Mayornan, Protehá Boso Herensia Presioso

“Sabiduria ta protekshon . . . [E] ta preservá bida di esnan ku ta pose’é.”—Eklesiastés 7:12.

1. Dikon mayornan mester mira nan yunan komo un regalo?

MAYORNAN ta trese na mundu un persona nobo i bibu ku tin karakterístikanan físiko i rasgonan di personalidat paresido na esnan di nan. Beibel ta yama e chikitinnan ei ‘un herensia di Yehova.’ (Salmo 127:3) Siendo ku Yehova ta e berdadero Dunadó di Bida, realmente e ta konfiando mayornan ku loke eigenlijk ta di dje. (Salmo 36:9) Mayornan, kon boso ta mira e echo ku boso a haña un regalo tan presioso for di Dios?

2. Kon Manoa a reakshoná ora el a haña sa ku lo e bira tata?

² Mayornan definitivamente mester risibí tal regalo ku humildat i apresio. Mas ku 3.000 aña pasá, e israelita Manoa a reakshoná asina ora ku un angel a informá su kasá ku lo e duna lus na un yu. Ora ku Manoa a tende e bon notisia, el a pidi den orashon: “O SEÑOR, pa fabor, laga e hòmber di Dios ku bo a manda bin serka nos atrobe, pa e siña nos kiko nos mester hasi pa e mucha ku mester nase.” (Huesnan 13:8) Mayornan, kiko boso por siña for di e ehèmpel di Manoa?

Dikon Dios Su Yudansa Ta Nesesario Awe

3. Dikon spesialmente awe nos tin mester di Dios su yudansa pa lanta yunan?

³ Awe mas ku nunka promé, mayornan tin mester di Yehova su yudansa pa lanta nan  yunan. E motibu? Satanas e Diabel ku su angelnan a ser saká for di shelu i tirá abou na tera. Beibel ta spièrta: “Ai di tera . . . pasobra Diabel a baha bin serka boso ku gran furia, sabiendo ku ta ked’é solamente un poko tempu mas.” (Revelashon 12:7-9, 12) Beibel ta splika ku Satanas ta “manera un leon ku ta gruña, buskando ken e por devorá.” (1 Pedro 5:8) Leon normalmente ta yag riba e bestianan mas indefenso, ku hopi biaha ta e yunan. Pues ta sabí anto pa mayornan kristian akudí na Yehova pa haña guia pa protehá nan yunan. Kuantu esfuerso boso ta hasiendo pa protehá boso yunan?

4. (a) Sabiendo ku tin un leon ta kana rònt den nan bario mester motivá mayornan pa hasi kiko? (b) Kiko muchanan tin mester pa nan haña protekshon?

⁴ Si boso sa ku tin un leon ta kana lòs den boso bario, protekshon di boso yunan sigur lo ta boso preokupashon prinsipal. Satanas ta manera un bestia feros. E ta buska moda di korumpí e pueblo di Dios, pa asina hasi nan indigno di haña Dios su aprobashon. (Jòb 2:1-7; 1 Juan 5:19) Mucha ta un blanko fásil. Pa skapa for di e trampanan di Diabel, muchanan mester siña konosé Yehova i obedes’é. Konosementu di Beibel ta esensial. Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Ademas, muchanan tin mester di sabiduria, esta, e abilidat di komprondé i apliká loke nan siña. Siendo ku “sabiduria ta preservá bida di esnan ku ta pose’é,” boso komo mayor tin ku inkulká e bèrdat den kurason di boso yunan. (Eklesiastés 7:12) Kon boso lo por hasi esaki?

5. (a) Kon un mayor por duna sabiduria? (b) Kon Proverbionan ta deskribí e balor di sabiduria?

⁵ Boso por—i lo mester—lesa pa boso yunan for di e Palabra di Dios. Pero yuda nan stima Yehova i obedes’é ta rekerí mas ku esei; yunan mester tin komprondementu. Un ehèmpel: Podisé mayornan ta bisa un mucha pa no krusa kaya sin ku promé el a wak tur dos banda. Sin embargo, tin mucha no ta obedesé. Dikon? Kisas no a splika nan sufisiente biaha kiko ta e konsekuensianan si outo dal nan òf no a splika nan esei den un manera ku ta laga nan komprondé bon kla kiko ta e peliger, i asina vense e “lokura” ku lo por hiba na un aksidente. Pa duna sabiduria na un otro hende ta tuma tempu, i tambe hopi pasenshi. Pero esta balioso sabiduria ta! Beibel ta bisa: “Su kamindanan ta kamindanan agradabel, i tur su bereanan ta pas. E ta un palu di bida pa esnan ku ta gar’é tene, i felis ta tur esnan ku tene duru na dje.”—Proverbionan 3:13-18; 22:15.

