Bo Ta Kòmbersá ku Bo Sernan Kerí?

“NOS abilidat di komuniká ku nos sernan kerí ta bayendo atras drástikamente,” segun e revista semanal polako, Polityka. Segun kálkulo, na Merka parehanan kasá ta kòmbersá solamente seis minüt pa dia ku otro riba kos konstruktivo. Algun eksperto ta pensa ku mitar di tur e kasonan di separashon i divorsio ta resultado di e deterioro aki.

Kiko di kòmbersashon entre mayornan i yunan? Segun e informe menshoná ariba, den mayoria kaso “e ta parse mas un interogashon ku e ta un kòmbersashon: Kon a bai na skol? Kon ta ku bo amigunan?” E informe ta puntra: “Kon nos yunan lo siña forma lasonan den kua tin interkambio di emoshon?”

Ya ku bon abilidat di komuniká no ta bini di mes, kon nos por mehorá nos abilidat di kòmbersá? E disipel kristian Santiago a duna nos un konseho importante: “Tur hende mester ta lihé pa tende, no lihé pa papia i no lihé pa rabia.” (Santiago 1:19) Sí, pa nos por tin un kòmbersashon edifikante, nos tin ku skucha ku atenshon i no sea impasiente dor di interumpí un otro persona òf bula saka konklushon. Evitá di kritiká, pasobra esaki por para un kòmbersashon fásilmente. Ademas, Hesus a usa pregunta ku takto, no pa interogá hende, sino mas bien pa saka afó loke tabatin den kurason di su oyentenan i pa fortalesé e relashon entre nan.—Proverbionan 20:5; Mateo 16:13-17; 17:24-27.

Apliká e ekselente prinsipionan ku Beibel ta kontené i tuma inisiativa pa kòmbersá i komuniká ku bo sernan kerí. Esaki por resultá den un relashon kaluroso ku boso lo disfrutá di dje pa hopi aña òf asta pa semper.