E Speransa di Resurekshon—Kiko E Ta Nifiká pa Bo?

“Bo ta habri bo man, i ta satisfasé e deseo di tur ser bibu.”—Salmo 145:16.

1-3. Ki speransa pa futuro algun persona tin? Duna ehèmpel.

MAINTA, Christopher di nuebe aña di edat ku su ruman hòmber, huntu ku nan tio, tanta i dos primu a prediká di kas pa kas den nan ministerio kristian den bisindario di Manchester, Inglatera. Spièrta!, kompañero di e revista aki, a splika loke a sosodé. “Atardi nan a sali bai dal un keiru na Blackpool, un área turístiko kant’i kosta no muchu leu. Nan tur 6 tabata entre e 12 hendenan ku a pèrdè nan bida instantáneamente den un aksidente riba karetera, ku polis a deskribí komo un ‘berdadero holokousto.’”

² E anochi promé ku e aksidente trágiko, e famia a asistí na e Estudio di Buki di Kongregashon, kaminda a trata e tema di morto. Tata di Christopher a konta: “Semper Christopher tabata un mucha ku a gusta meditá. E anochi ei el a papia bon kla tokante un mundu nobo i su speransa pa futuro. Despues diripiente, durante e estudio, Christopher a bisa: ‘E bon di ser un Testigu di Yehova ta ku ounke morto ta hasi doló, nos sa ku un dia nos lo mira otro atrobe riba tera.’ Ningun di nos ku tabata einan por a imaginá nos kon memorabel e palabranan ei lo a bira. *

³ Añanan mas promé, na 1940, un Testigu oustriako ku yama Franz a haña sa ku nan lo a bai ehekut’é na guiotina pasobra el a nenga di kibra su lealtat na Yehova. For di un sentro di detenshon na Berlin, Franz a skirbi su mama: “Ku e konosementu ku mi tin, si mi a hasi e huramentu [militar], lo mi a kometé un piká ku meresé morto. Esei lo ta malu pa mi. Lo mi no haña resurekshon. . . . I awor, mi mama stimá i tur mi rumannan, awe nan a duna mi e sentensia, i no spanta, ta sentensia di morto, i lo mi wòrdu ehekutá mañan mainta. Dios ta duna mi forsa, meskos ku semper el a duna tur kristian berdadero den pasado. . . . Si boso para firme te na morto, nos lo topa otro atrobe den e resurekshon. . . . Te despues ora nos topa atrobe.” *

4. Ki efekto e eksperensianan relatá aki tin riba bo, i kiko nos lo konsiderá siguientemente?

⁴ E speransa di resurekshon a nifiká hopi pa tantu Christopher komo Franz. Pa nan e tabata algu real. E relatonan aki sigur ta konmové nos! Pa nos por haña mas apresio pa Yehova i fortalesé nos speransa den e resurekshon, laga nos konsiderá awor pakiko e resurekshon lo tuma lugá i ki efekto esaki mester tin riba nos personalmente.

Vishon di e Resurekshon Riba Tera

5, 6. Kiko e vishon ku apòstel Juan a skirbi na Revelashon 20:12 i 13 ta revelá?

⁵ Den un vishon di susesonan durante e Reinado di Mil Aña di Kristu Hesus, apòstel Juan a mira e resurekshon riba tera tuma lugá. El a skirbi: “Mi a mira e mortonan, grandi i chikitu. . . . I laman a entregá e mortonan  ku tabata den dje, i morto i Hades a entregá e mortonan ku tabata den nan.” (Revelashon 20:12, 13) Sea kual sea nan posishon—“grandi” òf “chikitu”—tur esnan ku ta den e gara di Hades (Seol), graf komun di humanidat, lo ser lagá liber. Esnan ku a pèrdè nan bida den laman tambe lo bolbe bèk na bida e tempu ei. E suseso maravioso aki ta parti di e propósito di Yehova.

⁶ Ora Kristu kuminsá su reinado di mil aña, lo e mara Satanas i tir’é den abismo. Pues durante e reinado ei Satanas lo no por gaña ningun di e personanan resusitá aki ni ningun sobrebibiente di e tribulashon grandi pasobra lo e ta inaktivo. (Revelashon 20:1-3) Mil aña por parse un tempu largu pa bo, pero en realidat, pa Yehova e ta manera “ún dia.”—2 Pedro 3:8.

