Laga Dios Su Palabra Lusa Bo Kaminda
Laga Dios Su Palabra Lusa Bo Kaminda
“Bo palabra ta . . . un lus pa mi kaminda.”—SALMO 119:105.
1, 2. Bou di ki sirkunstansia Yehova su palabra lo lusa nos kaminda?
YEHOVA su palabra lo lusa nos kaminda basta nos permití esei. Pa nos disfrutá di e lus spiritual ei, nos mester ta studiantenan diligente di e Palabra skirbí di Dios i apliká su konseho. Ta e ora ei so nos por bisa meskos ku e salmista: “Bo palabra ta un lampi pa mi pia i un lus pa mi kaminda.”—Salmo 119:105.
2 Awor laga nos konsiderá Salmo 119:89-176. E versíkulonan aki, areglá den 11 strofa, ta sumamente riku na informashon! Nan por yuda nos keda riba e kaminda ku ta hiba na bida eterno.—Mateo 7:13, 14.
Pakiko Nos Mester Tin Delisia den Dios Su Palabra?
3. Kon Salmo 119:89 i 90 ta mustra ku nos por dependé di Dios su palabra?
3 Hende ku tin delisia den Yehova su palabra ta haña stabilidat spiritual. (Salmo 119:89-96) E salmista a kanta: “Pa semper, o SEÑOR, bo palabra ta establesí den shelu. . . . Bo a establesé tera, i e ta keda para.” (Salmo 119:89, 90) Pa medio di Yehova su palabra—su “ordenansanan di e shelunan”—solo luna i strea ta move perfektamente den nan órbitanan i tera ta firmemente establesí pa semper. (Jòb 38:31-33; Salmo 104:5) Nos por dependé riba kada palabra ku ta sali for di e boka di Yehova; loke Dios bisa ‘lo no keda sin alkansá’ e kumplimentu di su propósito.—Isaias 55:8-11.
4. Kon delisia den Dios su palabra por yuda Su sirbidónan ku ta pasa den aflikshon?
4 Si e salmista ‘no tabatin delisia den e lei di Dios, lo el a peresé den su aflikshon.’ (Salmo 119:92) No ta hende straño a persiguié; tabata e propio israelitanan kibradó di lei ku a odi’é. (Levítiko 19:17) Pero esaki no tabata demasiado p’e, pasobra e tabata stima e lei di Dios ku a sosten’é. Na Korinto, apòstel Pablo tabata “den peliger meimei di rumannan falsu,” tal bes inkluso “super-apòstelnan” ku tabata buskando un akusashon kontra dje. (2 Korintionan 11:5, 12-14, 26) Ma Pablo a sobrebibí spiritualmente pasobra e tabatin delisia den Dios su palabra. Ya ku nos tin delisia den e Palabra skirbí di Yehova i ta apliká loke e ta bisa, nos ta stima nos rumannan. (1 Juan 3:15) Ni sikiera e odio di e mundu aki no por pone nos lubidá instrukshonnan di Dios. Nos ta sigui hasi su boluntat den union amoroso ku nos rumannan segun ku nos ta den ekspektativa pa sirbi Yehova gososamente pa semper.—Salmo 119:93.
5. Kon Rei Asa a buska Yehova?
5 Ora nos ta ekspresá nos deboshon na Yehova, nos por bis’é den orashon: “Mi ta di bo, salba mi, pasobra mi a buska bo preseptonan.” (Salmo 119:94) Rei Asa a buska Dios i a eliminá apostasia for di Huda. Na un asamblea grandi den e di 15 aña di e reinado di Asa (aña 963 promé ku nos era), e habitantenan di Huda a ‘sera un aliansa pa buska e SEÑOR.’ Dios a “laga nan hañ’é” i a sigui “duna nan sosiegu na tur banda.” (2 Krónikanan 15:10-15) E ehèmpel aki mester motivá ken ku a drif bai for di e kongregashon kristian pa bolbe buska Dios. Lo e bendishoná i protehá esnan ku ta bolbe kuminsá asosiá aktivamente ku su pueblo.
