Pregunta di Lektor

Dikon no a mata David ku Bètsabé pasobra nan a kometé adulterio, miéntras ku nan yu resien nasí sí a muri?

E Lei di Moisés a bisa: “Si haña un hòmber ta drumi ku un muhé kasá, e ora ei nan tur dos mester muri, tantu e hòmber ku a drumi ku e muhé komo e muhé; asina bo mester kita e maldat for di Israel.” (Deuteronomio 22:22) Si Yehova Dios lo a permití huesnan humano bou di e Lei trata e kaso hudisial di e piká di David ku Bètsabé, nan lo a laga ehekutá e pareha adúltero. Siendo ku huesnan humano no por a mira kiko tin den kurason di hende, nan mester a dikta sentensia a base di e kondukta di e malbadonan ku a keda probá pa echonan. Segun lei, e kastigu pa adulterio tabata pena di morto. Huesnan israelita no tabatin outorisashon pa pordoná e piká ei.

Di otro banda, e Dios berdadero sí por mira loke tin den nos kurason i pordoná piká si e mira ku tin un base pa hasi esei. Dor ku e kaso aki a enbolbé David, ku kende El a sera un pakto pa un Reino, Yehova a skohe pa hasi un eksepshon dor di trata e kaso aki e mes. (2 Samuel 7:12-16) Komo “e Hues di henter mundu,” e tabatin tur derecho di tuma e desishon ei.—Génesis 18:25.

Kiko Yehova a mira ora el a eksaminá David su kurason? E introdukshon di Salmo 51 ta bisa ku e salmo aki ta revelá David su sintimentunan “tempu ku profeta Natan a bin serka dje, despues ku e tabatin relashon ku Bètsabé.” Salmo 51:1-4 ta bisa: “Tene miserikòrdia di mi, o Dios, segun bo miserikòrdia; segun e grandesa di bo kompashon, kita mi transgreshonnan. Laba mi kita tur mi inikidat, i purifiká mi di mi piká. Pasobra mi ta rekonosé mi transgreshonnan, i mi piká ta semper mi dilanti. Kontra abo, abo so, mi a peka i a hasi loke ta malu den bo bista.” Yehova lo mester a konsiderá e remordimentu intenso ku David a sinti den su kurason komo un evidensia di berdadero repentimentu i a disidí ku tabatin un base pa mustra miserikòrdia na e malechornan. Ademas, David mes tabata un persona miserikòrdioso, i Yehova ta mustra miserikòrdia na hende miserikòrdioso. (1 Samuel 24:4-7; Mateo 5:7; Santiago 2:13) P’esei, ora David a rekonosé su piká, Natan a bis’é: “SEÑOR tambe a kita bo piká; lo bo no muri.”—2 Samuel 12:13.

David ku Bètsabé no a skapa di tur e konsekuensianan di nan piká. Natan a bisa David: “Pasobra pa medio di e echo aki bo a duna okashon na e enemigunan di SEÑOR pa blasfemá, e yu ku a nase pa bo lo muri sigur.” Nan yu a bira malu i a muri apesar di e echo ku David a yuna i ekspresá tristesa shete dia largu.—2 Samuel 12:14-18.

Algun hende tin difikultat pa komprondé dikon e yu mester a muri, ya ku Deuteronomio 24:16 ta bisa: “Yu hòmbernan no mester wòrdu matá pa motibu di nan tatanan.” Pero nos tin ku kòrda ku si ta huesnan humano lo a trata e kaso, tantu e mayornan komo e yu ku no a nase ainda lo a pèrdè nan bida. E morto dje yu tambe lo por a yuda David komprondé mas kla ainda kon malkontentu Yehova tabata ku su piká ku Bètsabé. Nos por tin pleno konfiansa ku Yehova a trata e asuntu na un manera hustu pasobra “su kaminda ta perfekto.”—2 Samuel 22:31.

[Plachi na página 31]

David a manifestá berdadero repentimentu