tabatin vehíkulonan adekuá. Esnan ku a biaha den bùs a prediká prinsipalmente na e habitantenan di pueblitonan den e teritorio selektá.

Promé ku e biahe a kuminsá, e rumannan enkargá a hasi areglo pa tene vários diskurso i demostrashon pa asina duna guia kon pa presentá e bon nobo den e teritorio ekstraordinario aki. Por ehèmpel, pa prediká na un manera efektivo den komunidatnan aborígeno normalmente ta rekerí pa bo sigui sierto protokòl i ta na haltura di kustumbernan aborígeno. Tambe nan a trata aspektonan di medio ambiente pa yuda protehá bida den naturalesa.

E publikadónan tabatin hopi eksperensia sobresaliente. Por ehèmpel, den un komunidat aborígeno, e rumannan a hasi areglo pa duna  un diskurso públiko basá riba Beibel. E lider femenino di e komunidat personalmente a bai informá e hendenan di e diskurso. Despues, e publikadónan a laga 5 buki i 41 foyeto ku e presentenan. Den un otro komunidat, e rumannan a haña kontakto ku un hòmber aborígen. E tabatin asta su propio Beibel, un King James Version, pero e Beibel tabata bieu i tur kibrá. Ora nan a puntr’é si e sa e nòmber di Dios, el a bisa sí, anto a saka for di e saku di su bachi un edishon bieu di E Toren di Vigilansia. El a lesa un pida for di e revista, sitando Marko 12:30 [NW], ku ta bisa: “Bo tin ku stima Yehova bo Dios ku henter bo kurason.” E di: “Mi gusta e teksto ei masha hopi.” Despues di un kòmbersashon ekstenso, el a aseptá un Beibel nobo i otro literatura basá riba Beibel.

Serka di Golfo di Carpentaria, e hefe di un ganaderia di 400.000 hèktar a mustra un poko interes den e mensahe di Reino. Ora e publikadónan a mustr’é Mi buki di relato bíblico i Conocimentu cu Ta Hiba na Bida Eterno, * el a puntra nan si tabatin literatura disponibel na idioma kriol. Esaki tabata un petishon straño pasobra maske hopi aborígen ta papia kriol, poko di nan por les’é. A resultá ku tur e 50 empleadonan di e rancho ei por a lesa kriol. E hefe a keda hopi kontentu di por a haña literatura bíbliko na kriol, i gustosamente el a duna su number di telefon pa asina e rumannan por a tuma kontakto kuné.

Durante e nuebe dianan di predikashon intensivo, e rumannan a laga un total di 120 Beibel, 770 buki, 705 revista i 1.965 foyeto. Ademas, nan a hasi 720 rebishita i a kuminsá 215 estudio di Beibel.

Sí, por fin ta sasiá e hamber spiritual di hopi hende digno ku ta biba plamá den e área inmenso aki.—Mateo 5:6.

[Nota]

[Mapa na página 30]

(Pa e teksto den su formato kompleto, wak e publikashon)

OUSTRALIA

TERITORIO DI NORT

Darwin

Golfo di Carpentaria

Sydney

TASMANIA