Hende Por Kaba ku Pobresa?

MIÓNES di hende a krese sin sa kiko ta pobresa. Nunka nan mester a bai drumi ku hamber ni pega soño temblando di friu. Sin embargo, hopi di e personanan aki ta sinti duele di hende pober i ta hasi èkstra esfuerso pa yuda nan.

Pero, pobresa ta sigui ser un realidat kruel pa hende asotá pa guera sivil, inundashon, sekura i otro problemanan. E faktornan aki ta un pesadia pa kunukeronan di Afrika ku apénas ta logra mantené nan kabes riba awa. Algun a haña nan obligá di bandoná nan kas i muda bai statnan grandi òf di biba komo refugiado den un otro pais. Otro habitantenan di kunuku ta bai biba den stat pasobra nan ta ser atraí dor di promesanan di un mihó bida.

Statnan sobrepoblá hopi bes ta bira kuna di pobresa. Si tin espasio mes pa planta einan, ta masha poko. Ta difísil pa haña trabou. Puru desesperashon ta pone hopi hende bai den e mundu di kriminalidat. Habitantenan di stat ta sklama pa ousilio, pero gobièrnunan humano no por resolvé e problema kresiente di pobresa. Refiriendo na un informe di Nashonnan Uní publiká na novèmber 2003, e korant The Independent di Lònden a deklará: “Mas i mas hende na mundu ta sufriendo di hamber.” E korant a agregá: “Segun kálkulo, rònt mundu tin un 842 mion hende ku ta desnutrí awe. Ademas, e sifra ei ta asta oumentá tur aña ku 5 mion hende mas ku ta sufri di hamber.”

Tin biaha e sukursal di Testigunan di Yehova na Suráfrika ta risibí karta di hende hopi pober. Por ehèmpel, un hòmber di Bloemfontein a skirbi: “Mi no tin trabou, i ki ora ku mi haña un chèns mi ta hòrta den stat. Si mi no hasié, nos ta keda ku hamber pa vários dia, pa no papia mes di e friu intenso ku nos tin ku soportá. No tin ningun trabou. Hopi hende ta kana rònt riba kaya buskando trabou i algu pa kome. Mi sa di otronan ku ta buska kuminda den barí di sushi. Algun ta kometé suisidio. Hopi hende ta deprimí i desesperá meskos ku mi. Ta parse ku no tin speransa pa futuro. E Dios ku a krea nos ku e nesesidat di kome i bisti, no ta mira e kosnan aki?”

Tin kontestanan alentador pa e preokupashonnan di e hòmber aki. Manera e siguiente artíkulo lo mustra, Beibel, e Palabra di Dios ta duna kontesta riba e preguntanan aki.