Disfrutando Plenamente di “e Bida Presente”!
Historia di Bida
Disfrutando Plenamente di “e Bida Presente”!
SEGUN E RELATO DI TED BUCKINGHAM
Mi tabatin seis aña ta traha tempu kompletu komo un predikadó di e bon nobo i seis luna kasá ora ku diripiente mi a haña polio. Tabata aña 1950, i mi tabatin apénas 24 aña. Nuebe luna den hospital a duna mi basta tempu pa reflekshoná riba mi bida. Ku e desabilidatnan nobo ku mi a haña, ta kiko lo tin den futuro pa mi ku mi kasá, Joyce?
NA AÑA 1938 mi tata, kende no tabata un persona religioso, a optené un ehemplar di e buki Gobièrnu. * Probablemente ta e konfushon i agitashon polítiko i prospekto di guera a motiv’é pa aseptá e buki. Te asina leu ku mi sa, nunka e no a les’é pero mi mama ku tabata hopi religioso sí a les’é. El a reakshoná mesora riba e mensahe di e buki. El a bandoná Iglesia Anglikano, i apesar di oposishon di mi tata, el a bira un fiel Testigu di Yehova i a keda fiel te na su morto na aña 1990.
Mama a hiba mi na mi promé reunion kristian na un Salòn di Reino den e stat Epsom, zùit di Lònden. E kongregashon a reuní den un eks-tienda, i nos a skucha un diskurso grabá di J. F. Rutherford, kende tabata supervisá e trabou di Testigunan di Yehova e tempu ei. E diskurso aki a hasi un impreshon profundo riba mi.
E bombardeo pisá ku tabata tuma lugá durante e atakenan aéreo kontra Lònden tabata bira mas i mas peligroso. P’esei na 1940 mi tata a disidí di muda nos famia na un lugá mas safe, Maidenhead, un pueblo chikí un 45 kilometer wèst di Lònden. Esaki a resultá probechoso, ya ku e 30 miembronan di e kongregashon einan tabata un ekselente fuente di animashon.
Fred Smith, un fiel kristian ku a batisá na 1917, a demostrá interes personal den mi i a entrená mi pa bira un predikadó mas efektivo. Te awe mi ta masha gradisidu na dje pa su ehèmpel i yudansa amoroso.Den Sirbishi di Tempu Kompletu
Na 1941, na edat di 15 aña, mi a batisá den riu Thames riba un dia friu den mart. Pa e tempu ei ya mi ruman hòmber mas grandi ku mi, Jim, a inskribí komo predikadó di tempu kompletu. Awe, e ku su kasá, Madge, ta biba na Birmingham, despues ku nan a pasa mayor parti di nan bida den Yehova su sirbishi kumpliendo ku asignashonnan di sirkuito i di distrito rònt Gran Bretaña. Mi ruman muhé chikí, Robina, i su kasá, Frank, tambe a keda sirbidónan fiel di Yehova.
Mi tabata tene buki na un fábrika di paña. Un dia e direktor a yama mi na su ofisina pa ofresé mi e oportunidat di un karera prometedor komo kumpradó pa e empresa. Sin embargo, ya pa algun tempu mi tabatin pensá di sigui mi ruman hòmber su ehèmpel, p’esei kortesmente mi a nenga e oferta di mi dunadó di trabou i a splik’é dikon. Pa mi sorpresa, el a elogiá mi kalurosamente pasobra mi kier a sigui tal aktividat kristian balioso. Pues, despues di un kongreso di distrito na Northampton na 1944, mi a bira un predikadó di tempu kompletu.
Mi promé asignashon tabata Exeter, den e kondado di Devon. E tempu ei e stat aki tabata rekuperando pokopoko di e bombardeonan ku a tuma lugá durante guera. Mi a bai biba den un apartamento kaminda tabatin dos pionero ta biba kaba, Frank ku Ruth Middleton, kendenan tabata masha bondadoso ku mi. Mi tabatin apénas 18 aña, ku masha tiki eksperensia den labamentu di paña i kushinamentu, pero e situashon a drecha segun ku mi a desaroyá mi abilidatnan.
Mi kompañero di predikashon tabata Victor Gurd di 50 aña di edat, un ruman irlandes ku tabata prediká for di dékada di 1920. El a siña mi programá mi tempu na un manera probechoso, tambe pa desaroyá un interes mas profundo den lesamentu di Beibel i pa apresiá e balor di diferente tradukshon di Beibel. Durante e añanan di formashon ei, Victor su ehèmpel firme tabata nèt loke mi tabatin mester.