6. Ki akshon lo protehá nos kontra daño spiritual?
6 Yehova su palabra ta duna nos sabiduria ku por protehá nos for di daño spiritual. (Salmo 119:97-104) E mandamentunan di Dios ta hasi nos mas sabí ku nos enemigunan. Ora nos hasi kaso di su rekordatorionan nos ta haña perspikasia, i dor di ‘warda su preseptonan nos ta komprondé mas ku e bieunan.’ (Salmo 119:98-100) Si Yehova su dichonan ‘ta mas dushi ku miel den nos boka,’ nos lo odia i evitá “tur kaminda di mentira.” (Salmo 119:103, 104) Esaki lo sirbi komo un protekshon kontra daño spiritual ora nos topa hende arogante, feros i malbado den e último dianan aki.—2 Timoteo 3:1-5.
Un Lampi pa Nos Pia
7, 8. Na armonia ku Salmo 119:105, kiko nos tin ku hasi?
7 Dios su palabra ta un fuente konfiabel i konstante di lus spiritual. (Salmo 119:105-112) Sea nos ta kristiannan ungí òf nos ta nan kompañeronan, esta, di e “otro karnénan,” nos ta deklará: “Bo palabra ta un lampi pa mi pia i un lus pa mi kaminda.” (Juan 10:16; Salmo 119:105) Dios su palabra ta manera un lampi ku ta lusa nos kaminda, pa asina nos no trompeká i kai spiritualmente. (Proverbionan 6:23) Pero ta nos kada un personalmente mester laga Yehova su palabra ser un lampi pa nos pia.
8 Nos mester ta mes firme ku e kompositor di Salmo 119. E tabata determiná pa no desviá for di Dios su mandamentunan. El a bisa: “Mi a hura i lo mi konfirmá esaki, ku lo mi warda [Yehova su] ordenansanan hustu.” (Salmo 119:106) Laga nos nunka minimisá e balor di studia Beibel regularmente i partisipá den reunionnan kristian.
9, 10. Kon nos por sa ku hende dediká na Yehova por ‘desviá for di su preseptonan,’ pero kon nos por evitá esaki?
9 E salmista no a ‘desviá for di Dios su preseptonan,’ pero esei por sosodé ku un persona dediká na Yehova. (Salmo 119:110) Rei Salomon a desviá, ounke e tabata miembro di un nashon dediká na Yehova i na prinsipio el a aktua na armonia ku e sabiduria ku Dios a dun’é. “E muhénan stranhero a [pone] asta Salomon kometé piká” dor di sedusié p’e bai adorá dios falsu.—Nehemias 13:26; 1 Reinan 11:1-6.
10 Satanas, “e yagdó” di para, ta pone hopi trampa. (Salmo 91:3) Por ehèmpel, un ruman ku un tempu tabata huntu ku nos, lo por purba pone nos desviá for di e kaminda di lus spiritual i drenta den e skuridat di apostasia. Entre e kristiannan na Tiatira, tabatin “e muhé Jezabel,” posiblemente un grupo di hende muhé ku tabata siña otronan praktiká idolatria i kometé fornikashon. Hesus no a tolerá e mal kosnan ei, i nos tampoko no mester tolerá nan. (Revelashon 2:18-22; Hudas 3, 4) P’esei laga nos pidi Yehova su yudansa den orashon pa nos no desviá for di su preseptonan sino keda den lus divino.—Salmo 119:111, 112.
Sostené dor di Dios Su Palabra
11. Di akuerdo ku Salmo 119:119, kon Dios ta mira e malbadonan?
11 Si nos no desviá for di Dios su statutonan, lo e sostené nos. (Salmo 119:113-120) Nos no ta aprobá hende “indesiso,” meskos ku Hesus tampoko no a aprobá personanan lou ku awe ta pretendé di ta kristian. (Salmo 119:113; Revelashon 3:16) Pa motibu ku nos ta sirbi Yehova di henter nos kurason, e ta ‘nos lugá di skonde’ i lo e sostené nos. Lo e ‘rechasá tur esnan ku ta desviá for di su statutonan’ ora nan ta rekurí na triki i engaño. (Salmo 119:114, 117, 118; Proverbionan 3:32) E ta mira e malbadonan komo “skuma” sushi, manera e impuresanan ku ta ser eliminá for di metal presioso manera plata i oro. (Salmo 119:119; Proverbionan 17:3) Laga nos semper manifestá amor pa Dios su rekordatorionan, pasobra nos sigur no ke ta huntu ku e malbadonan riba e monton di desperdisio ku ta bai pa destrukshon!
