Konfia den Yehova Su Palabra

“Mi ta konfia den bo palabra.”—Salmo 119:42.

1. Kiko bo por bisa tokante e identidat i karakter di e eskritor di Salmo 119?

E KOMPOSITOR di Salmo 119 a stima Yehova su palabra. Kisas tabata trata aki di Prens Ezekias di Huda. E sintimentunan ekspresá den e kantika inspirá aki ta pas ku e karakter di Ezekias, kende “a tene duru na SEÑOR” tempu ku e tabata rei di Huda. (2 Reinan 18:3-7) Un kos ta sigur: E kompositor tabata konsiente di su nesesidat spiritual.—Mateo 5:3.

2. Kiko ta e tema di Salmo 119, i kon e kantika aki a ser areglá?

² Un punto klave di Salmo 119 ta e balor di Dios su palabra òf mensahe. * Probablemente e eskritor a komponé e kantika aki den un órden alfabétiko pa yuda hende kòrd’é for di kabes. Su 176 versíkulonan ta basá riba lèternan susesivo di e álfabèt hebreo. Den hebreo original, kada un di e 22 strofanan di e salmo aki tin 8 liña ku ta kuminsá ku e mesun lèter. E salmo aki ta papia di Dios su palabra, lei, testimonio- [òf, rekordatorio- *], kaminda-, presepto-, statuto-, mandamentu-, ordenansa- i dichonan. Den e artíkulo aki i esun siguiente nos lo analisá Salmo 119 a base di un tradukshon eksakto di e teksto di e Skritura Hebreo. Ora nos meditá riba e eksperensianan ku Yehova su sirbidónan di pasado i di aktualidat a pasa aden, nos lo komprondé e kantika ku Dios a inspirá aki mihó i haña mas apresio pa e Palabra skirbí di Dios, Beibel.

Obedesé e Palabra di Dios i Lo Bo Ta Felis

3. Splika i ilustrá kiko ke men kana sin mancha.

³ Si nos ke ta berdaderamente felis, nos tin ku kana den e lei di Dios. (Salmo 119:1-8) Ora nos hasi esaki, Yehova lo konsiderá ku ‘nos kaminda ta sin mancha.’ (Salmo 119:1) E echo ku nos ta sin mancha no ta nifiká ku nos ta perfekto, pero e ta indiká sí ku nos ta hasi esfuerso pa kumpli ku Yehova Dios su boluntat. Noe tabata un hòmber “perfekto [òf sin mancha] den su generashonnan” ya ku el a “kana ku Dios.” E patriarka fiel ei i su famia a sobrebibí e Diluvio pasobra el a hiba su bida manera Yehova a preskribí. (Génesis 6:9; 1 Pedro 3:20) Asina tambe, si nos ke sobrebibí fin di e mundu aki nos tin ku ‘kumpli ku Dios su preseptonan ku diligensia,’ ku otro palabra, hasi su boluntat.—Salmo 119:4.

4. Di kiko nos felisidat i éksito ta dependé?

⁴ Hamas Yehova lo bandoná hende ku ta ‘gradisié [“alab’é,” NW] ku rektitut di kurason  i ku ta sigui warda su statutonan.’ (Salmo 119:7, 8) Dios no a bandoná e lider israelita Josué, kende a sigui e konseho di ‘meditá den e buki di lei di dia i anochi pa e por a hasi tur loke tabata pará skirbí den dje.’ Esei a hasié un hòmber eksitoso i a yud’é aktua sabí. (Josué 1:8) Ora Josué tabata yegando na fin di su bida, ainda e tabata alabando Dios i e por a rekordá e israelitanan: “Boso sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya.” (Josué 23:14) Meskos ku Josué i e eskritor di Salmo 119, nos por haña felisidat i éksito dor di alabá Yehova i konfia den su palabra.

Yehova Su Palabra Ta Mantené Nos Limpi

5. (a) Splika kon ta posibel pa keda spiritualmente limpi. (b) Ki yudansa tin pa un hóben ku a kometé un piká serio?

⁵ Nos por ta spiritualmente limpi si nos mantené nos mes alerta konforme Dios su palabra. (Salmo 119:9-16) Esaki ta e kaso asta si nos mayornan no a pone un bon ehèmpel pa nos. Ounke Ezekias su tata tabata un adoradó di dios falsu, Ezekias a “tene su kaminda puru [òf limpi],” posiblemente, di influensia pagano. Suponé ku un hóben ku ta sirbi Dios awe ta kometé un piká serio. Si e repentí, hasi orashon, buska yudansa di su mayornan i di ansianonan kristian amoroso, lo e por bira manera Ezekias dor di ‘tene su kaminda limpi i mantené su mes alerta.’—Santiago 5:13-15.

