Resurekshon—Un Siñansa Ku Tin Efekto Riba Bo
Resurekshon—Un Siñansa Ku Tin Efekto Riba Bo
“[Mi tin] speransa den Dios . . . ku siguramente lo tin un resurekshon di tantu e hustunan komo e malbadonan.”—ECHONAN 24:15.
1. Kon bin e resurekshon a bira un punto di diskushon dilanti e Sanedrin?
NA FIN di e di tres biahe ku apòstel Pablo a hasi komo misionero na aña 56 di nos era, e tabata na Yerusalèm. Despues ku e romanonan a arest’é, nan a permitié presentá dilanti e Konsilio, e korte supremo hudiu. (Echonan 22:29, 30) Ora Pablo a mira e miembronan di e korte ei, el a ripará ku algun tabata saduseo i otronan tabata fariseo. Tabatin un diferensia remarkabel entre e dos gruponan aki. E saduseonan no tabata kere den e resurekshon, pero e fariseonan sí. Pa mustra unda é tabata pará riba e punto aki, Pablo a deklará: “Rumannan, mi ta un fariseo, yu di fariseonan; mi ta wòrdu husgá pa motibu di e speransa i resurekshon di e mortonan!” Su palabranan a kousa un konsternashon total den e asamblea!—Echonan 23:6-9.
2. Pakiko Pablo tabata prepará pa defendé su kreensia den resurekshon?
2 Hopi aña mas promé, ora Pablo tabata riba kaminda pa Damasko, el a haña un vishon den kua el a tende e stèm di Hesus. Asta el a puntra Hesus: “Kiko mi mester hasi, Señor?” Hesus a kontest’é: “Lanta i sigui pa Damasko; i aya nan lo bisa bo tur loke a wòrdu designá pa bo hasi.” Ora Pablo a yega Damasko, un disipel kristian ku yama Ananias a hañ’é. Ananias tabata un bon yudansa p’e pasobra el a splik’é: “E Dios di nos tatanan a skohe bo pa konosé su boluntat i pa mira Esun Hustu [Hesus resusitá] i pa tende un bos for di su boka.” (Echonan 22:6-16) P’esei anto, no tabata straño ku Pablo tabata prepará pa defendé su kreensia den resurekshon.—1 Pedro 3:15.
El A Deklará Públikamente e Speransa di Resurekshon
3, 4. Kon Pablo a demostrá ku e ta un defensor balente di resurekshon, i kiko nos por siña for di su ehèmpel?
3 Despues Pablo a presentá dilanti Gobernadó Felix. Na e okashon ei, Tértulo, “un abogado” ku a presentá e kaso di e hudiunan kontra Pablo, a akus’é di ta lider di un sekta i di ta kousante di rebeldia. Sin duda niun momentu so, Pablo a deklará: “Esaki mi ta rekonosé bo dilanti, ku segun e kaminda ku nan ta yama un sekta mi ta sirbi e Dios di nos tatanan.” Anto, yegando n’e kuestion prinsipal, el a kontinuá: “[Mi tin] speransa den Dios, meskos ku e hòmbernan aki tambe ta spera, ku siguramente lo tin un resurekshon di tantu e hustunan komo e malbadonan.”—Echonan 23:23, 24; 24:1-8, 14, 15.
4 Rònt di dos aña mas despues, e susesor di Felix, Porsio Festo, a invitá Rei Herodes Agripa pa huntu nan interogá e prezu Pablo. Festo a splika ku e hendenan ku a akusá Pablo no tabata di akuerdo kuné pasobra el a insistí ku ‘un tal hòmber ku a muri, Hesus, tabata bibu.’ Pablo a defendé su mes puntrando: “Pakiko boso ta konsiderá esaki inkreibel, ku Dios ta lanta e mortonan?” Anto el a deklará: “Ku yudansa di Dios, mi ta para te dia djawe dunando testimonio tantu na chikitu komo na grandi, sin bisa nada mas sino loke e Profetanan i Moisés a bisa ku lo a bai sosodé: ku e Kristu mester a sufri, i ku pa motibu di su resurekshon for di e mortonan e lo mester tabata e promé pa proklamá lus tantu na e pueblo hudiu komo na e paganonan.” (Echonan 24:27; 25:13-22; 26:8, 22, 23) Pablo sí tabata un defensor balente di resurekshon! Awe nos tambe, meskos ku Pablo, por proklamá ku konvikshon ku lo tin un resurekshon. Pero, ki reakshon nos por spera? Probablemente e mesun reakshon ku Pablo a risibí.
