Un Mundu sin Pobresa Ta Serka

PLACHINAN di Paradeis, manera esun riba e portada di e revista aki, ta atraé hende ku ta biba den pobresa. E promé pareha humano, Adam ku Eva, a biba den un berdadero paradeis. E hardin di Edén tabata nan kas. (Génesis 2:7-23) Ounke e Paradeis ei a bai pèrdí, e kreensia den un futuro paradeis—den un mundu nobo sin pobresa—no ta djis un soño. E tin un base sólido: e promesanan ku Beibel ta kontené.

Konsiderá e promesa ku Hesukristu a hasi e último dia di su bida riba tera. Un di e malechornan ku a muri huntu ku Hesus a mustra fe den Dios su abilidat di resolvé hende su problemanan. El a bisa: “Hesus, kòrda riba mi ora bo drenta den bo reino.” E palabranan aki ta mustra ku e malechor a kere ku Hesus lo a bai goberná komo Rei i ku e mortonan lo a biba atrobe. Hesus a kontest’é: ‘Di bèrdat mi ta bisa bo, lo bo ta ku mi den Paraiso.’—Lukas 23:42, 43.

Papiando di hende ku lo biba den Paradeis, Beibel ta bisa: “Nan lo traha kas i biba den nan; tambe nan lo planta kunukunan di wendrùif i kome nan fruta.” (Isaias 65:21) Sí, “kada un di nan lo sinta bou di su palu di wendrùif i bou di su palu di figu, i ningun hende lo no spanta nan, pasobra e boka di e SEÑOR di ehérsitonan a papia.”—Mikeas 4:4.

Pero dikon Dios ta permití pobresa awe? Kon Dios ta yuda hende hopi pober? Ki dia pobresa lo kaba finalmente?

Dikon Dios Ta Permití Pobresa?

E Paradeis ku Adam ku Eva tabata aden a bai pèrdí komo resultado di e rebelion ku e angel malbado, Satanas e Diabel, a inisiá. Usando un kolebra komo bosero, Satanas a sedusí Eva p’e kibra e lei di Dios ku a prohibí nan di kome e fruta di un sierto palu. El a gaña Eva i a lag’é kere ku independensia for di Dios lo a dun’é un mihó bida. Ora Eva a ofresé Adam e fruta prohibí, Adam tambe a kome. Asina el a bira lomba pa Dios i komplasé su esposa.—Génesis 3:1-6; 1 Timoteo 2:14.

Korektamente, Yehova a saka e pareha rebelde for di Paradeis. I for di e dia ei padilanti nan mester a lucha duru pa sobrebibí. Te na e dia djawe, Yehova ta permití Satanas goberná riba humanidat pekaminoso, mustrando asina bon kla e resultadonan di desobedensia na Dios. Historia humano a duna prueba ku hende no por trese Paradeis riba tera. (Jeremias 10:23) Al kontrario, independensia for di Dios a resultá den problemanan desastroso, inkluso pobresa.—Eklesiastés 8:9.

 Sin embargo, hende pober no a keda sin yudansa den e mundu yen di problema aki. Den Beibel, e Palabra inspirá di Dios, tin guia sano pa nan.

“No Preokupá”

Ora Hesus tabata papia ku un multitut di persona den kua tabatin hopi hende pober, el a bisa: “Mira e paranan di shelu ku no ta sembra ni kosechá, ni ta warda den mangasina, i tòg boso Tata selestial ta alimentá nan. Boso no tin muchu mas balor ku nan? . . . No preokupá boso mes anto, bisando: ‘Kiko nos lo kome?’ òf ‘Kiko nos lo bebe?’ òf ‘Kiko nos lo bisti?’ Pasobra tur e kosnan aki e paganonan ta buska; ma boso Tata selestial sa ku boso tin mester di tur e kosnan aki. Ma buska promé e reino di Dios i Su hustisia, i tur e kosnan aki lo wòrdu añadí na boso.”—Mateo 6:26-33.

Un persona pober no tin nodi hòrta. (Proverbionan 6:30, 31) Si e pone Dios na promé lugá den su bida, lo e perkurá p’e. Konsiderá e kaso di Tukiso, un hòmber na Lesoto, den e parti zùit di Afrika. Na 1998, tropanan stranhero a drenta Lesoto pa stòp un lantamentu ku tabatin kontra gobièrnu. Debí na e guera ei, tabatin plùndermentu di negoshi, pèrdèmentu di trabou i un skarsedat severo di kuminda.