E Reto di Neutralidat
E guera tabata yegando na un fin, pero tòg outoridatnan a sigui purba reklutá mucha hòmber pa servisio militar. Mi a presentá dilanti tribunal na 1943 na Maidenhead, kaminda mi a splika mi kaso bon kla pa mi haña dispensashon komo un minister di e Evangelio. Ounke nan a rechasá mi apelashon, mi a disidí di muda pa Exeter pa kumpli ku mi asignashon di prediká. Ta p’esei ta na Exeter mi a haña dagfar pa presentá dilanti e korte lokal. Ora ku e magistrado a sentensiá mi na seis luna di trabou pisá den prizon, el a bisa mi ku ta duel e ku e no por a duna mi un sentensia mas largu. Despues di a sirbi e seis lunanan ei, nan a manda mi bèk prizon pa un kuater luna mas.
Komo ku mi tabata e úniko Testigu den prizon, e wardadónan di prezu a yama mi Yehova. Tabata un poko inkómodo pa mi pa reakshoná riba e nòmber ei ora ku nan tabata kontrolá lista di presensia, pero mi mester a hasié. Ma di otro banda tabata un privilegio pa tende e nòmber di Dios wòrdu anunsiá tur dia! Esei a laga e otro prezunan sa ku ta mi posishon neutral basá riba mi konsenshi komo un Testigu di Yehova a pone ku mi tabata entre nan. Mas despues, nan a manda Norman Castro na e mesun prizon, i tabatin un kambio di nòmber. E ora ei nos a bira Moisés ku Aaron.
Nan a trasladá mi di Exeter pa Bristol i por último pa e prizon di Winchester. E
kondishonnan no tabata semper agradabel, pero un kos ku a yuda ta un sentido di humor. Ami ku Norman a keda kontentu ku nos por a konmemorá e Memorial huntu na Winchester. Francis Cooke, kende a bishitá nos den prizon, a duna nos un bunita diskurso di Memorial.Kambionan den e Añanan Despues di Guera
Na e kongreso na Bristol na 1946, a sali e buki nobo pa studia Beibel “Laga Dios Sea Hañá Berdadero.” Einan mi a topa tambe un bunita mosa, Joyce Moore, kende tambe tabata traha pionero na Devon. Nos amistat a floresé, i nos a kasa kuater aña despues na Tiverton, kaminda mi tabata biba for di 1947. Nos a forma nos hogar den un kuarto ku nos a hür pa 15 shilling (dos florin) pa siman. Nos tabatin un bida dushi!
Durante e promé aña di nos matrimonio, nos a muda bai zùit na Brixham, un pueblo portuario masha plasentero kaminda nan a desaroyá pa promé bes e sistema di piska ku ta lastra un reda tras di un boto. Sin embargo, nos no tabatin muchu tempu einan ora ku mi a haña polio na kaminda pa bai un kongreso na Lònden. Mi a kai den koma. Ku tempu mi a sali for di hospital, despues di nuebe luna, manera mi a menshoná anteriormente. Mi man drechi i ámbos pia a keda malamente afektá, i te ainda ta asina, i mi mester a usa un garoti pa kana. Mi kasá stimá tabata mi kompañera alegre i semper presente, i un fuente di animashon, spesialmente dor ku el a logra sigui ku su sirbishi di tempu kompletu. Pero kiko nos lo a bai hasi awor? No a tarda hopi ku mi a haña sa ku Yehova su man nunka no ta kòrtiku.
E siguiente aña nos a asistí na un asamblea na Wimbledon, Lònden. Ya pa e tempu ei mi por a kana sin mi garoti. Einan nos a topa Pryce Hughes, kende tabata supervisá e trabou na Gran Bretaña. Mesora el a kumindá mi ku e palabranan: “Hé! Nos ke boso den e trabou di sirkuito!” Mi no por a haña un animashon mas grandi! Pero mi salú lo tabata sufisiente bon? Ami ku Joyce tur dos tabata puntra nos mes esei, pero despues di un siman di entrenamentu i pleno konfiansa den Yehova, nos tabata riba kaminda bèk pa e parti zùitwèst di Inglatera, kaminda mi a haña e asignashon pa sirbi komo superintendente di sirkuito. Pa e tempu ei mi tabatin apénas 25 aña, pero ainda mi ta kòrda ku gran apresio e bondat i pasenshi di e Testigunan ei ku a yuda mi asina bon.
