Siensia i Religion—Kon un Konflikto A Kuminsá
Siensia i Religion—Kon un Konflikto A Kuminsá
E ASTRÓNOMO di 70 aña, Nicolaus Copernicus, tabata riba su kama di morto, hasiendo esfuerso pa lesa. E tabatin den su man e manuskrito kla pa ser publiká di un dokumento ku el a skirbi. Sea ku e tabata sa òf nò, su buki lo a revolushoná humanidat su punto di bista di universo. Tambe lo el a start un kontroversia intenso den kristiandat, i te awe mundu ta sinti e efektonan di e kontroversia ei.
Tabata aña 1543, i Copernicus tabata un polako katóliko. E buki di Copernicus, titulá Dreimentu di e Bolanan Selestial, a deklará ku ta solo, i no e tera, tabata e sentro di universo. Ku publikashon di esun buki aki Copernicus a remplasá e teoria sumamente kompliká di tera komo sentro di universo, pa un teoria bunita i simpel.
Na promé instante, tabatin masha tiki indikashon di e klèsh ku lo a tuma lugá den futuro. Un motibu tabata ku Copernicus a presentá su ideanan na un manera diskreto. Ademas, parse ku e tempu ei Iglesia Katóliko—ku a adoptá e punto di bista ku ta tera ta e sentro di universo—tabata mas habrí pa spekulashonnan sientífiko. Asta papa mes a urgi Copernicus pa publiká su buki. Ora ku Copernicus finalmente a publik’é, e editor ku tabatin miedu a skirbi su propio prólogo, i a presentá e konsepto di ku solo ta e sentro di universo komo un ideal matemátiko, no nesesariamente un bèrdat di astronomia.
E Konflikto Ta Bira Intenso
E siguiente partisipante riba esenario tabata e astrónomo, matemátiko i físiko italiano, Galileo Galilei (1564-1642), kende tambe tabata katóliko. El a hasi uso di teleskopnan ku e mes a traha i den kua el a inkorporá e lèns ku hende a kaba di inventá. Galileo a mira detayenan di shelu ku nunka promé hende a mira. Su opservashonnan a konvens’é ku Copernicus tabatin rason. Galileo a mira tambe mancha riba solo, i esei a kuestioná un otro kreensia filosófiko i religioso sumamente importante: ku solo nunka ta kambia, ni fria ni muri.
Distinto for di Copernicus, Galileo a promové su ideanan ku kurashi i selo. Anto el a hasi esei den un ambiente religioso mas *
hostil, pasobra pa e tempu ei Iglesia Katóliko abiertamente a bira kontra di e teoria di Copernicus. P’esei ora ku Galileo a argumentá ku e konsepto di solo komo e sentro di universo no solamente tabata korekto sino tambe a kuadra ku Skritura, iglesia a kuminsá sospech’é di herehia, esta, di ta bai kontra di doktrina di iglesia.Galileo a bai Roma pa defendé su mes, pero enbano. Na aña 1616 Iglesia Katóliko a orden’é pa stòp di promové Copernicus. Esei a silensiá Galileo pa un tempu. Pero na 1632 el a publiká un otro obra ku a apoyá Copernicus. E siguiente aña mes, Inkisishon a sentensiá Galileo na kastigu di prizon di bida largu. Sin embargo, debí na su edat nan a redusí e sentensia rápidamente na aresto di kas.
Hopi hende ta mira Galileo su konflikto ku iglesia komo un gran triunfo di siensia riba religion, i den un sentido mas amplio, komo un triunfo asta riba Beibel. Pero manera nos lo mira den e siguiente artíkulo, e konklushon simplista aki ta pasa por haltu di hopi echo.
[Nota]
^ par. 7 Galileo innesesariamente a hasi personanan poderoso su enemigu ku su palabranan na ora i sarkasmo skèrpi. Ademas, dor di argumentá ku e konsepto di solo komo sentro di universo a armonisá ku Skritura, el a presentá su mes komo un outoridat riba asuntunan di religion, lokual a provoká iglesia mas ainda.
[Plachi na página 3]
Copernicus
[Rekonosementu]
Saká for di Giordano Bruno und Galilei
[Plachi na página 3]
Galileo ta defendé su mes dilanti Inkisishon romano
[Rekonosementu]
For di e buki The Historian’s History of the World, Vol. IX, 1904
[Rekonosementu pa Potrèt na página 3]
Fondo: Diagram ku ta deskribí Copernicus su konsepto di e sistema solar