Salbá, No pa Medio di Obra So, Sino pa Medio di Bondat Inmeresí

“Boso a wòrdu salbá dor di fe . . . no komo resultado di obranan, pa ni un hende no gaba.”—EFESIONAN 2:8, 9.

1. Den ki sentido kristiannan ta distinto for di hende en general pa loke ta logronan personal, i dikon?

AWENDIA hende ta masha orguyoso di nan logronan personal, i hopi bes nan ta kla pa broma tokante nan. Kristiannan ta distinto. Nan ta evitá di duna demasiado énfasis na nan propio logronan, asta ora ta trata di logronan ku tin keber ku adorashon berdadero. Ounke nan ta alegrá ku loke Yehova su pueblo ta logra komo grupo, nan ta mantené nan kontribushon individual den background. Nan ta realisá ku den Yehova su sirbishi, motivashon korekto ta mas importante ku logronan personal. Ken ku al final haña e regalo di bida eterno lo a opten’é pa medio di fe i pa medio di Dios su bondat inmeresí, no debí na logronan personal.—Lukas 17:10; Juan 3:16.

2, 3. Di kiko Pablo a gaba, i dikon?

² Apòstel Pablo tabata bon konsiente di e echo aki. Despues ku el a hasi orashon tres biaha pa pidi alivio for di “un sumpiña den karni,” el a haña Yehova su kontesta: “Mi grasia [òf, “bondat inmeresí,” NW] ta basta pa bo, pasobra mi poder ta wòrdu hasí perfekto den debilidat.” Humildemente Pablo a aseptá Yehova su desishon, bisando: “P’esei, gustosamente lo mi preferá di gaba den mi debilidatnan, pa e poder di Kristu por biba den  mi.” Pablo su aktitut humilde ta un aktitut ku nos lo ke imitá.—2 Korintionan 12:7-9.

³ Maske Pablo a sobresalí den hasimentu di obranan kristian, el a rekonosé ku su logronan no tabata debí na ningun abilidat partikular di dje mes. Ku modestia el a bisa: “Na ami, esun di mas ménos entre tur e santunan, e grasia [òf, “bondat inmeresí,” NW] aki a wòrdu duná, pa prediká na e paganonan e rikesa insondeabel di Kristu.” (Efesionan 3:8) Pablo su palabranan ta mustra ku e no tabatin un aktitut di broma ni tampoko e arogansia di pensa ku e ta mas santu ku otro hende. “Dios ta resistí e orguyosonan, ma ta duna grasia na e humildenan.” (Santiago 4:6; 1 Pedro 5:5) Nos ta sigui e ehèmpel di Pablo, i humildemente ta konsiderá nos mes esun di mas ménos entre nos rumannan?

“Konsiderá e Otro Mas Importante”

4. Dikon tin biaha por ta difísil pa nos konsiderá otro hende komo mas importante ku nos?

⁴ Apòstel Pablo a konsehá kristiannan: “No hasi nada ku un aktitut di egoismo òf orguyo, ma ku humildat laga kada un di boso konsiderá e otro mas importante ku e mes.” (Filipensenan 2:3) Esaki lo por ta difísil, spesialmente si nos ta den un puesto di responsabilidat. Podisé e difikultat ta surgi pasobra nos a ser influensiá te na sierto grado dor di e spiritu di kompetensia ku awe ta reina den mundu. Por ta ku na mucha nan a siña nos kompetí, sea ku nos rumannan na kas òf ku nos kompañeronan di klas na skol. Podisé hende konstantemente tabata urgi nos pa hasi esfuerso pa alkansá e onor di ta e mihó atleta òf e mihó alumno di skol. Klaru ku ora nos ta hasi nos bèst den kualke aktividat korekto esei ta algu digno di elogio. Sin embargo, kristiannan ta hasi nan bèst no pa hala indebido atenshon na nan mes, sino pa saka pleno benefisio di e aktividat i kisas pa benefisiá otro hende tambe. Pero lo por ta peligroso si semper nos ta buska manera pa hende elogiá nos komo esun mihó. Kon asina?

