‘Mi Yudansa Ta Bin for di Yehova’

Konosementu di Dios Ta Fortifiká Bida di Famia

“MURAYA di Berlin.” Esei ta e nòmber ku un pareha na Argentina a duna e muraya literal ku nan a traha den nan kas pa partié na dos! Nan tabatin desakuerdonan ku nan no por a sali for di dje; nan tabatin ègt rabia riba otro.

Lamentablemente, no ta e pareha aki so ta den e situashon ei. Hopi famia ta ser afektá pa pleitu, infieldat i enemistat total. Esaki ta duele pasobra ta Dios mes a establesé e areglo di bida di famia. (Génesis 1:27, 28; 2:23, 24) E regalo divino aki ta un ambiente ideal pa mustra amor profundo. (Ruth 1:9) Ora miembronan di famia ta kumpli ku e obligashonnan ku Dios a duna nan, nan por onra Yehova i ser un bendishon pa otro. *

Siendo ku ta Dios a instituí e areglo di famia, nos tin ku laga su punto di bista influensiá nos komprondementu di e manera ku famianan mester funshoná. Den su Palabra tin hopi konseho práktiko diseñá pa yuda famianan pa ta eksitoso, foral ora ku difikultatnan surgi. Pa loke ta e papel di esposonan, Beibel ta bisa: “Esposonan . . . mester stima nan esposa manera nan mes kurpa.” Ora e esposo ta kumpli ku e rekisito aki, ta un plaser pa su esposa “respetá su esposo.”—Efesionan 5:25-29, 33.

Enkuanto e relashon entre mayornan i nan yunan, apòstel Pablo a skirbi: “Tatanan, no provoká boso yunan na rabia, ma lanta nan den e disiplina i instrukshon di Señor.” (Efesionan 6:4) Esaki na su turno, ta krea un ambiente di amor den famia ku ta pone ku ta mas fásil pa e yunan obedesé nan mayornan.—Efesionan 6:1.

E puntonan ei ta algun ehèmpel di e konseho sano ku Beibel ta duna pa bida di famia. Dor di apliká e prinsipionan di Dios, hopi hende ta disfrutá di felisidat den nan kas. Konsiderá por ehèmpel e pareha na Argentina menshoná den e introdukshon. Despues ku nan tabatin tres luna ta studia Beibel ku Testigunan di Yehova, nan a kuminsá apliká Beibel su konseho sabí relashoná ku matrimonio. Nan a traha duru pa mehorá nan komunikashon, pa mustra komprenshon pa otro i pa siña pordoná otro. (Proverbionan 15:22; 1 Pedro 3:7; 4:8) Nan a siña dominá nan rabia i akudí na Dios pa yudansa ora ku kosnan a parse di bai for di man. (Kolosensenan 3:19) No a dura mashá ku nan a kita e “Muraya di Berlin”!

Dios Por Fortifiká un Famia

Konosementu i aplikashon di Dios su normanan por fortifiká un famia pa resistí preshon. Esaki ta masha importante pasobra Beibel a profetisá ku famia lo ser ataká kruelmente den nos tempu. Pablo a predisí ku moralidat i sosiedat humano lo a bai hopi atras; lokual nos ta mira aktualmente. El a bisa ku “e último dianan” lo ta karakterisá pa infieldat, falta di amor i desobedensia na mayornan, asta entre e hendenan “ku tin aparensia di ta religioso.”—2 Timoteo 3:1-5.

 Esfuersonan pa agradá Dios por yuda kontrarestá e influensianan negativo ei riba bida di famia. Hopi famia a realisá ku nan tin mester di un solushon ku ta bini di Dios pa yuda nan trata ku e tantísimo difikultatnan ku nan ta haña nan kuné. Si miembronan di famia ta deseá di mantené un bon relashon ku Dios, nan tin ku apliká prinsipionan di Beibel mas ku tur kos. Tambe nan tin ku realisá ku si Yehova “no traha e kas, ta en bano esnan ku ta trah’é ta traha kansa kurpa.” (Salmo 127:1) Hende ta logra mayor felisidat den nan hogar dor di pone Dios na promé lugá den bida di famia.—Efesionan 3:14, 15.

Na Hawai, un hòmber ku yama Dennis a realisá kon sierto esei ta. Ounke pa nòmber e tabata un kristian, e tabata gusta usa palabranan ofensivo i bringa. Despues ku el sirbi den ehérsito, el a bira asta mas agresivo i desagradabel. “Semper mi tabata den un òf otro konflikto,” e ta kòrda. “Mi no tabatin kunes kiko pasa ku mi ni mi no tabatin miedu di muri. I mi a sigui papia palabra malu i bringa. Mi esposa, kende tabata un Testigu di Yehova, a animá mi pa studia Beibel.”

Dennis a resistí e intentonan di su esposa pa yud’é. Sin embargo, e esposa su kondukta kristian a suavisá Dennis su aktitut negativo. Ku tempu Dennis a bai un reunion kristian huntu ku su kasá i e yunan. Despues di esei, nan a kuminsá studia Beibel ku Dennis i el a hasi ekselente progreso. El a stòp ku e hábito di huma ku e tabatin pa 28 aña largu i tambe a stòp di asosiá ku amigunan ku tabata hasi tur e kosnan ku e tabata purba di laga. Gradisidu na Yehova, Dennis a remarká: “Mi bida di famia a mehorá. Nos tabata bai e reunionnan i sirbishi huntu komo famia. Mi dos yunan no tabatin miedu di mi mas pasobra mi a siña dominá mi mal beis i a stòp di insultá hende. Nos por a papia ku otro i disfrutá di kòmbersashonnan basá riba Beibel. Si no tabata pa e bèrdat di Beibel, lo mi no tabata aki awe; mi tabata un hende ku ta rabia masha lihé.”

Famianan por logra felisidat ora nan ta traha duru pa hasi Yehova su boluntat. Eksperensia a mustra ku asta si ta un miembro so di un famia ta apliká prinsipionan bíbliko, kosnan ta bai mas mihó ku ora ningun hende no ta hasié. Fortifiká un famia kristian ta trabou duru ku ta rekerí abilidat i tempu. Pero miembronan di e famianan ei tin e siguransa ku Yehova lo rekompensá nan esfuerso pa edifiká nan famia ku éksito. Nan por ripití e palabranan di e salmista: ‘Mi yudansa ta bin for di Yehova.’—Salmo 121:2.

[Nota]

[Komentario na página 9]

“Henter e famia den shelu i riba tera ta haña su nòmber” for di Dios.—EFESIONAN 3:15

[Kuadro na página 8]

YEHOVA TA DUNA HOPI BALOR NA BIDA DI FAMIA

“Dios a bendishoná nan, i Dios a bisa nan: ‘Sea fruktífero i multipliká, i yena e tera.’”—Génesis 1:28.

“Bendishoná ta tur esnan ku ta teme [Yehova] . . . Bo esposa lo ta manera un mata di wendrùif fruktífero den e parti mas paden di bo kas.”—Salmo 128:1, 3.