7. Kiko lo ta e base pa huisio durante Kristu su Reinado di Mil Aña?

⁷ Di akuerdo ku e vishon, Kristu su Reinado di Mil Aña lo ta un tempu di huisio. Apòstel Juan a skirbi: “Mi a mira e mortonan, grandi i chikitu, pará dilanti di e trono, i bukinan a wòrdu habrí; i un otro buki a wòrdu habrí, kual ta e buki di bida; i e mortonan a wòrdu husgá for di loke tabata pará skirbí den e bukinan, segun nan obranan. . . . I nan a wòrdu husgá, kada un di nan segun nan obranan.” (Revelashon 20:12, 13) Ripará ku e base pa e huisio aki no ta loke e persona a hasi òf laga di hasi promé ku el a muri. (Romanonan 6:7) Mas bien, esei tin di haber ku e “bukinan” ku lo wòrdu habrí den futuro. Ta loke un persona hasi despues ku el a siña loke e bukinan ta kontené lo determiná si su nòmber ta skirbí den “e buki di bida.”

“Resurekshon di Bida” òf “Resurekshon di Huisio”

8. Kiko lo ta e dos posibel resultadonan pa hende resusitá?

⁸ Mas promé den e vishon, Juan ta deskribí Hesus ku “e yabinan di morto i di Hades.” (Revelashon 1:18) E ta sirbi komo Yehova su “Prens di bida,” kende a risibí poder pa husga “e bibunan i e mortonan.” (Echonan 3:15; 2 Timoteo 4:1) Kon lo e hasi esaki? Dor di trese bèk na bida esnan ku ta drumi den morto. Hesus a bisa: “No straña boso di esaki, pasobra e ora lo yega den kua tur ku ta den graf lo tende su bos, i lo sali.” Anto el a agregá: “Esnan ku a hasi bon, pa un resurekshon di bida, esnan ku a kometé maldat, pa un resurekshon di huisio.” (Juan 5:28-30) Pues, kiko ta warda hòmber- i muhénan fiel di antigwedat den futuro?

9. (a) Ora e hendenan bolbe bèk den e resurekshon, kiko hopi di nan lo siña sin duda? (b) Ki inmenso obra di edukashon lo ser efektuá?

⁹ Ora e hendenan fiel aki di antigwedat bolbe den e resurekshon, lo no tarda muchu pa nan ripará ku e promesanan ku nan a konfia aden awor ta un realidat. Nan lo ta masha interesá pa haña sa e identidat di e Simia di e muhé di Dios, menshoná den e promé profesia di Beibel na Génesis 3:15. Nan lo keda hopi kontentu ora nan tende ku e Mesias primintí aki, Hesus, a keda fiel te na morto, entregando su bida komo un sakrifisio di reskate! (Mateo 20:28) Esnan ku ta risibí nan bèk na bida lo haña un goso grandi den yuda nan komprondé ku e reskate ta un ekspreshon di Yehova su bondat inmeresí i miserikòrdia. Ora e personanan resusitá ei haña sa kiko e Reino di Dios ta logrando den kumplimentu ku e propósito pa e tera, sin duda nan kurason lo basha over ku ekspreshonnan di alabansa na Yehova. Nan lo tin amplio oportunidat pa demostrá nan deboshon na nan tata selestial amoroso i na su Yu. Pa tur hende na bida e tempu ei lo ta un plaser pa partisipá den e inmenso obra di edukashon ku lo ta nesesario pa siña e míles di miónes di hendenan ku lo sali for di graf, kendenan tambe lo mester aseptá e reskate ku Dios a perkurá.

10, 11. (a) Ki oportunidat e Mil Aña lo duna tur hende riba tera? (b) Ki efekto esaki mester tin riba nos?

 ¹⁰ Dia Abraham resusitá, lo e haña un gran konsuelo ora e mira kon e bida ku el a anhelá bou di mando di e “stat” ei a bira realidat. (Hebreonan 11:10) E hòmber fiel Jòb lo mester keda masha kontentu ora e haña sa ku e manera ku el a hiba su bida a fortalesé otro sirbidónan di Yehova pa nan tambe a wanta pruebanan di integridat! I Daniel lo ta hopi ansioso pa haña sa kon e profesianan ku el a ser inspirá pa skirbi a kumpli!

¹¹ En bèrdat, tur hende ku haña bida den e hustu mundu nobo, sea dor di resurekshon òf dor di sobrebibí e tribulashon grandi, lo tin hopi di siña tokante Yehova su propósito pa tera i su habitantenan. E oportunidat di biba pa semper i alabá Yehova pa tur eternidat sigur lo hasi e programa di edukashon pa e Mil Aña un berdadero plaser. Sin embargo, loke ta mas importante ta kiko kada un di nos lo hasi segun ku nos ta siña e kontenido di e bukinan. E informashon vital aki lo fortalesé nos pa resistí e último intento di Satanas pa desviá nos for di bèrdat. Nos lo meditá riba dje i tum’é na pechu?

12. Kiko lo yuda kada hende partisipá plenamente den tantu e obra edukashonal komo e trabou di transformá tera den un paradeis?

