No Kansa di Hasi Loke Ta Ekselente

“LAGA boso kondukta ta ekselente meimei di e paganonan,” apòstel Pedro a konsehá. (1 Pedro 2:12) E palabra griego tradusí komo “ekselente” ta referí na algu ‘bunita, noble i onorabel.’ Awendia ta parse ku ta masha irealístiko pa spera un kondukta noble òf onorabel di hende en general. Sin embargo, e pueblo di Yehova awe por lo general a logra sigui Pedro su konseho. De echo, nan ta konosí rònt mundu pa nan kondukta ekselente.

Esaki ta hopi remarkabel foral ora nos tuma na kuenta e problema- i tenshonnan ku nos ta konfrontá durante e “tempunan trabahoso” aki. (2 Timoteo 3:1) Diariamente nos ta haña nos ku prueba, i oposishon kontra e estilo di bida kristian ta komun. Ademas, ounke algun prueba ta di korto durashon, otronan ta persistí pa hopi tempu i asta ta bira mas intenso. Sin embargo, apòstel Pablo a spièrta: “No laga nos kansa di hasi bon [“loke ta ekselente,” NW], pasobra na debido tempu nos lo kosechá, si nos no desmayá.” (Galationan 6:9) Pero kon ta posibel pa hasi—i sigui hasi—loke ta ekselente miéntras ku nos ta konfrontá pruebanan doloroso i hostilidat insistente?

Yudansa pa Hasi Loke Ta Ekselente

Ser ‘noble, onorabel i ekselente’ klaramente tin di haber ku e persona di paden, e ta un kualidat di nos kurason. Pues anto, mantené un kondukta ekselente apesar di prueba i difikultat, no ta un reakshon impulsivo, sino e resultado di sigui prinsipionan di Beibel i praktiká nan diariamente den tur aspekto di bida. Kiko ta algun kos ku por yuda nos den esaki? Konsiderá lo siguiente.

Kultivá e aktitut mental di Kristu. Pa bo soportá loke por parse inhustu bo mester ta humilde. Un persona ku ta pensa ku e ta masha kos, probablemente lo no tolerá maltrato. Sin embargo, Hesus “a humiá su mes dor di bira obedesidu te na morto.” (Filipensenan 2:5, 8) Dor di imit’é, nos lo no ‘kansa ni pèrdè ánimo’ den nos sirbishi sagrado. (Hebreonan 12:2, 3) Mustra obedensia humilde dor di koperá boluntariamente ku e rumannan ku ta hiba delantera den bo kongregashon. (Hebreonan 13:17) Siña konsiderá otro hende komo “mas importante” ku bo, poniendo nan interesnan promé ku esnan di bo.—Filipensenan 2:3, 4.

Kòrda ku Yehova stima bo. Nos mester ta konvensí ku Yehova “ta esun ku ta rekompensá esnan ku ta busk’é” ku empeño. (Hebreonan 11:6) E ta realmente interesá den nos i ke pa nos haña bida eterno. (1 Timoteo 2:4; 1 Pedro 5:7) Si nos keda kòrda ku nada no por kaba ku Dios su amor pa nos, esaki lo yuda nos pa no kansa di hasi loke ta ekselente ora nos haña nos ku prueba.—Romanonan 8:38, 39 .

Pone pleno konfiansa den Yehova. Ta masha importante pa konfia den Yehova, foral ora parse ku no tin un fin na nos pruebanan òf ora nan ta pone nos bida na peliger. Nos mester tin pleno konfiansa ku Yehova lo no permití nos pasa den ningun prueba ‘ku nos  no por soportá,’ i ku semper lo e “proveé salida.” (1 Korintionan 10:13) Ora nos ta konfia den Yehova nos por enfrentá asta menasa di morto ku kurashi.—2 Korintionan 1:8, 9.

Perseverá den orashon. Orashon di kurason ta hopi importante. (Romanonan 12:12) Orashon sinsero ta un di e maneranan ku nos ta hala serka Yehova. (Santiago 4:8) Mediante eksperensia personal, nos ta siña ku “si nos pidi kualke kos . . . , e ta tende nos.” (1 Juan 5:14) Si Yehova ta permití nos prueba sigui komo un tèst di nos integridat, nos ta resa pidié yudansa pa nos wanta. (Lukas 22:41-43) Orashon ta siña nos ku nunka nos no ta nos so, i ku Yehova na nos banda, semper nos ta sali vensedó.—Romanonan 8:31, 37.

Obranan Ekselente Ta ‘Resultá den Alabansa i Onor’

De bes en kuando, tur kristian ta “wòrdu afligí pa medio di vários prueba.” Sin embargo, nos no mester “kansa di hasi bon.” Ora bo haña bo ku prueba, laga e echo ku bo sa ku bo fieldat finalmente lo “resultá den alabansa i gloria i onor,” duna bo e fortalesa pa wanta. (1 Pedro 1:6, 7) Saka pleno probecho di tur e provishonnan spiritual ku Yehova ta perkurá pa fortifiká bo. Ora bo tin mester di atenshon personal, bai serka e rumannan ku ta sirbi komo wardadó, maestro i konsehero den e kongregashon kristian. (Echonan 20:28) Asistí regularmente na tur e reunionnan di kongregashon ku ta ‘stimulá nos pa stima i hasi bon obra.’ (Hebreonan 10:24) Un programa di lesa Beibel tur dia i di estudio personal lo yuda bo keda alerta i spiritualmente fuerte. Loke lo yuda bo tambe ta partisipashon regular den e ministerio kristian.—Salmo 1:1-3; Mateo 24:14.

Mas bo sinti e amor i kuido di Yehova, mas lo bo deseá pa demostrá “selo den hasimentu di bon obra.” (Tito 2:14) Kòrda, “esun ku perseverá te na fin, esei lo ta salbá.” (Mateo 24:13) Sí, sea determiná pa no ‘kansa di hasi loke ta ekselente’!

[Komentario na página 29]

Nos mester tin pleno konfiansa ku Yehova lo no permití nos pasa den ningun prueba ‘ku nos no por soportá,’ i ku semper lo e “proveé salida”

[Plachinan na página 30]

Kedando okupá den aktividatnan teokrátiko por yuda nos prepará pa enfrentá prueba