Hasi Yehova Bo Dios

DEN tempu bíbliko, sierto personanan tabatin un relashon asina íntimo ku Yehova ku tabata papia di Yehova komo nan Dios. Por ehèmpel, den e Skritura, Yehova ta ser deskribí komo “e Dios di Abraham,” ‘e Dios di David,’ i “e Dios di Elias.”—Génesis 31:42; 2 Reinan 2:14; 20:5.

Kon e tres hòmbernan aki a logra haña un relashon íntimo ku Dios? Kiko nos por siña for di nan di manera ku nos tambe por edifiká i mantené un relashon personal fuerte ku e Kreadó?

Abraham A Pone “Fe den Yehova”

Abraham tabata e promé persona ku Beibel ta bisa ku a pone fe den Yehova. Fe tabata e kualidat prinsipal di Abraham ku a yud’é gana Dios su aprobashon. De echo, Abraham tabata asina bon mirá den bista di Yehova ku e Kreadó despues a introdusí su mes na Moisés komo “e Dios di Abraham” i di Abraham su yu Isaak i di su nietu Jakòb.—Génesis 15:6, NW; Eksodo 3:6.

Kon Abraham a kultivá e klase di fe aki den Dios? Na promé lugá, Abraham a edifiká su fe riba un fundeshi sólido. Podisé ta Sèm, e yu hòmber di Noe ku tabata testigu okular di Yehova su aktonan di liberashon, a instruí Abraham den e kamindanan di Yehova. Sèm tabata un testimonio bibu ku Yehova “a preservá Noe, un predikadó di hustisia, huntu ku shete otro persona mas, ora ku el a trese un diluvio riba e mundu di e impionan.” (2 Pedro 2:5) Abraham lo por a siña for di Sèm ku unabes Yehova primintí algu, esei lo kumpli sigur. En todo kaso, ora ku Abraham mes a risibí un promesa serka Dios, el a alegrá i e manera ku el a hiba su bida tabata basá riba e echo ku e tabatin sigur ku e promesa ei lo kumpli.

Teniendo un fundeshi sólido, Abraham su fe e ora ei a ser fortifiká pa medio di su obranan. Apòstel Pablo a skirbi: “Pa medio di fe Abraham, ora ku el a wòrdu yamá, a obedesé dor di sali bai na un lugá ku e tabata pa risibí komo herensia; i el a sali bai, sin sa unda e tabata bai.” (Hebreonan 11:8) E akto di obedensia ei a fortifiká Abraham su fe. Anto relashoná ku esei, disipel Santiago a skirbi: “Bo ta mira ku fe tabata traha huntu ku su obranan, i komo resultado di e obranan, fe a wòrdu perfekshoná.”—Santiago 2:22.

Ademas, Yehova a permití pa Abraham su fe ser poné na prueba, lokual a hasi su fe mas fuerte ainda. Pablo a sigui bisa: “Pa medio di fe Abraham, ora ku el a wòrdu poní na  prueba, a ofresé Isaak.” Prueba ta refiná i fortifiká fe, i ta hasié hopi “mas presioso ku oro.”—Hebreonan 11:17; 1 Pedro 1:7.

Ounke Abraham no a biba pa mira kumplimentu di tur loke Dios a primintí, e tabatin e goso di mira otro hende sigui su ehèmpel. Su kasá Sara i tres otro miembro di su famia—Isaak, Jakòb i Hosé—tambe ta ser elogiá den Beibel pa nan fe sobresaliente.—Hebreonan 11:11, 20-22.

Fe Manera di Abraham Awe

Fe ta esensial pa ken ku ta deseá di hasi Yehova nan Dios. Pablo a skirbi: “Sin fe ta imposibel pa agradá [Dios].” (Hebreonan 11:6) Kon un sirbidó di Dios awe por desaroyá fe fuerte manera esun di Abraham?