E Siñansa Ku Ta Duna Sabiduria

6. (a) Dikon muchanan hopi bes no ta aktua sabí? (b) Ki bataya ta tumando lugá?

⁶ Hopi bes muchanan ta hasi loke ta malu, no pasobra no a siña nan loke ta korekto, sino pasobra e siñansa no a alkansá nan kurason, e hende ku nan ta di paden. Diabel ta hibando un lucha pa gana kurason di muchanan. Su método ta pa sòru eksponé nan na influensianan malbado di su mundu. Tambe e ta purba probechá di e inklinashon pekaminoso pa hasi loke ta malu ku muchanan a heredá. (Génesis 8:21; Salmo 51:5) Mayornan tin ku rekonosé ku ta un berdadero bataya ta tumando lugá pa haña kontròl di e kurason di nan yunan.

7. Dikon djis bisa un mucha loke ta bon i loke ta malu no ta basta?

⁷ Mayornan normalmente ta bisa un mucha loke ta bon i loke ta malu, keriendo ku asina nan a siñ’é un sierto prinsipio moral. Kisas nan ta bisa e mucha ku ta malu pa gaña, hòrta òf tene relashon seksual ku un hende ku bo no ta kasá kuné. Sin embargo, pa e mucha obedesé e tin mester di un motivashon mas fuerte ku djis pasobra ta su mayornan ta bis’é. E kosnan aki ta leinan di Yehova. E mucha mester siña ku e proseder sabí ta di obedesé e mandamentunan di Dios.—Proverbionan 6:16-19; Hebreonan 13:4.

8. Ki klase di siñansa por yuda muchanan aktua sabí?

⁸ E universo sumamente kompliká, e variedat di kosnan bibu ku tin, e kambionan di  temporada, tur e kosnan ei por yuda un mucha komprondé ku ta eksistí un Kreadó ku tin tur sabiduria. (Romanonan 1:20; Hebreonan 3:4) Ademas, mester siña e mucha ku Dios ta stim’é i ku el a hasi areglo mediante e sakrifisio di Su Yu pa dun’é bida eterno i ku e por hasi Dios kontentu dor di obedesé loke Dios ta bisa. E ora ei probablemente e mucha lo haña gana di sirbi Yehova, apesar di e intentonan di Diabel pa strob’é.—Proverbionan 22:6; 27:11; Juan 3:16.

9. (a) Kiko siñansa ku ta salba bida ta rekerí? (b) Kiko Beibel ta manda tatanan hasi, i kiko esaki ta enserá?

⁹ E klase di siñansa ku ta protehá un mucha i ta motiv’é pa hasi loke ta korekto ta tuma tempu, atenshon i planiamentu. E ta rekerí pa mayornan aseptá guia for di Dios. Beibel ta bisa: “Boso, tatanan, . . . lanta [boso yunan] den e disiplina i instrukshon di Señor.” (Efesionan 6:4) Kiko esei ta nifiká? E palabra griego original pa “instrukshon” ta transmití e idea di “pone mente den.” Pues básikamente tatanan ta ser urgí pa pone e mente di Yehova den nan yunan. Ki un gran protekshon esei lo ta pa e muchanan! Si yunan tin e pensamentunan di Dios, su manera di pensa, inkulká den nan mente, esei lo protehá nan pa no hasi loke ta malu.

Deseo Motivá pa Amor

10. Pa instruí bo yu na un manera efektivo, kiko ta importante pa bo sa?

¹⁰ Sin embargo, pa bo por kumpli ku bo deseo di kria bo yu na e manera korekto, bo esfuersonan mester ta motivá pa amor. Un faktor importante ta bon komunikashon. Buska pa sa kiko ta pasa den bida di bo yu i kon e ta mira kosnan. Den un ambiente kómodo i trankil, usa takto pa stimulá bo yu pa ekspresá su mes. Tin biaha, loke e bisa por shòk bo. Pero tene kuidou pa bo no reakshoná na un manera eksagerá. Mas bien, skucha ku interes.

