Historia di Bida

Un Huérfano Bandoná Ta Haña un Tata Amoroso

SEGUN E RELATO DI DIMITRIS SIDIROPOULOS

Bentando un rifel abou mi dilanti, e ofisial a rous mi: “Ban mira, kue e arma ei i tira.” Mi a nenga trankilamente. Hororisá e sòldánan pará eibanda a mira kon e balanan di skopèt di e ofisial a kuminsá skeiru rònt di mi. A parse ku mi tabata a punto di muri. Felismente, mi a sobrebibí. Pero esaki no tabata e promé biaha ku mi bida tabata na peliger.

MI FAMIA tabata griego i a biba serka di Kayseri, na Kapadosia, Turkia. Aparentemente algun persona di e área ei a aseptá kristianismo den e promé siglo di nos era. (Echonan 2:9) Sin embargo, pa prinsipio di siglo 20 e situashon a kambia drástikamente.

Di Refugiado pa Huérfano

Un par di luna despues ku mi a nase na 1922, konflikto étniko a obligá mi famia hui bai Gresia komo refugiado. E úniko kos ku mi mayornan morto spantá a bai kuné tabata ami, nan beibi di dies luna. Despues di a sufri masha hopi miseria, nan a yega den un kondishon deplorabel na e pueblito di Kiria, serka di e stat Drama, den parti nort di Gresia.

Ora mi tabatin kuater aña, i djis despues ku mi ruman hòmber chikí a nase, mi tata a muri. E tabatin apénas 27 aña, pero e sufrimentu di e tempunan troumátiko ei a kaba kuné. Mama a pasa den miseria teribel, i poko despues e tambe a muri. Ami ku mi ruman hòmber a keda kompletamente desampará. Nos a pasa di un orfanato pa otro, i na edat di 12 aña, mi a bai para den un orfanato na Tesalónika, kaminda mi a risibí entrenamentu komo mekániko.

 Segun ku mi tabata krese entre e murayanan friu i inhospitalario di e orfanatonan, mi tabata puntra dikon sierto hende ta pasa den asina tantu sufrimentu i inhustisia. Mi tabata puntra mi mes dikon Dios ta permití tal kondishonnan tristu. Den nos lèsnan di edukashon religioso, nan tabata siña nos ku Dios ta todopoderoso, pero nan no tabata duna un splikashon rasonabel dikon tabata reina asina tantu maldat. Un dicho popular tabata bisa ku Iglesia Griego Òrtodòks ta e mihó religion. Ora mi a puntra: “Si Iglesia Òrtodòks ta e mihó religion, dikon tur hende no ta òrtodòks?,” mi no a haña un kontesta satisfaktorio.

Sin embargo, nos maestro tabatin un rèspèt profundo pa Beibel, i el a graba den nos mente ku e ta un buki sagrado. E direktor di e orfanato a desplegá e mesun aktitut, pero pa un motibu deskonosí e no tabata partisipá den servisionan religioso. Ora mi a puntra tokante esei, nan a bisa mi ku un tempu el a yega di studia ku Testigunan di Yehova, un religion ku mi no tabata konosé.

Mi tabatin 17 aña ora ku mi edukashon na e orfanato di Tesalónika a terminá. Ya Segundo Guera Mundial a kuminsá, i Gresia tabata bou di dominio nazi. Hende tabata muri den kaya di hamber. Pa mi por a sobrebibí mi a hui bai den kunuku pa traha komo peon pa masha tiki plaka.

Beibel Ta Duna Kontesta

Ora mi a regresá Tesalónika na aprel 1945, mi a haña bishita di e ruman muhé di un di mi amigunan di infansia ku ken mi a biba den vários orfanato. Paschalia a konta mi ku su ruman hòmber a disparsé i el a puntra mi si mi tabata sa di su paradero. Durante e kòmbersashon Paschalia a bisa mi ku e ta un Testigu di Yehova i el a menshoná Dios su interes den hende.

Amargá, mi a lansa hopi opheshon. Dikon mi ta sufriendo desde mi infansia? Dikon mi a bira huérfano? Unda Dios ta ora ku nos tin mas mester di dje? Paschalia a kontestá: “Bo tin sigur ku ta Dios su falta ku e kosnan aki ta tuma lugá?” Usando su Beibel, el a mustra mi ku Dios no ta pone hende sufri. El a yuda mi mira ku e Kreadó stima hende i ku pronto lo e drecha e situashon. Usando tekstonan bíbliko manera Isaias 35:5-7 i Revelashon 21:3 i 4, el a mustra mi ku pronto Dios lo eliminá guera, konflikto, malesa i morto, i ku hende fiel lo biba pa semper riba tera.