6. Menshoná algun hende muhé ku a ‘tene nan kaminda limpi i mantené nan mes alerta konforme Dios su palabra.

⁶ Ounke Rahab i Rut a biba hopi tempu promé ku Salmo 119 a wòrdu komponé, ‘nan a tene nan kaminda limpi.’ Rahab tabata un prostituta kananeo, pero el a bira konosí pa su fe komo adoradó di Yehova. (Hebreonan 11:30, 31) E moabita Rut a bandoná su diosnan, a sirbi Yehova i a kumpli ku e Lei ku Dios a duna Israel. (Rut 1:14-17; 4:9-13) Tur e dos muhénan aki ku no tabata israelita a ‘mantené nan mes alerta konforme Dios su palabra’ i nan tabatin e privilegio maravioso di bira antepasado di Hesukristu.—Mateo 1:1, 4-6.

7. Kon Daniel i e tres otro hóbennan hebreo a pone un bon ehèmpel den keda spiritualmente limpi?

⁷ Ounke “intenshon di kurason di hende ta malu for di su hubentut,” hóbennan por sigui un kaminda limpi asta den e mundu korupto aki bou di dominio di Satanas. (Génesis 8:21; 1 Juan 5:19) Komo eksiliado na Babilonia, Daniel i tres otro hóben hebreo a ‘mantené nan mes alerta konforme Dios su palabra.’ Por ehèmpel, nan no a kontaminá nan mes “ku e mihó kuminda di rei.” (Daniel 1:6-10) E babilonionan a kome bestia impuru ku tabata prohibí bou di e Lei di Moisés. (Levítiko 11:1-31; 20:24-26) Nan no tabatin kustumber di laga bestia matá sangra, i nan komementu di karni ku no a  sangra a violá e lei di Dios tokante sanger. (Génesis 9:3, 4) Nada straño anto ku e kuater hebreonan no a kome e kuminda ekskisito di e rei! E hóbennan ei deboto na Dios a keda spiritualmente limpi i dor di esei a pone un bon ehèmpel.

Dios Su Palabra Ta Yuda Hende Keda Fiel

8. Ki aktitut i konosementu nos tin mester si nos ke komprondé i apliká e lei di Dios?

⁸ Algu hopi importante ku por yuda nos keda fiel na Dios ta ora nos tin delisia den su palabra. (Salmo 119:17-24) Si nos ta manera e eskritor inspirá di e kantika, nos lo tin un deseo fuerte pa komprondé e “kosnan maravioso” di e lei di Dios. Konstantemente nos lo ‘anhelá e ordenansanan di Yehova’ i haña ‘delisia den su rekordatorionan.’ (Salmo 119:18, 20, 24) Asta si nos tin un par di aña so dediká na Yehova, nos a forma ‘un anhelo pa e lechi puru di e palabra’? (1 Pedro 2:1, 2) Nos tin ku kapta e siñansanan básiko di Beibel pa nos por ta den un mihó posishon pa komprondé i apliká e lei di Dios.

9. Kon nos mester reakshoná ora tin un konflikto entre e lei di Dios i loke hende ta eksigí di nos?

⁹ Kisas nos tin delisia den e rekordatorionan di Dios, pero kiko nos lo hasi si pa un òf otro motibu “prensnan” papia kontra nos? (Salmo 119:23, 24) Awe, hopi bes hende ku tin puesto di outoridat ta purba fòrsa nos pa pone leinan humano riba e lei di Dios. Ora tin un konflikto entre loke hende ta eksigí di nos i e boluntat di Dios, kiko nos lo hasi? Nos delisia den Dios su palabra lo yuda nos keda fiel na dje. Meskos ku e apòstelnan di Hesukristu ku a wòrdu persiguí, nos lo bisa: “Nos mester obedesé Dios mas ku hende.”—Echonan 5:29.

10, 11. Ilustrá kon nos por mantené integridat na Yehova bou di e sirkunstansianan di mas difísil.