5, 6. (a) Ora e apòstelnan a defendé e siñansa di resurekshon, kon e hendenan a reakshoná? (b) Kiko ta importante pa nos por papia tokante nos speransa den e resurekshon?
5 Wak kiko a sosodé mas promé durante Pablo su di dos biahe komo misionero (rònt di aña 49 pa 52 di nos era) ora el a bishitá Atenas. El a rasoná ku hende ku tabata kere den hopi dios, i el a urgi nan pa tuma nota di Dios su propósito pa nombra un hòmber ku mester husga e tera habitá den hustisia. Tabata trata aki di Hesus. Pablo a splika ku Dios a duna un garantia di esaki dor di resusitá Hesus. Kon e hendenan a reakshoná? Nos ta lesa: “Awor ora nan a tende di e resurekshon di e mortonan, algun a hasi bofon, ma otronan a bisa: ‘Nos lo tende di bo atrobe tokante di esaki.’”—Echonan 17:29-32.
6 Esei tabata e mesun reakshon ku Pedro i Juan a haña djis despues di Pentekòste di aña 33 di nos era. Atrobe e saduseonan tabata e sentro dje kontroversia. Echonan 4:1-4 ta konta loke a sosodé: “Miéntras ku nan [dos] tabata papia ku e pueblo, e saserdotenan i e kapitan di e guardia di tèmpel i e saduseonan a bin riba nan, masha rabiá pa motibu ku nan tabata siña e pueblo i tabata proklamá den Hesus e resurekshon for di e mortonan.” Ma otronan sí a reakshoná positivamente. “Hopi di esnan ku a tende e mensahe a kere; i e kantidat di e hòmbernan a bira komo sinku mil.” Pues, nos por spera tur tipo di reakshon ora nos ta papia tokante e speransa di resurekshon. En bista di esei, ta masha importante pa nos fortalesé nos fe den e siñansa aki.
Fe i Resurekshon
7, 8. (a) Segun un karta dirigí na e kongregashon korintio den e promé siglo, kon nos fe por ta en bano? (b) Kon un komprondementu korekto di e speransa di resurekshon ta distinguí kristiannan berdadero for di esnan falsu?
7 No ta tur hende ku a bira kristian den e promé siglo di nos era a haña ku tabata fásil pa aseptá e speransa di resurekshon. Algun di nan ku tabatin problema pa kere den dje tabata miembro di e kongregashon na Korinto. Pablo a skirbi nan: “Mi a duna boso loke mi tambe a risibí, ku Kristu a muri pa nos pikánan segun e Skrituranan i ku el a wòrdu derá, i ku el a wòrdu lantá riba e di tres dia segun e Skrituranan.” E ora ei Pablo a konfirmá e bèrdat aki dor di deklará ku Kristu resusitá a “aparesé na mas ku sinku shen ruman,” di kua mayoria, segun Pablo, ainda tabata na bida. (1 Korintionan 15:3-8) Mas aleu, el a rasoná: “Si Kristu ta wòrdu prediká, ku el a wòrdu lantá for di e mortonan, kon algun di boso ta bisa ku no tin resurekshon di e mortonan? Ma si no tin resurekshon di e mortonan, anto ni Kristu tampoko no a wòrdu lantá; i si Kristu no a wòrdu lantá, e ora ei nos predikamentu ta bano, i boso fe tambe ta bano.”—1 Korintionan 15:12-14.