Mi Ta Haña un Famia Ku Ta Apoyá Mi

Despues mi a haña sa ku e ruman hòmber di Paschalia a muri den un bringamentu di e forsanan di gueria. Mi a bishitá su famia pa konsolá nan, pero na lugá di esei ta nan a duna mi konsuelo for di e Skritura. Mi a bai bèk pa mas konsuelo for di Beibel, i den korto tempu mi a bira parti di un grupo chikí di Testigunan di Yehova ku tabata reuní den sekreto pa studia i adorá. Apesar ku e aktividatnan di e Testigunan tabata prohibí, mi tabata desididu pa sigui asosiá ku nan.

Den e grupo di kristiannan humilde ei, mi a haña e ambiente familiar kaluroso i amoroso ku mi tabata sinti falta di dje. Nan a perkurá e apoyo i yudansa spiritual ku desesperadamente mi tabatin mester. Serka nan mi a haña amigunan desinteresá i amoroso, ku tabata kla i dispuesto pa yuda mi i konsolá mi. (2 Korintionan 7:5-7) Mas importante ainda, nan a yuda mi hala mas serka di Yehova, kende mi tabata mira awor komo mi amoroso Tata selestial. Yehova su kualidatnan di amor, kompashon i interes profundo tabata masha atraktivo. (Salmo 23:1-6) Porfin mi a haña un famia spiritual i un Tata amoroso! Esei a konmové mi kurason. Poko despues mi a sinti mi motivá pa dediká mi mes na Yehova, i mi a batisá na sèptèmber 1945.

Segun ku mi tabata asistí na reunionnan kristian mi konosementu a oumentá i mi fe tambe a bira mas firme. Komo ku no tabatin ningun otro medio di transporte, vários di nos  hopi bes tabata kana e 6,5 kilometer ku tabatin entre nos pueblito i e lugá di reunion, i na kaminda nos tabatin kòmbersashonnan spiritual inolvidabel. Kasi na final di aña 1945 mi a haña sa di e oportunidat di partisipá tempu kompletu den e trabou di prediká, i mi a kuminsá traha komo pionero. Un relashon fuerte ku Yehova tabata masha importante, ya ku poko despues mi fe i integridat a ser poné na prueba te na su límite.

Oposishon Tin un Efekto Kontrario

Kada bes polis tabata invadí nos reunion bou di menasá di arma. E pais tabata bou di lei militar, ya ku tabatin un guera sivil ta tumando lugá den Gresia. Gruponan opositor tabata ataká otro ku un odio salbahe. E miembronan di klero a probechá di e situashon i a konvensé outoridatnan ku nos tabata komunista i a pone nan persiguí nos ferosmente.

Durante un periodo di dos aña, ami ku dos ruman pionero a keda arestá vários biaha, i seis biaha nan a sentensiá nos te na kuater luna di prizon. Sin embargo, e prizonnan tabata yen kaba ku prezunan polítiko, p’esei nan a laga nos liber. Nos a usa nos libertat inesperá pa sigui prediká, pero despues di poko tempu nan a bolbe arestá nos, tres biaha den e mesun siman. Nos tabata sa ku hopi di nos rumannan a keda eksiliá pa islanan desolá. Mi fe lo tabata sufisiente fuerte pa konfrontá un prueba asina?

E situashon a bira sumamente difísil ora ku mi a haña libertat kondishonal i mester a mèldu na warda di polis tur dia. Pa nan por a vigilá mi, e outoridatnan a mandá mi e pueblito Evosmos, serka di Tesalónika, kaminda tabatin un warda di polis. Mi a hür un kuarto djis pegá ku e warda, i pa mantené mi mes, mi a kuminsá traha komo artesano ambulante; mi tabata pòlish wea i panchi di koper. Segun ku mi a traha pionero den e pueblitonan den bisindario, e fishi aki a hasi posibel ku mi por a bai e kasnan fásilmente sin lanta sospecho di polis. Komo resultado, vários hende a tende e bon nobo i a reakshoná faborabel. Ku tempu, mas ku dies di nan a bira adoradónan dediká di Yehova.