¹² Nos no mester lubidá tampoko riba e bendishonnan maravioso ku nos lo haña komo resultado di e benefisionan di e sakrifisio di reskate di Kristu. Hende tresé bèk na bida den e resurekshon lo no tin e tipo di enfermedatnan i desabilidatnan ku ta eksistí aktualmente. (Isaias 33:24) Un kurpa sano ku e posibilidat di haña salú perfekto despues lo permití tur habitante di e mundu nobo partisipá plenamente den e obra edukashonal di yuda e míles di miónes di hendenan resusitá haña e kaminda ku ta hiba na bida. E habitantenan ei tambe lo partisipá den e proyekto di mas grandi ku a yega di ser realisá riba tera, esun di transformá e planeta kompletu den un paradeis pa e gloria di Yehova.

13, 14. Pakiko Satanas lo ser librá na e prueba final, i kiko lo ta e posibel resultado pa kada un di nos individualmente?

¹³ Ora Satanas ser librá for di abismo pa e prueba final, lo e purba gaña hende atrobe. Segun Revelashon 20:7-9, tur e ‘nashonnan engañá,’ òf gruponan di hende, lo kai bou di e influensia malbado di Satanas i lo haña nan huisio di destrukshon: ‘Kandela lo baha for di shelu i devorá nan.’ Pa e hendenan aki ku a haña un resurekshon durante e Mil Aña, e destrukshon aki lo pone nan resurekshon resultá den un huisio di kondenashon. Na kontraste, e wardadónan di integridat resusitá lo haña e don di bida eterno. Nan resurekshon en bèrdat lo ta “un resurekshon di bida.”—Juan 5:29.

¹⁴ Kon e speransa di resurekshon por konsolá nos asta awor? I mas importante ainda, kiko nos tin ku hasi pa garantisá ku nos lo risibí su benefisionan den futuro?

Lèsnan Ku Nos Por Siña Awor

15. Kon kreensia den resurekshon por ta un yudansa pa bo aworakí?

¹⁵ Kisas resientemente bo a pèrdè un ser stimá den morto i tal bes ainda bo no a logra adaptá bo bon na e situashon nobo ku un pèrdida grandi asina ta trese kuné. E speransa di resurekshon ta yuda bo haña un trankilidat i fortalesa interno ku otro hende ku no konosé e bèrdat no tin. Pablo a konsolá e tesalonisensenan: “Nos no kier, rumannan, pa boso keda den ignoransia tokante di esnan ku a muri, pa boso no ta tristu manera e otronan ku no tin speransa.” (1 Tesalonisensenan 4:13) Bo ta imaginá bo mes den e mundu nobo, presensiando e resurekshon? Haña konsuelo awor dor di meditá riba e speransa di topa bo sernan kerí atrobe.

16. Kiko probablemente lo ta bo sintimentunan si bo tin ku wòrdu resusitá?

 ¹⁶ Kisas aktualmente bo ta sufriendo di konsekuensianan físiko di e rebelion di Adam, tal bes den forma di malesa. No laga e angustia ku esaki ta kousa pone bo lubidá e speransa gososo di eksperensiá personalmente e resurekshon i bolbe bèk na bida ku salú i energia renobá den e mundu nobo. E tempu ei ora bo wowonan habri i bo mira karanan yen di goso ku lo ta ansioso pa mustra bo kon kontentu nan ta di por a mira bo resusitá, lo bo gradisí Dios sigur pa su bondat inmeresí.

17, 18. Ki dos lès importante nos mester kòrda?

¹⁷ Miéntras tantu, tin dos lès ku nos mester kòrda. Unu ta e importansia di rindi un sirbishi di henter alma na Yehova aworakí. Siguiendo e ehèmpel di nos Doño, Kristu Hesus, nos bida di sakrifisio propio ta demostrá amor pa Yehova i pa nos próhimo. Si oposishon òf persekushon pone nos pèrdè nos trabou òf nos libertat, sin importá e pruebanan ku nos lo tin ku enfrentá, nos ta determiná pa para firme den fe. Te na ora mes ku opositornan menasá nos ku morto, e speransa di resurekshon ta konsolá nos i fortalesé nos pa keda leal na Yehova i na su Reino. Sí, nos selo pa e trabou di prediká e Reino i hasi disipel ta duna nos e speransa ku nos lo risibí e bendishonnan eterno ku Yehova tin prepará pa e hustunan.