5. Si no dominá e spiritu di kompetensia, na kiko e por hiba?

⁵ Si un persona no dominá e spiritu di kompetensia òf di egoismo, esei por pon’é bira arogante i sin rèspèt. Lo e por kuminsá envidiá otro hende pa motibu di nan abilidat- i privilegionan. Proverbionan 28:22 ta bisa: “Un hende pichiri [“envidioso,” NW] ta purá pa bira riku, i e no sa ku pobresa lo bin riba dje.” Lo e por asta kuminsá hasi esfuerso arogantemente pa alkansá puestonan ku e no tin derecho riba dje. Pa hustifiká su akshonnan, lo e por kuminsá murmurá i kritiká otro hende, lokual ta nèt e tendensianan ku kristiannan mester evitá. (Santiago 3:14-16) En todo kaso, e ta kore e riesgo di desaroyá un aktitut di ami-promé.

6. Kon Beibel ta spièrta nos kontra e spiritu di kompetensia?

⁶ P’esei Beibel ta urgi kristiannan: “Laga nos no bira egoista, instigando kompetensia un ku otro, envidiando otro.” (Galationan 5:26, NW) Apòstel Juan a papia di un sierto  kompañero kristian ku evidentemente a bira víktima di e tipo di aktitut aki. Juan a bisa: “Mi a skirbi algu na e iglesia; ma Diótrefes, kende ta gusta di ta e promé den nan, no ta aseptá loke nos bisa. Pa e motibu aki, si mi bin, lo mi hala atenshon riba su echonan ku e ta hasi, akusando nos inhustamente ku palabranan malisioso.” Ta ki un situashon lamentabel pa un kristian kai aden!—3 Juan 9, 10.

7. Kiko un kristian lo ke evitá den e ambiente kompetitivo ku tin na trabou awe?

⁷ Klaru ku no ta realístiko pa pensa ku un kristian por evitá tur aktividat kompetitivo. Por ehèmpel, un kristian su empleo kisas ta enserá kompetensia ekonómiko ku otro personanan òf ku negoshinan ku ta produsí produktonan similar òf ku ta ofresé servisionan similar. Sin embargo, asta den kasonan asina un kristian lo kier hasi negoshi ku un spiritu di rèspèt, amor i konsiderashon. Lo e rechasá práktikanan ilegal òf no-kristian i lo evitá di bira un persona konosí prinsipalmente pa su aktitut kompetitivo, dispuesto pa trapa riba otro pa bai dilanti. Lo e no sinti ku ser number un—sea kual sea e aktividat—ta e kos di mas importante den bida. Si esei ta sierto pa loke ta aktividatnan no-religioso, kuantu mas e mester ta asina den asuntunan di adorashon!

‘No na Komparashon ku e Otro Persona’

8, 9. (a) Dikon ansianonan kristian no tin nodi kompetí ku otro? (b) Dikon 1 Pedro 4:10 ta apliká na tur sirbidó di Dios?

⁸ E siguiente palabranan inspirá ta deskribí e aktitut ku kristiannan mester tin den nan adorashon: “Laga kada un saminá su mes obra, i e ora ei e lo tin motibu pa gaba solamente enkuanto su mes, i no enkuanto [òf, “na komparashon ku,” NW] un otro.” (Galationan 6:4) Ansianonan den e kongregashon, konsiente di e echo ku nan no ta den kompetensia ku otro, ta koperá i traha estrechamente huntu komo un kuerpo. Nan ta kontentu ku e kontribushon ku kada un por hasi na bienestar general di e kongregashon. Pues nan ta evitá kompetensia perhudisial i nan ta pone un bon ehèmpel di union pa e restu di e kongregashon.

⁹ Debí na edat, eksperensia òf abilidatnan natural, tin ansiano ku kisas ta mas efisiente ku otro, òf kisas nan tin mas perspikasia. P’esei mes, ansianonan tin responsabilidatnan distinto den Yehova su organisashon. En bes di hasi komparashon, nan ta tene na mente e konseho: “Usa e don, na proporshon ku kada un a risibié, pa sirbi otro komo mayordomonan ekselente di e bondat inmeresí di Dios ekspresá den vários manera.” (1 Pedro 4:10, NW) Bon mirá, e teksto aki ta apliká na tur sirbidó di Yehova pasobra te na sierto grado nan tur a risibí e don di konosementu eksakto i tur ta disfrutá di e privilegio di partisipá den e ministerio kristian.

10. Kua ta e úniko manera pa nos sirbishi sagrado ta aseptabel pa Yehova?

 ¹⁰ Nos sirbishi sagrado ta agradá Yehova solamente ora nos ta rindi esei motivá pa amor i deboshon, no pasobra nos ke halsa nos mes riba otro hende. Ta p’esei ta masha importante pa nos tin un punto di bista balansá di e aktividat ku nos ta hasi pa apoyá adorashon berdadero. Ounke ningun hende por husga presis kiko ta e motivashon di un otro persona, Yehova “ta wak kurason.” (1 Samuel 16:7; Proverbionan 24:12) Pues, ta bon pa nos puntra nos mes de bes en kuando: ‘Kiko ta motivá mi pa hasi obranan di fe, es desir, pa partisipá den Yehova su sirbishi?’—Salmo 24:3, 4; Mateo 5:8.