12. Pakiko ta importante pa nos tin temor di Yehova?
12 E salmista a bisa: “Mi karni ta tembla di temor pa bo [Yehova].” (Salmo 119:120) Si nos ke pa Yehova sostené nos komo su sirbidónan, ta importante pa nos tin un temor saludabel di dje, i nos ta manifestá esei dor di evitá loke e ta desaprobá. Un temor respetuoso di Yehova a yuda Jòb hiba un bida hustu. (Jòb 1:1; 23:15) Sin importá kiko nos tin ku wanta, temor di Dios por yuda nos hiba un bida ku ta karga su aprobashon. Pero pa nos tin awante nos tin hasi orashon sinsero ku fe.—Santiago 5:15.
Orashon den Fe
13-15. (a) Pakiko nos por tin fe ku nos orashonnan lo wòrdu kontestá? (b) Kiko por sosodé si nos no sa kiko pa bisa den orashon? (c) Ilustrá kon Salmo 119:121-128 por kuadra ku e ‘kehamentu ku nos no por ekspresá’ den orashon.
13 Nos por hasi orashon ku e fe ku Dios lo aktua na nos fabor. (Salmo 119:121-128) Meskos ku e salmista, nos ta sigur ku nos orashonnan lo ser kontestá. Pakiko? Pasobra nos ta stima e mandamentunan divino “mas ku oro, sí, mas ku oro fini.” Ademas, ‘nos ta konsiderá komo rekto tur Dios su preseptonan tokante di tur kos.’—Salmo 119:127, 128.
14 Yehova ta tende nos petishonnan pasobra nos ta hasi orashon ku fe i tambe pasobra nos ta kumpli kuidadosamente ku su preseptonan. (Salmo 65:2) Pero kiko lo pasa si nos haña nos mes den problema ku ta tolondrá nos asina tantu ku nos no sa mes kiko pa bisa den orashon? E ora ei “e spiritu mes ta intersedé pa nos ku kehamentu ku no por wòrdu ekspresá.” (Romanonan 8:26, 27) Na momentunan asina, Dios ta aseptá ekspreshonnan den su Palabra komo orashon ku ta representá nos nesesidatnan.
15 E Skritura ta yen di orashon- i pensamentunan ku ta kuadra ku sierto ‘kehamentu ku nos no a ekspresá.’ Por ehèmpel, konsiderá Salmo 119:121-128. E manera ku kosnan ta ser ekspresá aki kisas ta kuadra ku nos sirkunstansianan. Por ehèmpel, si nos tin miedu di wòrdu estafá, nos por pidi e yudansa di Dios den e manera ku e salmista a hasié. (Versíkulo 121-123) Suponé ku nos tin ku tuma un desishon sumamente difísil. E ora ei nos por pidi Yehova usa su spiritu pa yuda nos kòrda i apliká su testimonionan òf rekordatorionan. (Versíkulo 124, 125) Ounke nos “ta odia tur kaminda di mentira,” nos lo tin ku pidi Dios aktua na nos fabor pa nos no sukumbí na tentashon pa kibra su lei. (Versíkulo 126-128) Si nos lesa Beibel tur dia, kisas e pasashinan probechoso ei ta bini na nos mente ora nos ta supliká Yehova.
Yudá dor di e Rekordatorionan di Yehova
16, 17. (a) Pakiko nos mester di Dios su rekordatorionan, i kon nos mester mira nan? (b) Kiko otro hende por pensa di nos, pero kiko ta loke realmente ta konta?
16 Si nos ke pa Dios tende nos orashon i si nos ke tin su fabor, nos mester hasi kaso di su rekordatorionan. (Salmo 119:129-136) Komo hende ku sa lubidá, nos mester di Yehova su rekordatorionan maravioso ku ta pone nos kòrda bèk riba su instrukshon i mandamentunan. Klaru ku nos ta masha gradisidu pa e lus spiritual ku kada komprondementu nobo di Dios su palabranan ta trese. (Salmo 119:129, 130) Tambe nos ta gradisidu ku Yehova a laga ‘su kara resplandesé riba nos’ komo muestra di su aprobashon, ounke ‘awa ta basha for di nos wowo’ pa motibu ku otro hende ta violá su lei.—Salmo 119:135, 136; Numbernan 6:25.
