Kon pa Laga Kada Dia Konta

“SIÑA nos konta nos dianan, pa nos por presentá na bo un kurason yen di sabiduria.” (Salmo 90:12) Esaki tabata un orashon humilde di un eskritor di Beibel, Moisés. Kiko presis el a pidi? Nos tambe tin ku hasi e petishon respetuoso ei?

Den versíkulo 10, Moisés a lamentá ku hende su bida ta masha kòrtiku. Na un otro okashon el a registrá e deklarashon di Jòb, kende a bisa: “Hende ku a nase di muhé ta biba poko dia i ta yen di problema.” (Jòb 14:1) Ta bisto ku Moisés tabata bon konsiente kon pasahero bida di hende imperfekto ta. P’esei, el a konsiderá kada dia di bida komo un regalo presioso. Den su súplika na Dios, Moisés a ekspresá su deseo pa biba e restu di su dianan na un manera sabí ku ta agradá su Kreadó. Nos tambe no tin ku hasi esfuerso pa usa nos dianan na un manera signifikativo? Si nos ke Yehova su aprobashon awor, esei mester ta nos determinashon.

Un otro faktor ku a motivá tantu Moisés komo Jòb ta un faktor ku mester motivá nos tambe. Tur e dos hòmbernan deboto aki a anhelá un futuro rekompensa: bida riba tera den mihó kondishonnan. (Jòb 14:14, 15; Hebreonan 11:26) Ora nos risibí e rekompensa ei, morto lo no pone fin na e bon obranan di ningun hende. E propósito di nos Kreadó ta pa hende fiel biba den paradeis riba tera pa semper. (Isaias 65:21-24; Revelashon 21:3, 4) Abo tambe por tin e speransa aki si bo ‘konta bo dianan pa bo por presentá na Yehova un kurason yen di sabiduria.’