E Punto di Bista Korekto di Nos Obranan den Yehova Su Sirbishi

11. Ki preguntanan tokante nos aktividat den sirbishi ta rasonabel pa nos konsiderá?

¹¹ Si ta motivashon ta lo mas importante pa gana Yehova su aprobashon, ta te na ki grado anto nos mester wòri ku nos obranan den su sirbishi? Tanten ku nos ta hasi nos sirbishi ku e motivashon korekto, ta realmente nesesario pa tene registro di kiko nos ta hasi òf kuantu nos ta hasi den sirbishi? E preguntanan aki ta rasonabel, pasobra nos no ke pa sifra bira mas importante ku loke realmente nos ta hasi den Yehova su sirbishi ni nos no ke laga un bon rapòrt bira nos preokupashon prinsipal relashoná ku nos aktividat kristian.

12, 13. (a) Menshoná algun motibu pakiko nos ta tene un registro di nos sirbishi di vèlt. (b) Ki motibunan nos tin pa sinti goso ora nos ta wak e rapòrt mundial di nos aktividat di prediká?

¹² Tuma nota di loke e buki Organisá pa Hasi Yehova Su Boluntat ta bisa: “E promé siguidónan di Hesukristu tabata interesá den informenan di progreso den e trabou di prediká. (Mar. 6:30) E buki bíbliko di Echonan ta konta nos ku tabatin rònt di 120 persona presente ora spiritu santu a drama riba e disipelnan na Pentekòste. Djis despues e kantidat di disipel a krese bira 3.000 i despues 5.000. . . . (Echo. 1:15; 2:5-11, 41, 47; 4:4; 6:7) E informenan di e oumentonan aki lo mester tabata un tremendo animashon pa e disipelnan!” Pa e mesun motibu, Testigunan di Yehova djawe ta purba tene registronan eksakto di loke nan ta logra mundialmente komo kumplimentu di e palabranan di Hesus: “E evangelio aki di e reino lo wòrdu prediká den henter mundu  komo un testimonio na tur nashon, i e ora ei e fin lo yega.” (Mateo 24:14) E informenan ei ta duna un kuadro realístiko di loke ta tuma lugá mundialmente. Nan ta mustra unda tin mester di yudansa i ki tipo di literatura tin mester i tambe kuantu literatura mester pa por yuda e trabou di prediká bai dilanti.

¹³ Pues, dor di raportá nos aktividat di prediká nos por kumpli ku nos tarea di prediká e bon nobo di Reino na un manera mas efektivo. Ademas, nos ta sinti nos enkurashá ora nos ta tende tokante e trabou ku nos rumannan ta hasiendo den otro partinan di mundu, no ta bèrdat? Informe di kresementu i ekspanshon rònt mundu ta duna nos goso, ta motivá nos pa hasi mas tantu i ta sigurá nos ku nos tin Yehova su bendishon. Anto ta ki un gran satisfakshon pa sa ku nos rapòrt personal ta inkluí den e rapòrt mundial ei! Nos rapòrt individual ta tiki na komparashon ku e total mundial, pero Yehova no ta keda sin tuma nota di dje. (Marko 12:42, 43) No lubidá, sin bo rapòrt, e rapòrt mundial lo no tabata kompletu.

14. Fuera di prediká i siña otro hende, kiko nos adorashon di Yehova ta enserá?

¹⁴ Klaru ku gran parti di loke kada Testigu ta hasi pa kumpli ku su responsabilidat komo un sirbidó dediká di Yehova no ta aparesé riba su rapòrt. Por ehèmpel, e rapòrt no ta inkluí estudio personal di Beibel riba un base regular, asistensia i partisipashon na reunionnan kristian, debernan den kongregashon, yudansa na rumannan den fe ora tin nesesidat, sosten finansiero na e obra mundial di Reino, etcetera. Pues, ounke nos rapòrt di sirbishi di vèlt ta importante, pasobra e ta yuda nos mantené nos selo den e predikashon i ta evitá ku nos ta floha, nos tin ku mir’é den su perspektiva korekto. Nos no mester mir’é komo un lisensia òf pasport spiritual, esta, komo si fuera ta esei ta determiná si nos ta kualifiká pa bida eterno.