Den Dies Aña, Ocho Prizon

Mi a keda bou di vigilansia di polis te na fin di 1949, e ora ei mi a regresá Tesalónika, ansioso pa sigui den e sirbishi di tempu kompletu. Na 1950, nèt ora ku mi a pensa ku mi pruebanan a pasa, mi a haña òrdu inesperadamente pa drenta den ehérsito. Siendo ku mi kier a keda neutral komo un kristian, mi a disidí di no “train pa guera.” (Isaias 2:4) Asina a kuminsá un seri largu di enkarselashon sumamente doloroso ku lo a hiba mi na algun di e prizonnan mas notorio di Gresia.

Tur kos a kuminsá den e stat Drama. Durante e promé simannan di mi enkarselashon einan, e sòldánan resien reklutá a kuminsá train nan abilidat di tira ku skopèt. Un dia nan a hiba mi na e kancha di tiru. Un di e ofisialnan a benta un rifel mi dilanti i a ordená mi pa tira. Ora mi a nenga, el a kuminsá tira riba mi. Ora ku e otro ofisialnan a mira ku lo mi no bai komprometé, nan a kuminsá bati mi ferosmente. Nan tabata sende sigaria i paga nan den mi plant’i man. Despues, nan a benta mi den kashòt. Esaki a tuma lugá tres dia tras di otro. E kimánan di sigaria tabata sumamente  doloroso, i pa hopi aña mi a keda ku e sikatrisnan den mi plant’i man.

Promé ku nan a hiba mi dilanti korte militar, mi a keda transferí pa un kampo militar na Iráklion, Kreta. Einan, den un intento pa kibra mi integridat, nan a bati mi severamente. Komo ku mi tabatin miedu ku lo mi sukumbí pa e preshon, mi a hasi orashon ferviente, pidiendo mi Tata selestial pa fortalesé mi. Anto e palabranan di Jeremias 1:19 a bin na mi mente: ‘“Nan lo bringa kontra bo, ma nan lo no vense bo, pasobra ami ta ku bo pa libra bo,” Yehova ta deklará.’ E “pas di Dios” refreskante a duna mi un trankilidat. Mi a mira e sabiduria di pone pleno konfiansa den Yehova.—Filipensenan 4:6, 7; Proverbionan 3:5.

Despues den korte, mi a keda sentensiá na bida largu den prizon. Testigunan di Yehova tabata ser konsiderá komo e pió “enemigunan di Estado.” E kastigu di bida largu a kuminsá na un prizon pa kriminal situá pafó di Canea, yamá Itsedin. Ei nan a sera mi den kashòt. Itsedin tabata un fòrti bieu, i mi sèl tabata pèstá ku djaka. Mi tabata lora mi kurpa, for di kabes te pia, den un deken bieu i tur gastá pa asina e djakanan no mishi ku mi kurpa ora nan tabata kana riba mi. Mi a haña pulmonia i a bira hopi malu. E dòkter a bisa ku mi tabatin ku sinta den solo, i asina mi a logra kòmbersá ku hopi di e prezunan den e patio. Sin embargo, mi kondishon a empeorá, i despues di un sangramentu pulmonar severo, nan a transferí mi pa e hospital di Iráklion.

Atrobe mi famia spiritual di rumannan kristian tabat’ei ora mi tabatin mester di nan. (Kolosensenan 4:11) E rumannan di Iráklion a bishitá mi ku regularidat, i a duna mi konsuelo i animashon. Mi a bisa nan ku mi tabatin mester di literatura pa mi por a prediká na personanan interesá. Nan a trese un maleta ku un bòm falsu pa mi, kaminda mi por a skonde literatura sin problema. Esta felis mi tabata ku durante mi estadia den e prizonnan ei, mi por a yuda por lo ménos seis otro prezu bira kristian berdadero!

Miéntras tantu e guera sivil a terminá, i nan a redusí mi sentensia na dies aña di prizon. Mi a sinta e restu di mi sentensia den prizonnan na Rethimno, Genti Koule i Cassandra. Despues di a pasa kasi dies aña den ocho prizon, mi a haña mi libertat. Mi a regresá Tesalónika kaminda mi rumannan kristian stimá a risibí mi kalurosamente.