¹⁰ Nos por keda fiel na Yehova asta bou di e sirkunstansianan di mas difísil. (Salmo 119:25-32) Si nos ke tin éksito den mantené nos integridat na Dios, nos mester ta dispuesto pa aseptá su siñansa i tambe pidié di kurason p’e instruí nos. Tambe nos tin ku skohe “e kaminda di fieldat.”—Salmo 119:26, 30.

¹¹ Ezekias, e probabel eskritor di Salmo 119, a skohe “e kaminda di fieldat.” El a hasi esei maske e tabata rondoná pa adoradónan falsu, i tal bes opheto di mofa di parti di e miembronan di e palasio real. Muy probablemente, “su alma no por a drumi di deskonsuelo” pa motibu di e sirkunstansianan ei. (Salmo 119:28, NW) Pero Ezekias a konfia den Dios, e tabata un bon rei i el a hasi loke tabata “bon den bista di SEÑOR.” (2 Reinan 18:1-5) Si nos konfia den Dios, nos tambe por wanta prueba komo wardadónan di integridat.—Santiago 1:5-8.

 Yehova Su Palabra Ta Duna Nos Kurashi

12. Kon nos por apliká Salmo 119:36 i 37 personalmente?

¹² Si nos sigui e guia di Dios su palabra, nos ta haña e kurashi nesesario pa enfrentá e pruebanan di bida. (Salmo 119:33-40) Ku humildat nos ta buska e instrukshon di Yehova pa asina nos por kumpli ku su lei ‘ku henter nos kurason.’ (Salmo 119:33, 34) Meskos ku e salmista, nos ta pidi Dios: “Inkliná mi kurason na bo rekordatorionan, i no na ganashi desonesto.” (Salmo 119:36) Meskos ku apòstel Pablo, nos ta “komportá nos mes den tur kos na un manera onorabel.” (Hebreonan 13:18) Si un doño di trabou ta ferwagt pa nos hasi algu desonesto, ku kurashi nos ta pega na e instrukshonnan di Dios—i semper Yehova ta bendishoná un kondukta asina. De echo, e ta yuda nos mantené tur mal deseo bou di kontròl. P’esei laga nos pidié den orashon: “Kita mi bista for di banidat.” (Salmo 119:37) Hamas nos lo ke deseá ningun banidat ku Dios ta odia. (Salmo 97:10) Dos di e kosnan ku e orashon aki lo yuda nos evitá ta pornografia i spiritismo.—1 Korintionan 6:9, 10; Revelashon 21:8.

13. Kon Hesus su disipelnan persiguí a haña e kurashi nesesario pa duna testimonio ku frankesa?

¹³ Konosementu eksakto di Dios su palabra ta duna nos konfiansa pa duna testimonio ku kurashi. (Salmo 119:41-48) I en bèrdat nos tin mester di kurashi pa ‘kontestá esun ku ta reprochá nos.’ (Salmo 119:42) Tin biaha, nos por ta manera Hesus su disipelnan ku a sufri persekushon i ku a pidi den orashon: “SEÑOR, . . . laga bo sirbidónan papia bo palabra ku tur konfiansa [“kurashi,” NW].” Ku ki resultado? “Nan tur a wòrdu yená ku spiritu santu i a kuminsá papia e palabra di Dios ku tur frankesa.” Meskos tambe awe SEÑOR Soberano ta duna nos kurashi pa papia su palabra ku frankesa.—Echonan 4:24-31.

14. Kiko ta yuda nos duna testimonio ku kurashi, meskos ku Pablo?

¹⁴ Si nos tin delisia den “e palabra di bèrdat” i ta ‘warda e lei di Dios kontinuamente,’ nos lo haña e kurashi nesesario pa duna testimonio sin tin nodi tene bèrgwensa. (Salmo 119:43, 44) Estudio diligente di e Palabra skirbí di Dios ta ekipá nos pa ‘papia di su rekordatorionan dilanti reinan.’ (Salmo 119:46) Orashon i Yehova su spiritu tambe lo yuda nos papia loke ta apropiá na un manera apropiá. (Mateo 10:16-20; Kolosensenan 4:6) Pablo a papia ku kurashi tokante e rekordatorionan di Dios ku e gobernantenan di promé siglo. Por ehèmpel, el a duna testimonio na e gobernante romano Felix, kende “a skuch’é ora ku e tabata papia di fe den Kristu Hesus.” (Echonan 24:24, 25) Tambe Pablo a duna testimonio dilanti Gobernadó Festo i Rei Agripa. (Echonan 25:22–26:32) Ku e respaldo di Yehova, nos tambe por ta testigunan ku kurashi i nunka tene “bèrgwensa di e evangelio.”—Romanonan 1:16.