Tukiso tabata biba den e parti mas pober di e kapital. Hopi di su bisiñanan a plùnder negoshinan pa nan por a sobrebibí. Ora ku Tukiso a regresá su habitashon di un kamber, el a ripará ku Maseiso, e señora ku e tabata biba kuné, tabatin hopi merkansia ku el a hòrta. Tukiso a bis’é: “Saka e kosnan ei for di aki den.” I el a splik’é ku Dios su lei ta prohibí hòrtamentu. Maseiso a obedesé. E bisiñanan a hasi bofon di nan i nan sí a tuma e merkansianan hòrtá.

Tukiso a tuma e posishon aki pa motibu di loke el a siña den su estudio di Beibel ku Testigunan di Yehova. El a muri di hamber pasobra el a obedesé Dios su lei? Nò. Poko despues, e ansianonan di e kongregashon di Testigunan di Yehova kaminda Tukiso tabata asistí a tuma kontakto kuné i a trese poko kuminda p’e. De echo, Testigunan di Yehova di e pais bisiña Suráfrika a manda mas ku dos tòn di artíkulonan di promé nesesidat pa nan rumannan kristian na Lesoto. Tukiso su obedensia na Dios i e yudansa amoroso di e kongregashon a impreshoná Maseiso. E tambe a kuminsá studia Beibel. Ku tempu nan dos a kasa legalmente i asina a kualifiká pa batisá komo Testigu di Yehova. Nan ta sigui sirbi Dios fielmente.

 Yehova Dios ta interesá den hende pober. (Wak e kuadro titulá “Kon Dios Ta Mira Hende Pober?”) Di un forma amoroso el a hasi areglo pa hende pober manera Tukiso i Maseiso siña mas di dje. I den su Palabra el a perkurá konseho práktiko pa bida di tur dia.

Un Areglo Ekselente

Semper Testigunan di Yehova a hasi esfuerso pa reflehá e mesun interes ku Dios tin den hende pober. (Galationan 2:10) Hopi bes ora un desaster asotá un pais i kristiannan berdadero ser afektá, ta hasi areglo pa duna e yudansa nesesario. Pero mas importante ainda, e Testigunan ta mustra interes den e nesesidat spiritual di tur hende, inkluso di hende pober. (Mateo 9:36-38) Durante e último 60 añanan, míles di ministernan entrená a ofresé nan mes boluntariamente pa sirbi komo misionero den paisnan stranhero. Por ehèmpel, ta un pareha misionero for di Finlandia ku a siña e idioma sesoto a siña Tukiso i Maseiso pa nan bira disipel di Hesus. (Mateo 28:19, 20) Hopi bes e trabou ei di misionero ta enserá sakrifiká un bida konfortabel den un pais riku i muda bai un pais pober.

Kristiannan berdadero no tin mag di hòrta pa nan sobrebibí. En bes di hasi esei, nan tin fe den Yehova Dios su abilidat di perkurá pa nan. (Hebreonan 13:5, 6) Un manera ku Yehova ta perkurá pa su pueblo ta mediante su organisashon mundial di adoradó ku ta perkurá pa otro.

Un otro manera ku Yehova ta yuda hende pober ta dor di duna nan konseho práktiko relashoná ku bida diario. Por ehèmpel, Beibel  ta manda: “Laga esun ku ta hòrta, no hòrta mas; ma mas bien, lag’é traha, hasiendo ku su mes mannan loke ta bon, pa e por tin algu pa kompartí ku esun ku ta den nesesidat.” (Efesionan 4:28) Hopi hende desempleá a logra kreá nan propio trabou, hasiendo trabou pisá, por ehèmpel dor di planta i kultivá un hòfi di bèrdura. Tambe Beibel ta yuda hende pober spar sèn dor di siña nan evitá mal kustumbernan, manera por ehèmpel mal uso di alkohòl.—Efesionan 5:18.

Un Mundu sin Pobresa—Ki Dia?

Beibel ta indiká ku nos ta bibando den “e último dianan” di Satanas su gobernashon. (2 Timoteo 3:1) Pronto Yehova Dios lo manda Hesukristu pa husga humanidat. Kiko lo sosodé e tempu ei? Hesus a duna e kontesta den un di su ilustrashonnan. El a bisa: “Ora ku e Yu di hende bin den su gloria, i tur e angelnan santu huntu kuné, e lo sinta riba e trono di su gloria. I tur e nashonnan lo wòrdu tresí huntu su dilanti; i e lo separá nan un for di otro, manera wardadó ta separá karné for di kabritu.”—Mateo 25:31-33.

