Un Morto Trágiko

OWEN, un mucha hòmber di dos aña i mei, tabata hunga den baño na su kas. El a logra subi yega na un kashi di remedi ku su mayornan a kere tabata fuera di su alkanse. Di tur loke tabatin den e kashi, su bista a kai riba un bòter. El a habrié i bebe e líkido ku tabatin den dje, lokual a resultá fatal.

E bòter tabata kontené un ásido ku ta kima, i lamentablemente esaki a kosta bida di e hobensitu Owen. Esei a kibra kurason di su mayornan. E tata, Percy, a buska konsuelo serka su iglesia. El a puntra e pastor: “Pakiko e kos aki a pasa ku nos?” E pastor a kontestá: “Dios tabata ke un angel chikitu mas den shelu.” Grandi tabata deskonsuelo dje mayor; el a sinti ku esei tabata un gran inhustisia. Ta Dios mes tabata ke pa algu trágiko asina sosodé? Desilushoná, Percy a disidí ku e no ke tin nada mas di haber ku su iglesia.

Ora Percy tabata pensa riba loke a sosodé, e tabata puntra su mes: ‘Mi yu chikitu ta sufriendo ainda? Lo mi mir’é un dia atrobe?’

Kisas abo tambe a yega di puntra bo mes kiko ta sosodé ora un hende muri i si ta posibel ku un dia lo bo por topa bo sernan kerí atrobe. Beibel, e Palabra di Dios, ta tira lus riba e preguntanan aki. E tin kontestanan bon kla i palabranan ku por konsolá tur hende ku tambe a pèrdè un ser kerí den un morto trágiko. I mas importante ainda, e ta revelá un speransa glorioso ku Dios a duna: e resurekshon.

Por fabor, lesa e siguiente artíkulo pa bo haña sa mas di e speransa maravioso aki.