Demasiado Konosementu pa Nos?

Un pareha misionero sintá na un playa na Wèst Afrika tabata kontemplá e splendor suave di luna. E hòmber a puntra: “Kiko hende sa di luna i kuantu mas nan falta pa siña di dje?”

Su esposa a agregá: “Awor imaginá bo ku nos por a mira tera pasa nos dilanti asin’aki. Kiko hende sa kaba di tera, i kuantu mas nan falta pa siña di dje? Anto kòrda esaki: ademas di ku tera ta drei den su órbita rònt di solo, henter nos sistema solar ta moviendo. Esaki ta nifiká ku probablemente nunka mas nos lo ta eksaktamente na e mesun punto aki den universo. Es mas, nos por kalkulá nos posishon aktual den universo solamente en relashon ku solo i e streanan ku nos konosé. Nos tin masha hopi konosementu di sierto kosnan, pero den un sentido, nos no sa mes unda nos ta!”

E PENSAMENTUNAN ei tin di haber ku algun bèrdat fundamental. Ta parse ku tin masha hopi kos di siña i tur dia nos ta siña algu nobo. Pero, maske kuantu kos nos siña, ta parse ku nos no por kaba di siña tur loke nos ke, ni siña nan mes lihé ku nos lo a deseá.

Nos tin ku rekonosé sí ku ademas di nos kapasidat pa siña kos nobo, e kapasidat pa warda informashon a oumentá masha hopi. Uso di teknologia ta permití hende graba un enorme kantidat di informashon. Hard disk di e kòmpiuternan di aktualidat tin kapasidatnan asina grandi ku mester a inventá palabranan matemátiko nobo pa deskribí nan. Un simpel CD-ROM por kontené un enorme kantidat di informashon; su kapasidat ta di 680 megabyte òf mas. Un DVD normal por kontené kasi shete biaha mas tantu informashon ku esei, i den futuro lo tin algun ku tin kapasidat mas grandi ainda.

Otro kos ku kasi nos no por kaba di komprondé ta e medionan moderno ku hende ta usa pa hasi e informashon disponibel. Imprentanan di rotashon pa produsí korant, revista i buki ta drei riba velosidatnan haltísimo. Un persona ku ta usa Internet por haña informashon pa no kaba dor di djis primi un boton. Den e maneranan aki i den hopi otro mas, e distribushon di informashon ta tuma lugá muchu mas lihé ku kualke hende por asimilá. Nan a yega di kompará e kantidat di informashon aki ku un laman; e ta asina ekstenso ku nos tin ku siña landa den dje, na moda di papia, pero sin purba bebe tur. E inmenso  kantidat na nos disposishon ta obligá nos pa ta selektivo.

Un motibu mas pakiko nos mester ta selektivo ta ku hopi di e informashon disponibel no semper ta benefisioso. Tin biaha e ta asta indeseabel i no ta bale la pena pa sa mes. Kòrda ku konosementu tin di haber ku informashon—sea bon òf malu, positivo òf negativo. Pió ainda, algun kos ku hopi hende ta aseptá komo echo simplemente no ta kuadra ku bèrdat. Kuantu biaha e deklarashonnan di asta outoridatnan respetá a resultá despues di ta inkorekto? Pensa por ehèmpel riba e sekretario di e stat antiguo di Efeso, sin duda rekonosé einan komo un funshonario bon informá. El a deklará: “Ken no sa ku e stat di e efesionan ta wardadó di e tèmpel di e gran diosa Artémis i di e imágen ku a kai for di shelu?” (Echonan 19:35, 36) Aparentemente tur hende tabata sa esaki i pa hopi e tabata asta inkuestionabel. Pero no ta bèrdat ku e imágen a kai for di shelu. Ku bon motibu anto, e Skritura Santu ta spièrta kristiannan pa tene kuidou ku “loke falsamente ta wòrdu yamá ‘konosementu.’”—1 Timoteo 6:20.

Un motibu fuerte pa ta selektivo tokante konosementu ta ku nos bida aktual ta masha kòrtiku. Sea kual sea bo edat, sin duda tin hopi área di konosementu ku lo bo tin gana di eksplorá, pero bo sa ku lo bo no biba sufisiente largu pa hasi esei.

E problema básiko aki lo kambia un dia? Por tin un ramo di konosementu disponibel ku lo prolongá bida pa hopi tempu mas, asta pa semper? Tin posibilidat ku e konosementu ei ta eksistí kaba? Si ta asina, lo e ta disponibel pa tur hende? Lo yega e dia ora ku tur konosementu lo konsistí di loke nos ta spera, esta, e bèrdat? E pareha misionero menshoná anteriormente a haña kontestanan satisfaktorio riba e preguntanan aki. Bo tambe por. P’esei nos ta invitá bo pa lesa e siguiente artíkulo ku ta bai mustra bo ku lo yega e dia ku bo por sigui gana konosementu pa semper.