 Prosperando den e Hermandat Kristian

Pa e tempu ei e Testigunan na Gresia por a adorá ku basta libertat. Mesora mi a probechá di e oportunidat pa sigui den sirbishi di tempu kompletu. Poko despues mi a haña un otro bendishon ora ku mi a bin konosé Katina, un fiel ruman muhé kristian ku a stima Yehova i ku tabata hopi aktivo den e trabou di prediká. Nos a kasa na òktober 1959. E nasementu di mi yu muhé, Agape, i e echo ku mi tabatin mi propio famia kristian a kaba di kura e heridanan di mi bida komo huérfano. Mas ku tur kos, nos famia tabata kontentu di por a sirbi bou di e kuido protektivo di nos amoroso Tata selestial, Yehova.—Salmo 5:11.

Debí na sirkunstansianan fuera di mi kontròl, mi a haña mi obligá ta stòp di traha pionero, pero mi a apoyá mi kasá segun ku e sí a sigui den sirbishi di tempu kompletu. Un okashon hopi memorabel den mi bida kristian tabata na 1969, tempu ku a tene un kongreso internashonal di Testigunan di Yehova na Nuremberg, Alemania. Segun ku mi tabata prepará pa bai einan, mi a solisitá pa haña un pasport. Ora mi kasá a bai warda di polis pa puntra dikon mi no a haña mi pasport ainda despues di mas ku dos luna, un polis a saka un fail diki for di su lachi i a bisa: “Bo ta pidiendo un pasport pa e persona aki pa asina e por bai kombertí hende na Alemania? Apsolutamente ku nò! E ta peligroso.”

Ku yudansa di Yehova i di algun ruman, mi a keda inkluí den un pasport pa grupo i asina mi a logra asistí na e kongreso maravioso ei. E asistensia a alkansá un máksimo di mas ku 150.000 hende, i mi por a mira bon kla kon Yehova su spiritu tabata dirigí i uni e famia spiritual internashonal aki. Mas despues den bida, mi a haña mas apresio ainda pa e balor di e hermandat kristian.

Na 1977 mi kasá stimá i fiel kompañera a fayesé. Mi a hasi mi bèst pa lanta mi yu muhé segun e prinsipionan di Beibel, pero mi no a keda mi so. Atrobe mi famia spiritual a bin na mi yudansa. Semper lo mi keda gradisidu pa e sosten di e rumannan durante e tempu difísil ei. Algun di nan asta a bin biba serka nos pa un tempu pa kuida mi yu muhé. Nunka lo mi lubidá nan amor di sakrifisio propio.—Juan 13:34, 35.

Agape a bira grandi i a kasa ku un ruman hòmber, Elias. Nan tin kuater yu hòmber, i tur ta den bèrdat. Den último añanan, mi a haña vários atake selebral i mi salú a bai atras. Mi yu muhé ku su famia ta kuida mi bon. Apesar di mi mal salú, ainda mi tin hopi motibu pa alegrá. Mi ta kòrda tempu ku nos tabata apénas shen ruman den henter Tesalónika, reuniendo sekretamente den kasnan privá. Awor tin rònt di sinku mil Testigu seloso den e área ei. (Isaias 60:22) Na kongresonan, rumannan hòmber hóben sa aserká mi i puntra mi: “Ruman ta kòrda tempu ku ruman tabata trese revista na nos kas?” Ounke e mayornan kisas no tabata lesa e revistanan ei, nan yunan sí tabata lesa nan, i nan a progresá spiritualmente.

Segun ku mi ta mira kon Yehova su organisashon ta krese, mi ta sinti ku tur e pruebanan ku mi a soportá tabata bale la pena. Semper mi ta bisa mi nietunan i otro hóbennan pa kòrda riba nan Tata selestial den nan hubentut, i nunka lo e no bandoná nan. (Eklesiastés 12:1) Yehova a kumpli ku su palabra, i a bira pa mi “un tata di huérfano.” (Salmo 68:5) Ounke for di infansia mi tabata un huérfano bandoná, ku tempu mi a haña un Tata amoroso!

[Plachi na página 22]

Mi a traha komo kòki den prizon Drama

[Plachi na página 23]

Huntu ku Katina, dia di nos kasamentu, 1959

[Plachi na página 23]

Un asamblea den un mondi serka di Tesalónika, fin di dékada 1960

[Plachi na página 24]

Huntu ku nos yu muhé, 1967