8 Sí, e siñansa di resurekshon ta asina fundamental ku si e no wòrdu aseptá komo un realidat e fe kristian lo no tin sentido. En bèrdat, e komprondementu korekto di resurekshon ta distinguí kristiannan berdadero for di esnan falsu. (Génesis 3:4; Ezekiel 18:4) P’esei Pablo ta inkluí e siñansa di resurekshon den “e siñansa elemental” di kristianismo. Laga nos ta determiná pa “yega na madures.” “I esaki nos lo hasi,” segun Pablo, “si Dios permití.”—Hebreonan 6:1-3.
E Speransa di Resurekshon
9, 10. Kiko e palabra resurekshon, manera e ta aparesé den Beibel, ta enserá?
9 Pa fortalesé nos fe den resurekshon ainda mas, laga nos repasá preguntanan manera: Kiko Beibel kier men ora e ta referí na resurekshon? Kon e siñansa di resurekshon ta resaltá e amor di Yehova? E kontestanan riba e preguntanan aki lo hala nos mas serka Dios i na mes momentu nan ta yuda nos siña otro hende.—2 Timoteo 2:2; Santiago 4:8.
10 “Resurekshon” ta e tradukshon di un palabra griego ku literalmente ta nifiká “lanta para atrobe.” Kiko e ekspreshon ei ta enserá? Segun Beibel, e speransa di resurekshon ta e konvikshon ku un persona morto por biba atrobe. Beibel ta mustra mas aleu ku e persona ta bini bèk sea ku un kurpa humano òf spiritual, dependiendo di si e tin un speransa di biba den shelu òf riba tera. E amor, sabiduria i poder ku Yehova ta manifestá dor di e speransa magnífiko aki ta algu maravioso.
11. Kiko e speransa di resurekshon ta enserá pa Dios su sirbidónan ungí?
11 E resurekshon di Hesus i di su rumannan ungí ta den un kurpa spiritual ku ta kuadra ku nan sirbishi den shelu. (1 Korintionan 15:35-38, 42-53) Huntu nan lo sirbi komo gobernante di e Reino Mesiániko, ku lo hasi e tera aki un Paradeis. Bou di Hesus komo Sumo Saserdote, e ungínan ta forma un saserdosio real. Den e mundu nobo di hustisia nan lo apliká e benefisionan di e sakrifisio di reskate di Kristu na humanidat. (Hebreonan 7:25, 26; 9:24; 1 Pedro 2:9; Revelashon 22:1, 2) Miéntras tantu, e ungínan ku ta na bida ainda aki riba tera ta deseá di keda aprobá den bista di Dios. Ora nan muri, nan lo risibí nan ‘rekompensa’ pa medio di resurekshon pa un bida spiritual inmortal den shelu. (2 Korintionan 5:1-3, 6-8, 10; 1 Korintionan 15:51, 52; Revelashon 14:13) Pablo a skirbi: “Si nos a wòrdu uní kuné den e semehansa di su morto, siertamente nos lo ta uní kuné tambe den e semehansa di su resurekshon.” (Romanonan 6:5) Pero kiko di esnan ku lo resusitá pa biba riba tera atrobe komo hende? Kon e speransa di resurekshon por hala nan mas serka Dios? Nos por siña hopi for di e ehèmpel di Abraham.
Resurekshon i Amistat ku Yehova
12, 13. Ki base firme pa fe den resurekshon Abraham tabatin?
12 Abraham, kende Beibel ta deskribí komo “amigu di Dios,” tabata un hòmber ku un fe sobresaliente. (Santiago 2:23) Ora Pablo a menshoná e hòmber- i muhénan fiel registrá den kapítulo 11 di Hebreonan, tres biaha el a referí na e fe di Abraham. (Hebreonan 11:8, 9, 17) E di tres biaha el a enfoká riba e fe ku Abraham a manifestá ora esaki a obedesé Dios i prepará pa ofresé su yu Isaak komo un sakrifisio. Yehova a garantisá Abraham ku e promesa di un simia mediante Isaak lo a kumpli. Abraham tabata konvensí di esei. Asta si Isaak mester a muri komo un sakrifisio, Abraham “a konsiderá ku Dios ta poderoso pa lanta hende asta for di morto.”