Meskos ku tabata e kaso di Abraham, nos fe mester ta establesí riba un fundeshi sólido. E mihó manera pa nos hasi esei ta dor di un estudio regular di Beibel i di publikashonnan basá riba Beibel. Dor di lesa Beibel i meditá riba loke nos ta lesa, nos ta haña e siguransa ku e promesanan di Dios lo ser realisá. Esaki e ora ei lo motivá nos pa adaptá nos bida a base di e speransa sigur ei. Nos fe ta ser fortifiká mas ainda dor di aktonan di obedensia, ku ta inkluí nos partisipashon den e sirbishi públiko i asistensia na reunionnan kristian.—Mateo 24:14; 28:19, 20; Hebreonan 10:24, 25.

Nos fe definitivamente lo ser poné na prueba, podisé dor di oposishon, malesa grave, morto di un ser kerí òf algu otro. Kedando fiel na Yehova bou di prueba ta enrikesé nos fe, i ta hasié mas presioso ku oro. Sea ku nos ta na bida pa mira kumplimentu di tur Dios su promesanan òf nò, nos fe lo hala nos mas serka di Yehova. Ademas, nos ehèmpel lo animá otro hende pa imitá nos fe. (Hebreonan 13:7) Esaki tabata e kaso ku Ralph, kende a opservá i imitá e fe di su mayornan. El a splika:

“Tempu ku mi tabata biba na kas, mi mayornan a animá henter e famia pa lanta mainta trempan pa nos por a lesa Beibel huntu. Asina nos a lesa henter e Beibel.” Te ainda Ralph ta lesa Beibel tur mainta, i esaki ta duna su dia un bon komienso. Ralph tabatin kustumber di bai den e sirbishi públiko huntu ku su tata tur siman. “Di e manera ei mi a siña hasi rebishita i kondusí estudionan di Beibel.” Awor Ralph ta sirbi komo boluntario na un di e ofisinanan di sukursal di Testigunan di Yehova na Europa. Ki un ekselente rekompensa pa e fe di su mayornan!

Un Hòmber Konforme Yehova Su Kurason

David, kende a nase un 900 aña despues di Abraham, ta un personahe sobresaliente entre e sirbidónan di Yehova menshoná den e Skritura. Relashoná ku e echo ku Yehova a skohe David komo futuro rei, profeta Samuel a bisa: “SEÑOR a buska pa su mes un hòmber konforme su mes kurason.” E banchi di amistat entre Yehova ku David tabata asina será, ku mas despues profeta Isaias a papia ku Rei Ezekias tokante ‘Yehova, e Dios di bo tata David.’—1 Samuel 13:14; 2 Reinan 20:5; Isaias 38:5.

Ounke David tabata konforme Yehova su kurason, tabatin okashonnan ku David a laga su deseonan domin’é. Tres biaha el a kometé eror serio: El a permití hende transportá e arka di aliansa na un manera inapropiá ora tabata hib’é Yerusalèm; el a kometé adulterio ku Bètsabé i a laga nan mata su esposo, Urias; i el  a tene un senso òf konteo di e pueblo di Israel i Huda ku Yehova no a manda. Na kada un di e okashonnan ei, David a violá e Lei di Dios.—2 Samuel 6:2-10; 11:2-27; 24:1-9.

Sin embargo, ora ku a konfrontá David ku su pikánan, el a aseptá responsabilidat pa nan i no a tira kulpa riba otro hende. El a atmití ku no a hasi areglo apropiá pa transportá e Arka, i a agregá ku “nos no a buska [Yehova] konforme e ordenansa.” Ora ku Natan e profeta a eksponé David su adulterio, David a kontestá bisando: “Mi a peka kontra SEÑOR.” I unabes David a realisá ku el a kometé un bobedat dor di a konta e pueblo, el a atmití: “Mi a peka gravemente ku loke mi a hasi.” David a repentí di su pikánan i a keda serka di Yehova.—1 Krónikanan 15:13; 2 Samuel 12:13; 24:10.