17 Si nos kumpli ku Dios su rekordatorionan hustu nos por sigui konta ku su fabor. (Salmo 119:137-144) Komo sirbidó di Yehova, nos ta rekonosé ku e tin e derecho di hala nos atenshon riba su rekordatorionan i ferwagt ku nos ta obedesé e mandamentunan aki. (Salmo 119:138) Siendo ku e salmista a obedesé Dios su mandamentunan, pakiko el a bisa: “Mi ta chikitu i despresiá”? (Salmo 119:141) Aparentemente, e tabata refiriendo na e manera ku su enemigunan a mir’é. Ora nos ta para pa hustisia sin komprometé, tal bes otro hende ta despresiá nos. Pero loke ta konta realmente ta ku Yehova ta wak nos ku fabor pasobra nos ta biba segun su rekordatorionan hustu.
Den Pas i Siguridat
18, 19. Kiko ta e resultadonan ora nos ta warda Dios su rekordatorionan?
18 Dor di warda Dios su rekordatorionan, nos ta mantené un relashon estrecho kuné. (Salmo 119:145-152) Pa motibu ku nos ta presta atenshon na Yehova su rekordatorionan, nos ta sinti nos liber pa invok’é ku henter nos kurason, i nos por ferwagt ku e ta tende nos. Kisas nos ta spièrta “promé ku mardugá” i roga su yudansa. Esaki ta un bon ora pa hasi orashon! (Salmo 119:145-147) Ademas, Dios ta serka nos pasobra nos ta evitá kondukta indesente i ta mira su palabra komo e bèrdat, meskos ku Hesus a hasi. (Salmo 119:150, 151; Juan 17:17) Nos relashon ku Yehova ta sostené nos den e mundu turbulento aki i lo yuda nos pasa dor di su guera grandi di Armagedón.—Revelashon 7:9, 14; 16:13-16.
19 Debí na nos rèspèt profundo pa Dios su palabra, nos tin berdadero siguridat. (Salmo 119:153-160) Distinto di e malbadonan, nos sí ‘no a desviá for di Yehova su testimonionan,’ òf rekordatorionan. Nos ta stima e preseptonan di Dios i p’esei nos ta sinti nos sigur den su bondat amoroso. (Salmo 119:157-159) Yehova su rekordatorionan ta stimulá nos memoria pa nos kòrda loke e ta rekerí di nos den situashonnan spesífiko. Di otro banda, e òrdunan di Dios ta kosnan ku e ta manda nos hasi i nos ta rekonosé mesora ku nos Kreadó tin derecho di duna nos òrdu. Konsiente ku ‘Dios su palabra den su totalidat ta bèrdat’ i ku nos no por dirigí nos pasonan independiente di dje, nos ta aseptá su instrukshon gustosamente.—Salmo 119:160; Jeremias 10:23.
20. Pakiko nos tin “pas abundante”?
20 Nos amor pa e lei di Yehova ta duna nos un pas abundante. (Salmo 119:161-168) Persekushon no ta kita e “pas [inkomparabel] di Dios” for di nos. (Filipensenan 4:6, 7) Nos ta balorá e ordenansanan di Yehova asina tantu ku konstantemente nos ta alab’é pa nan—“shete biaha pa dia.” (Salmo 119:161-164) E salmista a kanta: “Esnan ku ta stima bo lei tin gran pas, i nada no ta hasi nan trompeká.” (Salmo 119:165) Si nos komo personanan individual ta stima i warda e lei di Yehova, nos lo no laga loke otro hende bisa ni nada otro pone nos trompeká spiritualmente.