¹⁸ Un di dos lès tin di haber ku e manera ku nos ta enfrentá e tentashonnan kousá dor di nos imperfekshon. Nos konosementu di e speransa di resurekshon i nos apresio pa Yehova su bondat inmeresí ta fortalesé nos determinashon pa para firme den fe. Apòstel Juan a spièrta nos: “No stima mundu, ni e kosnan ku tin den mundu. Si un hende ta stima mundu, e amor di e Tata no ta den dje. Pasobra tur loke ku tin den mundu, e deseo di karni i e deseo di wowo i e orguyo di bida, no ta bin di e Tata, sino di e mundu. I e mundu ta pasa bai i su deseonan tambe, ma esun ku hasi e boluntat di Dios ta permanesé pa semper.” (1 Juan 2:15-17) Ora nos kompará e atrakshon di e mundu aki den forma di materialismo ku “e bida berdadero,” lo e no  trèk nos mashá. (1 Timoteo 6:17-19) Si nos ser tentá pa kometé inmoralidat, nos lo resistí firmemente. Nos ta realisá ku si nos persistí den un kondukta ku ta desagradá Yehova i nos muri promé ku Armagedón, nos lo ta den e mesun situashon ku esnan ku lo no haña un resurekshon.

19. Ki gran onor nos no mester lubidá?

¹⁹ Riba tur kos, hamas nos mester lubidá e gran onor ku nos tin di hasi Yehova su kurason kontentu awor i pa semper. (Proverbionan 27:11) Nos fieldat te na morto òf nos integridat te na fin di e mundu malbado aki ta demostrá na Yehova na ken su banda nos ta pará den e kuestion di soberania universal. E ora ei bida den Paradeis riba tera, sea dor di sobrebibí e tribulashon grandi òf dor di haña un resurekshon milagroso, lo ta un goso indeskriptibel!

Dios Lo Satisfasé Nos Deseonan

20, 21. Te na ora mes ku nos no a haña kontesta riba tur nos preguntanan tokante resurekshon, kiko lo yuda nos keda fiel? Splika.

²⁰ Nos análisis di e siñansa di resurekshon no a kontestá tur pregunta. Por ehèmpel, kiko Yehova lo hasi pa ku hende ku tabata kasá ora nan a muri? (Lukas 20:34, 35) Hende lo resusitá n’e lugá kaminda nan a muri? Nan lo bini bèk na bida den bisindario di nan famianan? I ainda tin hopi otro pregunta relashoná ku resurekshon. Ma nos tin ku kòrda e palabranan di Jeremias: “SEÑOR ta bon pa esnan ku ta warda riba dje, pa e alma ku ta busk’é. Ta bon pa warda den silensio riba e salbashon di SEÑOR.” (Lamentashon 3:25, 26) Na Yehova su debido tempu, tur nos preguntanan lo ser kontestá na nos pleno satisfakshon. Pakiko nos por ta sigur di esaki?

²¹ Reflekshoná riba e palabranan inspirá di e salmista ora el a kanta di Yehova: “Bo ta habri bo man, i ta satisfasé e deseo di tur ser bibu.” (Salmo 145:16) Segun ku nos ta bira grandi, nos deseonan ta kambia. Loke nos a antohá tempu nos tabata mucha no ta loke nos ta deseá awe. Nos eksperensia di bida i tambe nos speransanan ta determiná kon nos ta mira bida. Pero den e mundu nobo, nos por ta sigur ku Yehova lo satisfasé kualke deseo apropiá ku nos por tin.

22. Pakiko nos tin bon motibu pa alabá Yehova?

²² Loke ta importante aworakí ta pa kada un di nos keda fiel. “Loke ta ser ferwagt di mayordomonan ta pa un hòmber ser hañá fiel.” (1 Korintionan 4:2, NW) Nos ta mayordomonan di e glorioso bon nobo di e Reino di Dios. E manera diligente ku nos ta prediká e bon nobo aki na tur hende ta yuda nos keda riba e kaminda ku ta hiba na bida. Nunka pasa por haltu di e echo ku “tempu i suseso imprevisto” ta bini riba nos tur. (Eklesiastés 9:11, NW) Pa kontrarestá kualke ansiedat innesesario ku e insiguridatnan di bida ta kousa, tene firme na e speransa glorioso di resurekshon. Realisá ku si ta parse ku bo ta bai muri promé ku Kristu su Reinado di Mil Aña kuminsá, bo por haña konsuelo den e echo ku lo bini alivio sigur. Na e tempu ku Yehova fiha pa esei, lo bo por ripití e palabranan di Jòb dirigí n’e Kreadó: “Abo lo yama, i ami lo kontestá bo.” Alabá sea Yehova, kende ta ansioso pa resusitá tur esnan ku ta den su memoria!—Jòb 14:15.

[Nota]

Bo Ta Kòrda?

• A base di kiko hende lo ser husgá durante e Mil Aña?

• Pakiko algun hende lo haña “un resurekshon di bida” i otronan “un resurekshon di huisio”?

• Kon e speransa di resurekshon por konsolá nos awor?

• Kon e palabranan di Salmo 145:16 ta yuda nos trata ku preguntanan tokante resurekshon ku a keda habrí?

[Preguntanan di Estudio]

[Plachinan na página 21]

Kon kreensia den resurekshon por yuda nos awor?