Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kiko tabata e motibu ku a skohe 25 di desèmber komo e fecha pa selebrá Hesus su nasementu?

E Palabra di Dios no ta duna e fecha di Hesus su nasementu. E Enciclopedia Hispánica ta komentá: “A skohe e fecha di 25 di desèmber komo e dia pa selebrá Pasku di Nasementu no a base di e fecha eksakto di e nasementu, pero mas bien, pa motibu ku nan kier a kristianisá e fiestanan di e solstisio di wenter.” E romanonan di antigwedat tabata selebrá e salimentu di solo den wenter dor di kome na grandi, dibertí na un manera desenfrená i duna otro regalo.—15/12, página 4-5.

• Echonan 7:59 ta indiká ku Esteban a hasi orashon na Hesus?

Nò. Beibel ta mustra ku orashon mester ta dirigí na Yehova Dios so. Dor ku Esteban tabata mirando Hesus den vishon, aparentemente el a sinti su mes liber pa apelá na dje direktamente, bisando: “Señor Hesus, risibí mi spiritu.” Esteban tabata sa ku Yehova a duna Hesus outoridat pa lanta morto. (Juan 5:27-29) P’esei Esteban a pidi Hesus òf a hasi un apelashon na dje pa protehá su forsa di bida te ora ku e haña resurekshon.—1/1, página 31.

• Kon nos por sa ku un persona su destino no ta predeterminá?

Dios a duna hende libertat di skohe, i esaki ta ekskluí e posibilidat di predestinashon. Yehova lo tabata masha inhustu i sin amor si el a predeterminá e manera ku nos lo hiba nos bida, i despues ta tene nos responsabel pa nos echonan. (Deuteronomio 32:4; 1 Juan 4:8)—15/1, página 4-5.

• Dikon lo ta un falta di modestia pa bisa ku milager ta algu imposibel?

Algun sientífiko ku ta rekonosé ku nan tin solamente un konosementu limitá di e milagernan sientífiko ku tin den kreashon di Dios, ta atmití ku nan no por bisa ku tur siguridat mas ku algu ta imposibel. A lo sumo, nan ta dispuesto pa bisa ku e ta improbabel.—15/2, página 5-6.

• Dikon Hues Samson a bisa su mayornan ku e tabata ke un yu muhé di e filisteonan komo esposa? (Huesnan 14:2)

E lei di Dios a prohibí kasamentu ku un adoradó di dios falsu. (Eksodo 34:11-16) Sin embargo, e muhé filisteo tabata “nèt esun apropiá” den bista di Samson. Samson “tabata buska un oportunidat kontra e filisteonan,” i e muhé tabata nèt apropiá pa e propósito ei. Dios a apoyá Samson pa medio di Su spiritu. (Huesnan 13:25; 14:3, 4, 6)—15/3, página 26.

• Un kristian tin mag di duna un empleado di gobièrnu tep òf regalo pa su servisio?

No ta bon pa soborná un funshonario, esta, dun’é algu balioso pa asina e por hasi algu ilegal, keda sin kumpli ku lei òf duna trato preferensial. Pero no ta soborno pa duna un sirbidó públiko un tep òf regalo ora e kumpli ku su deber òf pa haña un servisio legal òf pa evitá trato inhustu.—1/4, página 29.