“Selo den Hasimentu di Bon Obra”

15. Ounke obra so no por salba nos, pakiko nan ta nesesario?

¹⁵ Pues, ta bisto ku maske obranan so no por salba nos, nan ta nesesario. Ta p’esei Beibel ta yama kristiannan “un pueblo pekuliar, ku selo den hasimentu di bon obra” i p’esei nan ta ser animá pa “konsiderá kon pa stimulá otro pa stima i hasi bon obra.” (Tito 2:14; Hebreonan 10:24) Mas al kaso, un otro eskritor bíbliko, Santiago, a bisa simplemente: “Meskos ku e kurpa sin spiritu ta morto, asina tambe fe sin obranan ta morto.”—Santiago 2:26.

16. Kiko ta asta mas importante ku obranan, pero ku kiko nos mester tene kuidou?

¹⁶ Pa importante ku e bon obranan por ta riba nan mes, loke ta motivá nos pa hasi nan ta asta mas importante ainda. P’esei ta sabí pa tempu-tempu nos analisá nos motivashonnan. Sin embargo, komo ku ningun hende no por sa presis kiko ta motivá otronan, nos tin ku tene kuidou ku husgamentu di hende. Beibel ta puntra nos: “Ken bo ta pa husga sirbidó di otro hende?” Anto e kontesta opvio ta: “Pa su mes shon e ta keda para òf e ta kai.” (Romanonan  14:4) Yehova, e Shon di tur hende, i su Hues nombrá, Kristu Hesus, lo no husga nos a base di nos obranan so sino tambe a base di loke ta motivá nos, e oportunidatnan ku nos tin, nos amor i nos deboshon. Ta Yehova i Kristu Hesus so por husga presis si nos a hasi loke kristiannan ta ser konsehá pa hasi, segun e palabranan di apòstel Pablo: “Hasi tur bo esfuerso pa presentá bo mes aprobá dilanti di Dios manera un trahadó ku no tin motibu pa tin bèrgwensa, ku ta parti e palabra di bèrdat na un manera korekto.”—2 Timoteo 2:15; 2 Pedro 1:10; 3:14.

17. Pakiko nos mester tene e palabranan di Santiago 3:17 na mente segun ku nos ta hasi tur nos esfuerso?

¹⁷ Yehova ta rasonabel den loke e ta ferwagt di nos. Segun Santiago 3:17, “e sabiduria di ariba” ta, entre otro kosnan, “rasonabel.” Lo no ta muestra di sabiduria i tambe di berdadero logro pa nos imitá Yehova den esaki? Pues, nos no mester purba pone ekspektativanan irasonabel i inalkansabel pa nos mes ni pa nos rumannan.

18. Kiko nos por antisipá ora nos tin un punto di bista balansá di nos obranan i di Yehova su bondat inmeresí?

¹⁸ Tanten ku nos ta mantené un punto di bista balansá di nos obranan di fe i di Yehova su bondat inmeresí, nos lo keda ku e goso ku ta un karakterístika ku ta distinguí berdadero sirbidónan di Yehova. (Isaias 65:13, 14) Nos por alegrá ku e bendishonnan ku Yehova ta drama riba su pueblo komo grupo, sin importá kuantu kisas nos personalmente por hasi. Nos lo sigui hasi “orashon i súplika ku gradisimentu” na Dios pa pidié yuda nos hasi tur nos esfuerso. E ora ei, sin duda, “e pas di Dios, ku ta surpasá tur komprondementu, lo warda [nos] kurason i [nos] mente den Kristu Hesus.” (Filipensenan 4:4-7) Sí, nos por haña konsuelo i animashon dor di kòrda ku nos por ser salbá, no pa medio di obra so, sino pa medio di Yehova su bondat inmeresí!

Bo Por Splika Dikon Kristiannan

• no ta broma tokante logronan personal?

• ta evitá di mustra un spiritu di kompetensia?

• ta raportá nan aktividat kristian den sirbishi di vèlt?

• ta evitá di husga nan kompañeronan kristian?

[Preguntanan di Estudio]

[Plachi na página 15]

‘Mi bondat inmeresí ta basta pa bo’

[Plachinan na página 16, 17]

Ansianonan ta kontentu ku e kontribushon ku kada un por hasi na bienestar di e kongregashon

[Plachinan na página 18, 19]

Sin bo rapòrt, e rapòrt mundial lo no ta kompletu