Dios Su Palabra Ta Duna Nos Konsuelo

15. Kon e Palabra di Dios por duna nos konsuelo ora otro hende ta hasi bofon di nos?

¹⁵ Yehova su Palabra ta ofresé konsuelo konstantemente. (Salmo 119:49-56) Tin biaha nos ta den hopi nesesidat di konsuelo. Ounke nos ta papia ku kurashi komo Testigu di Yehova, “e arogantenan”—personanan ku ta aktua ku arogansia kontra Dios—tin biaha ta “hasi masha bofon” di nos. (Salmo 119:51) Sin embargo, ora nos ta hasi orashon, nos por kòrda sierto kosnan positivo ku e Palabra di Dios ta trese dilanti i asina nos ta haña ‘konsuelo pa nos mes.’ (Salmo 119:52) Durante nos súplikanan, nos por kòrda un lei òf prinsipio bíbliko ku ta duna nos e konsuelo i ánimo ku nos mester den un situashon di tenshon.

16. Apesar di persekushon, kiko sirbidónan di Dios no a hasi?

¹⁶ E arogantenan ku tabata hasi bofon di e salmista tabata israelita—miembronan di un nashon dediká na Dios. Esta un bèrgwensa! Ma distinto di nan, laga nos ta determiná pa nunka desviá for di e lei di Dios. (Salmo 119:51) Durante e persekushon nazi i otro eksperensianan similar atraves di añanan, míles di sirbidó di Dios a nenga di desviá for di e lei- i prinsipionan ku nos por haña den e Palabra di Dios. (Juan 15:18-21) I no ta un karga pa obedesé Yehova,  pasobra su statutonan ta manera melodianan di konsuelo pa nos.—Salmo 119:54; 1 Juan 5:3.

Sea Gradisidu pa Yehova Su Palabra

17. Kiko apresio pa Dios su palabra ta impulsá nos pa hasi?

¹⁷ Nos ta demostrá nos gratitut pa Dios su palabra dor di biba di akuerdo kuné. (Salmo 119:57-64) E salmista a ‘primintí di warda Yehova su palabranan,’ i asta ‘mei anochi e tabata lanta pa gradisí Dios pa Su ordenansanan hustu.’ Si nos spièrta anochi, lo ta un bon oportunidat pa ekspresá nos gratitut na Dios den orashon! (Salmo 119:57, 62) Nos apresio pa Dios su palabra ta impulsá nos pa buska siñansa divino i ta hasi nos ‘kompañeronan gososo di esnan ku ta teme Yehova,’ esta, personanan ku tin un temor respetuoso di Dios. (Salmo 119:63, 64) Unda nos por haña mihó kompañerismo aki riba tera?

18. Kon Yehova ta kontestá nos orashonnan ora ‘e lasonan òf kabuyanan di e malbadonan ta rondoná nos’?

¹⁸ Ora nos ta hasi orashon ku henter nos kurason i ta pidi Yehova humildemente pa siña nos, nos ta ‘buskando su fabor.’ Nos tin ku hasi orashon spesialmente ora ‘e lasonan [òf kabuyanan] di e malbadonan ta rondoná nos.’ (Salmo 119:58, 61) Yehova por kòrta e kabuyanan enemigu ku ta stroba nos i di e forma ei libra nos pa sigui ku e obra di prediká e Reino i hasi disipel. (Mateo 24:14; 28:19, 20) Esaki a keda demostrá bes tras bes den paisnan kaminda nos obra ta prohibí.

Tene Fe den Dios Su Palabra

19, 20. Den ki sentido por ta bon pa pasa den un aflikshon?

¹⁹ Fe den Dios i den su palabra ta yuda nos wanta difikultat i hasi su boluntat. (Salmo 119:65-72) Ounke e personanan arogante a ‘saka mentira kontra dje,’ e salmista a kanta: “Ta bon pa mi ku mi a wòrdu afligí.” (Salmo 119:66, 69, 71) Den ki sentido por ta bon pa un sirbidó di Yehova pasa den aflikshon?