13 Segun ku kosnan a desaroyá, ora Yehova a mira kon fuerte Abraham su fe tabata, el a sòru pa un bestia remplasá Isaak komo sakrifisio. Pero e eksperensia di Isaak a sirbi komo un ilustrashon di ku lo bini un resurekshon, pasobra Pablo a splika: “For di kual tambe, figurativamente bisá, [Abraham] a risibié [Isaak] bèk.” (Hebreonan 11:19) Es mas, ya kaba Abraham tabatin un base firme pa kere den resurekshon. No ta Yehova a rebibá Abraham su podernan pa prokreá ora e ku su esposa Sara a bini huntu den nan behes i a produsí nan yu Isaak?—Génesis 18:10-14; 21:1-3; Romanonan 4:19-21.
14. (a) Segun Hebreonan 11:9 i 10, kiko Abraham tabata anhelá? (b) Pa Abraham por risibí e bendishonnan di Reino den e mundu nobo, kiko mester sosodé kuné ainda? (c) Kon nos por risibí e bendishonnan di Reino?
14 Pablo a deskribí Abraham komo un residente stranhero i un hende ku a biba den tènt i ku tabata “buska [“spera,” NW] e stat ku tin fundeshinan, di kual Dios ta e arkitekto i konstruktor.” (Hebreonan 11:9, 10) No tabata trata aki di un stat literal manera Yerusalèm, kaminda e tèmpel di Dios tabata situá, sino mas bien un stat simbóliko. Tabata e Reino selestial di Dios ku ta konsistí di Kristu Hesus i su 144.000 ko-gobernantenan. Tambe Beibel ta yama e 144.000 aki, ora ku nan ta den nan gloria selestial, “e stat santu, Yerusalèm nobo,” e “brùit” di Kristu. (Revelashon 21:2) Na 1914, Yehova a instalá Hesus riba trono komo Rei Mesiániko di e Reino selestial i a mand’é bai goberná meimei di su enemigunan. (Salmo 110:1, 2; Revelashon 11:15) Pa Abraham, “amigu di Dios,” por risibí e bendishonnan di e gobernashon di Reino, lo e tin ku biba atrobe. Meskos tambe, pa nos risibí e bendishonnan di Reino, nos mester ta na bida den e mundu nobo di Dios, sea komo miembro di e multitut grandi di sobrebibiente di Armagedón òf komo hende ku a resusitá for di morto. (Revelashon 7:9, 14) Pero kiko ta e base pa e speransa di resurekshon?
E Amor di Dios—Base pa e Speransa di Resurekshon
15, 16. (a) Kon e promé profesia den Beibel ta pone e base pa nos speransa di resurekshon? (b) Kon kreensia den resurekshon ta hala nos mas serka Yehova?
15 E relashon estrecho ku nos tin ku nos Tata selestial amoroso, nos fe firme manera di Abraham i nos obedensia na e mandamentunan di Dios ta hasi posibel pa Yehova deklará nos hustu i konsiderá nos komo su amigunan. Esaki ta duna nos e oportunidat pa benefisiá di loke e Reino lo logra. En bèrdat, e promé profesia registrá den e Palabra di Dios, na Génesis 3:15, ta pone e base pa e speransa di resurekshon i amistat ku Dios. Di un banda e ta mustra ku e kabes di Satanas lo wòrdu heridá i di otro banda ku e hilchi di e Simia di e muhé di Dios lo wòrdu heridá. E morto di Hesus na staka tabata un herida simbóliko na hilchi. Su resurekshon riba e di tres dia a kura e herida ei i a habri kaminda pa tuma akshon desisivo kontra “esun ku tabatin poder riba morto, esta, Diabel.”—Hebreonan 2:14.
16 Pablo ta rekordá nos ku “Dios ta demostrá su mes amor pa ku nos den esaki, ku tempu nos tabata pekadó ainda, Kristu a muri pa nos.” (Romanonan 5:8) Nos apresio pa e bondat inmeresí di Dios aki en bèrdat ta hala nos mas serka Hesus i mas serka nos Tata selestial amoroso.—2 Korintionan 5:14, 15.