Ora Nos Kometé Eror

E ehèmpel di David ta un gran animashon pa nos den nos esfuerso pa hasi Yehova nos Dios. Si un hòmber ku tabata asina konforme Yehova su kurason tabata kapas pa kometé e pikánan serio ei, nos no tin ku bira deskurashá si apesar di nos mihó esfuersonan, de bes en kuando nos ta faya òf asta kometé erornan serio. (Eklesiastés 7:20) E echo ku ora David a repentí, su pikánan a ser pordoná por sirbi komo un konsuelo pa nos. Esaki ta loke a sosodé ku Uwe * algun aña pasá.

Uwe tabata sirbi komo ansiano den un kongregashon di Testigunan di Yehova. Na un okashon, el a sukumbí na mal deseo i a kometé inmoralidat. Na prinsipio Uwe, meskos ku Rei David, a purba tene e asuntu sekreto, sperando ku Yehova lo a pasa por haltu di su piká. Pero ku tempu, Uwe su konsenshi tabata molesti’é asina tantu ku el a konfesá na un otro ansiano. E ora ei nan a tuma akshon pa yuda Uwe rekuperá di su desaster spiritual.

Uwe a repentí di su pikánan i a keda serka di Yehova i e kongregashon. E tabata asina gradisidu pa e yudansa ku el a risibí, ku algun siman despues el a skirbi e ansianonan i a ekspresá su gratitut sinsero i profundo pa e yudansa ku nan a dun’é. El a skirbi: “Boso a yuda mi limpia e nòmber di Yehova di reproche.” Uwe a logra keda ku su relashon ku Yehova i ku tempu el a bolbe keda nombrá komo sirbidó den e mesun kongregashon.

“Un Hòmber ku Sintimentunan Meskos Ku di Nos”

Elias, kende a biba un siglo despues di David, tabata un di e profetanan prinsipal di Israel. Elias tabata un defensor di adorashon berdadero den un tempu ku korupshon i inmoralidat tabata reina, i nunka el a tambaleá den su deboshon na Yehova. Nada straño anto ku su susesor, Eliseo, un biaha a yama Yehova “e Dios di Elias”!—2 Reinan 2:14.

Sin embargo, Elias no tabata sobrehumano. Santiago a skirbi: “Elias tabata un hòmber ku sintimentunan meskos ku di nos.” (Santiago 5:17, NW) Por ehèmpel, despues ku Elias a kousa un derota severo pa e adoradónan di Baal den Israel, Reina Jezabel a menasá di mat’é. Kon Elias a reakshoná? El a haña miedu i a hui bai den desierto. Einan, sintá bou di un palu di enebro, Elias a lamentá: “Ta basta; awor, o SEÑOR, tuma mi bida, pasobra mi no ta mihó ku mi tatanan.” Elias no kier tabata un profeta mas, sino mas bien el a preferá di muri.—1 Reinan 19:4.

Yehova sin embargo a mustra komprenshon pa Elias su sintimentunan. Dios a fortifiká Elias i a sigur’é ku e no tabata su so, ya ku tabatin mas hende ku tabata leal na adorashon berdadero. Ademas, ainda Yehova tabata konfia Elias i tabatin trabou pa e hasi.—1 Reinan 19:5-18.

Elias su trastorno emoshonal no tabata un indikashon di ku el a pèrdè Dios su aprobashon. Rònt di 1.000 aña despues, tempu ku Kristu Hesus a transfigurá dilanti di Pedro, Santiago i Juan, ta ken Yehova a skohe pa aparesé den vishon banda di Hesus? Moisés ku  Elias. (Mateo 17:1-9) Klaramente anto, Yehova a konsiderá Elias komo un profeta ehemplar. Ounke Elias tabata simplemente “un hòmber ku sintimentunan meskos ku di nos,” Dios a apresiá e trabou duru ku el a hasi pa restorá adorashon puru i pa santifiká Dios su nòmber.