11. Kon un mayor por pone Dios su mente den un mucha?

¹¹ Por ta masha bon ku bo a lesa pa bo yu for di Beibel tokante Dios su lei ku ta prohibí relashon seksual, i asta a lesa esei vários biaha p’e. (1 Korintionan 6:18; Efesionan 5:5) Esaki kisas a graba den bo muchanan loke ta agradá Yehova i loke no ta agrad’é. Sin embargo, pa pone Yehova su mente den un mucha ta rekerí mas ku esei. Muchanan tin mester di yudansa pa rasoná riba e importansia di Yehova su leinan. Mester konvensé nan ku su leinan ta hustu i bon i ku obedesé nan ta e kos korekto i amoroso pa hasi. Ta solamente si bo rasoná ku bo yunan for di e Skritura di manera ku nan ta aseptá Dios su punto di bista, lo bo por bisa ku bo a pone Yehova su mente den nan.

12. Kon un mayor por yuda su yu haña e punto di bista korekto di relashon seksual?

¹² Ora bo ta papia tokante sèks, lo bo por puntra: “Bo ta kere ku si un hende obedesé Yehova su lei di no tene relashon seksual  promé ku matrimonio, esei lo strob’é di ta felis?” Animá bo yu pa splika su kontesta. Despues di repasá Dios su areglo maravioso pa produsí un yu, lo bo por puntra: “Bo ta kere ku nos Dios amoroso lo a traha leinan ku ta stroba nos di gosa di bida? Òf bo ta pensa ku su leinan t’ei pa hasi nos felis i pa protehá nos?” (Salmo 119:1, 2; Isaias 48:17) Saka afó kiko bo yu ta pensa di e asuntu aki. Kaba lo bo por duna algun ehèmpel ku ta mustra kon inmoralidat seksual a hiba na doló di kurason i problema. (2 Samuel 13:1-33) Dor di rasoná ku bo yu di manera ku e ta komprondé i ta aseptá Dios su punto di bista, lo bo a logra pa un gran parti di pone Dios su mente den dje. Sin embargo, tin un kos mas ku bo por hasi.

13. Si un mucha komprondé kiko tokante Yehova esei spesialmente lo por motiv’é pa obedesé Yehova?

¹³ Ta sabí pa bo siña bo yu no solamente e konsekuensianan di desobedesé Yehova, sino tambe splik’é kon Yehova personalmente ta ser afektá dor di e manera ku nos ta biba. Mustra bo yu for di Beibel ku nos por hasi Yehova tristu ora nos no hasi su boluntat. (Salmo 78:41, NW) Lo bo por puntra: “Dikon lo bo no ke hasi Yehova tristu?” Anto splik’é: “Dios su enemigu Satanas ta bisa ku nos ta sirbi Yehova pa motibunan egoista i no pasobra nos stim’é.” Kaba splika ku dor di mantené integridat, Jòb a hasi Yehova su kurason kontentu, i asina a kontestá Satanas su akusashon falsu. (Jòb 1:9-11; 27:5) Bo yu tin ku komprondé ku dependiendo kon e komportá su mes, e por hasi Yehova tristu òf kontentu. (Proverbionan 27:11) E lès sumamente importante aki i hopi otronan mas mayornan por siña muchanan dor di usa e buki Siña for di e Gran Maestro. *

Bon Resultado

14, 15. (a) Ki lèsnan den e buki Maestro a motivá muchanan? (b) Ki bon resultado abo tabatin usando e buki? (Wak tambe e kuadro na página 18-19.)

¹⁴ Un tawela na Kroasia ku ta lesa e buki Maestro ku su nietu di shete aña a skirbi ku e mucha hòmber a kont’é lo siguiente: “Mama a bisa mi hasi algu, ma promé mi no kier a hasié. Pero m’a kòrda riba e kapítulo ‘Obedensia Ta Skapa Bo,’ p’esei mi a bai bèk i a bis’é ku lo mi obedes’é.” Relashoná ku e kapítulo “Pakiko Nos No Mester Gaña,” un pareha na Flórida, Merka, a bisa: “E ta hasi preguntanan ku ta invitá muchanan pa habri nan kurason i atmití erornan ku normalmente nan lo no a atmití.”

¹⁵ E buki Maestro tin mas ku 230 plachi, i tin un komentario breve na kada plachi òf grupo di plachi. Un mama yen di apresio a komentá: “Hopi biaha mi yu hòmber ta keda wak un plachi  i no ke pa bira e página. E plachinan no solamente ta atraktivo sino tambe ku riba nan mes nan ta siña sierto lèsnan, òf a lo ménos ta motivá e muchanan pa hasi pregunta. E plachi kaminda tin un mucha ta wak televishon den un kamber skur a pone mi yu hòmber puntra: ‘Mami, ta kiko e mucha ei ta hasiendo?,’ den un tono ku a indiká ku e tabata sa ku algu no ta bon.” E komentario bou di e plachi ei ta bisa: “Ken por mira tur kos ku nos hasi?”