Di tur e diferente kamponan di aktividat teokrátiko, ami ku Joyce a ripará ku bishitá e kongregashonnan ta loke a trese nos mas serka di nos rumannan kristian. Nos no tabatin outo, pues nos a biaha sea ku trein òf konvoi. Ounke ainda mi tabata siña adaptá na e limitashonnan ku mi malesa a trese kuné, nos a disfrutá di nos privilegionan te ku 1957. Tabata un bida yen di satisfakshon, pero e aña ei un otro reto a presentá.
Rumbo pa Sirbishi di Misionero
Nos a risibí un invitashon pa asistí na e di 30 klas di Galaad, i esei tabata masha emoshonante pa nos. Mi a siña trata bon ku mi parálisis, di manera ku ami ku Joyce gustosamente a aseptá e yamada. Di eksperensia nos tabata sa ku Yehova semper ta perkurá e fortalesa si nos ta trata di hasi su boluntat. E sinku lunanan di entrenamentu intensivo na e Skol Bíbliko di Galaad di Watchtower, situá den e bunita área di South Lansing (New York, Merka), a pasa masha lihé. E studiantenan tabata prinsipalmente parehanan kasá den e trabou biahero. Ora ku a puntra e klas ken lo kier a ofresé nan mes pa traha komo misionero den estranheria, nos tabata entre esnan ku tabata kla pa ofresé nos mes. Unda nos lo a bai? Uganda, Ost Afrika!
Siendo ku e trabou di Testigunan di Yehova tabata prohibí na Uganda e tempu ei, e rumannan a konsehá mi pa establesé mi mes den e pais i buska un empleo. Despues di un biahe largu ku trein i ku boto, nos a yega na Kampala, Uganda. E funshonarionan di imigrashon no tabata kontentu di mira nos i nan a permití nos keda un par di luna so. Anto despues nan a ordená nos sali for di e pais. Riba instrukshon di e sede mundial, nos a biaha bai Nort Rodesia (awor Zambia). Tabata un gran goso di por a topa kuater di nos kompañeronan di Skol di Galaad, Frank ku Carrie Lewis i Hayes ku Harriet Hoskins. Djeinan, nos a ser reasigná poko despues pa Sur Rodesia (awor Zimbabwe).
Nos a bai ku trein i nos a haña un bista inisial di e magnífiko waterval Victoria Falls promé ku nos a yega na Bulawayo. Nos a keda pa un tempu serka famia McLuckie, kendenan tabata entre e promé Testigunan ku a establesé nan mes einan. Durante e siguiente 16 añanan nos tabatin e privilegio di siña konosé nan bon.
Adaptando na Kambio
Despues di dos siman di entrenamentu pa sera konosí ku e kampo afrikano, mi a ser nombrá pa sirbi komo superintendente di distrito. Prediká den e mondinan di Afrika a nifiká bai ku awa, kuminda, paña di kama, paña di bisti, un mashin di pasa pelíkula i generator, un pantaya grandi i otro nesesidatnan. Tur esaki nos a
paketá den un trùk sufisiente sólido pa transportá nos riba kaminda malu.Mi a traha ku e superintendentenan di sirkuito afrikano miéntras ku Joyce felis di dje a yuda nan kasá i yunan ku tambe tabata kompañá nan. Kana den sabana afrikano por laga bo keda kansá, foral durante e parti kayente di dia. Pero no a tarda hopi ku mi a ripará ku den e klima aki, mi limitashonnan físiko tabata mas fásil pa trata kuné, i mi tabata gradisidu pa esei.
E hendenan por lo general tabata pober. Hopi di nan tabata mashá metí den tradishon i superstishon i a praktiká poligamia; sin embargo nan a demostrá un rèspèt profundo pa Beibel. Den algun área, e rumannan tabata tene reunionnan di kongregashon bou di palunan grandi ku a duna bon sombra, i parti anochi nos tabata haña lus di lampinan di zeta kologá den palu. Semper nos a sinti un rèspèt i atmirashon profundo ora ku nos tabata studia e Palabra di Dios direktamente bou di e shelu yen di strea, un parti asina magnífiko di Dios su kreashon.