Nos Lucha Emoshonal

Sirbidónan di Yehova awe tin biaha por sinti nan desanimá òf preokupá. Ta un gran konsuelo pa sa ku Elias a eksperensiá e mesun emoshonnan! I loke ta trankilisá nos ta ku meskos ku Yehova a komprondé Elias su sintimentunan, asina tambe e ta komprondé nos lucha emoshonal.—Salmo 103:14.

Di un banda, nos ta stima Dios i nos próhimo i ta deseá di hasi Yehova su trabou di proklamá e bon nobo di Reino. Di otro banda, kisas nos ta desepshoná ku e falta di reakshon faborabel riba nos predikashon òf nos ta asta preokupá pa e menasanan ku ta bin di parti di enemigunan di adorashon berdadero. Sin embargo, meskos ku Yehova a ekipá Elias pa sigui padilanti, e ta ekipá su sirbidónan djawe tambe. Tuma por ehèmpel e kaso di Herbert ku Gertrud.

Herbert ku Gertrud a batisá komo Testigunan di Yehova na Leipzig, den e eks-Repúblika Demokrátiko Aleman, na 1952. E tempu ei bida tabata difísil pa sirbidónan di Dios, ya ku nan sirbishi públiko tabata bou di prohibishon. Kon Herbert a sinti tokante e predikashon di kas pa kas?

“Tabatin biaha ku nos tabata hopi preokupá. Ora nos a bai di kas pa kas, nos no tabata sa si outoridatnan lo a presentá diripiente i arestá nos.” Kiko a yuda Herbert i otro rumannan vense nan miedu? “Nos a hasi hopi estudio personal di Beibel. Anto Yehova a duna nos e fortalesa pa sigui padilanti ku nos trabou di prediká.” Herbert a pasa dor di vários eksperensia den su sirbishi públiko ku a fortifik’é, i ku tin biaha a asta pon’é hari.

Herbert a topa un señora di edat medio ku a mustra interes den Beibel. Ora Herbert a bishit’é atrobe algun dia despues, tabatin un yònkuman presente ku a skucha e kòmbersashon. Despues di vários minüt Herbert su bista a kai riba algu ku a pon’é tembla. Riba un stul den skina di e kuarto tabatin un pèchi di polis. Tabata pèchi di e yònkuman, kende tabata un polis desididu pa arestá Herbert.

“Bo ta un Testigu di Yehova!” e yònkuman a grita. “Laga mi wak bo sédula.” Herbert a entreg’é su sédula. E ora ei algu inesperá a sosodé. E señora a bira wak e polis i a spièrt’é: “Si algu mester pasa ku e hòmber di Dios aki, bo no ta bonbiní mas den e kas aki.”

E yònkuman a pensa un ratu, kaba el a duna Herbert su sédula bèk i a lag’é bai. Despues Herbert a haña sa ku e polis tabata frei e yu muhé di e señora. Opviamente, e polis a haña ku lo kumbinié mas pa sigui frei e mucha muhé ku entregá Herbert.

Hasi Yehova Nos Dios

Kiko nos por siña di e susesonan aki? Meskos ku Abraham, nos mester tin fe firme den e promesanan di Yehova. Meskos ku David, nos mester akudí na Yehova ku berdadero arepentimentu ki ora ku nos kometé eror. I meskos ku Elias, nos tin ku dependé riba Yehova pa haña fortalesa den tempu di ansiedat. Di e maneranan ei nos por hasi Yehova nos Dios awor i pa tur eternidat, ya ku e ta “e Dios bibu, kende ta e Salbadó di tur hende, spesialmente di kreyentenan.”—1 Timoteo 4:10.

[Nota]

[Plachinan na página 25]

Aktonan di obedensia a fortifiká Abraham su fe

[Plachi na página 26]

Meskos ku David, nos mester arepentí ora nos peka

[Plachi na página 28]

Meskos ku Yehova a komprondé Elias su sintimentunan, asina e ta komprondé esnan di nos