Edukashon Hopi Importante pa Awe

16. Kiko ta sumamente importante pa siña muchanan awe, i dikon?

¹⁶ Muchanan tin ku sa e uso korekto i inkorekto di nan partinan privá di kurpa. Sin embargo, no ta semper fásil pa papia tokante esaki. Un kolumnista di korant a remarká ku é a lanta den un tempu den kua hende a konsiderá uso di palabranan ku ta referí na e órganonan seksual komo ofensivo. Pa loke ta siña e kosnan aki na su yunan, el a skirbi: “Lo mi tin ku bai pèrdè bèrgwensa.” En realidat, ora ku mayornan pa bèrgwensa ta evitá e tópiko di sèks, esei no ta protehá un mucha. Personanan ku ta buska pa abusá seksualmente di mucha ta probechá di e muchanan su ignoransia. Siña for di e Gran Maestro ta trata ku e tópiko den un manera sano i respetuoso. Nos no ta pone nos yunan pèrdè nan inosensia dor di informá nan tokante sèks, al kontrario, dor di siña nan nos por protehá nan pa nan no pèrd’é.

17. Kon e buki Maestro ta yuda mayornan siña nan yunan tokante sèks?

¹⁷ Den kapítulo 10, ku ta trata tokante e angelnan malbado ku a bin na tera i prokreá yu, e buki ta puntra e mucha: “Kiko abo sa tokante relashon seksual?” E buki ta duna un kontesta simpel i respetuoso. Mas despues, kapítulo 32 ta splika kon por protehá muchanan kontra personanan ku ta buska pa abusá seksualmente di nan. Hopi karta ku e editornan di e revista aki a haña ta informá ku e siñansa ei ta sumamente importante. Un karta a bisa: “Siman pasá mi yu hòmber Javan a bishitá su dòkter di mucha, e dòkter a puntra si nos a papia kuné tokante e uso korekto di partinan  privá di kurpa. El a keda hopi impreshoná ku nos a hasi esei usando nos buki nobo.”

18. Kon e buki Maestro ta trata e asuntu di rindi homenahe na emblemanan nashonal?

¹⁸ Un otro kapítulo ta trata ku e relato bíbliko di e tres hóbennan hebreo, Sadrak, Mesak i Abed-nego, kendenan a nenga di bùig pa un imágen ku a representá e Estado di Babilonia. (Daniel 3:1-30) Tin hende no ta konsiderá rindi homenahe na un imágen komo algu ku ta igual na saludá bandera, manera e buki Maestro ta indiká. Sin embargo, tuma nota di loke e eskritor Edward Gaffney tabatin di bisa den un entrevista ku e revista U.S. Catholic. El a konta ku su yu muhé a bis’é, despues di su promé dia na un skol públiko, ku el a siña un “orashon nobo na skol.” El a pidi e yu ripití e orashon p’e. Gaffney a bisa: “El a pone su man na su kurason i ku orguyo a kuminsá: ‘Mi ta hura lealtat na bandera . . . ’” Gaffney a sigui bisa: “Diripiente, mi a realisá un kos. Testigunan di Yehova tabatin rason. Tin un aspekto di spiritualidat nashonal ku ta ser promové den nos skolnan na un etapa hopi trempan, un lealtat inkuestionabel i mas ayá di tur límite.”

Ta Bale la Pena

19. Ki rekompensa mayornan lo haña pasobra nan ta siña nan yunan?

¹⁹ Di bèrdat siña bo yunan ta bale la pena. Un mama na Kansas, Merka, no por a kontené su lágrimanan ora el a haña un karta di su yu  hòmber. E yu a skirbi: “Mi ta sinti mi hopi afortuná di tabatin un kriansa ku a yuda mi pa ta relativamente stabil i kompletu den sentido emoshonal. Abo ku Papi siguramente meresé elogio.” (Proverbionan 31:28) Siña for di e Gran Maestro por yuda hopi mayor mas siña nan yunan pa asina protehá e herensia presioso aki.

20. Kiko mayornan mester kòrda semper, i ki efekto esei mester tin riba nan?

²⁰ Nos yunan ta meresé tur e tempu, atenshon i esfuerso ku nos por duna nan. Ta pa un tempu kòrtiku so nan ta keda mucha. Probechá di tur oportunidat pa bo ta ku nan i yuda nan. Si bo hasié, nunka lo bo lamentá esei. Nan lo bin stima bo. Semper kòrda esaki, bo yunan ta un regalo ku Dios a duna bo. Nan ta un herensia masha presioso! (Salmo 127:3-5) Pues trata nan komo tal, komo si fuera bo tin ku rindi kuenta na Dios pa e manera ku bo a kria nan, pasobra de echo, ta asina ta.