21. Ki ehèmpel bíbliko ta mustra ku nos no mester laga difikultat ku por surgi den e kongregashon pone nos trompeká?
21 Hopi individuo di tempu di Beibel no a laga nada bira un piedra di trompeká permanente pa nan. Por ehèmpel, e hòmber kristian Gayo no a laga e kondukta malbado di Diótrefes pon’é trompeká, ma el a sigui ‘kana den e bèrdat.’ (3 Juan 1-3, 9, 10) Pablo a animá e muhénan kristian Euodias i Sintike fuertemente “pa nan biba den armonia ku otro den Señor,” ya ku probablemente a surgi algun difikultat entre nan. Aparentemente, nan a haña yudansa pa resolvé nan problema, i nan a sigui sirbi Yehova fielmente. (Filipensenan 4:2, 3) Pues anto, nos no mester laga ningun tipo di difikultat ku por surgi den e kongregashon pone nos trompeká. Laga nos konsentrá riba warda e preseptonan di Yehova, kòrdando ku ‘tur nos kamindanan ta su dilanti.’ (Salmo 119:168; Proverbionan 15:3) E ora ei nada lo por kita nos “pas abundante” permanentemente for di nos.
22. (a) Si nos obedesé Dios, ki privilegio nos por tin? (b) Kon nos mester mira algun di e personanan ku a dual for di e kongregashon kristian?
22 Si nos ta obedesé Yehova semper, nos lo tin e privilegio di sigui alab’é. (Salmo 119:169-176) Dor di biba na armonia ku e statutonan di Dios, no solamente nos ta disfrutá di siguridat spiritual sino tambe ‘nos lepnan ta sigui ekspresá alabansa pa Yehova.’ (Salmo 119:169-171, 174) Esaki ta e mayor privilegio ku nos por tin den e último dianan aki. E salmista kier a sigui biba i alabá Yehova, pero ounke Beibel no ta duna e detayenan, el a “kana dual manera un karné pèrdí.” (Salmo 119:175, 176) Algun persona ku a dual for di e kongregashon kristian kisas ainda ta stima Dios i kier alab’é. P’esei laga nos hasi tur loke ta na nos alkanse pa yuda nan di manera ku nan por bolbe haña siguridat spiritual i sinti e goso di alabá Yehova huntu ku su pueblo.—Hebreonan 13:15; 1 Pedro 5:6, 7.
Lus Permanente pa Nos Kaminda
23, 24. Ki benefisionan bo a saka for di Salmo 119?
23 Salmo 119 por benefisiá nos den vários manera. Por ehèmpel, e por hasi nos mas dependiente di Dios, pasobra e ta mustra ku “kana den e lei di SEÑOR” ta trese berdadero felisidat. (Salmo 119:1) E salmista ta rekordá nos ku ‘e totalidat di Dios su palabra ta bèrdat.’ (Salmo 119:160) Esaki sigur mester oumentá nos apresio pa henter e Palabra skirbí di Dios. Ora nos meditá riba Salmo 119, esei mester motivá nos pa studia e Skritura diligentemente. Bes tras bes e salmista a pidi Dios: “Siña mi bo statutonan.” (Salmo 119:12, 68, 135) Tambe el a supliká Dios: “Siña mi bon disernimentu i konosementu, pasobra mi ta kere bo mandamentunan.” (Salmo 119:66) Ta bon pa nos hasi orashon den un manera similar.
24 Siñansa divino ta hasi posibel ku nos por tin un relashon íntimo ku Yehova. Bes tras bes e salmista a yama su mes un sirbidó di Dios. De echo, el a dirigí su mes na Yehova ku e palabranan konmovedor aki: “Mi ta di bo.” (Salmo 119:17, 65, 94, 122, 125; Romanonan 14:8) Esta un privilegio pa sirbi i alabá Yehova komo un di su Testigunan! (Salmo 119:7) Abo ta sirbiendo Dios ku goso komo un proklamadó di Reino? Si ta asina, bo por tin e garantia ku Yehova lo sigui sostené bo i bendishoná bo den e aktividat privilegiá aki si bo konfia semper den su palabra i lag’é lusa bo kaminda.
Kon Lo Bo Kontestá?
• Pakiko nos mester tin delisia den Dios su palabra?
• Kon Dios su palabra ta sostené nos?
• Den ki maneranan e rekordatorionan di Yehova ta yuda nos?
• Dikon e pueblo di Yehova tin pas i siguridat?
[Preguntanan di Estudio]
[Plachi na página 16]
Dios su palabra ta un fuente di lus spiritual
[Plachi na página 17]
Si nos ta stima e rekordatorionan di Yehova, hamas lo e mira nos komo “skuma” sushi
[Plachinan na página 18]
Si nos lesa Beibel tur dia, ora nos ta hasi orashon mesora pasashinan probechoso ta bini na nos mente