17. (a) Ki speransa Jòb a ekspresá? (b) Kiko Jòb 14:15 ta revelá tokante Yehova, i ki sintimentu esaki ta duna bo?
17 Jòb, un hòmber fiel di e époka pre-kristian, tambe a anhelá un resurekshon. El a sufri pisá na man di Satanas. Distinto di su kompañeronan falsu, ku nunka no a papia di resurekshon, Jòb a haña konsuelo den e speransa aki i a puntra: “Si un hende muri, lo e bolbe biba?” Jòb mes a kontestá bisando: “Tur e dianan di mi lucha lo mi spera, te ora mi liberashon bin.” Dirigiendo su mes na su Dios, Yehova, el a rekonosé: “Abo lo yama, i ami lo kontestá bo.” Relashoná ku e sintimentunan di nos Kreadó amoroso, Jòb a remarká: “Lo bo anhelá na e obra di bo mannan.” (Jòb 14:14, 15) Sí, Yehova ta antisipá ansiosamente e tempu ora hende fiel bolbe na bida den resurekshon. Ora nos meditá riba e amor i bondat inmeresí ku e ta mustra na nos ounke ku nos ta imperfekto, esaki sigur ta hala nos mas serka dje!—Romanonan 5:21; Santiago 4:8.
18, 19. (a) Ki speransa tabatin pa Daniel bolbe biba? (b) Kiko nos lo repasá den e siguiente artíkulo?
18 Profeta Daniel, ku e angel di Dios a deskribí komo un “hòmber masha stimá,” a hiba un bida largu di sirbishi fiel. (Daniel 10:11, 19) For di su eksilio na aña 617 promé ku nos era te na su morto poko tempu despues ku el a haña un vishon na aña 536, e di tres aña di Siro, rei di Pèrsia, el a mantené su integridat na Yehova. (Daniel 1:1; 10:1) Na un dado momentu durante e di tres aña ei di Siro, Daniel a haña un vishon di e marcha di potensianan mundial ku ta kulminá den e binidero tribulashon grandi. (Daniel 11:1–12:13) Dor ku e no por a komprondé e vishon kompletamente, el a puntra e angel mensahero ku a dun’é e vishon: “Mi señor, kiko lo ta e fin di e eventonan aki?” E angel a kontest’é halando atenshon na “e tempu di e fin,” durante kua “esnan ku tin disernimentu lo komprondé.” Pa loke ta Daniel mes, ki speransa tabatin p’e? E angel a rekonosé: “Lo bo bai sosegá i lo lanta pa risibí e parti ku ta toka bo na e fin di dianan.” (Daniel 12:8-10, 13) Daniel lo bolbe den “e resurekshon di e hustunan,” durante Kristu su Reinado di Mil Aña.—Lukas 14:14.
19 Awor nos ta den e parti final di e tempu di fin i e momentu pa e Reino di Mil Aña di Kristu kuminsá ta mas serka ku tempu nos a bira kreyente. P’esei, nos tin ku puntra nos mes: ‘Lo mi ta den e mundu nobo pa asosiá ku Abraham, Jòb, Daniel i otro hòmber- i muhénan fiel?’ Nos lo t’ei basta nos keda serka Yehova i obedesé su mandamentunan. Den nos siguiente artíkulo, nos lo repasá e speransa di resurekshon den mas detaye pa haña sa ken lo wòrdu resusitá.
Bo Ta Kòrda?
• Kon e hendenan a reakshoná ora Pablo a papia di su speransa den resurekshon?
• Pakiko e speransa di resurekshon ta distinguí kristiannan berdadero for di esnan falsu?
• Kon nos por sa ku Abraham, Jòb i Daniel tabatin fe den e resurekshon?
[Preguntanan di Estudio]
[Plachi na página 8]
Pablo a presentá dilanti Gobernadó Felix i a deklará ku konvikshon e speransa di resurekshon
[Plachi na página 10]
Pakiko Abraham tabatin fe den e resurekshon?
[Plachi na página 12]
Jòb a haña konsuelo den speransa di resurekshon
[Plachi na página 12]
Daniel lo bolbe den e resurekshon di e hustunan