²⁰ Ora nos pasa den un aflikshon, sin duda nos ta supliká Yehova di kurason, i esei ta hala nos mas serka dje. Nos por dediká mas tempu pa studia e Palabra skirbí di Dios i hasi mas esfuerso pa aplik’é. Esaki ta resultá den un bida mas felis. Pero kiko nos por hasi si nos ta reakshoná riba aflikshon na un manera ku ta saka na kla karakterístikanan indeseabel manera falta di pasenshi i orguyo? Ku orashon sinsero i ku yudansa di Dios su Palabra i spiritu, nos por vense e debilidatnan ei i “bisti e hende nobo” òf un personalidat nobo, mas plenamente. (Kolosensenan 3:9-14) Ademas, ora nos ta wanta kontratempu, nos fe ta bira mas fuerte. (1 Pedro 1:6, 7) Pablo a benefisiá di su tribulashonnan pa motibu ku esakinan a hasié mas dependiente di Yehova. (2 Korintionan 1:8-10) Nos ta laga sufrimentu tene un bon efekto riba nos?

Konfia Semper den Yehova

21. Kiko ta sosodé ora Dios brongosá e arogantenan?

²¹ Dios su palabra ta duna nos un base sólido pa konfia den dje. (Salmo 119:73-80) Si nos realmente ta konfia den nos Kreadó, nos lo no tin nodi sinti bèrgwensa. Sin embargo, pa motibu di loke otro hende ta hasi, nos tin mester di konsuelo i tin biaha nos tin gana di resa pidi pa “laga e arogantenan keda brongosá.” (Salmo 119:76-78) Ora Yehova ta brongosá hende asina, nan kamindanan malbado ta sali na kla i Yehova su nòmber sagrado ta keda santifiká. Nos por ta sigur ku esnan ku ta persiguí e pueblo di Dios no ta gana nèt nada. Por ehèmpel, nan no a logra ni lo no logra hamas tampoko pa kaba ku Testigunan di Yehova, kendenan ta  konfia den Dios ku henter nan kurason.—Proverbionan 3:5, 6.

22. Den ki sentido e salmista tabata ‘manera un bòter di kueru den huma’?

²² Dios su palabra ta fortalesé nos konfiansa den dje ora nos ta ser persiguí. (Salmo 119:81-88) Debí ku e arogantenan tabata persiguí e salmista, el a sinti su mes “manera un saku [“bòter,” NW] di kueru den huma.” (Salmo 119:83, 86) Den tempu di Beibel, e hendenan tabata usa bòter trahá di kueru di bestia pa warda awa, biña i otro líkidonan. Ora nan no tabata usa e bòternan aki, i a kologá nan banda di un kandela den un kuarto sin skorsten, esakinan lo por a kremp. Difikultat òf persekushon a yega di pone bo sinti bo ‘manera un bòter di kueru den huma’? Si ta asina, konfia den Yehova i pidié den orashon: “Rebibá mi segun bo miserikòrdia, pa asina mi warda e rekordatorio di bo boka.”—Salmo 119:88.

23. Kiko nos a konsiderá den nos análisis di Salmo 119:1-88, i kiko nos por puntra nos mes segun ku nos ta antisipá e estudio di Salmo 119:89-176?

²³ Loke nos a konsiderá den e promé mitar di Salmo 119 ta mustra ku Yehova ta tene miserikòrdia di su sirbidónan pa motibu ku nan ta konfia den su palabra i tin delisia den su statuto-, rekordatorio-, mandamentu- i leinan. (Salmo 119:16, 47, 64, 70, 77, 88) E ta kontentu ku e personanan ku ta dediká na dje ta mantené nan mes alerta konforme su palabra. (Salmo 119:9, 17, 41, 42) Segun ku bo ta antisipá e estudio di e sobrá di e bunita salmo aki, bo por puntra bo mes: ‘Realmente mi ta laga Yehova su palabra lusa mi kaminda ?’

[Nota]

Kon Lo Bo Kontestá?

• Di kiko berdadero felisidat ta dependé?

• Kon Yehova su palabra ta mantené nos spiritualmente limpi?

• Den ki maneranan Dios su palabra ta duna kurashi i konsuelo?

• Pakiko nos mester tin fe den Yehova i den su palabra?

[Preguntanan di Estudio]

[Plachinan na página 11]

Rut, Rahab i e tres hóbennan hebreo eksiliá na Babilonia ‘a mantené nan mes alerta konforme Dios su palabra’

[Plachi na página 12]

Ku kurashi Pablo a ‘papia di Dios su rekordatorionan dilanti reinan’