[Nota]

Kon Lo Bo Kontestá?

• Dikon spesialmente awe mayornan tin ku protehá nan yunan?

• Ki klase di siñansa ta duna sabiduria?

• Ki asuntunan ta sumamente importante pa trata ku bo yunan awe?

• Kon e buki Maestro a yuda mayornan siña nan yunan?

[Preguntanan di Estudio]

[Kuadro/Plachinan na página 18, 19]

Un Buki pa Tur Hende

Siña for di e Gran Maestro a ser prepará pa yuda mayornan òf otro adultonan lesa i trata e siñansanan di Hesukristu ku mucha. Sin embargo, adultonan ku a lesa e buki riba nan mes a ekspresá apresio sinsero pa loke nan a siña.

Un hòmber na Texas, Merka, a bisa: “Siña for di e Gran Maestro ta elokuente den su simplesa, motivando nos sea kual sea nos edat, manera den mi kaso asta na edat di 76 aña. Masha, masha danki di un persona ku a sirbi Yehova desde su hubentut.”

Un lektor di Lònden, Inglatera, a informá: “E plachinan bunita sigur lo atraé tantu mayornan komo muchanan. E preguntanan i layout di e buki ta maravioso, i ta fantástiko pa mira e manera ku e ta trata asuntunan delikado, manera den kapítulo 32, ‘Kon Yehova A Protehá Hesus.’” E lektor a konkluí: “Maske e buki aki sin duda ta diseñá prinsipalmente pa yunan di Testigunan di Yehova, mi ta imaginá ku maestronan i otro hende tambe lo keda hopi kontentu pa haña un ehemplar. Mi ta spera ansiosamente di por us’é den e lunanan i añanan binidero.”

Un señora di Massachusetts, Merka, a komentá riba e hopi “plachinan bon pensá.” El a remarká: “Mi a ripará ku maske e buki ta pa mucha, e tópikonan ku e ta trata por yuda nos tambe komo adulto pensa riba nos relashon personal ku Yehova.”

“Wauw! Ki un buki maravioso!” un señora di Maine, Merka, a bisa. “E no ta solamente pa mucha sino pa nos tur komo yunan di Dios. El a touch mi den lo mas profundo di mi ser i a lanta emoshonnan i despues a kalma nan, di manera ku mi a haña pas. Mi ta sinti mi asina serka di Yehova komo mi Tata. El a kita tur e pena ku mi a sufri atraves di añanan i a laga mi mira su propósito kla-kla.” El a konkluí: “Mi ta bisando tur hende: ‘Por fabor, les’é.’”

Un señora di Kyoto, Hapon, a informá ku ora e tabata lesa pa su nietunan, nan tabata puntr’é kosnan manera: “‘Ta kiko e mucha hòmber ei ta hasiendo? Dikon nan ta skual e mucha muhé aki? Kiko e mama aki ta hasiendo? Anto e leon aki awor?’ E buki ta siña nos kosnan ku nos ta interesá den dje, pues mi ta stim’é mas ku kualke otro buki ku mi por a haña den un biblioteka.”

Un tata na Calgary, Canada, a bisa ku manera el a haña e buki, el a kuminsá les’é pa su yu muhé di seis aña i su yu hòmber di nuebe aña. El a informá: “Nan a reakshoná mesora na un manera maravioso. Mi yunan tabata lesa huntu ku mi i a kontestá e preguntanan di kurason. Nan a sinti nan mes parti di e estudio, i esei a duna nan un chèns di ekspresá nan mes. Nan a haña un bida, i mi yu muhé ta bisa ku e ke studia for di e buki tur anochi.”

Despues di un biaha ku nan a studia, e tata a konta: “Ami ku mi yu hòmber a keda papia oranan largu tokante Yehova i su propósito. E tabatin hopi pregunta basá riba informashon den e buki. Mi wowo a yena ku awa ora ku el a yama mi bon nochi i a puntra: ‘Nos por hasi esaki un biaha mas, Papi? Mi tin hopi pregunta, i mi ke sa tur kos tokante Yehova.’”

[Plachi na página 15]

Mayornan, kiko boso por siña for di e ehèmpel di Manoa?

[Plachi na página 16]

Muchanan, kiko boso por siña for di e ehèmpel di e tres hebreonan?

[Plachinan na página 17]

E plachinan ku nan komentario den e buki “Maestro” ta un hèrmènt potente pa siña mucha

Kiko Ananias ta gaña Pedro?

Ken por mira tur kos ku nos hasi?