Un otro eksperensia inolvidabel tabata ora nos a pasa pelíkulanan di Sosiedat Watch Tower riba e reservaatnan di Afrika. Un kongregashon kisas tabatin 30 Testigu, pero na e okashonnan ei, nos tabata sa ku nos por a ferwagt un asistensia di 1.000 hende òf mas.
Den paisnan tropikal, kebranto di salú por ta un problema de bes en kuando, pero na momentunan asina ta esensial pa keda optimista. Ami ku Joyce a siña dil hopi bon ku esei; ami a trata ku mi atakenan sporádiko di malaria i Joyce ku enfermedat kousá dor di amuba (parasit).
Despues nos a ser asigná na e ofisina di sukursal na Salisbury (awor Harare), kaminda mi tabatin e privilegio di traha huntu ku otro fiel sirbidónan di Yehova, entre nan Lester Davey i George ku Ruby Bradley. Gobièrnu a nombra mi komo funshonario matrimonial, lokual a hasi posibel ku mi por a kasa rumannan afrikano, i asina fortalesé e laso di matrimonio kristian den e kongregashonnan. Un par di aña despues, mi a risibí un otro privilegio. Mi mester a bishitá tur kongregashon den e pais ku no ta di abla bantu. Pa mas ku un dékada, ami ku Joyce a disfrutá di siña konosé nos rumannan den e manera aki, i nos tabata alegrá ku nan progreso spiritual. Durante e tempu ei nos a bishitá tambe nos rumannan na Bòtswana i Mozambique.
Nos Ta Muda Atrobe
Despues di hopi aña felis den parti zùit di Afrika, nos a ser reasigná na 1975 na Sierra Leone, Wèst Afrika. Nos a establesé nos mes umbes na e ofisina di sukursal pa disfrutá di nos kampo nobo di aktividat, pero esaki no a dura hopi. Mi a bira malu i suak debí na un atake severo di malaria, i ku tempu mi mester a risibí tratamentu na Lònden, kaminda mi a ser konsehá pa no bolbe bèk na Afrika. Esaki a hasi nos tristu, pero e famia di Bètel di Lònden a risibí nos kalurosamente. E kantidat grandi di rumannan afrikano ku tabatin den hopi di e kongregashonnan di Lònden tambe a laga nos sinti nos na kas. Segun ku mi salú a mehorá, nos a adaptá na un otro rutina, i e rumannan a pidi mi pa tuma e Departamentu di Kompra na mi enkargo. Ku tur e ekspanshon ku nos a mira den e añanan ku a sigui, esaki a resultá un trabou hopi interesante.
Na prinsipio di dékada di 1990, mi kerido Joyce a haña un malesa na e nervionan di múskulo, i el a muri na 1994. El a demostrá di tabata un esposa amoroso, leal i fiel, semper dispuesto pa adaptá na e vários sirkunstansianan ku nos a konfrontá huntu. Pa mi por a trata ku un pèrdida manera e morto di Joyce, mi a deskubrí ku ta importante pa mantené un punto di bista spiritual kla i sigui wak padilanti. Un otro yudansa pa tene mi mente bon okupá ta di hasi orashon na Yehova pa yuda mi sigui pega na un bon programa teokrátiko, inkluso e trabou di prediká.—Proverbionan 3:5, 6.
Sirbi na Bètel ta un privilegio i un ekselente manera di biba. Tin asina tantu hóben pa traha kuné i hopi goso pa kompartí. Un bendishon ta e kantidat di bishitante ku nos ta haña aki na Lònden. Tin biaha mi ta topa amigunan stimá di mi asignashon na Afrika, i esei ta trese grato rekuerdo. Tur esaki ta yuda mi sigui gosa plenamente di “e bida presente” i kontemplá ku konfiansa i speransa e bida “ku ta bin.”—1 Timoteo 4:8.
[Nota]
^ par. 5 Publiká na 1928 dor di Testigunan di Yehova, pero no ta ser imprimí mas.
[Plachi na página 25]
Huntu ku mi mama na 1946
[Plachi na página 26]
Huntu ku Joyce dia nos a kasa, na 1950
[Plachi na página 26]
Na un kongreso na Bristol na 1953
[Plachinan na página 27]
Bishitando un grupo isolá (ariba) i un kongregashon (banda robes) na Sur Rodesia, awor Zimbabwe