E karnénan den e ilustrashon aki ta hende ku ta someté nan mes na Hesus su reinado. Hesus a kompará nan ku karné pasobra nan ta siguié komo nan Wardadó. (Juan 10:16) E personanan manera karné aki lo haña bida bou di e gobernashon perfekto di Hesus. Nan lo tin un bida felis den un mundu nobo sin pobresa. Hende ku kualidatnan manera di kabritu, ku ta rechasá e gobernashon di Hesus, lo ser destruí pa semper.—Mateo 25:46.

E Reino di Dios lo kaba ku maldat. E ora ei lo no tin pobresa mas. En bes di esei, e tera lo ta habitá ku hende ku ta stima i kuida otro. E amoroso hermandat internashonal di Testigunan di Yehova ta un prueba ku e mundu nobo ei ta posibel, pasobra Hesus a bisa: “Na esaki tur hende lo sa ku boso ta mi disipel, si boso tin amor un pa otro.”—Juan 13:35.

[Kuadro/Plachinan na página 6, 7]

KON DIOS TA MIRA HENDE POBER?

Beibel ta deskribí e Kreadó di humanidat komo Esun ku “ta duna pan na esnan ku tin hamber.” (Salmo 146:7) Beibel ta kontené mas ku shen versíkulo ku ta enfatisá Dios su interes den hende pober.

Por ehèmpel, ora Yehova a duna su Lei na e nashon di Israel di antigwedat, el a prohibí e kunukeronan israelita di kosechá e rantnan di nan kunuku kompletamente. Nan no tabatin mag di bai pa di dos biaha na un palu di oleifi òf di wendrùif pa rekohé fruta ku a keda atras. E leinan aki tabata un areglo amoroso pa stranhero, huérfano, biuda i otro hende afligí.—Levítiko 19:9, 10; Deuteronomio 24:19-21.

Ademas, Dios a duna e siguiente mandamentu na e israelitanan: “No afligí ningun biuda ni huérfano. Si di un òf otro manera bo afligié, i e sklama na mi, lo mi tende su sklamashon sigur; i mi rabia lo sende, i lo mi mata boso ku spada; i boso esposanan lo bira biuda i boso yunan lo keda sin tata.” (Eksodo 22:22-24) Lamentablemente, hopi israelita riku a ignorá e palabranan aki. Mediante su profetanan, Yehova Dios a duna e israelitanan vários spièrtamentu kontra esaki i otro maldatnan. (Isaias 10:1, 2; Jeremias 5:28; Amos 4:1-3) Ku tempu Dios a pone ku e asirionan i despues e babilonionan a konkistá e teritorio di Israel. Nan a mata hopi israelita i hiba e sobrebibientenan komo katibu den paisnan stranhero.

Dios su Yu stimá, Hesukristu, a reflehá e interes amoroso ku su Tata tin den hende pober. Splikando e propósito di su ministerio, Hesus a bisa: “E spiritu di SEÑOR ta riba mi, pasobra el a ungi mi pa prediká evangelio na e pobernan.” (Lukas 4:18) Esaki no ta nifiká ku ta hende pober so Hesus a yuda den su ministerio. Ku amor el a yuda hende riku tambe. Pero ora e tabata yuda nan, hopi bes el a ekspresá su interes pa hende pober. Por ehèmpel, el a duna un gobernante riku e konseho aki: “Bende tur bo propiedatnan, i partié pa hende pober, i lo bo tin tesoro den shelu; i bin, sigui mi.”—Lukas 14:1, 12-14; 18:18, 22; 19:1-10.

Yehova Dios i su Yu ta masha interesá den hende pober. (Marko 12:41-44; Santiago 2:1-6) Mustrando ku e ta interesá den hende pober, Yehova ta tene na mente miónes di hende pober ku a muri. Tur e hendenan ei lo haña resurekshon den un mundu nobo sin pobresa.—Echonan 24:15.

[Plachinan]

E hermandat internashonal di Testigunan di Yehova ta un prueba ku e mundu nobo ta posibel

[Plachi na página 5]

Tukiso ku Maseiso huntu ku e misionero ku a studia Beibel ku Tukiso

[Plachi na página 5]

Maseiso pará na porta di su kas, huntu ku e misionero ku a studia Beibel kuné