Riba Ki Fundeshi Bo Ta Edifikando?

DURABILIDAT di un edifisio ta dependé prinsipalmente di kon fuerte su base òf fundeshi ta. Tin bes Beibel ta usa e prinsipio aki den un sentido figurativo.

Profeta Isaias por ehèmpel, ta referí na Yehova Dios komo esun ku ‘a pone e fundeshi di tera.’ (Isaias 51:13) E fundeshi aki ta konsistí di leinan inkambiabel di Dios ku ta kontrolá e moveshon di tera i ta ten’é na su lugá. (Salmo 104:5) Beibel, e Palabra di Dios, ta papia tambe di “e fundeshinan” riba kua sosiedat humano ta establesí. Nan ta hustisia, lei i órden. Ora ‘destruí’ òf debilitá nan dor di inhustisia, korupshon i violensia, e sosiedat ta pèrdè su órden i stabilidat.—Salmo 11:2-6; Proverbionan 29:4.

E prinsipio aki ta apliká tambe den kaso di hende individual. Na final di Hesukristu su famoso Sermon Riba Seru, el a bisa: “Ken ku tende e palabranan aki di mi, i hasi nan, lo wòrdu kompará ku un hòmber sabí ku a traha su kas riba baranka. I áwaseru a kai, diluvionan a bin, i bientunan a supla, i a suta duru kontra e kas ei; i tòg e no a kai, pasobra e tabata fundá riba baranka. I ken ku tende e palabranan aki di mi, i no hasi nan, lo ta manera un hòmber bobo ku a traha su kas riba santu. I áwaseru a kai, diluvionan a bin, i bientunan a supla, i a suta duru kontra e kas ei; i el a kai, i su kaida tabata grandi.”—Mateo 7:24-27.

Riba ki fundeshi abo ta edifikando bo bida? Riba e santunan instabil di filosofia humano ateista ku lo resultá den un kolapso struktural? Òf bo ta edifikando riba e baranka sólido di obedensia na e palabranan di Hesukristu, ku lo yuda bo pasa safe dor di e tormentanan figurativo den bida?